خااااااااااااااص لبنات مصر فقط

سلام عليكم
قبل أي حاجه...احنا كلنا بنحب مصر..وكلنا نفسنا نشوفها احسن...صح؟

انا فكرت ان بدال مانقعد نتجادل ونتقانش المظاهرات تستمر ولا تقف...المعتصمين على حق ولا على باطل...وكل فريق يرمي التاني بالتهم
الي مع المظاهرات يقول ان التانيين متخاذلين
والفريق الي عايز الحياة تمشي وكفايه الي خدناه يقول ان التانيين مخربين
وكل ده مش ف مصلحتنا وبيضعف من ثورتنا...ايوه ثورتنا...ثورة الشباب ...الي هما احنا..والي عشاننا احنا عشان نعيش افضل وولادنا يطلعوا ف بيئة افضل ويتربوا ويتعلموا ويكبروا ف بلدهم مش كل واحد يبقى بيدور على بلد يهج ليها ولا يهاجر ولا يسافر

فكرت اننا نخلينا ديموقراطيين..الي عايز حاجه يعملها...بمعنى؟؟
بمعنى ان المؤيدين لاستمرار المظاهرات يستمروا ف المظاهرات..خصوصا ان الحياة رجعت طبيعية والاعمال مستمرة وكل حاجه
ودول لهم مننا كل احترام وتقدير لان تمسكهم بموقفهم بيمثل ورقة ضغط لحد ماكل مطالبنا تتنفذ

والمعارضين وبيقولوا الحياة تمشي...ماشي هما كمان بيفكروا ف مصلحة مصر...يبقوا يمشوا الحياة...يروحوا شغلهم وكليتهم واعمالهم وتستمر الحياة لان طبعا وقوفها هيأثر علينا كلنا واكيد كان هيأثر على المعتصمين ويخليهم يرجعوا

وبكدا كل طرف قدم خدمة للتاني..الطرف الاولاني متمسك بالقضية عشان مايفرطش فيها وتنهار الثورة ف نصها ونبقى ماحصلناش حاجه....
والطرف التاني بيسد ذريعة الحكومة الي بتقول ان دول مخربين ووقفوا حال البلد..

بس بشرط
كل طرف يبقى عارف ان الطرف التاني وطني زيه وبيحب بلده زيه وان الخلاف في وجهات النظر لا يفسد للود قضية
واننا مانسمحش لأي حد يغتال ثورتنا او يشوه صورة اعظم جيل انجبته مصر...لازم نقدم لكل طرف الاحترام والتقدير لان المستفيد الوحيد من اختلافنا هو الحكومة...او النظام

كلنا نفسنا بلدنا تبقى احسن كلنا نفسنا ان المطالب تتحقق...في ناس شايفه انها مش هتتحقق الا بالاعتصام فاعتصموا...ربنا معاهم
وفي ناس شايفه انها هتتحقق ونرجع شغلنا...ارجعوا وبرده ربنا معاكم

المهم ف االاخر ان الهدف واحد...مصر...
احنا عايزين لما مصر ترجع لنا تبقى اقوى واجمل واعظم بلد ف الدنيا
وده مش هيحصل واحنا بنتناحر على النت وفي التليفزيون وفي التليفون وحتى ف البيوت
لازم نبقى ايد واحدة...لحد مانوصل...عشان زي ماعبرنا بمصر من الحفرة الي كانت فيها...نقب بيها على وش الدنيا وتبقى اعظم بلد ف العالم
وترجع مصر للمصريين
لا مصر مبارك ولا مصر الحزب الوطني ولا مصر المنتفعين
مصر لولادها بس

فعلا يا نانو ده اللى كنت بقوله فى التجهيزات ما احنا كل يوم مع ضغط المتظاهرين بيطلعوا قرارات جديدة ضد الفاسدين التانيين مرة منع من السفر و تجميد ارصدة و مرة استقالات جماعية لاباطرة الحزب الوطنى و هكزا و كل يوم حقايق جديدة عن النظام بتنكشف
لكن لو الناس بطلت تظاهر بعد خطاب الريس كان ايه اقصى حاجة وصلناهلها؟
ان الريس مش هيترشح تانى بس كده و كل الفاسدين كانوا هيفضلوا زى ما هما بدون محاكمة او مساءلة و هيكون ولا كأننا عملنا حاجةرئيس جديد فى سبتمبر و نفس النظام هو هو اتغير بس رئيسه لكن اعضاءه زى ما هما و هيكونوا اقوى كمان و هيجهزوا نفسهم كويس اوى ضد اى احتجاج بعد كده
كانت فيه معلومة او حكمة مش فاكرة قريتها قبل كده مضمونها ان اللى عايز يموت اسد لازم يتأكد ان طلقة الرصاص هتصيبه فى مقتل ليه؟؟؟؟ لان الاسد الجريح هيصبح اشرس و اقوى الف مرة و هيبطش بالصياد اشد بطش لو فضل عايش و ده اللى هيحصل مع النظام لو بطلنا مظاهرات

كيتى اقتراحك روعة وانا معاكى

للتوضيح برده...
مطالب الناس دلوقت مش انه يمشي لو مشيه هيضر البلد...الناس الي هناك دي فاهمه وواعية كويس...لو لازم يقعد معندهمش مشكلة انه يقعد بس يبقى صورة لحد ما الموضوع يمشي..هما عايزين يضمنوا ان الوعود هتتنفذ وان الي طلبوه هيتحقق وان امالنا هتتحقق
عايزين حقنا مايضيعش
عايزين الي بدأناه نكمله....مانقفش ف نص الطريق يبقى لا حصلنا ده ولا ده
كل ما خطوة بتحصل بتبقى فعلا تهدئة للناس او حاجة صورية...زي اني افصل ناس من الحزب الوطني واجيب غيرهم..طب مانحلوش ليه؟
الحاجة الوحيدة الي استفدناها من الخطوة دي هو القضاء على مشروع التوريث الي بحسب الدستور لازم المرشح يكون له اعضاء ف مجلسي الشعب والشورى

وده ماحصلش من اول يوم ولا تاني يوم ولا تالت يوم...لا ده عاااااااااااشر يوم
شفتوا ؟؟ بيدونا بالقطارة
فلازم نفسنا يبقى طويييييييل اوي اطول منهم
لحد ماناخد كل مطالبنا
مش ملاحظين ان كل الخطابات دلوقت بقت حنينة اوي
وبقوا بيخافوا على المواطن..من امتى؟
تخيلوا ان وزير المالية يقول ان الوزارة هتتحمل ارتفاع الاسعار ومش هتغليها على الناس...من امتى؟؟؟
ده كان لو الحاجة غليت جنيه بيغلوها 10 جنيه ويقولوا ارتفاع عالمي
وقالوا ان مش هيلغوا الدعم...بعد ماكانوا بيقولوا هيلغوه
وقانون التامين الجديد محدش بقى بيجيب سيرته
وقانون المستشفيات كذلك
لا وايه...هيرفعوا الرواتب...بعد ماكانت المحكمة الدستورية حاكمة بكدا وهما طاعنين فيه ورافضين

لازم نسنتنى كمان شوية لان كل يوم بنستناه من مصلحتنا كلنا
ونحمد ربنا ان احنا في ناس واقفين بدالنا...كل الي طالبينه مننا ياجماعه اقعدوا ف بيوتكم وادعولنا وخلاص...بس مش نقعد ف بيوتنا ونشتم فيهم

اميره
الاقتراح ده كاتباه على النت تحت اسم مبادرة...انشريه او اعملي عليه لايك عشان نجمع اكبر عدد مقتنع بكدا..ونوقف بنفسنا الحملة ضد شباب التحرير دي
واعتقد دي اقل حاجه نقدمهالهم قلبي معاهم ياااااااارب انصرهم يارب

بالظبط يا كيتى المتظاهرين و مؤيدينهم اللى احنا منهم مطلبناش حد ينزل التحرير و لا يقعد فى بيته بالعكس انزلوا روحوا شغلكم و عيشوا حياتكم الحياة لازم تستمر بدليل الاتنين اللى اتجوزوا فى المظاهرات و نزلوا تانى يوم ميدان التحرير تانى النضال و المظاهرات لا تعترض ابدا ابدا مع سير الحياة
انا ليا جارتى مش مصرية بتقولى ان المتظاهرين بياكلوا و بيغنوا و يهزروا فى ميدان التحرير قولتلها لانهم عايشين مش ميتين مش معنى انى بتظاهر و ليا مطالب انى ابطل ضحك او ماكلش لأ طبعا كل ده بيدينا امل فى ان المستقبل هيكون اجمل ان شاء الله و هل فى كل الدول المحتلة- مش هقولك حتى زينا- الناس بطلت تاكل ,بطلت تضحك او بطلت تتجوز؟ لأ طبعا المهم منخليش مطالب الحياة و الضحك و الاكل و الشرب و الجواز و كل ده ينسينا هدفنا و كرامتنا و سعينا لحياة افضل
بس اللى بنطلبوا من المعارضين لنهم يسبونا نتظاهر و نعبر عن رأينا و نحاول نغير اللى مش عاجبنا كلنا من غير ما يحبطونا و لا يقللوا عزيمتنا ولا يتهمونا اننا بنخرب البلد

حاضر ياكيتى هاشير

امبارح بقى وزير المالية المذيعه بتقوله صندوق النقد الدولى هايدعم مصر
تخيلوا قال ايه؟؟؟؟؟؟؟؟؟؟؟؟؟؟؟؟
مش محتاجين دعم عندنا مواردنا قناة السويس والبترول والغاز الطبيعى

دلوقتى بقى عندنا موارد !!!!!!!!!!!!!!
مش كل سنة فى منحة عيد العمال يطلع علينا الخطاب السنوى احنا كتير ومواردنا قليلة
حسبنا الله ونعم الوكيل

سمعت عن شعوب نجحت ثوراتها وشعوب فشلت ثوراتها و شعوب غيرت و شعوب اتغيرت و شعوب تقدمت و شعوب فضلت عالم ثالث لكن عمري ما شوفت شعب عايز ينهي ثورته عشان عنده شغل الصبح والعيال عندها مدارس والمرتب مانزلش

ياجماعه ميدان التحرير بقى صورة في منتهى الحضارة لمصر
هايد بارك حقيقية
جوزي هناك ومراسل مباشر ليا هههههههه
في ناس بتخطب فيهم تفهمهم المطالب والدستور
وناس بتعزف وناس بتغني وناس بتتكلم وتتناقش وناس وناس وناس
شباب يفرح بلاش نشوه صورتهم ارجوووووووكم بلاش

اه والله يااميره انا برده كتبت الكومنت بتاعك نفسه على الكلمة دي
مصر مش محتاجه دعم صندوق النقد
ياماشاء الله ياماشاء الله
مصر بقى فيها فلوس
وفورا ...رصد خمس مليار للناس الي اتضررت
من امتى؟؟ ماكنتم بتقولولهم اولعوا بجاز

والله العظيم مفيش احسن من حسبنا الله ونعم الوكيل

دلوقتى الموارد طلعت وارصدتهم بالمليارات؟؟؟؟؟؟؟؟؟؟؟؟
ازاى نقولهم مع السلامة سامحناكم
ودم الشهدا فى رقبة مين؟؟؟؟؟؟؟؟؟؟؟؟؟
دم الغلابة اللى ماتت وهى مش لاقية تمن الدوا؟؟؟؟؟؟؟؟؟؟

فين القصاص ياناس

دلوقتي برضه هتلاقي ناس تطلع تقولك كفاية كده بقى يا جماعة انتوا موقفين البلد ارجعوا بيوتكوا بقى

وتاني يوم يفرحوا باللي احنا عملناه ويقولوا خلاص بقى كفااية احنا مكناش نحلم بده

اهى كلمة مكناش نحلم بده يا نانو بتنرفزنى جدا لما بيقولوها
يا جماعة ده حقنااااااااااااااااا حقنا اللى اتاخد منا على مدى 30 سنة
لازم نفوق و نعرف حقوقنا و ساعتها عمر ما حد هيقول الكلمة دى

لاحظوا دايما الاجانب بيقولوا دايما جملة طبعا غريبة على اسماعنا هى( من اموال دافعى الضرائب) صح؟؟؟؟؟؟؟؟؟؟
احنا بندفع ضرائب و المفروض بنتمتع بخدمات فى مقابل الضرائب دى و كمان مرتبات الحكومة من اموال الضرائب
حد فينا راح حس انه خد خدمة مقابل الضرائب سواء فى الشوارع او المستشفيات او اى مرافق عامة او ختى المسئولين اشتغلوا لمصلحة دافعى الضرائب؟؟؟؟؟؟
و لما بنحب ناخد خدمة كويسة بنعمل ايه؟ يا بندفع رسوم الحكومة مقرراها ال يعنى مقابل الخدمة المتميزة يا بندفع اكرامية(رشوة يعنى)
و ده جزء بسيط من حقنا اللى احنا منعرفوش

مفيش حد في مصر شايف ان الريس حلو وهو فعلا ظالم بس هنستقر ازاي مين هيحكم يعني العميل البرادعي ولا رد السجون ايمن نور ولا تكمل بقي ونجيب واحد مسيحي
هو ماشي وهنكسر القلل باذن الله بس لما نقدر ننتخب حد كويس
اهو مشينا نظيف والعادلي الكلب وعز واتحاكموا حتي لو زي مابيقولوا فلوسهم برا هيعمل بها ايه وهو ممنوع من السفر
ربنا يزلهم جميعا وكل ظالم اللهم امين

هذه هي ترجمة لقاء السيد عمر سليمان و قناة إي بي سي. المصدر باللغة الإنجليزية أدناه.
--------------------

المذيعة: قلت أنك ستبدأ حوار مع المعارضة, هل هذا يشمل السيد البرادعي؟
عمر سليمان: لا. البرادعي ليس من المعارضة. له مجموعته الخاصة التي على صلة بالإخوان المسلمين و الإخوان المسلمون طلبوا مني أن نبدأ حوارا بدون السيد البرادعي

المذيعة: ماذا تفهم من القول: لابد أن يحدث الانتقال -التغيير- الآن. كما تقول الولايات المتحدة و كذا دول أخرى
عمر سليمان: هي عملية تبدأ بالحوار القومي. الذي بدأته هذا الصباح و سنكمل غدا و بعد غد. نريد أن يعرف الشباب أن كل طلباتكم سنجيبها بالموافقة الإيجابية و نعد بأن ننفذ ولكننا في حاجة لوقت لذلك

المذيعة: لماذا القلق مع أن الرئيس المصري يقول: لقد طفح الكيل
I have had enough
و قد أخبرني بذلك بأنه كان في العمل العام منذ 62 عاما وهو يريد أن يرحل ولكن ليس بعد!
لماذا القلق... لماذا لا يرحل الآن فعلا؟
عمر سليمان:
لا نريد فوضى في بلادنا. لو قال سأرحل اليوم... من سيحل محله ؟ طبقا للدستور يجب علي أنا أن أحل محله
و أعتقد في هذا المناخ... آخرون الذين لهم أجندتهم الخاصة سيقومون بزعزعة الاستقرار في بلدنا

المذيعة: و هل ستقدم نفسك ك مرشح للرئاسة؟
عمر سليمان: لا. طبقا لهذا الدستور لا يمكنني. فأنا لا أنتمي لأي حزب أو جماعة

المذيعة: ولو كان ممكنا فهل سترشح نفسك؟
عمر: لا أعتقد
المذيعة: لم؟
عمر: أنا رجل الكرة -صانع الألعاب- فعلت الكثير للدولة. ولا طموح لدي لأكون الرئيس
حينما عرض علي الرئيس أن أساعده قبلت مباشرة. فقط لأساعد الرئيس في هذا الوقت العصيب

المذيعة: حينما ترى كل ما يحدث في مصر تونس اليمن الأردن... و سوريا ماذا تعتقد... هؤلاء شباب يحاولون أن...
قاطعها عمر قائلا: هذا هو التيار الإسلامي الذي يدفع الناس
المذيعة: هل تعتقد ذلك؟
عمر بثقة: نعم
المذيعة: لا تعتقد أنها حركة الشباب يريد حقوقهم... حريتهم؟
عمر سليمان محركا رأسه بعد تفكر قليل: لا أظن أنهم الشباب وحدهم...هناك آخرون يدفعونهم

المذيعة وهي تبتسم: في كثير من أنحاء العالم العربي لا يوجد ديمقراطية, ألا تعتقد أن الشباب العربي متصل الآن بكل شئ... يرى... يقارن... ألا تظن أن ذلك يأتي من قلوبهم هم؟
عمر مقاطعا مرة أخرى: سهلت لهم الحديث معا... ولكنها ليست فكرتهم. لقد أتت -الفكرة- من الخارج.

المذيعة متعجبة بامتعاض: هل تؤمن بالديمقراطية؟
عمر سليمان: أكيد... الجميع
حاولت المذيعة أن تقطع كلامه فأكمل:
ولكن متى؟؟ عندما يكون الناس جاهزون لثقافة الديمقراطية

المذيعة: نعرف ماذا تريد المعارضة... ولكن ماذا تريد أنت من المعارضة؟
عمر سليمان: أريد من المعارضة أن تفهم أنه في هذا الوقت الضيق,بإمكاننا عمل ما قاله الرئيس مبارك وليس بإمكاننا فعل المزيد
و حينما يأتي رئيس جديد سيكون لديكم كل الوقت لتقوموا بكل التغييرات التي تريدونها

المذيعة: ما الرسالة التي تحملها إلى الشباب الذي مازال يقف في ميدان التحرير
عمر سليمان: فقط نقول: عودوا لمنازلكم ليس بإمكاننا فعل المزيد وليس بإمكاننا دفعهم بالقوة. يجب على الجميع أن يعودوا لمنازلهم. نريد أن نحيا حياة طبيعية. لا نريد أي شخص في الشارع. إذهبو للعمل. أعيدوا السائحيين مجددا. عودوا للحياة الطبيعية و أنقذوا اقتصاد الدولة

المذيعة: شكرا لك سيدي
عمر سليمان: شكرا

ملكة جمال مصر;14437327:
مفيش حد في مصر شايف ان الريس حلو وهو فعلا ظالم بس هنستقر ازاي مين هيحكم يعني العميل البرادعي ولا رد السجون ايمن نور ولا تكمل بقي ونجيب واحد مسيحي
هو ماشي وهنكسر القلل باذن الله بس لما نقدر ننتخب حد كويس
اهو مشينا نظيف والعادلي الكلب وعز واتحاكموا حتي لو زي مابيقولوا فلوسهم برا هيعمل بها ايه وهو ممنوع من السفر
ربنا يزلهم جميعا وكل ظالم اللهم امين

بصى حبيبتى مصر ماعدمتش رجالها

رد السجون ايمن نور اتسجن عشان وقف قدامه فى يوم من الايام

انا عن نفسى برشح عمرو موسى وبقوة

[SIZE=3][COLOR=#ff6633][SIZE=5][B]هحاول اتابعكم يامشموشة لانى فعلا تعبت جدا من كثر مابسمح فى الموضوع دى :(
[/COLOR][/SIZE][/SIZE][/B]

المطالبون للشباب بالعودة لبيوتهم لا يدركون حجم الضرر الذى يلحقونه بمصر. الفساد عميق جدا يا أهل مصر. لقد تم التخلص من قشرة الفساد الخارجية لكن جذور الفساد لم تزل ضاربة فى قطاعات واسعة من الحكم فى مصر. إن حرص الحريصين على بقاء الرئيس فى السلطة ليس تكريما للرجل بقدر ما هو رغبة فى عدم انكشاف هرم الفساد الذى استشرى فى البلد.

هناك مسئولون فى وزارات مختلفة بقوا فى مناصبهم رغما عن وصولهم لسن المعاش كنوع من الفساد المتبادل بين الدولة وهؤلاء. هى تضعهم فى أماكن لا يستحقونها، وهم يجاملون كبار الفاسدين بتسهيلات مهولة على حساب حقوق الوطن والمواطن. ورسالتى للشعب المصرى الذى يطالب الشباب بالعودة إلى بيوتهم: هل تريدون أن تعيشوا بقية حياتكم تعانون من الفساد أم تريدون من هؤلاء الشباب الذين أرسلهم الله كى يعطوا لمصر من طهرهم ما يطهر به حياتنا، ومن إصرارهم ما يرفعون به رءوسنا؟

ألا تريدون أن تعرفوا مدى صحة التقارير الصادرة عن منظمات وصحف دولية متعددة (لا تتواطأ على كذب) بشأن ثروة أسرة الرئيس مبارك (من 40 إلى 70 مليار دولار)، فى حين أن مجمل ديون مصر الخارجية 35 مليار دولار؟

ألا تريدون أن تعرفوا من الذى وراء قتل 315 شابا وفتاة من أرقى وأطهر وأعظم شباب مصر؟

ألا تريدون يا أهل مصر أن تعرفوا من وراء الخلل الأمنى الرهيب الذى حدث؟

هل تثقون فى الحزب الوطنى الذى زور وأفسد طوال ثلاثين عاما أن يدير عملية انتقال السلطة خلال الشهور القادمة؟

هل تصدقون فعلا أن هؤلاء الشباب الطاهر عملاء لإسرائيل وإيران وأمريكا أو أنهم مضللون لأنهم يرفضون أن يقبلوا تغيير الوسطاء والتعايش مع رءوس الفساد؟

هل تريدون أن تعيشوا فى بلدكم وكأنكم أسرى أو معتقلون: تنتظرون «التشريفة» حتى يمر السيد المسئول وكأنكم «فراخ فى عشة،» تقفون فى الطوابير بحثا عن أبسط حقوقكم فى حين تصل الحقوق إلى «الكبار» وكأنكم خلقتم كى تعيشوا خدما لهم؟

هل تعتقدون أن هؤلاء الشباب الثائر لا يريد أن يعود إلى بيته كى يحيا فى نعمة الجهالة وحياة الستر التى تليق بالأرانب ولا تليق بالإنسان؟

إنهم مناضلون بالنيابة عنا، وعلى الأقل، لا تسفهوهم، فكفى بنا إثما أن نكون أعوانا للفاسدين عليهم. ولولا نضالهم وصمودهم لما رأينا الكثير مما يحدث أمامنا الآن من تنازلات. وكى يعود الوطن إلى أهله، فلا بد أن يصمد الثائرون، وأن يوجه لهم المصريون جميعا كلمات الشكر والدعم والتأييد.

لا تجعلوا «نصف الوعى» ينتج لنا «نصف ثورة» استكملوا ما بدأتم: «إنما النصر صبر ساعة» كما قال الرسول (ص)