»¤‡° تجهيزات عرائس لشهر ذو القعدة 1431 - 2010 م / الجزء = 16 °‡¤«

جواب مخالفه

هو 190 اكيد صندوق والقطع ها تكون زياده

و55 كم قطعه؟؟؟ لو 6 قطع كويس نقولك من توه مبروك عليه


تعرفي اني شوفت حتي بي 250 وهبلتعليهم
لكن بعد فكرت قلت انا شنو بنستفيد من القطع غير زياده عدد اهم شئ خامه المنشف

خديت واحد 6 قطع 2 ديشمبر و2 مناشف متوسط 2 مناشف صغار بي 130تقريبا معاش نتذكر بضببط

مصراتية لشرقاوى;13482106:

مبروكات ومسعودات عليك ... حبيبتى متالقة وان شاء الله تبيديهم بالهناء مع نصيبك ....
ويقعدن ذكرى تحكى بيهن ...
بس كان حطيتيلنا شوية صور منهم علشان انمتعوا نظرنا :confused::confused:بيهن زى مامتعتينا بالحكى عنهن:worn_out:
- تقريبا كملتى الاساسيات شوية وتكونى مشطبة الكماليات والزيادات لو حابة من عندك انا انقول كفاية السرير معاش محتاجة شى ليه ...توة بس شوفى الوناسات والعلاقة "الشطار " ماتنسيه وشوية اكسسوارات وسجادة 3 قطع
وبالنسبة عندى اضافة ... لو حجرة نومك مافيها "شوفينيرة " لازم تشريها علشان الملابس الداخلية والشخاشير والايشاربات "التتسمانات "..وتقدرى اتحط بداخلها لو عندك منظمات الملابس الداخلية والشخاشير ...ولو ماعندك تلقيهم فى سوق هايل شوب ب10 دينار ممكن نعرف شكلهن كيف ؟

وهذه صورة لشوفينيرة دار اختى فى حوشنا "معليش صورة من حوسة عقدها"

سويلي;13485608:

عرايسنا الحلوات
انا ليا فترة ماخشيتش وتوا حاولت نقرا اللي فاتني تعبت
سؤال المخالفة
شفت طاقم حمام مناشف وروب الحمام اللي هو الديشمبر كيف الصندوق ب190 دينار عند ابناء الساحلي اللي عند شارع عشرين ولقيت وحدات اخرات ب55دينار بس والله عجبني حتى هنا شن رأيكن اين واحد ناخذ خايفة ناخذ 55 يطلع بخيص زي مايقولو الرخيص بخيص
ونفس الوقت وحدات قاللي انه كلام زايد امتاع ال190 غير صندوق وقطع مالهنش لازمة
وبالنسبة لمحل ابناء الساحلي صح غالي والا لا وشن احسن محل لأني شبه كملت المطبخ توا بنبدا في دار النوم

السلام عليكم حبيبتي لازم تشوفي الخامة لأن بالفعل يمكن الزيادة فقط على عدد القطع مش على الخامة أهم حاجة تكون قطن 100% وموفقة يارب

بنات في حد شاف الحاجات هذي في بنغازي خصوصا اللي زي الدزدان الصغيرة الموف حسيتها امورة وكم اسعارها ؟؟؟ حتى بالتقريب أو حتى باقي الحاجات لو شفتوها قولولي وين بلييييييييييييييييز

شيما عليك وعلى سوق المصريه تلقي فيه كل حاجه

عجبونى مين تعرف مينو ايبيع فيهم فى طرابلس

سؤال مخالف لبنات بنغازي: منهم المتالقة ) شوما ) هنو ) سولي ) كلكم

شنو يدروا هل العروس في الفاتحة بزبط؟

ويوم الحنة الصغيرة الي قبل يوم الحنة يعني العروسة

شنو تلبس وشنو تدير الي نعرفه انها تدير خبزة وسكر وعود وقيد

امس سمعت ع مية تحط كرعيها وتمسك سيف قولولي بزبط شنو تدير؟

وع لبستها تقدر تلبس لبسه هندية وتقعمز بيها ولالا؟وشنو قصة البودري مابودري؟؟

وبارك الله فيكم مقدما

نقولك يا قدوره
أحني سبرنا
والي درته في فاتحتي ياحنه تاخدي هديكا المرايا وتحطيها على الحيط وتمسكي موس في أيدك وتغطي روحك بي رداء وأول مايبدو يقرو في الفاتحه أقري المعوذات
وبعدها أقعدي أحفري في الحيط وقولي أحفر معزتي في قلبه كيفه مانحفر في الحيط توه وأقعدي أحفري وكرري أقري معوذات وقولي الجمله وماتبطليش حفر لوين
يكملو قراية فاتحه وتقعد وحده ثانيه واخده خبزه مقطعه وفوقها سكر تولع الوقيد وتطفيه في الخبزه وهكذا ولما يكملو قرايه توقف وتفرق الخبزه على الشبابات
والوقيد حتى هو وكل شباب ترشقه في راسها والي يطيح الأولى معناها لاحقه العروس هههههههههههه هما حاجات غريبه وأعتبريهم للجو بس تعرفي
طقوس تهبل بجديات
وبالنسبه للبسه أنتي حره الي يناسبك وشني ثاني يوم الحنه مانقدرش نفيدك هلبه لأننا أحني ماشيين بسبر طرابلسيه ولو تبي نقولك كيف الجيران وصحباتي تحت أمرك

هنو الدلوعه;13491197:
نقولك يا قدوره
أحني سبرنا
والي درته في فاتحتي ياحنه تاخدي هديكا المرايا وتحطيها على الحيط وتمسكي موس في أيدك وتغطي روحك بي رداء وأول مايبدو يقرو في الفاتحه أقري المعوذات
وبعدها أقعدي أحفري في الحيط وقولي أحفر معزتي في قلبه كيفه مانحفر في الحيط توه وأقعدي أحفري وكرري أقري معوذات وقولي الجمله وماتبطليش حفر لوين
يكملو قراية فاتحه وتقعد وحده ثانيه واخده خبزه مقطعه وفوقها سكر تولع الوقيد وتطفيه في الخبزه وهكذا ولما يكملو قرايه توقف وتفرق الخبزه على الشبابات
والوقيد حتى هو وكل شباب ترشقه في راسها والي يطيح الأولى معناها لاحقه العروس هههههههههههه هما حاجات غريبه وأعتبريهم للجو بس تعرفي
طقوس تهبل بجديات
وبالنسبه للبسه أنتي حره الي يناسبك وشني ثاني يوم الحنه مانقدرش نفيدك هلبه لأننا أحني ماشيين بسبر طرابلسيه ولو تبي نقولك كيف الجيران وصحباتي تحت أمرك

ولو بيقروا الفاتنحه في الجامع انتي كيف تعرفي ؟؟؟؟؟ هالحاجة اول مرة نعرف هالموضوع !!! الحق

سؤال للمخالفة:-
أهل بابا في مصراته كل بنت تتزوج يوم بدير حلوة وحنة نسمع فيهم يقولوا خيط النيرة ؟؟؟ مش عارفه شن هو وخاطري نعرف شن هوا !!! بس كل الي فهمته ان انا معنديش وماما مبتش اديرهولي لان عيلة بابا كل مناسبة يعلقوا علي ماما .....

رد للمخالف:

فهمني كيف يعني مراية ونحفر في ساس والله مافهمتيش

يعني ناخذ مراية وموس ونكسر لمراية ؟؟؟ وشنو نقول

باهي لما نولع وقيد في الخبزة اضني يقولوا في حاجة شنو هيا ؟؟

ويوم الفاتحة نلبس اي حاجة خاطري فيها صاح؟

اه ياحبوبتي ياريت تقوليلي بنات جيرانكم شنو داروه يوم حنتهم ؟

وعادي لو لبست يعني هندي الي تعرفيه قوليلي بزبط وباااااااااااااااااارك الله فيك

رد للمخالفة

خيط النيرة الي نعرفة انها حنة

وخيط صوف يلفوا بيه ويحطوا الحنة فوقه

هذا الي نعرفة ياحبوبة

وع قصة الفاتحة في الجامعه توه انا مانعرفيش

في الي في الجامعه وفي الي في حوش العروسة

اولا شكرا يا هنو على ردك

ثانيا جواب لسؤال المخالفة بتاع قدرك شوفي تقدري تقولي انا آخر وحدة تسأليها في الموضوع بس قاعدة توه نلم في موضوع الجهل المرير والمؤسف اللي انا عايشه فيه وقاعدة كل ما نشوف كرت في الحوش نمشي واي حاجة نمشي ونشوف اتاريني مش هنا خالص المهم منطولش عليك ... تجربتي في الفاتحة قالولي نولع الوقيد ونسمي اسم بنت ونطفيه في السكر اللي قدامي وهكذا وتمت كل وحدة تسميلي حتى في اسماء صحباتها فيها جو الصراحة وطبعا في مراية قدامك تمسكهالك وحده من صحباتك تقريبا وقت قراية الفاتحة وبعد ما يكملوا تديري عود الوقيد في السكر وبعدها يقولوا لازم توزعي السكر هذا على البنات فعلشان هكي درت سكر قوالب على اطراف طبق السكر اللي قدامي وزينتها ومعاها شكولاطه ملفوفة زي البونبونيرة فهمتيني ووزعتها على الموجودين وبعدها حطينا الحاجات الاخرى وهكذا وتقريبا هي اسبار لأن في بنت نعرفها زي ما قالت هنو يحفروا براس الموس في الساس ويقولوا علشان البنت تسيب أثر في بيت اهلها اثر ملموس يعني هذا بالنسبة لتجربتي في الفاتحة بالنسبة للحنة ان شاء الله اللي يفيدوكي يفيدوني .

قدرك كبير بقلبي;13491352:
رد للمخالف:

فهمني كيف يعني مراية ونحفر في ساس والله مافهمتيش

يعني ناخذ مراية وموس ونكسر لمراية ؟؟؟ وشنو نقول
يابنتي شني تكسري المرايا لا المرايا تكون متسنده على الحيط وتقعدي تشبحيلها والموس في الحيط الساس يعني تحفري حفره وتخلي الموس فيها يحفر وتقري معوذات وتقولي أحفر محبتي في قلبه زي مانحفر في هالساس فهمتي ولالا
باهي لما نولع وقيد في الخبزة اضني يقولوا في حاجة شنو هيا ؟؟
تعرفي هادي توه نسألك عليها

ويوم الفاتحة نلبس اي حاجة خاطري فيها صاح؟
أيه عاااادي الي تبيه

اه ياحبوبتي ياريت تقوليلي بنات جيرانكم شنو داروه يوم حنتهم ؟
يعني بصفه عامه في بنغازي يلبسو لبسه يحبوها في الي بيجاما ستان بودريه وفي الي تلبس تونسي ههههههههههه يعني حسب سبركم فهمتي وفي الي تلبس قفطان وتمكيج وبعدين تبدل وتحني ويطلاحولها في النص ويقعمزو حدها يدربكو ويحنوها ههههههههه وطبعا عزومتك أنتي حره فيها

وعادي لو لبست يعني هندي الي تعرفيه قوليلي بزبط وباااااااااااااااااارك الله فيك

أيه عادي ماهو قتلك بنغازي عادي حبوبه يعني أحني في طرابلس لازم رداء بودري مش غيره

حبيباتي قدرك وحبيبة ايمن بالنسبة للفاتحة هي صح في الجامع بس في عدة طرق انك تعرفي ... الصراحة هو فتح تلفونه وحطه له صاحبه جوه قريب باعتبار ان العريس يستقبل الضيوف على باب الجامع وميخشش وتما الموبايل مفتوح إلى أن كملوا وسمعناها عندنا في البيت يعني كانت حلوة الخطبة الصغيرة اللي تسمعيها واسمك واسمه كامل ينقال وانك اصبحتي زوجته وهكي فيها شعور حلو بكل.

قدرك كبير بقلبي;13491381:
رد للمخالفة

خيط النيرة الي نعرفة انها حنة

وخيط صوف يلفوا بيه ويحطوا الحنة فوقه

هذا الي نعرفة ياحبوبة

وع قصة الفاتحة في الجامعه توه انا مانعرفيش

في الي في الجامعه وفي الي في حوش العروسة

بالنسبه لي طبعا الفاتحه على العريس يعني يا أما في حوش ماليه أو يحجز وين مايبي
أني حجز في جامع الدعوه الأسلاميه (الكنيسيه سابقا) الي في ميدان الجزاير طرابلس طبعا
وفي بنغازي تختلف يعني أما حوش العروسه ولو كان صغير في جامع وطبعا لو جامع العريس يدفع التكاليف

هههههههههههههههه أني لما كانت في الجامع
أتفقت مع ولاد خالي الزوز وقتلهم أول مايبدو شرينولي وفعلا كلمو وقالو بدو ههههههههههههههه
وجت تهبل وكل شئ في وقته والحلو يابنت ماتنسوش تبعتو حد يصورهالكم في الفيديو محلاها لما تتفرجو عليها أني بعتت ولد خالي صورهالي كااااااااامله من أول كاتبة التفاصيل لوين فرقو الزاطه والعبمبر والبكلاوه الكونفيتي وقعدو يباركو
ولما جابهوالي حطينها في شاشه التلفزيون وتفرجنا ههههههههههههههه ومانحكيلكمش علي الدموع والبكاء هههههههههههههه كلهم تأثرو وقالو عمرنا ماشفنه فاتحه ههههههههههههه
والحو شكل حبيب قلبي وهو يقول أقبل هههههههههههه وشكله مبسوط ومرتبك الله محلاها
ولليوم هذا كل مانتفرج عليها نبكي هههههههههههههههههههه

حبيبة أيمن;13491323:

سؤال للمخالفة:-
أهل بابا في مصراته كل بنت تتزوج يوم بدير حلوة وحنة نسمع فيهم يقولوا خيط النيرة ؟؟؟ مش عارفه شن هو وخاطري نعرف شن هوا !!! بس كل الي فهمته ان انا معنديش وماما مبتش اديرهولي لان عيلة بابا كل مناسبة يعلقوا علي ماما .....

حبوبه النيرة عباره عن خيوط من الصوف لو جيتي لي مصراته زياره تحصليها في محل البدشه يبعوا فيها
بس اغلب ناس ديرها ليهم مرا كبيره في العمر **وانا وقت توصل النيرتي ها نصوره ونزله ليكم
ان شاء الله**

وتطلع الحنه بها الشكل


فيه ناس تلف الخيط علي اليد والرجلين العروسه وخلاص
وفيه ناس لفتهم حلو بشكل مرتب اليدين تكون رسمتهم نفس بعض


** المعروف انه بس العروس تحني بالنيره مره واحده بس يوم عرسها***



/// يوم الفاتحه سالت ماما توه قالت زمااان بس عندهم ها السبر .. ممكن قبل 25 سنه
وبدل السكر عندنا ياخدوا للحمه طايبه ويلفوها في فتاتت وكل حوش فيه بنات يعطوهم للفه ع العدد بنات في الحوش
وكانت هذا بطاقه دعوه لليوم الحفله *_*