للمقبلات على الزواج ويريدون يعرفون كل شي بالتفصيل لتجهيزات العرس "بنات الامارات فقط"

تسلمون الغاليات على الرد والمساعده وبارك الله فيكم.. :)

بصراحة انا سرت عند ليندا كان مكياجها حلو


بس مكياجها حلو بس على البشرة البيضاء

اما فوز الاميرى ترى حلو بس 4000 درهم تاخذ عن العروس
المكياج العادى 300 درهم
عقد القران 2000 درهم
اما هند الاميرى انا مجربتنها بصراحة وايد حلو مكياجها
بس التسريحات لا مب حلو

القاعات للعرس
فندق الحياة -----قاعة بنى ياس



تحياتى
ام وديمة

السلام عليكم ورحمة الله وبركاته>>>>>>>>

لم سمحتي ام وديمة

ممكن رقم فوز الأميري؟؟



و شكرا

تشكري الغالية على المعلومات المفيدة

والله استفدت منها وايد

هلا اخواتي اليوم راح نتكلم عن الصلونات بس من راي انا طبعا اللي في دبي واحسن الصلونات بجميع المستويات


المهم خلنا نبدي بالحمام المغربي


1- في عندكم في فندق رويال ميراج روعة روعة والسعر 200 درهم المكان طبعا في الميناء السياحي جميرا

2- صالون دون في جميرا نوعين عندهم العادي 100 وعندهم 150 يمدحونة الحمام مالهم واللي اتسوية هندية

3- مركز الضيافة للتجميل في الجميرا نوعين العادي وبالاعشاب انا مجربة عندهم زين بس على فكرة كل مرة يغيرون اللي اتسوي ماعندهم وحدة ثابتة بس في النظافة اوكية نظيف الصراحة

4- صالون نسيت اسمة اللي في مركز الهنا فوق انا شفت الحمام مالهم ماعيبني مش يلين هناك واللي اتسوي مغربية


5- صالون الدرة في الضيافة ووين صالون ايمان يمدحونة ومنافسة بينهم وبين ايمان في الحمام المغربي

6- صالون شاليمار في الضيافة وايد زين اللي اتسوية وحدة مصرية

7- مركز العناية بالبشرة فوق البصريات بناية الشيخ حمدان ووايد زين يمدحون وووايد ووايد

8- صالون الود في ديرة زين بعد

واللي اتعرف اتخبرنا بعد

مرحبا اخواتي العضوات اتذكرت اسم الصالون اللي في مركز الهنا اسمة البسمة

وصالون دار العرايس في الراشدية بعد ووايد زين

حمام الهنا في ديرة من اول الصالونات للحمام المغربي في دبي



اما عن المكياج والتسريحة خلونا انقسم الصالونات اللي زين في المكياج واللي في التسريحة شو رايكم يابنات وكل بنت لها راي في صالون


صالون مشكبار((هندي)) من احسن الصالونات والمعروفة على مستوا الامارات ولاعروس طلعت من عندهم خسفة سوري كل العرايس حلوات من كل النواحي التسريحة والمكياج واخفاء العيبوب سوا العروس بيضا او سمر او حنطية

صالون موار ((لبناني)) زين مكياجهم ويناسب البيض بس لاتغمرين اذا كنتي سمرا لانهم مايعرفون يتعاملون مع البشرا السمرا مول يطلعونها بهلون يوم العرس وهي طبعا ليلة وحدة ماتتكرر

صالون ايمان في الميكاج ووايد حلوة مكياجهم للحنطيات والبيض وحتا السمر ومن اقدم الصالونات في دبي اقدم عن موار وغيرهم

صالون الوداد ((هندي)) مكياجهم نفس مشكبار بس الفرق في السعر وانهم ما عندهم نفس زحمة مشكبار واللي اتمكيج طلعة من عند مشكبار مكياجها مميز

صالون المعالي آنا شايفة المكياج على ربيعتي ((هندي))بس المعاملة مول مب زينة بس الشغل اوكية

صالون غواطيس في الكرامة مركز الشريفي مووووووووووول مب زين كلة زيت في زيت
اللي اتمكيج دليلة مغربية ماتعرف مووول المغربيات معروفات حق الحمام المغربي مش للمكياج نصيحة مب ززين

مركز قنطار اللي في ديرة يبعون ماركة كرولايون كانت عندهم وحدة اتمكيج زين يقولون طلعت حلوة مكياجهم بعد

صالون رفال((لبناني)) اللي في ديرة في التسعيان كانت لة سمعة اما الحين مش ووايد عرايس ايسرون عندهم

صالون عمرو((لبناني)) اللي في ديرة مول مب شي الصراحة آنا شفتة في فنجان قهوة ما اعتقد انة في عروس تيغي أتجازف يوم عرسها


صالون((هندي)) روبي في ديرة من اقدم واحسن الصالونات من المكياج روعة واللة

صالون مني((لبناني)) مساكين آنا من راي مش حلوة بس حق اللي تبا لة


بنات اخاف نسيت صالون من صالونات دبي احنا اتكلمنا الحين بس عن المكياج ما قلنا شي عن التسريحة

الغاليه التمساحه مشكوره وايد على هلمعلومات.. بس حبيت اضيف شوي..

صالون وداد مب شي برايي..
وأنا اتكلم عن تجربه.. يمكن اتمكيج حلو حق السمر ام البيض والحنطاويات ابد مب شي.. ومعاملتها هاي الي اتمكيج مب شي.. أنا رحت لها عشان عرس اخو ربيعتي وكنت متحمسه يوم ربيعتي مدحته فشليتها معاي ورحنا يالسه اتريا الي اتمكيج خيستني ومع ان مب زحمه هي وربيعاتها دايرين حوالي وحده وقريب بتخلص يايه عشان التسريحه بس ومطنشيني.. ومع ان انا كنت متصله وحاجزه هاه.. وعقب تذكروني ويت وحده منهم عشان اتسويلي التسريحه يلست تستشور شعري لين ما حرقته وعقب شوي زادو البنات عشان المكياج شفتها مكيجت كم من وحده وسمره.. والي ايوونها كلهن سمر يعني الي شفتهم كانو كلهم سمر فقلت لربيعتي متى بيي دوري خيستني والله وعقب زقرتني يوم يلست معصبه ورحت وتمت تتفلسف على ويهي وانا مول مب عايبني الوضع وترمس ربيعتها تتحسبني ما افهم لها يالسه تحش وطلعت وانا مول مب عايبني شغلهم ما كمل 10 دقايق ويهي زيت وتغير لونه صرت رصاصيه ونفسيتي داون.. هذي تجربتي وانا ما اعتبر هالصالون من الصالونات الممتازه لا ابد مب شي.. والله لو كنت اقدر اسوي سكانر للصوره واحطه على المنتدى عشان الكل يشوفه كل صوري جني وحش لوني متغير الكل ما عرفني انا الحنطاويه صرت سمرى على رصاصي جني روبرت..

وعن صالون عمر:
هذيلا بس شطار في التسريحات ام المكياج لا مب شي..

والصالون الي ذكرتيه البسمه الي في مركز الهناء:
كانهم اطرش في الزفه.. متصله بهم عشان احجز حق حمام مغربي حاطين وحده طمه اترد على التلفون ما تعرف شسالفه انا يالسه اسائلها وهي تقولي شو!؟ وعقب قلتلها تعرفين انجليزي اتقولي شو!؟ وعصبت جان اقولها ازقري اي حد ثاني بالاردو وسارت زقرتلي وحده تشتغل عندهم اسالها اتسون مكياج تقولي لا اسالها تسوون تسريحه تقولي لا اسالها تسوون حنى اتقولي لا وحمام مغربي بعد لا؟!؟!؟!؟! جان اقولها عيل ليش كاتبين في البطاقه مالتكم انكم تسوون هالاشياء تمت ساكته "شكلها مبرمجينها على لا وبس" وعقب قلتلها بندو صالون مالكم الله يعلم حق شو مبطلينه وبندت التلفون..

بس حبيت اخبركم تجربتي..

هلا اختي سنوا وايت صالون الوداد اكثرهم سمر بس بعد يصلح للبيض لانة نفس مشكبار

وصالون البسمة صح كلامج اصلن مايعرفون شي وانا ماجربت حمام المغربي مالهم

وصالون عمروا مول مب حلو

السلام عليكم ورحمة الله وبركاته...........

ضحكتيني يا سنو واايت

و مشكووورة يا التمساحة

حبيت أضيف شي بعد

في لبنانيات يمكيجون و يسوون تسريحات
بس ما عندهم صالونات...يعني ايون البيوت و الفنادق
و انا مجربة...الي يسوون الشعر...

سعاد....فنانة و ما تحط سبري واايد و اي تسريحة بتراوينها عايبتنج بتسويلج ايلها
.جمانة ... فنانة بعد
كلم روووعة

وفي بعد وحدة تمكيج مكياج لبناني مناسب للحنطاويات
و مكياجها يشبة مكياج المطربة نيللي مقدسي و اسمها

رولا.....و نوعية المكياج الي تحطة ممتاز و اعتقد ماركة Mac
و اتخليج طبيعة مب شكل ثاني و محد يعرفج؟؟؟
بس عيبها انها غالية

وبس


وعليكم السلام ورحمة الله وبركاته

أوة نسيت اخبركم


عن المواظنات اللي ايمكيجن

هيفاء صفر معروفة في حد يمدح واحد يذم وانا ماايعيبني مكيجها بس انا شفتة في المجلة

هند الاميري ايقولون روعة ما ادري

عايشة المطوع شفت حلو وبسيط

ندا شفتة على ربيعتي وووايد حلو وسعرها بعد 1100 للعروس يستاهل

ام سيف اول مرة اسمع عنها في المنتدي ولا اعرف احد جربها

عذبة شفت مكياجها روعة في عدد زهرة الخليج كانت امكيجة عارضات اول مرة بعد اسمع عنها
واذا اتعرفون اي مواطنة خبرونا

صحيح ان تكلمنىعن محلات تأخير الفساتين لكن فية ناس ما عندهم ميزانية لفساتين الاعراس
ترى تعرفون اقل فستنان للتأجير بحوالى 4000 درهم وبعد مب ذاك الزود من االحلاة

المهم انا سمعت ان فية حريم وبنات عندهم قسم فى البيت فية فساتين اعراس وغيرها واسعارهم معقولة وانا سمعت عن وحدة اسمها ام عبيد على ما اعتقد تأجر فساتين اعراس بس رخيص مب غالى واشياء حلوة عندها يعنى هى الحرمة ظبط المقاس وكل شيى واسعارها على ما اذكر بحدود 1000 الى 3000 او 4000 بس ما ادرى كم
وهناك حريم وينات وايد بس انا حبيت اضياف نقطة مهمة صح ان فستان العرس ليلة فى العمر بس حرام تعجين فلوسك على يوم واحد ...بعض البنات تفصل بحوالى 100000 آلف درهم والله حرام علشان يوم واحد
فكرة المواطنات اللى عندهم الفساتين حلو وهذا يشعل بنات البلاد احسن ما تعجين فلوسك على الوافد .....خلو اهل البلاد يستفدون من الفلوس مب الغير

هذا انا ذكرت حرمة بس الاسماء ممكن البنات يشاركونا......


او وديمة

والله انه موضوع رهيب .
اختي التمساحة ياريت لوتخبرينا عن هذيلا المواطنات من اي امارة .
وبالنسبة للاخت ام وديمة انا معاج في ان حرا تعجين البيزات حق ساعة اوساعتين وعلى حسب علمي ان اغلى شي عندنا في الامارات واضم صوتي لصوتها في انكم تخبرونا عن البنات المواطنات اللي نقدر نحصل عندهم هذي الاشياء

بنت حواء

واللة الواطنات

هيفا صفر وهند الاميري من الشارقة

ندا دبي اسعارها العروس في دبي في الفندق1000والملجة 500 بس شغلها حلو

عايشة المطوع ابوظبي


ام سيف ابوظبي

مشكورة اختي التمساحة ممكن اطرشين لي رقم ندا عل خاص واذا هي في صالون ولا عندها ملحق واسمحيلي تعبتج وياي

مشكورة حبيبتي على الموضوع

بس بغيت آخذ رأيك .. من الأحسن ؟!

عـمـرو .. ولا .. سيلفي ؟؟!!

تسلمون الغاليات على الرد واااااااااايد.. ما شاء الله روح التعاون والتفاعل بينكم.. هيه هذيلا هم بنات ابلادي ما شاء الله عليكم..

----------------------

الغاليه فوانيس حبذا لو تكلمين عن سعاد وجمانه اكثر عشانالكل يستفيد منهم يعني وي مقرهم وكيف تعاملهم ويا الزباين وكم اسعارهم التقريبيه؟!

-----------------------

الغايله ام وديمة عن الحريم المواطنات الي ياجرن فساتين انا سمعت عن ام عبيد.. وعن ام عبد العزيز.. واتصلت عشان احجز بس غيرت رايي ما ادري ليش والله؟!

------------------------

الغالي التمساحه ممكن تخبرينا اكثر عن ندى.. وهل تسوي حق الغير العرايس وكم اسعارها؟!
وانتي ذكرتي حق العروس اتسوي ب1100 درهم هذا بس المكياج صح؟! وتسلمين على المحهود والردود الحلوه..

------------------------

الغاليه حـليـوه عمرو بس تسريحاتهم حلوه وغريبه ام المكياج لا.. وسيلفي مكياجها حلو بس مرات تييلها حالات وتغليب مرات على ناس وترخص على ناس ومرات مكياجها للعرايس تكون عاديه..

بنات انا اعرف مواطنات هنتين ياجرون فساتين الاعراس وماخذه رقمهم من الجرايد اللي تريد تقولي وبطرشهن على الخاص وحده في العين والثانيه ماعرف من وين ماكلمتها بس عندي رقمها..:smile:

السلام عليكم ورحمة الله وبركاته...............ز

بعطيعكم تفاصيل عن اللبنانيات الي يسون الشعر

سعاد ...للشعر فقط...مقرها الشارقة..بس وين ما تكون العروس تسيرلها و ما في مشاكل..و ساعات تسير العين و أبوظبي ويا المواطنات الي يحطن المكياج...و تسريحاتها مال اللبنانيات عدل...


جمانة..للشعر....صراحة ما أ عرف...بس يمكن في دبي او بس وايد فنانة

رولا.. دبي....مكياج لبناني هادي جدا و روعة و فنانة حق الي بشرتهم حنطاوية...بس مثل ما قلت ..غالية اشوية؟؟

بالنسبة لفستان العرس يا سنو وايت....
أفضل انه يكون فستان يديد و خاص بج
حتي يمكن ميولج انت..... انه اتفصلين..عشان جيه انت ما اتصلتي لمواطنات الي يأجرن؟؟
و يوم بتسيرين إنشاءالله أتفصلين..قولي للمصمم ابا فستان
خطوبة أبيض أو أوف وايت و جيه بيطلع سعره أقل
و سوي الموديل الي في خاطرج؟؟؟
حلاتها العروس بفستان يديد و على ذوقها؟؟؟

انا هذا رأييه؟؟؟






وعليكم السلام ورحمة الله وبركاته

مشكورة اختي الغالية وعروسة عروس المتميزة بمواضيعج المتميزة دائما

XxSnow Whitex


عن ندا انا اتصلت لها وقلت العروس ويا البروفة طبعا اذا في دبي 1100 ويا البروفة هذا للعروس


اما عن الخطوبة 500 هذ سعر المكياج بدون التسريحة

اما للعروس مكياج مع تسريحة هي تيب لج اللي اتسوي الشعر كلة 1500

بس اللة حق المكياج حلو بدون مجاملة

مشكورات أخواتي على التفاعل واشكر الأخت سنو وايت

اما عن الصالونات للعناية بالبشرة عندكم 1- فينولا في الجميرا بجانب اروشي

لاسبري في الجميرا بجانب صالون موار

مركز العناية بالبشرة


بس انصحكم بالتنظيفات السطحية والخفيفة للبشرة مش العميقة