للمقبلات على الزواج ويريدون يعرفون كل شي بالتفصيل لتجهيزات العرس "بنات الامارات فقط"

ماشاءالله الله يوفقكم...


انا مالي حظ معاكم...:(


ومشكورة:)

تسلمون الغاليات على الرد وااااااااااااايد.. ابصراحه حمستوني لتكملت الموضوع.. واعذروني لاني رديت متأخره عليكم لاني مشغوله وايد لترتيبات العرس..

وبنسبه للخوات الي يبون يعرفون عن الصالونات الي في بوظبي.. سامحوني أنا ما عندي أي فكره واتمنى من بنات بوظبي يشاركونا هالاشياء ويخبرونا من خبرتهم لاسامي المحلات والصالونات و و و الخ.. عشان الكل يستفيد..

----------------------

وخلونا نكمل باقي الاشياء:

بسم الله نبدء..

أماكن تسوون فيها حمام مغربي ومضمون ان شاء الله وبعيد عن هالسوالف الي نسمعها والله يبعدكم عنها يا رب:

* صالون عمرو..
* صالون دون.. جميرا..
* صالون ريد دور.. سوق الحمريه..
* دار تجميل العروس.. الراشديه..
* مركز ضيافه للتجميل.. جميرا..

وتقريبا يأخذون على حدود 100- 200درهم.. يعني لو تخبرونهم انكم عرايس أعتقد ياخذون 200 واذا عادي بيأخذون 100 درهم.. واذا رحتو بعض الصالونات الغير مشهوره يأخذون على حدود 60 أو 50 أو 70 درهم.. ويكون صالون صغير مب عود ولا مشهور يعني جيه والا جيه يسوون حمام مغربي وينظفون لج الجسم..

وهالاماكن هي:

* صالون البسمه.. مركز الهناء.. شارع جافليه..
* الصالونات الي قرب مركز حلوان في الشارجه أعتقد في شارع حلوان تقريبا نصها اتسوي حمامات مغربي..
* وفي سوق الحمريه دبي تقريبا نص الصالونات اتسوي حمامات مغربي..

بس يا بنات خلوكم حذرات وايد ولا تنسون ان من السره للركبه عورة الحرمه جدام الحرمه ثانيه حرام..

و ترومون اتسوون حمام مغربي في البيت بعد.. تروحين وتشترين الاغراض من العطار وبس تسوين بروحج في البيت وبنسبه للظهر تنادين اختج والا امج تساعدج في هالشغله.. توفير الوقت والمال..

---------------------------

ندخل في موضوع تنظيف البشره للعرايس.. قبل العرس ب 3 أشهر والا شهرين والا شهر تسوون تنظيف للبشره عشان تعيدون تجديد الخلايا وتكون خاليه من الحبوب والزيوان وهالاشياء الي تخرب البشره..

يعني Maximum 3 أشهر للي في بشرتها حبوب وزيوان وآثار جروح وووالخ..
وشهرين حق الي في بشرتها آثار حبوب خفيفه و و والخ
وشهر حق الي بشرتها صافه بس يباله تنظيف..

ولا تنسون قبل العرس أكثرو من الفواكه والخضروات والتنظيف داخل الجسم وخارجه.. وشوفو كيف البشره بتصير صحيه.. وابتعدو عن التوتر والقلق والاهاق لانه ياثر على البشره وايد..

وبنسبه للتنظيف عندكم كذا صالونات اتسوي تنظيفات حلوه مثل:
* صالون رافال.. دبي.. شارع رقه..
* جانيت وهدى.. مركز الهناء.. جافليه..
* مركز دون.. جميرا..
* مركز ضيافه للتجميل.. جميرا..
* صالون عمرو.. شارع رقه..
* كليوبترا.. مركز وافي..

يعني التنظيفات على حدود 200-400 درهم.. فانتو سوو على شكل جلسات.. يعني كل اسبوع مره أو كل اسبوعين مره أكيد فيه خصم..

وبنسبه للصالونات العاديه الي ما تبا اتخسر وايد اتروح لاي صالون عادي بس بشرط الي اتسوي التنظيفات اتكون وحده زلمايه.. يعني لبنانيه والا سوريه والا اردنيه لانهم خبيرات في هالشغلات.. وما بيأخذون اقل عن 100 والا 150 درهم على حسب وفي منهم ياخذون 50 وفي منم ياخذون 80 درهم يعني على حسب..

---------------------------------

انروح لحجز الكوشات..

طبعا أول التراتيب تكون الكوشه يعد حجز الفندق طبعا.. يعني اتفكرين شو هو الشكل المطلوب وبعدين تيين اتصممين الفستان وعقبه البطاقه وعقبه الماسكه وعقبه المكياج وبعده الزفه..

والاماكن الي يسوون فيها الكوش وباسعار مناسبه هي:

* انترفلور.. شارع الرقه..
* هاي فلور.. شارع المطينه..
* المناسبات للانتاج الفني.. الشارجه..
* البداد -شمس الخليج- الشارجه..
* سامس.. شارع الرقه..

يعني تقريبا اسعارهم تبدء ككل المحلات من ال1500 الى .......... على حسب الي في البالج يعني توقعو 30 الف والا 25 الف وهكذا..
كلما يكثر فيه الديزاين والاشياء كلما يزيد السعر..

وفي منكم يبون يسوون كوش راقيه وحلوه بسعر مناسب وتقريبا على حسب الميزانيه ورخيص فعندكم الشارجه.. شارع حلوان أعتقد الي هو نفسنه فيه مركز حلوان.. شي محلات صغيره وعدال بعض وكلها للاعراس يصممون فيها كوشوعلى حسب انتي الي تبينه طبعا لا تنسون انكم اتكاسرون واتطلعون روح راع المحل :D2 عشان يخصم شوي من السعر..

----------------------------------

ندخل للاستوديو والمصورين..

أحسن المحلات والمشهورين في تصميم البوم والتصوير المرتب والواضح..

* أضواء المدينه.. عجمان..
* أيوب عيسى.. دبي وفرع في الشارجه..

يعني اسعارهم تقريبا من 4000 الى 5500 درهم ويمكن في زياده ما اعرف عنه..!!

وحق الي ما تبا اتكلف هالكثر حق الالبوم عندكم كذا استوديوهات اتسوي ديزاينات حلوه وبسعر حلو منها:

* استوديو الزورق.. الشارجه..
* لي ستوديو مستيك.. مركز المزايا.. دبي
* استوديو السيما.. مركز الهناء.. دبي

وعندكم كذا استوديوهات في مركز مزايا.. واسعارهم حلوه تقريبا من 3000 وفوق.. يعني على حسب الاذواق والميزانيه..

---------------------------------

وللحديث بقيه وسوف نكمل ان شاء الله بعد استقبال الردود :smile:

ماشاء الله عليج اختي سنو وايت..

بس حبيت ازيد بعض الاسامي على اللي حطيتيهن..

بالنسبة للحمامات المغربية
في الشارجه شي صالون كازابلنكا... وايد اوكي.. مشهور.. واسعارهم مابين 100 و 200 درهم ..

بالنسبة للحنايات... صالون قمــــــر.. في الشارجه وفي دبي.. حلو حناهم.. (اخص بالذكر .. هيما .. هاي احسن وحده .. وفي بنت صغيره ما اذكر اسمها.. بعد فنانه في الرسم.. بس هيما هاي الراس العود تعرف منو يحني اوكي ومنو لا.. وهيه فنانه بعد)

اما بالنسبة للكوش... صراحه انا شفت ليلة فرح.. شغله روعه.. في عيمان.. بس مواعيده زفت.. :) بس شغله تمام.. وعنده افكار..
وشي بعد واحد مواكن بصراحه نسيت اسمه.. بس غاوي شغله وافكاره اروع وشغله نظيف صدق من الخاطر.. مسوي عرس احلام ووايد من العوايل الكبيرة.. :)

اذا حصلت رقمه بييبلكم اياه..
بالنسبة لصوالين بوظبي.. اعتقد صالون دولا اشعرهم.. بس تي لين دبي 7000.. شعر ومكياج.. غاليه بس مكياجها جنان..
وفي عروس الخليج .. بس ما اعرف حد معين هناك.. :)
وبس

ممممممممممممممممممممممممممم شو بعد..

بسني.. :) اذا حصلت شي زياده بظيفلكم..

ومشكوره الغاليه.. واسمحيلي على المداخله..

تسليمن XxSnow WhitexX على هذا الموضوع الغاوي و المفيد في نفس الوقت و انشاء الله الكل يستفيد وانشاء الله بعد نشوف مثل هالموضوع بس لدول ثانيه مثل الكويت و قطر و السعوديه وغيرها من البلدان عشان الكل في هالمنتدى الغالي يستفيد :) :D

تسلمون الغاليات على الرد وايد.. :smile:

ونكمل حديثنا..

-----------------------------

بنسبه الي تبا تحجز كوش.. عندكم هالمحلات:

1- انترفلورا.. شارع الرقه..
2- ساميس.. شارع الرقه..
3- هاي فلور.. شارع المطينه..
4- اللمسه الانيقه.. دبي..
5- المناسبات للانتاج الفني.. الشارجه..

يعني بتحصلون المبلغ من ال2500 درهم فما فوق..

وعندكم محلات يسوون كوش ورخيصه وزينه بعد على شارع حلوان الشارجه والمحلات عدال بعض روحو محل ومحل وسالو عن الاسعار بتحصلون من 1000-5000 درهم ويسوون الي انتو تبونه..

----------------------------

البطايق..؟!

عندكم مصنعين رئيسين في الشارجه ومعروفين وهم:
1- البنفسج..
2- رهونجي..

وأي محل مال البطايق يروحون عند هالمصانع ويسوون بطايق وعقب يعطونكم بسعر مضاعف او يزيدون عليه كم من ريال.. :D2 يعني أفضل مكان اتسوين عندهم بطايق هو "البنفسج" لان انا رحت لمحل رهونجي وطلعو جذابين ونصابين الواحد يتجنبهم احسن شي..

وحق الي في دبي عندكم مركز بوهيل طابق الثالث كذا محلات للبطايق..

وطبعا سعر البطايق تبدء من الدرهم لفوق وانتو تضربون السعر في عدد الاشخاص عشان اتطلعون المبلغ الاجمالي..

------------------------------

عن القاعات والفنادق للعرس:
1- البوم السياحيه.. دبي
2- انتركونتينانتل.. دبي
3- هوليدي ان.. دبي
4- البستان روتانا.. دبي
5- فورمونت.. دبي
6- ابراج الامارات.. دبي
7- حياة دبي..
8- حياة ريجينسي..

وفي الشارجه:
1- شارجه مالينيوم..
2- روتانا..
3- هوليدي ان..

وفي عجمان..
1- جمعية أم المؤمنين..

وسعر الالحجز يكون على حسب المنيو للفرد واحد..

---------------------------

انتظر الردود :smile:

أنااااااااااااا بعدنى ما عرست :o لكن استفد والله :up: تسلمين اختى XxSnow WhitexX والله يسعدج ان شاءالله في حياتج .. وفي انتظار الجديد ..



تحياتي
بنت ديره
:smile:

Very Nice :up:

مشكورة اختي على هذا الموضوع
وهذي أول مشاركة لي وما لحقت أقرأ كل الردود
لكن الواحد يحتار في الاختيار
وبعدين كيف نروح الصالون ونقعد نطالع كيف شغلهم بس
بعض الصالونات ما ترضى انا نتشوف بس

تحياتي
احلام

يوم بتفيج بكتب لكم كل شيء حلو في بوظبي :D لانه ربيعاتي ثنتين بيتزوجن ويا بعض وانا كنت وياهن في كل مكان سرنا نتجهز منه والصاولين بعد بس عطوني فرصه اشووية:D ويعلج العافيه اختي صاحبه الموضوع تحياتي لج

السلام عليج اختى XxSnow WhitexX مشكووووره على جهودج المبذوله و ما عليج زود والله

الله يعطيج العافيه

:clap:

يعطيك الف عافية اختي


XxSnow WhitexX

على المجهود المبذول وان شاء الله البنات يستفيدون خاصة اللي ما عندهم خبرة

انا عن نفسي استفدت لأني مثل ماانتي عارفة جاية بكرة عندكم وفي كم محل يفيدوني وان شاء الله بعد بمر على محلات الكوشات عشان آخذ فكرة عن الأشكال الجديدة في السوق

مشكورة وما قصرتي يالغالية ونخدمك في الأفراح ان شاء الله

تحياتي لك

:confused: :confused: كتبت لكم صفحة معلومات عن الاشياء اللي في بوظبي اخر شيء اكتشفت ان الاتصال مقطوع وانمسح كل شيء :confused: :confused:

اختي ربشة ..
ما عليه حبيبتي ....كتبيهم لنا مرة ثانية يالغالية ...وعشان ما تتكرر هالحركة ..
كتبيهم الأول على برنامج الوورد وعقبها انسخي والصقي في المنتدى ...



يالله نتريى مساهمتج الثميييييييييييييييييينة ..:D

مشكورة اختي الغالية ...على هالمجهود الواضح في سبيل تفيدين خواتج اللي مقدمين على خطوة اللي نقدر نسميها خطوة العمر ....و الصراحة انا استفدت منج وايد...و في اشياء وايد احب انج تخبرينا عنها و تتطرقين الها عزيزتي........على سبيل المثال..فستان العرس..اذا سمحتي اختي ممكن تخبرينا اختي عن اماكن مصممين معروفين يصممون فساتين باسعار مناسبة جدا بحدود العشرة او الاثناعشر الف...لانه تعرفين معظم العرايس ما يحبون يأجرون و بصعوبة يحصلون و معظم الفساتين المأجرة يا بيكون فيها اثار المكياج او الطرحة مطرطرة من تحت و من هالسوالف اللي تعرفينها ...و خاصة العروس يهمها فستان العرس وايد و خاصة يوم تلبس شي يخصها و على ذوقها...مثلا في مصميمين يوم تروحين لهم يسألونج عن سعر الفستان اللي تبينه و على هالاساس يصممون لج؟ و من هالمصصمين وليد عطا الله ان شفت وحدة لابسة فستان من تصميمه باثنا عشر الف و كان بمنتهى الروعة احسن من وحدة تفصل بفستان بعشرين او ثلاثين و عقب يطيح بجبدها ...و ما تحصل حد يأجره......
اسفة على الاطالة عزيزتي ...و ان شاء الله نتريا تواصلج بهالخصوص..

هونج علينا حبيبتي الصرااحه توني اشوف الموضوع وحلوو واااايد وفعلالا مفيد للكل اللي بيعرسن واللي بعدهن للمستقبل تسلمين على المجهود
ويعطيج العافيه

والله الموضوع مفيد .... وانشالله يستفيدون المقبلات على الزواج ... أما عن نفسي عرست وخلصت واحتست حووووووووسة كبييييييييييرة لين ماقررت أي صالون أسير وشو أسوي وشو أشتري ..... إييييييييييييييييييه والله أيام كانت حلوة و متعبة في نفس الوقت ..... :shy:

سلالالالالالالام

مشكورة أختى وماقصرتى

والله يعطيج العاااااااااافية

:clap: :clap: :clap:

تسلمون الغاليات على الرد وااااااااااااايد..

خلونا نكمل اسماء المحلات الي أتأجر فساتين السهرات والاعراس والي اتفصل والي اتبيع ايضا..

--------------------------

المحلات الي في الشارع الرقه وأبوبكر الصديق:

* روزيتا.. لتصميم الازياء وتأجير وبيع..
* الثوب الوردي.. خياطه وبيع وتأجير وشراء..
* أماسي.. بيع وتأجير..
* الزفه.. بيع وتأجير..
* غلاديولي.. تصميم..
* رحمانيان..
* الغنادير.. تصميم وخياطه وتطريز..
* غريس.. تصميم الازياء..
* كوتور.. تصميم الازياء بيد مصمم الازياء شربل طنوس..
* دار الاناقه.. تصميم الازياء..
* رعودي.. ارقى التصاميم لفساتين الاعراس والسهرات..
* مابل.. خياطه وتطريز وتصميم..

وعن المحلات الي في الشارجه..

* رحمانيان.. فرعين واحد في شارع الوحده وواحد طريق دبي والشارجه شارع الوحده..
* الطرحه.. شارع الاتحاد طريق الشارجه ودبي.. تأجير فساتين الاعراس..
* كومو.. لتصميم الازياء.. مصمم حسان فيوري.. شارع الوحده..

----------------------------

هالمحلات الي رحتلها وخذت عنهن البيزينس كارد.. وبعضها حلوه وبعضها لا على حسب ذوقي.. ان شاء الله اتحصلون على الي تبونه منهم.. والسموحه على التقصير..

انتظر ردودكم :smile:

وينج يا ربشة ؟؟ فيدينا عن بوظبي ...... :D

مشكورة عزيزتي .... الموضوع شيق و ممتع ...
أكيد كل هذا احتاج منج جهد و بحث طويل ... الله يعطيج العافية:up:

تحياتي للجميع :

عاشقة كونان