مرحبا بنات شخباركم كلكم ..
اول مرة برد عليكم في هذا التجمع لكن بعضكم ايعرفني ..
المهم آنا بحاول ارد على اللي اتذكره لأن ما شاء الله عليكم ما قصرتون في الصفحات وكل موضوع غير عن الثاني ..
موضوع الحمل .. هذا اول شي بكتبة رب العالمين عزوجل .. واللي يصير لها من البداية لا تقول لاء ماني مستعدة او مو متأهله لأن محد يعرف الصلاح لج كثر رب العالمين .. ولا وحده تقول بخليها سنه لأن هذا كله بعلم الغيب .. فاي وقت جى حياه الله ..
موضوع اللي يسألون متى الزواج وما ادري شنو .. هو صح الموضوع يضايق من كثر تكرار الاشئلة ومن نفس الاشخاص لكن في طريقة احلى للرد انه الواحد كل شي بيد رب العالمين ووقت اللي يأذن لنا راح ايصير الشي .. لأن قريت من خلال ردودكم اللي وحده عصبت وقالت انه عطونا فلوس وبنتزوج مو حلوة في حقها ولا حق زوجها .. يعني الناس بتأخذ عنها فكره إنها قليلة أدب مع إحترامي للجميع بس ما يسوى لأن الناس ما تذكر الزين كثر ما تذكر الشين ..
وموضوع المتزوجات اللي يعانون من اهل زوجهم .. الله يعينكم الصراحه ...
من خلال زواجي تعلمت هاي الأشياء ..
اول شي لازم الوحده اتحط في بالها انها جاية من وسط عائلة غير عاداتها غير وسلوكياتهم غير يعني في التفكير مو في التربية وجذي وانها بتدش على ناس عاداتهم في التفكير غير وحتى الزوج لكن مع العشرة كلن ياخذ من الثاني ..
ثاني شي الزوجه لازم اتخلي لها حدود من البداية وي بيت زوجها بحيث لا اهي تتضايق منهم ولا اهما يتضايقون منها ..
ثالث شي عمرج لا اتقولين حق الزوج بيتكم سوا وبيتكم فعلوا لأن إذا حطاج في كفة الميزان وياهم بتكون كفتهم الرابحه .. لكن حاولي اتكونين ماسكه زمام الأمور من النص بحيث ترضين زوجج وترضين العائلتين علشان محد يتحسس.. وفي منها كذا طريقة ومن خلال هالقصه بتعرفون وحده من الطرق ..
كان فيه تاجر كويتي (مع احترامي لجميع الكويتين ) وكان من عائلة معروفة وعنده 6 اولاد و4 بنات وكل اولاده متزوجين من أبناء وبنات اصدقائه التجار والهوامير مثل ما نسميهم الا واحد منهم وهو آخر واحد .. هذا الصبي وخلي انسميه (س) كان يحب وحده من بنات العائلة المتوسطه واللي تمثل للعائلات الكبيرة انهم فقراء المهم راح وقال حق ابوه انه آنا ابي اخطب وطبعاً الابو حاله حال الابهات فرح وقاله بتاخذ بنت بو ضاري والله بنت بو مشعل والله بنت بو يوسف ؟؟؟ قاله لاء آنا في بالي وحده وهي بنت من بنات بوعبدالله من هالعائلة الفلانية .. الأبو قال له اول مرة اعرف هالعائله شنو يشتغل ابوها قاله موظف بسيط في القطاع الخاص قاله شنو؟؟؟؟؟؟؟ تبي تتزوج وحده مو من مواخذينا ؟؟ ومو من ثوبنا ؟؟ قاله يا يبا الرسول عليه افضل الصلاة والسلام قال : " من ترضون دينه وخلقه فزوجوه " وتم الابو رافض الفكرة وكل ما يروح الولد ويقوله عن هذا البنت يرفض والولد ما استسلم وتم ايحن فوق راس ابوه لمده سنة وانص لحد ما آخر شي رضى وتزوجو .. والأبوا كان يعامل هالبنت معامله سيئة وحتى الاخوان والخوات وحتى الأم كانوا يعاملونها اخس معامله يعني حتى خدمهم ما يعاملونهم مثلها افضل منها والبت كله صابرة واتقول ما عليه علشان زوجي وعلشان زوجي الى حد انها الله يعز السامع توقف عند رجوله وتلبسه نعاله وبعد مو عاجبه ولما تطبخ اول شي تودي حق بيت عمها وبعد ما ياكلون من عندها وياخذون الأكل ويقطونه جدام عينها في الزبالة الله يعز السامع الى حد ما جى يوم من الايام والابو طاح بغيبوبة وأولاده وحريمهم وبناته وأزواجهم كانوا ايروحون له في البداية بس اول يومين وعقب تمللوا لكن زوجه ولده تمت اتروح له كل يوم وتخيلو الابو تم في الغيبوبة يمكن 8 أشهر ومحد كان يهتم فيه الا هذه البنت كانت اتسوي له الأكل وتحضر معاه الجلسات العلاجية وكل شي اتسويه له .. وبعد ما طلع من الغيبوبة تم متحسف على اللي سواه فيها وقرر انه يكتب لها البيت اللي عايشين فيه باسمها ومع بعض العقارات ومبلغ كبير في البنك على الرغم من معارضة الابناء والبنات له الا انه اهو مشى اللي في راسه ليش ؟؟ وصار ما يرضى عليها وصارت اقرب له حتى من بناته واولاده ..(وهذه قصة حقيقة آنا اعرفها لأن سمعتها من وحده من اهلي هذه اتصير صديقتها )
لأن المعامله الحسنه حتى إن طال الزمن مردها اتخلي الانسان ايلين .. بتقولون تعبتون وما ادري شنو لكن بقولكم علشان راحتكم اتعبوا اشوي والشي ما يجي بسهولة لآزم ايجي مع عده محاولات يعني مرة تفشل ومرة تنجح .. وإذا فشلت التجربة مو معناته اه النهاية لاء بالعكس معناته البداية لطريق النجاح .. فانتوا حاولوا معاهم بس بطريقة ذكية بحيث انها تحفظ لكم حقوقكم وواجباتكم معاهم ونفس الشي معاكم ..
مونزي حبيبتي الزوج إذا عصب ما يحب زوجته تحن فوق راسه .. خليه يرتاح وعقب كلميه بالطيب وحاولي ما تفتحين الموضوع بطريقة مباشرة معاه وعلشان الاعتذار حاولي تسوين لج طريقة إعتذار بدل كلمة سوري لأنها لاعت جبده منها على حسب كلامج ولا اتقولين له سامحني وما ادري شنو لكن في طرق ثانية تعبر عن الإعتذار ومنها ..
تقدرين اتروحين له البيت ومعاج باقة ورد حلوة وهدية بسيطه
وفكرة البحرين نور بعد حلوة
تقدرين اتطرشين له رساله غزل بس بإعتذار بس ما تتضمن كلمة سوري
تقدرين اتعزمينه على عشا او غدى في مكان حلو او تقدرين تطبخين لكم طبخه حلوة وتجهزين السفرة بطريقة رومانسية
تقدرين بعد تاخذين له هدية مالت حركات هبله يعني مثلاً تاخذين له مخده وتحطين عليها عبارات إعتذار بس بغزل واتحطين في وسطها صورتج
وايد افكار عندج بس لا تحنين على راسه لأن الشي بيكبر وخليه يهدأ على راحته بس مو تنسينه في نفس الوقت يعني خليه يهدا مع بعض العبارات الحلوة والله يسخركم حق بعض إن شاء الله