لمة الليبيات لشهر شعبان 1431 - 2010 م

QuEEn of icE;12851206:
يلا تصبحو علي خير يازينات غدوا عندي مشية للبحر ......

بيكاتشو;12853766:
لو سمحتوا ممكن تعطونى طريقة الفطيرة متاع هيولة

جاى خاطرى فى فطيرة من الصبح ههههههههههههه

Hayela;12817004:
لالا يا هنو مش هادى



اهو خودوا الطريقة وجربوها والله حتعجبكم انى توا كيف كنت مدايرتها وتوا ناكل منها ههههه :worn_out:


صونية ليمونى بتحطى فيها الدقيق .. انى ندير فى نص كيلو اديرلى فى حوالى 15 طرف او مرات ندير كيلو ادير 30 طرف .. وطبعا العدد يتغير على حجم الفطيرة ..

بترشى عليه الملح وطبعا عينك ميزانك .. حوالى كاشيك كبير لو كيلو دقيق .. ونص كاشيك كبير لو نص كيلو .. بس انتى حاولى ادوقى وزيدى او نقصى .. انى الحق نحبها تبدا مالحة شوية ..

تخلطى الدقيق والملح وتصبى حوالى طاسة مية فاترة .. مش سخونة ولا مسقعة تبدا عادية وتبدى تعجنى .. واحسن طريقة للعجن انك تمسحى لو عندك رخامة فى المطبخ وترشى عليها دقيق وتبدى بكانك تغسلى فى فوطة .. مش عارفة وصلت ولا لا ههههه .. يعنى تبدى شادة العجينة بايد والايد التانية ترفعى بيها العجينة القدام وترجعى التالى وتعاودى بكانك تحكى فى فوطة هلبا مرات لين تحسيها تبدا زى المستكة وناعمة زيدى اعجبنى زيدى متاع جو خمسة او عشرة دقايق عجن مستمر ..




خلاص كوريها ولفيها بكيس نايلو طبعا بدون دهن ولا زيت ولا شى .. وخليها بزبط 10 دقايق ترتاح .. على ماغسلتى الماعين ..



بعدها اتحطى بحداك صفرة وابدى كورى كور كبار شوية مش زى البيتسا اكبر شوية يعنى تبدا زى كورة التنس البيضة .. وحطى فى الصفرة تكون مدهونة شووووية .. لما تكملى خليها حتا بدون ما تغطيها لمدة خمسة دقايق ..



فى الخمسة دقايق هادى بتسيحى زبدة مادابيك مالحة .. انى ندير فى نص بانيو كامل لما كيلو دقيق .. ولما نص كيلو حوالى كاشيكين كباااار زبدة .. سيحيها وزيدى عليها شوية زيت نباتى .. وحطيها على الرخامة فى صونية .. وبحداها حطى صونية فيها سمدينة (سميد) انى ندير فى متوسط لان فى تلاتة انواع واحد رقيق وواحد متوسط وواحد غليظ .. احسنهم للفطيرة المتوسط او حتا الرقيق حلو .. وكل مايكون السميد اغلظ بتجى الفطيرة مقرمشة ..

بتبدا بتاخدى اول كورة .. تدهنى الرخامة بزيت نباتى وتحطيها وتفطحيها وتدهنى بالزبدة السايحة اللى مخلطة بالزيت .. وتفطحيها لين تبدا شفااااااااااافة ورقيييييقة لين قريب تشوفى الرخامة .. وهنى طبعا حتكتشفى عجينتك كويسة ولالا .. لو ولت كبيرة وشفافة ومتشركتش معاناها ممتازة بس لو قعدت تتلبز وتتفترش معاناها نص نص ..



المهم بديريلها دهننة زبدة وترشيها كلهااااا بالسميد مش هلباااا طبعا بس رشى كل الفطيرة على كبرها .. وبتاخدى اول جهة وتسكريها للنص بس مش توصليها للجهة التانية ,, مفهومة ؟؟؟؟ .. وبعدين الجهة التانية توصليها للجهة الاولى بيتلاقو فى النص .. وبعدها التالتة وبعدها الرابعة بنفس الطريقة يعنى بكانك اطبقى فى بطانية .. مش عارفة وصلت ولا لا ..









المهم كل ما تغلفوا جهة ديروا دهنة خفيفة بالزبدة .. وخلاص .. توا ولت زى المربع ... ديروهم كلهم وامشو ولعوا الغاز على طاجين كبير .. وديريله دهنة اقل من خفيفة بزيت نباتى .. يعنى مش دهنة تعتبر رشششة وادهنيها بيدك .. وخليه يسخن كويس ... وخليها النار متوسطة مش قويييييييية هلباااااااااا ومش ضعيفة لازم تميل للقوة .. وبدى خودى بالمربع فطحيه من جديد وحطيه يطيب توانى واقلبيه الجهة التانية وقيمى ..



وكل وحدة تحب بدرجة معينة من الطياب انى منحباش محروق هلبا ومنحباش ابيض هلبا يبدا دهبى داااكن حلووو .. وستفى فى الصونية وغطيها كل ماتحطى كل غطيها الصونية بفوطة ..


خلاص تمت ههههه والله زى العسل جربوها .. :thumbs_up: راجلى عقللله وشادها فى جرتى كل يوم يقولى ديريها