.،. شسوي ؟ أنفصل يعني ؟؟ .،.

بحرينية

نصيحتي انش تحاولين تطلعينه من هالجو
مو لازم تتطلعون تتعشون او تصرفون واجد
روحوا على البحر او البلاج
طلعيه من عزلته لا تخلينه
و بعدين حاولي انش تدورين ليه شغل بمساعدته
و صدقيني لين عدت هالمشكله على خير و اشتغل بيرجع مثل ماكان
و بيحبش ازيد من قبل و بيتمسكفيش لأنش وقفتين وياه

ترى مو سهل الي هو فيه خيو

و انتين لا تكسرين مجاديفه
كله قوي من شخصيته و من ارادته
و انشاء الله كل شي يتصلح

بس عندي سؤال وين كان يشتغل خطيبش
يعني وين شغلته ؟
يعني دارس و متخصص؟
و ما يبي اي شغلة و السلام ؟

اللي قاعدين يلمون البنية تراها ما تنلام .. لانة ظروفي مثل ضروفها ..

انا عرفت زوجي باسبوع وتقدم لي بالاسبوع الثاني والاسبوع الثالث عقدنا وعقب شهر ونص زواجنا .. بس لا تتهجمون على البنية في انها سلمت نفسها ترى كلش عادي لا عيب ولا حرام وهذا بعقد بسنة الله ورسوله .. ما سوت شيء غلط .. وانا حملت من الخطوبة بعد وكنت قاصده الحمل لانه ابي بيبي ..

زوجي كان يشتغل واللحين من كثر التنقلات يصير فترة طويلة في البيت قاعد ونفس الشيء على الاب توب والتلفزيون والبلي ستيشن ..

انا اساعده ما عندي مشكلة بس بعد احياناً اقول له ابي جذي وجذي سو لي جذي علشان يحس شوي بالمسئولية ..

يعني قلت له ابي تلفون ولا تقول لي بيعي تلفونج قال لي ان شاء الله اشتري لج ..
قلت له ابي اسافر السنة ايران او المدينه المنوره قال لي مو مشكلة بعطيج فلوس .. قلت له ابيك تجدد جوازي وتسوي جواز لولدي قال لي ان شاء الله ..

انا اضغط علية علشان يحس بالمسئولية

لا تفكرين في الانفصال ترا مو سهل عند الريال انه يكون خاطب ومايشتغل

حبيبتي صبري عليه وانتي على الاجر

يعني كانه الشغل بارز عنده واهو مو رايح

ياقلبي احنا في البحرين فلازم ينذل الواحد ذل على مايحصل شغل

والله يووفقج ويجعل لج اللي فيه الخير

انه معى راي البنات ، لا تفكرين بالطلاق ، طبيعي بيتغير و مزاجه بيتعكر لان قاعد بدون شغل و حاس بالنقص و الشغل هاي الايام ماتحصلينه بسهوله يبي له صبر ، انتي دورج اساندينه و لا تتخلين عنه بهاي الظروف الصعبه ،رفعي من معنواياته و انتي بعد كثري من الدعاء و الاستغفار و قيام الليل ادعي بتيسير الامور او حتى تصدقي لو بشي بسيط ، الصدقه تدفع البلاء

الله يسر اموركم حبيبتي

المشكلة ان انتون مفكرين السالفة سهلة ..
شلون يعني اطلعه من هالجو .. انزين واني من يطلعني من هالجو ؟؟
مو اني بعد متضايقة مثله وبسببه !!
تخيلو ان اهو قاعد يحملني السبب حق انه متضايق .. تصوروا ؟؟؟
يقول كنتين غير وماتخليني اتضايق قبل دقيقة وحدة الحين قاعدة تزيديني بالحنة وكله تصيحين .. مو بس جدي .. يقول انه اهو ماصار جذي الا لان اني بديت اتغير وكله اصيح فاهو تأزمت نفسيته !!
الحين يعني اني السبب في اللي انته فيه ؟ انته اللي بديت تتغير ومزاجك يصير مادري شلون فطبيعيا اني بتغير وياك بعد يعني بظل اتضحك واتنطط لك وانته مزاجك جدي عليي ؟؟

هاللي تقولون ليي طلعيه من هالجو .. انزين شلووون واني متضايقة منه اساسا ؟؟
يعين اهو السبب حق كل هالضيقة اللي اني فيها .. شلون اضحك وامزح وارجع اشاكس نفس قبل واني كل هذا فيني ؟؟ اني من يطلعني من ضيقتي ؟؟
سوري بنات بس جد يعني اني محتاجة من يحس فيني .. مو يزيدني ويحملني السبب !
ومشكورين كلكم على الردووود ..

يا عمررررري انتي يا حبيبتي

استهدي بالله وصلي على النبي

ابتعدي عنه يوم او يومين قولي له محتاجين نكون برووحنا ونعيد اوراقنا ونهدأ ونفكرر وبعدين نرجع لبعض

ارتاحي بعييييييد عنه وفكري عشان تهدأين

حاووولي تصلين على النبي وتصلين لك ركعتين صدقيني كفيلة بتهدئتك
وحاووولي لا تفكررررررين خلاص ووووووقفي لانه عارفه وحاسه فيج التفكير متعبببببب

توني طالعة من ازمه والله يسترررررر

حااااااسه فيج الغاليه

بس انتي حاوولي تزورين احد او تطلعين مع اختك او امك او اكتبي
يعني حاولي تكسري الروتين الي انتي فيه والتفكيرررررر الي ذابحه نفسج فيه

وحاولوا تقعدون مع بعض وتتفقون ثنينكم انكم تساعدون بعض بهالشدة وكل واحد يشجع الثاني انه ما يبتئس

والله وياااااااااااكم وبصراحة دعيت لك الغالية دعووة خاصة اول امس

ويارررررررررب ما يمر هالاسبووع الا تبشرررررينا عن احوالكم وانها تغيرت لاحسن حال يارب

اهتمي بنفسك وهذي مجررررررد فترررررررة وتكووون عابره باذن الله

اختي العزيزة يعني شنو تبغينه نقول لج انفصلي عنه ؟؟!!!

اللي المفروض تسوينه انج تخففين عنه و تتحملينه و لا تنسين ان هذا دور الزوجه و الام و اذا انتي من الحين ما تقدرين تتحملين مسئولية زوجج شلون بكره بتتحملين مسئولية اولاد !!!

ما عندج الا الصبر ثم الصبر ثم الصبر

و حاولي تطيبين خاطره

و اذا تحسين انج ما تقدرين تصبرين ولا مستعده تضحين القرار بيدج

و اسمحي لي يبين ان ما عندج صبر بالمره

صدق المادة ضرورية بس مو الى هالدرجة يعني انتي للحين مخطوبة تقدرين تدبرين روحج

و دام شريك حياتج في ازمة المفروض و لازم توقفين وياه

مع احلى تحية معتادة

^^
حبيبتي .. اول ش مشكورة على اهتمامش الملحوظ في مشكلتي !
عمري أني مشكلتي مو في المادة لاني الحمدلله عايشة ووضعنا المادي " بيت ابوييي " اوكي يعني فأني مو ميتة جوع وعندي بيزات اطلع واشتري وكل شي .. مو حاسة روحي ناقصتني المادة بالذات هالفترة !
خيوه اني كل اللي مضايقني في موضوع الشغل إن حياتنا بسبته مو مستقرة .. وعلاقتنا مو مستقرة بعد .. كل هذا بسبب الشغل .. اني كلش مو اللي شاغلني في سالفة شغل زوجي هيه المادة .. لان راتبه كان مو بزوده يوم كان يشتغل بس كانت حياتنا مشية صح وعلاقتنا ماشية صح يعني عايشين الوضع الطبيعي اللي يعيشونه اي زوجه وزوجها .. بس الحين علاقتنا كلما ليها تتدهور بسبة نفسيته وقعدته في البيت واللي انعكست عليي اني بعد !

ومشكورة خيوه مرة ثانية على اهتمامش ..

يا اختي لو نفرض انك انتي اللي بس تمري بظروف صعبه هل تتوقعين منه ان يتخلى عنك ؟ صدقيني في هالدنيا صعب واحد يحصل قلب يحبه وزوجش يحبش ، ساعديه هاذي ازمة وبتعدي مو محتاجة كل هالزعل ، لابد بيجي يوم وبيشتغل . صدقيني الدنيا فيها اشياء اهم ، من صبر ظفر

بحرينيـة 88;12503324:
المشكلة ان انتون مفكرين السالفة سهلة ..
شلون يعني اطلعه من هالجو .. انزين واني من يطلعني من هالجو ؟؟
مو اني بعد متضايقة مثله وبسببه !!
تخيلو ان اهو قاعد يحملني السبب حق انه متضايق .. تصوروا ؟؟؟
يقول كنتين غير وماتخليني اتضايق قبل دقيقة وحدة الحين قاعدة تزيديني بالحنة وكله تصيحين .. مو بس جدي .. يقول انه اهو ماصار جذي الا لان اني بديت اتغير وكله اصيح فاهو تأزمت نفسيته !!
الحين يعني اني السبب في اللي انته فيه ؟ انته اللي بديت تتغير ومزاجك يصير مادري شلون فطبيعيا اني بتغير وياك بعد يعني بظل اتضحك واتنطط لك وانته مزاجك جدي عليي ؟؟

هاللي تقولون ليي طلعيه من هالجو .. انزين شلووون واني متضايقة منه اساسا ؟؟
يعين اهو السبب حق كل هالضيقة اللي اني فيها .. شلون اضحك وامزح وارجع اشاكس نفس قبل واني كل هذا فيني ؟؟ اني من يطلعني من ضيقتي ؟؟
سوري بنات بس جد يعني اني محتاجة من يحس فيني .. مو يزيدني ويحملني السبب !
ومشكورين كلكم على الردووود ..

شي طبيعي اختي تحسين بضيقه وتعب بس هو متضايق وتعبان اكثر منش

يعني لازم توقفين معاه تساعدينه تقولين له كلام يطيب خاطره ويشجعه عشان يدور على شغل ولين راح مقابله حاولي تخلينه يتفائل قولي له بياخذونك وان الله مايضيع احد ومردها الظروف بتتعدل

بس كل شي بالصبر لازم يكون عندكم صبر وانتو الحمدلله مخطوبين حاليا يعني مو متزوجين وعندكم اطفال وتحاتين مصرفهم


في هالحال يكون الوضع اهون ادري انتي ماتبين احد يزيد همومش بس كلمة حق تنقال لازم توقفين وياه بهالمحنه هو محتاج لش اكثر من اول

وباجر لين تعدلت الظروف وحصل شغله زينه مابقصر وياش بشي وعلى طول بيتذكرش وبقول فلانه هي اللي وقفت وياي وشجعتني وصبرت على كل ظروفي

شوفي اشكثر بتكبرين بعيونه بس اذا قمتين تصيحين وكله متضايقه منه من اللي بيطلعكم اثنينكم من هالوضع ؟؟

على الاقل انتي اتحركي وحاولي تطلعينه من هالجو انتي زوجته وحبيبته وكل شي بحياته يعني اكثر شخص قريب منه ويقدر يرجعه مثل قبل واحسن


يارب يفرج همكم ويشتغل شغله زينه وتعيشون حياة هادئة وحلوة بحق محمد وآله

بحرينيـة 88;12504475:
^^
حبيبتي .. اول ش مشكورة على اهتمامش الملحوظ في مشكلتي !
عمري أني مشكلتي مو في المادة لاني الحمدلله عايشة ووضعنا المادي " بيت ابوييي " اوكي يعني فأني مو ميتة جوع وعندي بيزات اطلع واشتري وكل شي .. مو حاسة روحي ناقصتني المادة بالذات هالفترة !
خيوه اني كل اللي مضايقني في موضوع الشغل إن حياتنا بسبته مو مستقرة .. وعلاقتنا مو مستقرة بعد .. كل هذا بسبب الشغل .. اني كلش مو اللي شاغلني في سالفة شغل زوجي هيه المادة .. لان راتبه كان مو بزوده يوم كان يشتغل بس كانت حياتنا مشية صح وعلاقتنا ماشية صح يعني عايشين الوضع الطبيعي اللي يعيشونه اي زوجه وزوجها .. بس الحين علاقتنا كلما ليها تتدهور بسبة نفسيته وقعدته في البيت واللي انعكست عليي اني بعد !

ومشكورة خيوه مرة ثانية على اهتمامش ..

هلا و الله
الحمدلله اكو تقولين ان المادة مو هي المشكلة ...

يعني الحل بسيط و واضح وضوح الشمس

كل اللي عليج تسوينه انج تحاولين انج تتجاهلين ضيقتج شوي و تاكدي ان الله ما راح ينسى لج هذا الشي ...

تجاهلني ضيقج و حاولي تطلعين زوجج من اللي هو فيه بكلمة حنونة
بنظرة عطوفة
بلمسة حب
و الكل يدري ان متى ما المرأة اهتمت في زوجها يدوخ و يصير خاتم في اصبعها هديء الوضع حبيبتي ... تقربي منه .. احتويه .. لميه ...

حسسيه ان هو كل شي بالنسبة لج و ان مهما صار راح توقفين معاه ..

طلعوا غيرو جو مولازم تصرفون في الطلعات تقدرون تروحون تتمشون .. تتفرفرون في المجمعات .. اذا جفتي شي و عجبج في محل من محلات المجمع طالعي زوجج بنظرة طويلة شوي و قولي له ...

يارب الله يرزقك و تقدر تجيب لي كل شي احتاجه و ما احتاج الى احد غيرك

هاذي الكلمات البسيطة تسوي مفعول سحري
و تحنن قلوبكم على بعض

خيتو تحملي في زوجج و مسئوليتج ان تطليعينه من اللي هو فيه الحين

و طمنيني عليج

مع احلى تحية معتادة

السلام عليكم

ان شاء الله تكونين الحين بحال أفضل .


استبعدي فكرة الطلاق مو لأنك مو عذراء ، المطلقة طبيعي ما تكون عذراء و ما ينعد عيب فيها ، بس لأنه باين عليه فعلا يحبك و متمسك فيك ..


اصبري و شجعيه و حسسيه انك معاه بكل خطوة يخطيها ، اذا يضايقك استخدامه المتكرر للنت او الافلام شيليهم و اطلبي منه بإسلوب حلو انه يقلل منهم ، و اطلعو تمشو في مكان مفتوح ، مثل ممشى او حديقة ، و تذكري انه دائما انه بعد العسر يسر .


و خلي دائما ببالك (( خذوهم فقراء يغنيهم الله من فضله )) ..


و الله يوفقكم .

حبيبتي الحااه الززوجه لاززم اي طررف يتناازل

تناازلي انتي ولاتشدين عليه اكثر صبرري والله سبحاانه وتعالى بيسرها

لج ....

...

الله وياش ويهديكم ويرزق زوجك الوظيفة ويسعدكم يارب

هلا حبيبتي لانك بنت ديرتي قريت كل الردود وماطاوعني قلبي اطلع قبل ماارد

شوفي حبيبتي وسوري اذا بطول بردي عليك

انا حاسه فيك تماما لان صديقه عمري تمر بنفس ظروفك بالضبط وانا اقرا احسها هي اللي تتكلم

هي حبت واحد وخطبها وبنفس الاسبوع بدت مشاكل شغله ومنها بدا يتغير وصارت وايد مشاكل بينهم

البنت مو صغيره عمرها 28 وطول عمرها تنتظر واحد مثله ولما لقته شوفي شنو صار تحبه موووووووووووت وهو بعد

ومثل ما قلتي عن خطيبك صارت نفسيته دمار وصار كانه يطلع الحرة فيها لانه يشوف بنت جميله ودارسه وظيفه محترمه وسياره اخر موديل وبنت عايله وهو مو قادر حتى يصرف على نفسه حتى سيارته اضطر يبيعها والله صديقتي حاولت معاه بكل الطرق غضت النظر عن اشياء وسامحته وحاولت تغير جوه ماتت وهي اللي تسأل وترتب طلعاتهم مافي فايده مو قادر يطلع من الازمه
عمره ما عايرته بالعكس قالت له بالصبر وبتحمل وقفت معاه وحاولت تدور معاه وظايف ولا عمرها زعلته تدور رضاه


واهله طبعا ما يعرفون كل شيء بس اهلها يعرفون وابوها قال انه يبي يكلمه قالت لابوها انه يعز عليها تخلي ابوها ينزل روحه وكرامته حق واحد مو مهتم فيها نهائي..ما يسأل ما يتصل ولا يدري عنها واذا اتصلت بين وين وين كله يتكلم عن الشغل وبعدين يقول لها تحملي بروحج ويسكره تخيلي ..

المهم انها الحين تقريبا 3شهور في عذاب تخيلي امها بتموت حسره على بنتها وعايله الولد واثقين في ولدهم وكل ما سألوه عنها قال اوكيه اوكيه الحمد لله ومو مخليهم حتى يسألون عنها ، عاد ما تتخيلين شنو حالتها 3 شهور كله صياح والم وقهر مكسوره البنت ومقهوره تعرف انه يحبها وماقصرت معاه بس هو مو قادر يشوف نفسه ضعيف جدامها ..حاولت توقف معاه بس مو معطيها هالفرصه الحين ماعندها غير الصياح طبعا محد يعرف هالشيء غيري لانها ماتحب تكون ضعيفه جدام احد ، والدعاء وتقولي ادري متأكده بيرجع لي لانه احنا نحب بعض .. وانا اتمنى من كل قلبي انه تتيسر امور خطيبج وخطيبها ويارب تفرحون وتكون هالفتره شدة وتزول ..حبيبتي انا صديقتي قررت الانفصال وخبرت بيتهم بس للحين عندها امل كبييييييييييييييييييير انه الوضع يتصلح ويرجعون مثل قبل ..تقولي مستحيل اكون لغيره او يكون لغيري تشوف الدنيا كلها فيه..

بس الفرق انه صديقتي خلاص ما صارت تتصل ولا تسأل فيه تخيلي صار لهم شهرين وشيء ما شافو بعض ، تقولي مو قادره انزل نفسي اكثر بس ابيه يحس من نفسه محيرتني معاها مره تقولي انا احبه وبموت بدونه ومره تقولي اشلون يسوي فيني جذي ومره تقول مااقدر اعطيه شيء لانه وايد مقهوره منه .. ادري صعب على البنت تعطي انسان وايد المها وجرحها والقهر انها تحبه وتدري انه يحبها .. بس سبحان الله .. لكل شيءحكمه وصلاح يمكن فتره علشان تشوفون اشكثر تقدرون تتعايشون مع بعض .. المهم لا تطلبين الطلاق وانتو سعيتو للحلال وربي ما بخيب املكم فيه ادعي ربينا يسخر ه لج ويرزقه..

مااقدر اقولج انفصلي الا لما تحسين انه بايع وتحسين انج بتتعبين معاه وانه ممكن عند كل مشكله يتغير عليج مو علشان ظروف ان شاء الله وقتيه.. مع انه المفروض المشاكل تقوي العلاقه وتقرب والمفروض انج ملجأه الوحيد بس الشباب تفكيرهم غير عنا واصعب شيء عندهم سالفه الشغل ترا شيء يمسج رجولته ..


يارب يفرح قلبج وقلب صديقتي ويجبر بخاطركم يارب ويعطينا كل ما نتمنى

عزيزتي وضعنا في البحرين معروف من ناحية الوظايف
و اليوم الواحد يشتغل في وظيفةحكومية و مو قادر يصرف على بيته يضطر يشتغل شغل ثاني العصر ما يحتاج اشرح لج وانتي ادرى بالوضع هني
مو سهل على الرجال انه يحس بالعجز انتي الي عايشة معاه و عارفة معدنه و هني يبقى عليج اتخاذ القرار
تقدرين تتعاملين مع كونج مطلقة مع تضاؤل فرص الزواج قدامج لأنه مدخول عليج؟
تحسينه انه يستحق الصبر و الوقفة معاه؟
فكري وجاوبي على هالسؤالين و اخذي خيرة و بعدها قرري

و كلمة اسمعيها مني
انتي في حالة نفسية متأزمة بس انتي الحين زوجة مو بنت لو صحتي ابوج راح يركض يداريج بس الزوج لا يحتاج تكتيك أكبر و يحتاج انه الوحدةتكون ذكية علشان تسحب منه اللي تبي و ترى المرأة عندها القابلية انها تلعب بمخ الرجال مهما كان صعب و تسحب منه اللي تبي و هو يضحك بعد
الرجال تفكيرهم قد يكون أناني نوعا و مختلف عنا بس اللي لاحظته في حياتي الزوجية انه المرأة هي اللي تصنع السعادة في البيت
أدري انج متضايقة و تبينه يسندج و يطلعج من الحالة اللي انتي فيها بس هو بعد مثلج و الوضع اللي انتوا فيه سببه الوضع السياسي في البحرين يعني حطي في بالج انه لا ذنبج و لا ذنبه
جربي بكرة قولي له بكل هدوء و رومانسية حتى لو تصنعتيها غصب
انج حابة تغيرين جو و تبتعدين شوي فترة اسبوع مو اكثر علشان ترجعين له اكثر قوة و عندج طاقة حب و هو بعد محتاج يبتعد
خلج في بيت ابوج اسبوع و دلعي روحج اطلعي روحي الصالون سوي نيو لوك اعزمي صديقاتج سوي مساج حق الريلاكس لا تحسينها تفاهات ترى و الله العظيم تأثر و أنا متزوجة من سنين و مريت باللي كنتي فيه و أكثر و أنا أخبر منج
و كل اثنين متزوجين في بدايةحياتهم الا ما تمر عليهم هالفترة و الا ما يمر طاري الطلاق و الندم مع اختلاف الظرف
عاااااااااااااااااااادي
ارجعي له بعد هالاسبوع
وخلي تفكيرج ايجابي
يبيج تنكتين و تلعبين سوي اللي يبي
اضحكي و نكتي على وضعكم
اضغطي على روحج شوي
و صدقيني راح يرجع لج مثل قبل و احسن و راح يذكر لج هالوقفة ويوم ما تحتاجينه راح تلقينه
و الشغل الا ما يلقاه طال الزمن لو قصر
و ترى ما في شي يسوي نجيب لروحنا امراض نفسية علشانه و لا في شي يسوى ننقهر و نصيح ليل و نهار عليه
و في نفس الوقت ابدئي تسحبي شوي شوي
بدل ما تروحين شقتكم كل يوم روحي يوم و ترك تصنعي الانشغال
بدل ما تباتين كل ليلة خليها ويك اند بس و اقطعيها اسبو اي و اسبوع لا
انسحبي من حياته شوي شوي بس مو تصنعين فجوة لا .. خلج ذكية خليه مشعلل و مشتاق و في نفس الوقت مو طايلج
فاللي راح يصير انه بدل ما يتشرط و يتهاون راح يشتغل في اي وظيفة يلقاها بس علشان يتمم الزواج و تصيرين معاه في بيت واحد على طول
و انتي و حسن تدبيرج
شغلي كيد النسوان و طمنينا عليج

اللهم صلى على سيدنا محمد كما صليت على سيدنا ابراهيم وبارك على سيدنا محمد كما باركت على سيدنا ابراهيم فى العالمين انك حميد مجيد

استغفر الله الذى اله الاهو الحى القيوم واتوب اليه

حبيبتى الزمى الاستغفار فهو عجيب فى تفريج الهموم والكروب

بنصحج نصيحة من قلبي لاني حطيتها روحي مكانج
عمري اصبري ماعليه الوضع صعب بس انتي تدرين الاشغال في البحرين صعبه تتلاقى بسهوله وانه صار لي 6 شهور ادور على شغل وللحين مب محصله بس ان شاءالله بحصل وبتكونين معاه
صدقيني حبيبتي اصبري وكوني معاه خطوة بخطووة ولاتعايرينه لان هالشي يجرح كرامته ويحزز فيه ولاتحسسينه انج تعبانه من هالوضع قولي له انا بصبر عشانك عشان لما تحصل شغل تعووضني ونكون اسعد اثنين ,, ومالي هو مالك .. وفترة وتعدي وبعدين تحسين روحج ملكه
اما اذا انتي بتمين جذيه كل تعبانه لان مايشتغل وبتعبينه اكثر وبتعايرينه اكثر لا اهو بيتحمل ولا انتي بتتحملين
بس حاولي تغيرين نفسيتج وتفكيرج وخلي تفكيرج ايجابي عشان يتغير تفكيره حبيبتي وتفاءلوا بالخير تجدووه
وان شاءالله ينكتب لج الخيير بكل خطوة انتي وخطيبج