.،. مو طايقة خطيبي ولا طايقة عيشتي !! .،.

تعبت خلاص;12279335:
انزين ليش ما سجل كعاطل عشان ايصرفون عليه التأمين ضد التعطل وايدورون له شغل؟ يعني اهوه ريال ويقدر يشتغل اي شي، عكس البنت الي بتحاسب حق دوام ومكان شغل وووو....

بلى سجل وعرضوا عليه وظيفة بس الوظيفة مارضوا ياخذونه لانه دون الـ 25 سنة ،
وماعرضوا عليه غيرها لحد الحين ..
وراتب التعطل مامشى لانه للحين ماطاف شهرين من سجل !

إحساس قلمـ;12279894:
السلام عليكم ورحمة الله وبركاته


أولا أختي ومن بداية أقول لج شئ اسمه طلاق لاتفكرين فيه إلا اذا انتي موقد المسؤولية لتحمل الظروف، لانه الزواج شئ مقدس والطلاق شئ عظيم بس للاسف بزمننا تهاونوا الناس وصار الطلاق لأتفه الأسباب.

بسألج شنو الشئ الي صدق يستحق الطلاق من أجله؟ هل زوجك والعياذ بالله بشرب الخمر أو مايصلي أو متابع بنات الهوى أوخاين أو أو... أختي ترى فيه أزواج موجود فيهم أبشع الصفات والأعمال مع ذلك زوجاتهم صابرين وبل جاعلين نفسهم ستر وغطاء لهم.

شئ ثاني صح اذا الزوج عاطل شئ جدا صعب على الزوجة بس أختي ترى مو نهاية العالم ولازم تفهمين انه واقع البطالة على نفس الزوج أقسى منها وخصوصا انه الي يتحمل المسؤولية وشئ طبيعي راح يتغير تصرفاته وتعامله ونفسيته فالموضوع يحتاج من الطرف الثاني تفهم الوضع قدر الامكان والتفاهم مع الطرف الثاني بشكل ودي وعساه يكون وضع قصير الأجل ينتهي وترجع المياه لمجاريها وأفضل.

دائما فكري انه مافيه شئ كامل بهذه الحياة لاعلا بالج انه الأزواج مرتاحين بكل الوقت دائما مثل الأمواج يوم فوق ويوم تحت هذي الحياة تحتاج مرونه، أنا انصحج بالاستغفار والبحث عن أفضل الأشياء الي تحافظ على رابطة زواجك خصوصا انه من خلال كلامج انه يمكن تطورت العلاقة لتخرج من اطار الخطوبة.

ولاتزعلين على الشقة ولا على مملكتج لانه استخدمتينها لانه الأسواء انج تهدمين هذي المملكة.


أنا دائما انصح الجميع وخصوصا اصحاب الظروف انه يداومون على قرأت سورة البقرة مدة 40 يوم ويستغفرون وانصحج بها بعد، وحاولي انه يسجل بالعاطلين والله يفرج لكم ويسير أموركم لما فيه خير وصلاح

حبيتي كلامج ريحني وهدأني وايد ..
هوه فعلا ما سوى شي من الكبائر والعياذ بالله او انه يضرب او شي من هالاشياء .. لا اهو مافيه هالسوالف واحسه يحبني بس الظروف حولته لوحش كاسر .. ساعات يرجع حنون شوي وماياخذ له شي ويرد مثل قبل على افكاره وسلبيته ،
وبالنسبة حق غني اتفهم الوضع .. انا متفهمة الوضع وواقفة وياه .. حتى وحدة من اهلنا صار ان زوجها فنشوه وتركته وطلبت الطلاق .. اما اني لااا .. واقفة وياه وادعي ربي بس الشي زاد وااايد واهو صار شخص غريب .. لا يحتمل !
وبالنسبة للشقة خيوه .. والله حازة بخاطري ومستحيل اتنازل عن هالموضوع .. ماراح اعيش فيها الحين مستحيل .. اذا رحت بيتهم يمكن اقعد مع خواته وامه اما الشقة مابقعد فيها والله حاولت بس تجييني الصيحة كلما اتذكر عرسي وان هذي حق عرسنا .. مايصير نحرق كل شي في الخطوبة بعدين الزواج يصير ماله لزمة !!
تسلمين عيوني على ردش اللي ريحيني وهدا نفسيتي ^_* ،

ŚũҝąЯ Ŋă3m;12280006:
الغالية بقولك شي .. معظم الرجال لو استقالوا او تقاعدوا او اضطروا يطلعوا من وظائفهم حتى لو براضهم .. هالشي يأثر كثير بشخصيته

لان في مجتمعاتنا هذا هو الدور الاساسي للرجل .. تخلي انه فقد هذا الشي .. طبيعي بيحس بالضيق والنقص .. وانتي منفذه

بس ردت فعلك انتي صحيح حلوه ولكن ما تنفع انها تكون دائمه .. يعني غلط انك تكوني المعيله له .. مارح يحترمك لانك اخذتي دوره .. ولان عندك انتي شي هو الاولى فيه(الشغل) .. هذا تفكير الرجال

انا اقول اولا لازم تضغطي عليه بانك ترجعي لدوام واحد اذا كنتي تشغلي دوامين ..
ثانيا اقطعي اي مصروف ينصرف على الشقه ولا عليه .. طبيعي يسكن في شقتكم .. محصل عيشه مجانية .. ولا انه ياخذ من اهله
ثالثا اقنعيه يشتغل اي شغله بسيطه .. تشغله عن وقت الفراغ اللي هو عايشه واحكمي من بعدها على شخصيته

واتمنى انك تقطعي روحتك للشقه .. وقوليله عن السبب ... دام لاقي كل شي طبيعي مارح يتحمس للزفاف

خليه يحس من المسؤولية في هالفتره .. ولا تستعجلي بقرار الانفصال .. باذن الله هذي ضيقة في نفسه بسبب وقت الفراغ الكبير ولما يشتغل كل شي يرجع احسن من الاول

حبوبة تسلمين على ردج ..
بس قلت من قبل وارد اعيد ترى انا ما اصرف عليه ولا اعيله ولا شي ولا اعطيه ولا فلس .. اساسا اني توني مشتغلة واهو مايرضى ياخذ مني شي .. عمره مارضى بهلاشي ،
ولا اصرف لا على شقة ولا غير شقة ،
فلوسي لي وبس ،

الله ييسر امورج انشالله
يارب يشتغل ويتعدل حالكم للاحسن :)
انا متوقعه من كلامج ان متغير لانه تعبان نفسيا من كثر التفكير بالشغل
وانشالله تتيسر وتعود المياه لمجاريها ;)
وهالله هالله بزوجج .. شكله يحبج ويبي يحافط عليج :)
اوقفي معاه مره ومرتين وثلاث
موفقه انشالله ;)

حبيبتي خلي نفسك مكانة شلون بتحسين ؟

اتوقع تغير شخصيته شي طبيعي من الضغوطات والاحباط اللي يواجهه

وانشالله تتيسر اموركم ويحصل شغل

انا مش فاهم ازاى مخطوبه وقاعده معاه فى الشقه ازااااااااااااااى وانت كمان اللى بتشتغلى وتصرفى عليه طب واهلك فين
مش عارفه حاسه انى فاهمه الموضوع غلط استحاله يبقا فى كده

والله حبيبتي مااعرف شنو اقول لج

واللة وضعك صعب يمكن أقول كلام يضايقك بس هذي الحقيقة
لو سمعنا القصة من وحدة متزوجة وعندها أطفال بنقول اصبري عشان أطفالك لكن إنتي باقي على البر في البداية حاولي فية قد ماتقدرين ناقشية بهدوء واسألية نهاية الوضع وش بيكون اذا عندة حل ومهتم معناها اصبري واللة يعينك لكن اذا عاجبة الوضع ومايبغى يغيرة فآسفة بأقول لك اذا انتو باقي مخطوبين وكل هذي المشاكل فكيف بيكون الوضع بعد الزواج والأطفال
ولكن أكيد انتي تعرفين وضعك أكثر وأسأل اللة ييسر أمرك ويوفقك

حالتج تكسر الخاطر خيوه عورتين قليبي
ليش ما تتطلعون تروحون مكان هادي وحليو وتبتدين تكلمينه على الي صاير
وتفتحين قلبج له قولي لي فهميه علميه قولي له ترضى بحياتنا جذي راضي بروحك جذي بدون شغل ولا مشغلة ترضاها علي اشتغل دوامين واتعب وانت قاعد جذيه قولي له مدام احنا على وجه زواج ليش هالمشاكل بندخل مرحلة جديدة لازم انكون احسن من جذيه
وبالنسبة لمعاملته لج لا ترضينها على نفسج كلميه مرة ومرتين والف ولين ما نفع قولي لي تبي تروح انت في طريق وانه ف طريق وين المحبة والعشرة الي كانت بينا ف بداية الخطوبة
ذكريه بالايااااام الحلوة الي بينكم
وحاولي تكونين لينة وياه لان اهو يمر بظروف صعبة من ناحية العمل لا تضنين انه راضي بالوضع لان وراه مسؤولية الي اهو انتي بس من طبيعته لصبيان ما يطلعون
بس لا تفكرين بالطلاق لان كلش مو حل هالشي فكري ف نفسج وحياتكم

والله الله بالصلاة والاستغفار وقراءة القران لانها تفرج الهموم وتفك الضيق

وربي يعون بالعون ويسهلها عليكم بحق محمد وال محمد

حبيبتي زوجش في ظرف محتاج إن تكونين معاه وتساندينه إنتي ما خبرتينا شنو تصرفاته اللي لا تطاق بس أعتقد اللي مثل وضعه طبيعي بيتغير البطالة شي مو سهل أبداً بالذات على الرجل ومن ردودج فهمت إنه قاعد يدور له شغل ومضايق من وضعه ومو متكل عليج

إنتي عليج تشجعينه إذا حسيتينه محبط وما فيها شي أبداً اذا طرشتين السي في ماله لأماكن،، والحمدلله إنه شخص زين وما عنده خرابيط بس مشكلتكم الوحيدة حالياً إنه ما يشتغل وهذي إن شاء الله تنحل بالسعي الدائم وفي دورات في وزارة العمل حق العاطلين يعطون فيها مخصص شهري خله يراجعهم ويشوف اذا يصير يقدم لوحدة منهم

الله يسهل أموركم إن شاء الله ولا تتركين الدعاء والاستغفار

ام عمر افندى;12282199:
انا مش فاهم ازاى مخطوبه وقاعده معاه فى الشقه ازااااااااااااااى وانت كمان اللى بتشتغلى وتصرفى عليه طب واهلك فين
مش عارفه حاسه انى فاهمه الموضوع غلط استحاله يبقا فى كده

دائماً يصير مثل هالالتباس من أخواتنا من الدول الثانية

احنا عندنا في البحرين مخطوبة يعني مكتوب كتابها فترة الخطوبة عندنا هي الفترة اللي بعد عقد القران يعني الزوجين يكونون حلال بعض ويطلعون ويرجعون مع بعض ويجهزون للمكان اللي بيسكنون فيه والأخت تقصد الشقة اللي قاعدين يجهزونها للزواج

وقالت إنها تشتغل بس ما تصرف عليه

حاملة القرنفل;12282502:
دائماً يصير مثل هالالتباس من أخواتنا من الدول الثانية

احنا عندنا في البحرين مخطوبة يعني مكتوب كتابها فترة الخطوبة عندنا هي الفترة اللي بعد عقد القران يعني الزوجين يكونون حلال بعض ويطلعون ويرجعون مع بعض ويجهزون للمكان اللي بيسكنون فيه والأخت تقصد الشقة اللي قاعدين يجهزونها للزواج

وقالت إنها تشتغل بس ما تصرف عليه

اه لا احنا فتره الخطوبه عندنا بتكون اللى قبل عقد القران واللى فهمته انها تشتغل دوامين عشان تقدر تصرف معلش حصل سوء فهم
وان شاء الله ربنا ييسرلها امرها ويفرج عنها كربتها

ام عمر افندى;12282199:
انا مش فاهم ازاى مخطوبه وقاعده معاه فى الشقه ازااااااااااااااى وانت كمان اللى بتشتغلى وتصرفى عليه طب واهلك فين
مش عارفه حاسه انى فاهمه الموضوع غلط استحاله يبقا فى كده

لا حول الله .. قلت من قبل آنا ما اصرف عليه بتاتااااا ً ولا بربية .. بس على روحي اصرف ،
والشقة قلت إني ما اقعد فيها ولا ابي اقعد !

اعتقد اختي حاولي تخلين اهلك يتدخلون بالموضوع ...

وخبريهم عن موضوع اجبارك انك تقعدين بالشقه .... ترى مب حلوه في حقج مثل ما قلتي شخليتي للخطوبه..

وبعدين يقدر ( خطيبك ) يمشي روحه بإي شغله مؤقته .. حتى لو من ( الوسيط ) ...

لين ما الله ييسر له .. مب معقوله يقعد جذي ..

ترى حتى حياتكم ما لها طعم ونص المشاكل سببها انه عاطل عن العمل..

تحياتي

ام جنى

خيو الطلاق مو حل
انتين عارفه الاوضاع في البحرين شلون بخصوص الوظيفه
اني وزوجي مخلصين بكالوريوس
يتصلون حقنا حق شغل معاش 100 او 150 تتخيلين الوضع
ومو هين عليه قاعد بطالي بدون شغل
هذا كله مترتب عليه انه يصير عصبي ولمزاج كله متعكر
بس لا تفقدون الامل
ولا تقولين صبرت وصبرت
لا خيو مهما يكون حاولي قد ما تقدرين وياه
شجعيه
لا تخلين هالعلاقه بينكم تبرد
خله يجيك في اي شي
يروح الجرايد اذا يبون موزع او حق الطباعه
عنده شي مهاره يستخدمها في الكمبيوتر خله يجيك محلات الاعلانات وهالاشياء
بس كلش لا تبينين ليه انك عاطل واني إلا اشتغل

بغض النظر عن الموضوع فالعنوان فيه الكثير من الاساءة لخطيبش اسمحي ليي عمري
تخيلي يشوف هالكلام !
عشت هالظرف الي انتي فيه مرتين مع شخصين مختلفين
كان التفاعل مع المشكله يختلف بين الشخصين والشخص اليائس ظل يائس ولاعمره نجح
والي متكل على الله والمتفائل حاول وحاول لين الله وفقه وعسى الله يوفقه دووم ويوفقكم ان شاء الله