ملف خاص لشعراء العامية المصرية

الجميع : مع السلامة .. يا رايحة لزيارة النبى
مع السلامة .. يا قاصدة زمزم
تشربى
مع السلامة .. يا حاجة العقبى لنا
مع السلامة .. تعودى سالمة
وتكسبى
يا حاجة ..
ثلاث فتيات: مع السلامة مع السلامة يا حاجـة
وأبوكى سلطان مصر سلطان مكه
شـاهر حسـامه يحرسك بشهامه
فاطمه : وادى البـلد جايـه وجايبه النقطه
فطـير وكحـك محوجينه قشـطه
ومفتقه وحلبه وملح وشطه والخـير
كتـير حتـى ف إيديـن العـامه
خدى ده يا داده
ودهـه ودهـه
للــــزواده
الحرس الخاصيه: سنقر أغا الدودايدا أمير المحمل
فاطمه : جوزك حبيبك ع الحرملك أقبل
على أول السـلم وقف وتمهل
مستنى طلعة وجهه البسامـه
الجميع : مع السلامة .. يا رايحة .. الخ .
فاطمه : واخـده الهدايـا لأهـل مكة زيـاده
خمـسين جـمل عليها ميت سحـاره
ما ليـكى فيها يا حاجـة يا نـواره
غير طرحة بيضا ع الفريضه علامه
الدراويش : جاى .. مدد يا رسول الله
فاطمة : بخـرتك يا بنت السلـطان
من عين الأنس وعين الجان
المجموعة : مع السلامة ..
فاطمة : بخـرتك يا أميـر دويـدار
من عين شريف مكه الجبار
المجموعة : مع السلامة ..
فاطمة : بخـرتكم يا خاصـكيه
من عين عربان الشرقيه
الجميع : مع السلامه مع السلامه يا رايحه
لزيـــارة النـــبى .. (إلخ)
سنـقر أغا الدويدار أمير المحمل
حاسب على المحمل وأهل المحمل
وكسـوه الكعبه القصب والمخـمل
اللى الشـعوب تلجأ لها وتتحامى
مع السلامه ..
مع السلامه ..
أمير الحج : عسكر بيادة . هجانه . فرسان مزراق
مركب محمل شريف ..
إلى الحجاز .. إنطلاق ..
(نشيد القافله)
غناء : لين يا طريق الحج تحت الناقـه
دى الحـاجه رايحة للنبى سباقـة
جـوزها وجيشه تحت تختروانها
وتقـول حامينى اللى إليه مشتاقة
هيـه هيـه .. يـا أنـوار النبى
هيـه هيـه .. يـا زمـزم قربى
هيـه هيه .. يا روايح المصطفى
هيـه هيـه .. فداكـى أمى وأبى
سكـة نبـينا كونى خير وسلامه
دى الحاجة خيرها ع الخلايق ياما
جـوزها وجيـشه تحت تختروانها
وتقـول حامينى شفيعى يوم لقيامة
هيه هيـه .. يا أنوار النبى .. إلخ

[CENTER] مـلــس بـخدك ع التراكيب الجلوجية
والـمـس بـيــدك كرمـشات الزمان
أحـجــار بـهـيـئـة مـيـه مغلـية
مـعـمـولـة هــى والا عـفـويـة؟
مـن عهـد آدم والا عـام الـطـوفان؟
تـرابـيزة بعد السكر قلبوها الخمورجية
مـالـت سـبـع طـبـقات على طبقات
والسـن بـارز فـى السـما طبــقات
شـامـخ شـمـوخ فـرعـون جرانيتى
حـالم فى بهو الأعـمدة من غير نفرتيتى
وف جـبـهــتـه الـحـيــــه ..
والـرخ بـيـقـدف بـأجـنحته الجسام
صــاعد يتــمم مشــهد التــتويج
انصـت بـودنـك تـسـمع الاهـازيج
مـن فـرقـة الـكـهـنة ذوى الاحترام
والرقاصات فى المعبد الملكى العتيد التليد
بيـطـوحوا سـاق الـمـرح فـى الهوا
وينـطـوا ع الامـشـاط بخـفة سـوا
ويـدخـل الـعـسـكـر بـأجمل نظام
والـجـنـرالات تـحت الرايات العظام
بيـثـبـتوها فـوق ربـى "سـيـنـة"
ويــــدقــــوا بــالأقــــدام

ســـــيـــــــنــــــة..
نـبــض وسـرى فيـكى يادى الزلطة
وح يـسـرى دايـما .. بس تشـبعى دم
شـكـلك كـمـثـل القلب ع الخـارطة
انـــش لله دايـماً يبـقى خـالى الهم!
يــاللـى بـكــــيـت يــامــا
وحـفـرت وديـان دمـع فـوق خـدك
مـلـس بـخـدك ع التراكيب الجلوجية
وانصت بودنك تسـتمع ترانيم حـماسية
مـمزوجـة مـن صـوت صندل الفتيات
عــــبـــر الــسـنــيـــن
مع ضباشات العسكريين لما أدوا الفرض
ويــدقــــــوا بالاقــــــدام
ويـطـلـع الصـوت من صميم الأرض
مـن مـــوضـع الحـمــم الإلهية ..
دى ارض مصرية ..
دى ارض مصرية ..

[CENTER] المجد للجندى اللى من غير لبس حرب
الفـارس اللى مـش على صهوة جواد
الراجل الغلبان فى روحه وعيشته كرب
لكـن أمـير عـاشق بروحه ودمه جاد

عـاشق بروحـه ودمه جاد وكان أمير
وكـان ولـى العـهد فى الكـون الكبير
الصولـجان مكـتوب بإسمه فى الديوان
والوحـوش والغـزلان بإسـمه تستجير

والنـحل والعـصافير تجـيله تكـلـمه
أنـبل أمـير أساطـير خـيالك يرسمه
السـحارين سـحروه صبح عتال فقير
شـيل الحـمول يحنـيه ويوشك يهدمه

عتال فقير فى السوق يسير محنى البدن
حكـموا علـيه يفضل كده طول الزمن
لحـد مـا ف يـوم دق باب قلبه الهوى
وكـان هواه وغرام صباه هو الوطـن

لما انضرب بالنار على المتاريس ومات
بـصديرى بلدى وبقمـيص مربـعـات
مـالت علـيه الحـلوة بلـده ودمـعت
والدمـع زى الـدم يعـمل معـجزات

الدمـع فـك السـحر والأمـر اتـضح
وعـرفنا مـين هو الطريح اللى انطرح
وفـوق جبـينه اللى بقى ف وش السما
زالـت خـطوط الهـم وارتسم المـرح

[CENTER] (1)

اللحم طين والعروق دود من ديـدان الطـين
آدم وحــوا عـلى أرض العـدم حاطّـين
عاقـبـهم الرب .. أخـرجـهم من الجـنه
آدم عـمل حـضن حــوا جنـته وغـنى
الـناس بتـتـهنى مهـما يكـونوا منحطين

(2)

الولـف لـو شـاف وليفته ورا الجبل هدمه
يـا مـيت ندامـه عـلى جبلين واصطدموا
اتـهد منهم جـبل اسـمه هابـيل وانهـار
قابـيل أخـوه اللى قاتله سكب دموع أنهـار
واللى افتـتن بالنـهار … باللـيل يا ندمـه

(3)

مِرات عزيز مصر شابه وجوزها راجل كهل
يـوسـف حلـيـوه فلسطيـنى عديم الأهل
فـؤادها قاد نـار وصار تحت النهود لاعب
تـهـبش فـى يوسـف وتـترجاه وتداعب
والعـقل صـاعب لكين خلق المتاعب سهل

(4)

وفـى التـاريخ كليـوباتـره الأسـمرانـيه
كـانت غـرامـها غـرام اسكـنـدرانـيه
غـرام عنـيف لـه حفيف تعبان ولسعه نار
من عشـقها لحسـنها خـافت عليه يحـتار
واخـتـارت الانـتـحـار … المعجبانـيه

(5)

من بـرق سـيف الجدع .. يطلع صباح أمله
عنـتر معنـتر لكـين مسـكين أبـوه همله
بسيـفه قَـدِّف فـى بـحر الـدم عَدّاه عوم
ولـجل عبـلة وقُبـلة منـها .. سـاد القوم
والحُـر لـه يـوم يـدوق الشـهد من عمله

(6)

عالم من الهـمس من غير أمس من غير غد
الشمس ليـلى .. القمر ليلى .. السؤال والرد
ليـلى .. ومجنونها قيس هايـم يقول ليـلى
دى مهـما كـانت لغـيرى وقسـمتى مايله
الروح مـادام طـايـله .. مايهمش تنول اليد

(7)

عنـتر مـن الغـرب، أسمر يندهوله عطيل
كلل عـلى ديـدمونه وشالها فى عينيه شيل
بـياض عيـونـه لـمع من ضّى حـلاوتها
أولاد حـرام غـيروه بالغـيـره مَوِّتـهـا
والغـيـرة غشـوتها ما تفرق نهار من ليل

(8)

كـل الأحبة عـلى حـبال الـهوى طـالعه
فـاكـرين نجـوم السما شبابيك غرام والعه
أنـظر لروميو الجرىء طالع يشوف جوليت
تعـرف بـإن الغـرام يكـره بيـبان البيت
وإن كـنت حبـيت مـا تـهزم قلـبك القلعه

(9)

الريـح تـباريح جـريح ما ينتـهيله أنـين
حـسن قتـيل من سنين ونعيمه فى المجانين
عـلى كـل ملقـف هـوا تسـتنى تستـنى
يجـيلها صـوت كـله مـوت ويئن له أنَّـة
والحـب لـه نـاس فى جنه وناس غلبانين

(10)

كان ياما كان فيه ملك لـكن مالوش أحـباب
عشـق رمى التاج وعاش العمر كله شـباب
فيه نـاس يقـولوا عليه مجنون وناس جاحد
وأنا اقول أبيع عمرى كله بيوم غرام واحـد
ده الحـب والحـق واحـد يا أولى الألبـاب

[CENTER] شـفـايفها لما تضحك
زى شفـايـف ثريـا
وعـيونها بالحواجـب
تـمام شـبـه سنـية
وشـعـرها المـموج
مـفروق من الشـمال
عـلى الموضة البناتى
زى عـروسة كـمال
وسـمـرا زى خضره
ورقـيقه زى سـوسن
والـورد فوق خدودها
صـلاة النـبى أحسن
والـصـورة بين إيدينا
مـع كـل حـى حبه
يـاخـدها يـطل فيها
حرام يا عينى .. شابه
واللـى مادريش يقولك
مالـها؟ جرى لـها إيه
ده اللـى جرى لجميله
مـا يـنسـكت علـيه

وجمـيله مـن الجزاير
بـلد البـحر الكبــير
بـلد ولاد عـمامــنا
فرســان الأسـاطير
اللـى زارعين رايتهم
ع القـمه مـرفرفــه
اللـى سايـبين بيوتهم
والـفـرش والـدفـا
علشان عاوزين يعيشوا
حـيـاة مُـشَـرِّفَــه
جمـيله واحـده منـهم
واحـده من شعب ثاير
بتـكـره المظـالــم
وبتـحـب الـجـزاير
وبتـحـب الأغــانى
وبتــحب العــماير
وبتــحب الجــناين
والـورد والعـــيال
واللـى جـرى لجميله
شـىء من ورا الخيال

تـجرى والدم نـازف
وتقول يا جرح جازف
اصـبر ده الوقت آزف
والـناس مستـنـظره
أوامـــر القــيادة
أحـبك يـا جــزاير
أكــثر مـن العـبادة
أجـرى كـمان شويه
خطـوة كـمان زيادة
وف كتـفها الرصاصة
وعضـام اتحـطمـت
تنـزف تنزف وتجرى
لـحـد مـا اتـرمت
وكـلاب الصيد جابوها
ومهـما يـعـذبـوها
ومهـما يـصلـبـوها
ومـهما يضـربـوها
ومـهما اتـألـمــت
أبـداً مـا سـلّـمـت
ومـهما يغـصــبوها
أبـداً مـا اتـكلـمت
يـا حسـره ع الشباب
بيـن أنـيـاب الكلاب
كتـبوا العـذاب عليها
بـدال كـتـب الكتاب
والدنـيا تروح وتيجى
جـوه عيـون البنـيه
اللى ف صورتها بانت
شـبه عيـون سـنـيه
وتبـهـت الشـفايـف
الضـحـاكه الشهـيه
اللى ف صورتها بانت
زى شـفـايف ثـريا
وشـعـرهـا المموج
اللى ف صورتها سال
مـن فـرق ع الشمال
زى عـروسـة كمال
معـجـون بـدمــها
حـبـة عيـن أمــها
حـبـة عيـن النضال
واللـى جـرى لجميله
مـا تـحمـله الجـبال

وتـر من الكـمنـجه
وتـر واحـد وحـيـد
نـوَّح عـشان جمـيله
فـى أول النـشـيـد
والأوتـار اللـى باقية
صرخت من غير دموع
وامـتـدت م الكمـنجه
لحـناجـر الجـمـوع
عـلى بـاب المحكمة
والعـالم كـله واقـف
عـلى بـاب المحكمة
بيغـنى غنـوة واحدة
راعــدة ومـدمـدمه
تـزلـزل السـمــا
وقـضـاة المحـكـمة
العصـبـة المجـرمة
بـقـلـوب مطلـسمة
وعـلى عينـيـهم غما
وفـى إيـديـهم دمـا
بيسـمـعوا الأغـانى
وهُمّا فـى وادى تـانى
وإيـش تعـمل المعانى
فـى عقـول مضـَلِّمة

طـول اللـيل السجانة
بيـسِـنّوا المقـصـلة
وجمـيـله فى الزنزانه
سامـعه ومسـتحـملة
طـول اللـيل المعارك
دايرة ف حضن الجبل
وجمـيله فـى المهالك
عايـشـه عـلى الأمل
أمــل أمــل أمـل
اتـقـدم يـا بـطـل
تـبِّـت فـى البنـدقية
خـلى النـار تشـتعل
ده اللـى جرى لجميله
مـالـوش غير العمل

الشـعــر شـارد فى الجـبل منـى
عمـلـت انـا هجـان ورحـت وراه
قلـبـى دليـلـى يطيـر ويغــنـى
عصـفـور جـناحه بدمـه متـحنى
لَفِـفْـنى لففـنى الجـبـل ولا تــاه
تسفـى الرياح سبعـين صباح وصباح
قلـبـى دليـلى وانـتـا وراه سـواح
والشـعـر شـارد فـى الجبل منـى
حبـيت غـزال غنـيت لـه بالمـوال
صـد الغـزال سـاق الدلال أهــوال
حبـيت غـزال غنـيت له غنـيـوه
صـد الغـزال علـشان ما هو حليـوه

غنـيت له رصــد
هـجــر بقـصـد
غـنـيـت صـَبـا
جــافـى ونَـبــا
غـنـيت لـه بيّاتى

رقـاص أنـا وشـاعـر ونايـاتـى
وافـدى رفــاق الفـن بحـيـاتـى
وافـديـك يا نـجم اخضر يا بياتـى

أفــديـك أنـــا

يـا عنـدليـب ع المشنـقـه عِشِّـه
عـافـر مـع الجـلاد قـام هَـشّـه
علشـان يـروق الجــو لِفْـعـالـه
يقـتـل فـى ورد الحـب وِيْحِـشُّـه
صوتـك مـن البـلد البعـيد جـالـه
عَـدّى مـن الحـراس وعَــدّالــه
وكــأن يــد الـرب نـازلا لــه
تكـشـف نقـاب الغـش عن وشـه

أفــديــك أنــا

يـا عنـدليـب ع المشـنقه عشــه
خـارج فى يـوم العيـد وقلبى سعـيد
شفـت البنـات يتعاجـبوا فى الألوان
كأنـهم أغـانيـك يـا بـيـاتـــى
يابـو الأغـانى الزرقــا والخـضرا
وكـأن حلـمك بـان وآن لــه أوان
مديـت خيـالـى للعـراق .. لبعـيد
لابنـك "علـى" وهـاديـته بالونـه
كاتـب عليـها جمـيـع حـكـايتـى

كـان يـامـا كـان
مـلـك الـزمــان
كـان يـامـا كـان
ظـلــم وهــوان
إنـسـان جـعــان
كـان يـامـا كـان

وكـأن حـلـمـك بان وآن لـه أوان
الغنـوه زرقـا والكـلام بـجـنـاح
فتـحت انـا للشـمـس شبـاكــى
علـى قـاعـدة الشبـاك أنا تـاكـى
بيـن شفتـى وصوابعى نـاى نـواح
تسـفى الريح سبعـين صباح وصباح
قـلبـى دليـلـى وانـا وراه سـواح
والشـعـر شـارد فى الجـبل منـى

[CENTER] حتى الرسـول مـات وأمر الله لا بد يكـون
بـس الفـراق صعب واحنا شعب قلبه حنون
وحـشـتنـا نـظرة عيـونك للبـلد يا جمال
والـحـزم والـعـزم فيـها وحـبها المكنون

وحـشـتـنا عـبـسـة جبينك وانت بتفكر
ونـبـرتـك وانـت بـتـعـلـمـنا وتفسر
وبـسـمـة الـود لـمـا تـواجـه الملايين
وقبـضـة الـيـد لـمـا تـدق ع المـنـبر

وقـبـضة الـيـد لـمـا تـلاطم الجرانيت
وتـرفـع السـد عـالى المجد عالى الصيت
وتـأدب النـيل وتـحـكم مـيـة الفيـضان
مـا تـعـدى نقطة سوى بالخـطة والتوقـيت

وبـقـيت أقـول: ميـة الفيـضان واحشانى
سبـتمـبر ازاى بـدونـها يكـون يا خلانى
يـا ويـلى مـن ده طلب وياريتنى ما اتمنيت
لـبى الـزمان منـيتى من دمـع أشجـانـى

وعـاد لسـبتـمـبر الفيـضان دمـع هتون
ينـصـب م القـلب ويهيم فى النسيم محزون
يمـيل نخيـل الرطب على بعضه بالهمسات
حتى الرسول .. مات .. وأمر الله لا بد يكون!

[CENTER] "العنب ده، طعمه مر!"
قال كده التعلب فى مره
"والدليل على أنه مر ..
إنه جـوه وأنـا بره ..!

[CENTER] أنـا فـى الخـلا، بانـشد ولا بانـام،
صـلـوات غرام، ويا حرام تتـمحى.
الليـله بـل الطــل كـل الكــلام،
ولا مـلام، مـانا الخـلا مطـرحـى

خـلا خـلا، أنـا شِعرى قد الوجود،
وقـدَّها وقـدود، وقـلبـى غـنـى،
كأنه عود، فى الجود ما يعرف حدود،
وحبيـبـته عـواد، وعليـه منحـنى،

طـلع النهار، والشمس من غير غما،
الشـعر شَت وطـار، كـأنـه البخار.
داريـت حبيـبتى عن لهـيب السـما،
وصرخت .. فين السقف، فين الجدار،

أنـا بيت حبيـبتى، وهى بيـتى أنـا،
لـكـن يـا ريـت، يبقالنا بيت م البنا

[CENTER] دار الزمـان، فاتـت كمـان سنـه
وإلا اللى فايتين احـنا، ع السنـين؟
فتـنا عليـك يـا كوبرى أمسـنا،
ونـفـسنا فى حاجات، وسرحانين.

فتـنا على عصفور جريح فى ريح،
فـتـنا علـى منديـل يسيـل بُكا،
ع النـبـع فقـنا لسبع، مال طريح،
مِكَـتِّـفـاه حيـه مـلـعـبـكـه.

يـاما نفسنا العصافير تطير سرور،
وتفـحـفح المناديـل عرق، وفـل،
وتلـبـس السـباع عقـود زهور،
والكـل يلـقـى الكـل … لو يطل.

طلينا فى عيون بعض، انا وصديق..
شفـنا الحاجات دى، بحق وبحقيق.

[CENTER] "وفرشت عشى ريش فى ريش فى ريش،
ومْشـاغْلَه، وتْوشْـويش، وصـوْصَـوه..
سـوا سـوا ح نعـيش نعـيش نعـيش،
نعـيش نعـيش، نعـيش نعـيش، ســوا

لسـاه يـا عصفور الربـيع مـا جـاش،
عمـال تشقـشق، واحـنا فـى الشـتـا؟
شـجـر الشـوارع لسـه مـا انكساش،
ولا مـنـه فـتـفـوتـه، مـنـبِّـتـه!

"أنـا أغنـى صيف شـتا ربيـع خريف،
أغنـى .. غـنـوة خـضـرا ع الـدوام
ورق الشـجـر يـقـع، علـى الرصيف،
وانـا، والغـنـا، مِتْـشـبِّـكـين تمـام

عنـدك يـا عصـفور يـا بنى، ألف حق.
الريـح مـا بتـوقعـش غيـر … ورق!

[CENTER] من يوم ما شَفـنى طبيب ورا طبيب،
وقـالو لـى: خـد بـالك...ويلزمك...
بقـيت أخاف م الشِعر، خوف رهيب،
زى الحليـب، والخـمـرة، والسمك.
يـاليل يـا ليل .. لألأ .. بلاش بلاش
يا عيون حبيـبتى ... لأ يا واد تموت،
اسكـت سكوت، وارقد على الفِـراش
أحـسـن ما تـرقد داخل التـابوت.
يا مصر.. لأ.. يا مصـر آه يا مصر،
يا عيون حبيبتى، العصر فى الغيطان،
أهواكـى.. آه، عصرت نفسى عصر،
فـى هـمـسة المـحبـة والحنـان
بقـيت أخـاف م الشـعر .. بس آه،
الشـعـر مـوت، أحـلى من الحياة

[CENTER] بـتـهـز راسـك لـيـه وتبـتـسـم،
يـا غـراب، فـى ضل جنينتك التراب
مـن ضحـكـتك وسـطك ح ينـقسم،
اطلـقـها عاليه، وقول: خراب. خراب.

برضـك بتضـحـك، تحـت سـرتك،
وعـيـنـيك بتـتغـامز لبـعـضها؟..
مـلعـون أبـو الفكـره اللـى سـِّرتَك،
ملـعـون سـماهـا الشوم، وأرضـها

"الدنـيـا هـى الدنـيـا" مـش كده؟
الدنيـا يـا غـراب هـى هـى، نعـم:
كـرمة سـكـارى العـشـق والفـدا،
وسـريـر ولادة الحـلـم والـنـغـم!

اضحك وأنا ح اضحك، وشوف يا بين ..
ميـن ضحـكـتـه تـوصل لحد فيـن!

[CENTER] وقـالـوا طَفّوا النـور حصـل هجوم
طَفـيـنـا كـلــه بـس للأســف
قـلـبـى المضىء بالحب كالنجــوم
لـمـع ف قلب الضَلّمَـه وانـكـشف

هـدف مـبـاشـر جـت لـه قنـبلة
جـالـه الـنابالـم ادّالـه لـون كئيب
اسـود كـأنـه وصـمة مخـجـلـة
أو حـرق خـتـم معـتـقل رهـيب

وقـالـوا روح لأطـبـة السوفيـيت
حضـن الصـديـق عـلاج لكل داء
فى مـوسكو خدنى ف حضنه كل بيت
مـا فضـلش غير خطوة على الشفاء

يـا أصدقـاء آسـف لكيـن مُحــال
مـاليش دوا غيـر طـرد الاحتــلال

كان ياما كان وعلى مدى الأزمان
بلد وكانت أول البلدان
بكرية الدنيا لكين صلى ع النبى
كانت ترضع امها الألبان
من قبل منها الأرض عاشت سداح مداح
تسكنها أشباح ناس على حيوان
وشعرها منكوش ولا عارفه إسمها
والعقل غايب والكلام هذيان

الا وتطـلع جنـب نيـل مصر للعجب
مخالـيـق تقـيس الأرض بـالـفـدان
تعـمل بيوت لها سقـف ومـحل للأدب
وفـرن عـيـش ومـرايـة للنـسوان
تحـسب بـروج النجم والشمـس والقمر
وتقـول ح ييـجـى يـوم كذا الفيضان
تبـرى القـلام البسـط وتخط ع الورق
جـوابـات حـكـومـة وفلسـفة وبيان
تمـان تـلاف عام كل عام الف تجربة
ولـكـل تـجـربـة ألـف ألف ميدان

يـا مفتـحين العـين كـلامى يسركـم
ويـا غفـلانـين نشـوا علـى الدبـان
ولا كـل مـن لـها خارطة قالت أنا بلد
الرك ع المـدنـيــة والـعــمـران
وعـمـار يـا مصر عمار بنيلك وأمتك
عـمـار بـأفـراحـك وبـالأحـزان
آدى اللـى دم الجنـدى ع الصخر أثبته
بحروق من النـار فـى نهار شـدوان

أربـع إيـديـن عـلى الفـطــار
أربـع شـفايف يشربوا الشاى باللبن
ويـبوسوا بعض ويحضنوا نور النهار
بـين صدرها وصدره وبين البسمتين
ويحـضنـوا الحب اللى جمعهم سـوا
على الفطـار
ويحـضنوا الشمس اللى بتهز السـتار
وتـخش من بـين الخيوط وبعضـها
مع الهــوا
للأودة تـرسم نفسـها عـلى أرضها
عـلى البساط اللى اشتروه مع الجهاز
على الغرام اللى اشتروه من غير تمن
وعلى القـزاز
ويـشربـوا الشــاى باللــبــن
فى فنجالـين
عــلى الفـطار أربــع إيـديـن
ودبلتـــين
بيـصـحُّوا قـلبى كل ليلة فى المنام
وبـيكتـبولى بـلـون منَـور فزدقى
على الهـوا الاسود وع الجفن اللى نام
كلمة "سلام"

عشرين سنة
عمرى أنـا
أنا العجـوز الشـايـب الـحـزين
أنا العجوز من غير ما تمضى السنين
أنـا العـجوز من قبل سن اربعـين
عمرى النهاردة
رغم المرار ده
فى عمر وردة
عشرين سـنة
كانـلى صديـق وكان حبيب عمرى
هو اللى علمـنى المشـيـب بـدرى
حضـرت مولد كل شعـراية بيـضا
عبـرت سوالـفه كما الشهاب تجرى
كما بـرق سيف الحق فى الهيـضا
وسط الظلام تبرق هـلال هجـرى
تحـسب تاريخ الكون حقيقة ومجاز
كالأبـجـديــة بالقـلـم لـردواز
بالـشـعـر لابـيـض كان يعلمنى
أسـتاذ تـاريخ وفـى التاريخ أستاذ
قابلـته مـن عشريـن سنة وكلمنى
وانـا لسـه باحـبـى فـى الظلال
عـلمـنـى مشـيـة الـرجــال
سلـمـنـى رايــة الـنـضــال
ولـحـد هـذا الـيـوم .. بيـلهمنى
وخـيـالــه كل ما اقـع يقـومنى
وكـل مـا اتبـعتـر يـلـملمـنى
وانهـض واقـوم بـأمـل جـديـد
وبقـلب أقـوى مــن الـحـديـد
ولـيد .. عـجوز .. شايب .. حزين
وعـمـرى عـشـريـن ســنـة