ملف خاص لشعراء العامية المصرية

تونس الخضرا

اصحى يا نايـم
وحد الدايــــــم
و قول نويـــت
بكره ان حييت
الشهر صايــم
و الفجر قايــم
اصحى يا نايم
وحد الــرزاق
رمضان كريم

سحر يا مسحراتـــــــــــى
نقر يا منقراتـــــــــــــــــى
تونس خضـــــرا لليله دى
جاى بربابه خضـــــــــرا
خيال و مغنــــــــــــــواتى
طبـــال والا نـايــاتـــــــى
تحت البرق الزناتـــــــــى
و فى قلبى قطره قطــــره
دموع فى الضحك اطرى
من العنب البناتــــــــــــى
على اسنان العــــــــزيزه
زى الخفاجه عامــــــــــر
غنى و خفق و غامـــــــر
قلبى فى ألف سامـــــــــر
و ألف غيط و جـــــــيزه
و ألف نيــــــــــــل و دلتا
و أنا ماشــى بدراعـــاتى
شفت الجنه فى حيــــــاتى
خدت فى حضنى الوطــن
المغـــــــــــــرب و اليمن
يا تــــــــــــونس ونسينى
كان الــــــــــزمن نسينى
و نسيت كل الـــــــــزمن
الا أنس الليـــــــــــله دى

و المشى طاب لى
و الدق على طبلى
ناس كانوا قبــــلى
قالوا فى الأمثال :
الرجل تــــــدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

ما نختلفشى فى نسبه أحمد بن عـــــروس
كان من صعيد مصر والا تونس الخضرا
هناك بنوا له مقام فوق الجبل محـــــروس
هنا بنوا له فى اوطان القلوب حضــــــره
على لسان كل مصرى كلمته حاضــــــره

عرب نغرب نشرق
يجمعنا شــعر و آه
لو حد بيننا يـــفرق
ما نستــاهلش حياه

اصحى يا نايـــم وحد الدايـــــم
السعى للصـــوم خير من النوم
دى ليالى سمحه نجومها سبحه
اصحى يا نايــم يا نايم اصحى
وحد الرزاق

العبد الشاكر


اصحى يا نايم
وحد الدايـــــم
و قول نــويت
بكره ان حييت
الشهر صايــم
و الفجر قايــم
اصحى يا نايم
وحد الــرزاق
رمضان كريم


مسحراتــــــــى
منقراتـــــــــــى
يقبل صلاتـــــى
اله رحــــــــيــم
لا تقولوا شاعــر
و لا مــــــــغنى
تقولوا عـــــــنى
كان عبد شاكـــر
قلبه سليــــــــــم
لا صوته يعــلى
على اليــــــــتيم
ولا عمره ينسى
و لا يناجـــــــى
مع اللــــــــــئيم
و كان يجــــــدد
و كان صمــــيم
حفظ حماســـــه
جاور تمـــــــيم
باسم العــــروبه
حبال طــــروبه
ناديت على الدنيا و الصدى
جاوبنى من آخر المــــــدى
يا شوقى للكل
ريحة الـــــفل
فى النـــــدى
فى كل طــــيب
انسان اغــــيب
عقلى و اهـــيم
و امشى الليالى
رمضان كريـم
عارف تراب الوطن نعيم


المشى طاب لــــى
و الدق على طبلى
ناس كانوا قبلــــى
قالوا فى الأمثـــال :
الرجل تــــــدب
مطرح ما تحب


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :


يا أمهات المؤمنين هننوا و يا بنائين غنوا
المؤمنين بالرغيف و الماء يتهــــــــــــنوا
و لا يتولد طفل الا يلتقى الأحــــــــــضان
و ريحه من رمضان و ايدين تشيل عـــنه


اصحى يا نايـــم وحد الدايـــــم
السعى للصـــوم خير من النوم
دى ليالى سمحه نجومها سبحه
اصحى يا نايــم يا نايم اصحى
رمضان كريم

- من يوم عرابى

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
يادنيا هاتى
ويابحر زيد
فى أرضى نابت
نبات جديد
فى عينى ثابت
هلال وليد
على أطلع
فى كل مطلع
أنشد ويتبع
نشيد نشيد
كان وعد فاتنى
لكن لفتنى
تاريخ أفادنى
زلزال شديد
زرت الموالد
شيخ الشدايد
ياركن صامد
أنا المريد
ساكن فى دارى
يحلف بتارى
يشهد بتارى
يشهد فطارى
يوم الشهيد
يصرخ ترابى
من يوم عرابى
على المرابى
والمستفيد
عاوزين هلاكنا
عشان ملكنا
مصر وسلكنا
صراط حميد
ماعادش باطل
غير اللى عاطل
تعيش مناضل
انت السعيد
أنا جيل يفادى
أيام ولادى
يذكر جهادى
ابن وحفيد
و المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :
أنا طول حياتى ضنا يا طول حياتك أم
يا مصر يامعلمانى الصـبر والخضره
أنا الفقيـر الضـــعيف امنت بالقـــدره
ياشبر ايدك فى قلب الليل هلال رجبى
نزل عـــــلى وقال لى يا ضـــنا اكتب
ولا حد أغنى من المالك لسان عربى
ولا حد أقوى من اللى عمره ما بيكدب
ياشبر ايدك فى قلب الليل هلال رمضان
نزل على وقال لى اسهر على الاوطان
وانا طول حياتى ضنا ياطول حياتك أم

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
- :f::f::f::f::f::f::f::f::f::f::f::f::f::f::f::f:

-


الخال عوض

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
جاى لك ليلاتى
يا خال عوض
يازين ومالك
والطبع زين
سبع ممالك
وفدانين
تحب تحسم
بسن يبسم
وبين ولادك
تحب تقسم
بالعدل دايما
ياخال عوض
أظنى قاعد
والفرن قايد
سمعنى عايد
عليك يا خبط
فى الشاى تخلط
عشان تخرط
ولا مهندس
عمال يخطط
ياخال عوض
أظنى تشرب
شايك وتطرب
لواد بيضرب
على طبل بازه
فات الحداشر
شهر فى أجازه
وعاد ينادى
ياخال عوض
أظنى تنده
وتقول يا لوزه
يالوزه بنتى
أبوك انت
من تحت لبده
لفوق صديرى
بعينيك عاينى
شنب خضيرى
ومناخر جناينى
ومسحراتى
منقراتى
فالح يقولى
ياخال عوض
يا خال يا خال
وكمان يا خال
يازين وراضى
بالمندره دى
زهرت بابك
وقنيت شبابك
وانا فى الأراضى
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

ياخال عوض بسمتين فى ضحكتك ديه
الأوله من زمان والتانيه بدريه
الأوله صبر أما التانيه عسليه
عديت على الباشا راكب قمت مش نازل
والشمس وقفت تغازل بسمتك ديه

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
- :f::f::f::f::f::f::f::f::f::f::f::f::f::f:

-

ســــــــــــــــــــهران


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
انشد واقول
بعد الصلاة
على الرسول:
أنزل كتابه بلسان عرب
وبخيل محمد الله ضرب
من المشارق للمغترب
على جبين السما انكتب
هلال وراؤه قلبى انجذب
وراؤه أتبع سبب سبب
سلخت شعبان من رجب
وبعزم ما بى ناديت وجب
أصوم جهادا واصبر غضب
ماجفت دمعى ولا نضب
يتيم أنوح على العتب
الدم أغلى من الدهب
الأرض شدت زى العصب
من الكرامه الى النقب
و كل شبر و حته من بلدى
حته من كبدى
حته من موال :

لسه العرق ياعم
مايخدش ثار الدم
مايقيمش وحده الطوب
لسه الشهيد مكتوب
على جبين أجيال
علشان كدا ياخال
سهران أنا وابنى
سهران يناوبنى
لسه العرق مغلوب
مهما شقى وشغال
مايقيمش وحده الطوب
ولوحده مايبنى
علشان كدا يا خال
سهران أنا وابنى
سهران يناوبنى


اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
- :f::f::f::f::f::f::f::f::f::f::f::f::f::f::f::f::f::f::f::f:

- قلب مؤمــــــن


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
لاقلبى ريح
ولا رقد
دارت رحايه
على الضحايا
فجرى وضحايا
دم وجسد
والأرض حاضنه
غيطنا وحصادنا
دى أم أضنى
من الولد
على شط شرقى
شرقان بحقى
وجناحى خابط
فى عروق هدد
يا جيش مرابط
انت المدد
يا احمد ياخطوه
ياقناوى صبوه
ياولاد بحاروه
ياعيون بلد
ياقلب أخضر
تصوم وتفطر
تثبت وتقدر
باسم الصمد
أمر المهيمن
ياقلب مؤمن
فى الأرض مدمن
زى الوتد
نتقن حياتنا
وتضحياتنا
ننصر غاياتنا
احنا العدد
يقول لى مدفع
فى الفجر يرفع
لا يد تنفع
الا بيد
احنا اتحدنا
يا جيش بلدنا
على كل مادنه
الله أكبر
على كل منبر
الله أحد
أرض العروبة
لمن سجد
و المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

عدونا ما انعطفشى للبشر والناس
وماقالش لكبيره يابا وعظم الاحساس
ولا ضرب فى أراضى النور هرم وأساس
ولا زرع ست الاف وحضن وغل القمح
ولا تبنى ولا هز الهلال السمح
شهد التاريخ ان أعداد الوطن قتلوا
الانبياء واليتامى , والعرب عدلوا
ولا حد قبل العرب بين كافة الاجناس

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:f::f::f::f::f::f::f::f::f::f::f::f::f::f::f::f:

-


أنــــــــــــــــــت الامـــــــــــل


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
ماعاش فى قلبى
الا امل
وتسعه يونيه
كان فجر دنيا
كان ضى داوى
وكان أمل
الشعب فارغ
ملا الشوارع
قال يا حبيبنا
انت الأمل
الشعب كلك
قايم يقول لك
الكلمه واحده
وانت الأمل
لو فكر فاكر
انه نعانا
الله معانا
وانت الأمل
الأم شالت
فى الحضن قالت
تكبر يا ابنى
مع الأمل
وريف بلدنا
شجر ومادنه
ساق البنادر
وانت الامل
احنا الحوارى
مالناش ندارى
شعورنا كله
مع الأمل
احنا الحقايق
اخوات شقايق
عاوزين والدنا
انت الأمل
كبدى اللى يعيط
رجع يغنى
والنور حضننى
وانت الأمل
و المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

على صرخه واحده طلقناها وجاوبتنا
حقيقه واحده اللى تحت الجلد صابتنا
حملتنا أشواق على أشواق وجابتنا
من الجزاير نشق الليل بحربتنا
وبعرق مدبوح من الأردن وغضبتنا
م الأرز والنبع قاصدين سبع غابتنا

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:f::f::f::f::f::f::f::f::f::f::f::f::f::f::f::f::f:

-

حزمةوحزام


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
على طريقه
منقراتى
ورا الحقيقه
ستين دقيقه
فى كل ساعه
ماهيش براعه
لو فنى دام
فى كل كلمه
من الكلام
حضنت حزمه
شديت بحزام
يطرح زمانى
بلح سمانى
من الأمانى
عالى على
ياليل ياعين
أصبر شويه
شويتين
وافضل أجاهد
بقلب جامد
فلا أضام
فى كل كلمه
من الكلام
حضنت حزمه
وأنا المغنى
ولا جل انى
يدوم شبابى
أعمل حسابى
ينقص منابى
من السنابل
لكن مناب ال
أمل تمام
فى كل كلمه
من الكلام
حضنت حزمه
شديت حزام
ومشيت بهمه
الى الأمام
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :
من اليمن لليمامه ياما قلبى هام
وبوجد من نجد لديار النجف والشام
وفى مصر أطيب مقام السيده وامام
وفى تونس الخضرا بتنور من الأكمام
وفى المغارب مضارب للعرب وخيام
وكأنى من سالف الأيام الى زمنى
ورثت كل الهوى والعشق لازمنى

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:f::f::f::f::f::f::f::f::f::f::f::f::f::f::f:

-


المبـــــــــــعوثيـن


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
أنا بسحر المبعوثين
أولاد يارب
فى ألمانيا غرب
وألمانيا ش
لاجل أن يعودوا
متأسسين
يسلم لى عوده
الواد أمين
بدأ الرساله
ب نستعين
وثم قال
حبلى متين
أخبارى ساره
أنا خدت ذره
ونظام مجره
ومهندسين
وأنا بأذاكر
طول عمرى فاكر
وطن ودين
فى المغربيه
تتمد بيه
ايدى اليمين
على طبقنا
لولا فراقنا
أنا مش حزين
بافطر معاكم
واسمع دعاكم
امين امين
ما اشربش الا
الماء .. والا
فى قزاز ياسين
وختام كلامى
أبعت سلامى للأجمعين
نحن نلقن
العلم حقا
وكويسين
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

من بحر يوسف سلام يوصل لبحر السين
لولاد رفاعه محمد والسعيد وحسين
ولكل مبعوث مناضل بالصلا ع الزين
سيب اللى قاعد يفاضل بين الأدب والعلم
درس الوطن يامهم أفضل من الدرسين

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

- الأجـــــــــــر نور

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
فى طلتى
بطبلتى
من جنب شارع
لجنب حاره
كان نجم والع
زى الشراره
من البخور
الدنيا حلوه
والريحه أحلى
سمعت غنوه
ورجلى نحله
فضلت تدور
وفى طلتى
بطبلتى
من حى ريحنا
لشيخ قريب
قال يا ابنى احنا
عملنا طيب
والأجر نور
خيالات صداقه
تسرح فى عينى
من ألف طاقه
بينكم وبينى
يا اهل الندور
وفى طلتى
بطبلتى
م الحاره د كلها
للحاره ديه
سمعنى ديكها
أدان هديه
يا شيخ سرور
الديك دا صايح
لازم نصحصح
اسمع نصايح
الى نصح صح
فى السحور
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

أنا قلبى غاوى اللبان والجاوى بخرنا
ياطيبة الاسم يادلنجات وبحرنا
ولقبلى أسيوط فؤاد مبسوط وسحرنا
حنية الليل قطعها الجرح ياولادى
لما سمعنا المنادى ما تأخرنا

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:032::032::032::032::032::032::032::032:

-


دواليب زمــــــان


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
منجراتى
دواليب زمان
ماتشتكونى
جت فى الأوان
ياناس حبايب
ياناس جيران
أنا قلبى دايب
على البيبان عجوز شويه
لكن عينى
روحين حنان
لا ظنى سىء
ولا جبان
درويش وأوسطى
وشيخ كمان
وفى عبى قطه
ازاى حتلعب
فيه الفيران
تسألنى ياتعب
أقول صراحه
شقاى راحه
قوة حصان
لاجل وعشان
قبول عيالى
فى الامتحان
وأنا فى بالى
حاجات جنان
من الطبالى
أعمل صيوان
وابنى لخيالى
أربع حيطان
دا أنا فى انتقالى
من أولى ساقيه
لسد عالى
لقيت مكان
سيرى يا موجه
بالتكنولوجيه
لبر الأمان
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

لو ماشى فى الصحرا شفت النور أقول انسان
دا انا كل شباك يقيد أشكر لايد انسان
واقول هدتنى المناير سبحت للعرش
يارب من رحمتك مكنت للأنسان
يغير الضلمه أما النور مايتغيرش

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:032::032::032::032::032::032:

-


طبلة خضــــــــــــــــرا


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
مشيت بخطوه متثبته
لاجل العجيبه
اللى مش عجيبه
شاعر وحاسس وشيخ فتى
لو خفيف
واعرف أصيف
بالانسانيه فى عز الشتا
طول عمرى جد
وما اكلش حد
وما افتحش مقله للمقلته
غنى بايمانى
عن الأمانى
الوعد عمرى ما اقول متى
خد تاتا تاتا
الساعة تلاته
على طبله خضرا منبته
خد طم ططمطم
حتى المقطم
اذا سمعها تلفتنا
أنا مش بانادى
لام الصينيه
متكلفته
أنا بانادى
مواطنى
قلوب هنيه
بالخمسميه
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

كل اللى كان فى البال
غيرلى ريقى وبل
الليل وياما طال
الفجر ياما طل
عجوز شويه وعلى راسى خطوط بيضا
والفجر لسه صغير له فى البيضه
وأنا ماشى باسمع سلامات الندى والطل

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

- القـــمر

اصحى يا نايم
وحد الدايم
و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم

مسحراتى فى شهر الصيام
منقراتى على الدوام
شوف القمر اكتمل تمام
من الف ليله و الف عام
قمر يراكم مغرب و شام
قمر تراحم قمر وئام
يا من تواصوا ألفين سلام
قمرمحجب بالابتسام
بشفه يحيى فيها الكلام
لاغى الحمام اللى فى الامام
فى السيده حن للمقام
ذكر معانا و قال ما بانام
ذكرت يا سعد يا كرام
و الليل قطيفه و لا ملام
تحت القمر قلبى فى هيام
من ليلة النصف للختام
فى ليلة القدر له مرام

المشى طاب لى
و الدق على طبلى
ناس كانوا قبلى
قالوا فى الامثال :
الرجل تدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

بعد الشهاده و بعد السجده للرحمن
حينكتب لى قيام الليل و صوم رمضان
و ما دمت عارف طريقى و صالح النيه
و كل خطوه تزيد اوصالى حنيه
فى ساعة الفجر يفتح لى الأمل رضوان

اصحى يا نايم وحد الدايم
السعى للصوم خير من النوم
دى ليالى سمحه نجومها سبحه
اصحى يا نايم يا نايم اصحى
وحد الرزاق
:032::032::032::032::032::032::032::032::032:

-


كتب و ناس

اصحى يا نايـم
وحد الدايــــــم
و قول نويـــت
بكره ان حييت
الشهر صايـــم
و الفجر قايـــم
اصحى يا نايـم
وحد الـــرزاق
رمضان كريم

مسحراتى قديم جــــــــــديد
منقراتى خفيف شـــــــــديد
فاتح مدارس ساعة السحور
و طبلتى طبلة الحضــــــور
خدت الثقافه على اســـــاس
ان الثقافه كتب و نــــــــاس
قريت لطه و الحكـــــــــــيم
و لعم بيرم و النــــــــــــديم
و من المعره على بــــولاق
ابو العلا من ابو العــــــلاء
شفت الجميل يشكر الجميل
فى كل حته و فى كل جيل
من فننا جاءت الفــــــــنون
من شاعر جاء شاعــــرون
و من تراث لنا عريــــــــق
شيوخ اوروبا على الطريق
و مشيت فى شارع نور الظلام
و شفت لك يا عبد الســـلام
اكمنى راجل زيك أمـــــــير
الفجر أبيض زى الضـــمير

المشى طاب لـــى
و الدق على طبلى
ناس كانوا قبلــــى
قالوا فى الأمثـــال :
الرجل تدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

قلت المحبه و قلت المعرفه قسمـــــــــــه
و خدت عودى و كان عودى ربيع نسمه
أصبحه بالليالى و يجرى فى النجـــــــمه
انا قريت البلد و الفجر و الانســـــــــــان
و انا أتبعت الضحى و حدثت بالنعــــــمه

اصحى يا نايــم وحد الدايــــــم
السعى للصــوم خير من النــوم
دى ليالى سمحه نجومها سبحه
اصحى يا نـــايم يا نايم اصحى
وحد الــــــرزاق:032::032::032::032::032::032::032::032::032::032:

-


القدس


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى يا مؤمنين
منقراتى مد الأنين
الله على رعشة الحنين
عمره ما كان الأمل ضنين
ياقدس نوارة السنين
كأن عينى فى ميتمى
ياقدس ما يحتمل دمى
الا أشوفك وأرتمى
وأبوس ترابك المريمى
أبوى وابنى على فمى
ما اتوهش فى المطال
ياعاصره مهجه الرجال
سقاك من دمعته الهلال
ياقدس ياسبحة السقا
الأعمى فى سجدتك رأى
والفجر من صخرتك سقى
ياقدس تتفجر الجراح
والصبر حرب وأيوب صلاح
يا أخت من مكه والبطاح
قلبى انضرب للعرب وصاح
لابد من فتح فى الصباح
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

لما تقول أجمل ما فى الدنيا , الميه للعطشان
يعرفوك عربى
أما للراوى ريحة البرتقان فى مداخل يافا
يعرفوك عربى
لما تقول ابنى اتولد لاجىء
يعرفوك عربى
لما تقول يارب
يعرفوك عربى
لما تباشر جهادك , ترمى أوتادك
فى قلب دابح ولادك
يعرفوك عربى

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:032::032::032::032::032::032::032::032::032:

-


عبداللطيف


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
فى بحر شاتى
بعد الخريف
شافت ياربى
عين المراكبى
عبد اللطيف
ليلة مشقه
وهلالها شقه
من الرغيف
أو طير ترنح
عشان ينحنح
جناح نحيف
والمد غاسل
صدا السلاسل
على الرصيف
طلع ياربى
عمى المراكبى
عبد اللطيف
على ضى نجمه
من أجل نعمه
وقوت شريف
والبحر ملتم
عمال يلطم
فى حبال وليف
طرح شبكته
وشد يخته
لقاه خفيف
لقاه محاره
من جوه حاره
من جوه ريف
لقاه لوليه
وزغلو ليه
بصوت ضعيف
شكر ياربى
عمى المراكبى
عبد اللطيف
قال هى واحه
وعيون مراسى
وكف راحه
تسند لى راسى
تحيى لى عشى
وتخبز لى عيشة
فى الزهر خيشى
تعرف حدودى
وحق السفينه
وتزين جدودى
واحنا اللى فينا
ما حد ديب
ويا الديابه
وتجيب لى طيب
يقول لى يابا
سجد ربى
عمى المراكبى
عبد اللطيف
وقال ياعالم
كنز ابن ادم
حنان وليف
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

ياقارب الصيادين ترجع وفى الشبكه
شمس وقمر الدهب
والفضه والسمكه
فيه ناس قالوا لك تهدى وانت ماهديتش
والموج ضرب فى قلوعك صلب ما انهديتش
ياقارب الصيادين باليمن والبركه


اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق:032::032::032::032::032::032:

-
نـجـف


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
بنقره نقره أمس والمس
بيد ياما عاشت تغمس
أيام الليل وايام أشمس
واسرح من الفجر بالمدمس
وفى العصارى بدره وترمس
مااعرفش أربع أعرف أخمس
لاعيون حبايبى ولا عينى تنعس
وفى كل حى وفى كل مجلس
أنا ودنى أتقل من اللى وسوس
ويفتح الله عقلى المتربس
نجف ملعلع ما اعرفش أهمس
أعرف أدوى بصوت يحمس
والليل دا عندى تختة مدرس
باسرح وباشرح من غير ما ادعبس
أما مزاجى عمره مافلس
دا انا ابنى قال يا اوسطى للمهندس
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :
ياعم يا سقا يا اللى قربتلك لافته
أنا بادى ودنى لكل الدنيا واتلقى
الأوله أى نعم والثانيه مش لأه
والتالته دى الميه فى الحنفيه والمواسير
وأنا طبلتى فى الاذاعه دقة دقه

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

كل ليله


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
يا ابو الولاد فى كل ليله
أنا فنى عيله
يجمع بلاد
فى ايدى طبله
تقول يا أبله
راجعلى المواد
شايف جنينه
تقول يانينه
امتى الميعاد
لما تفتى
خلى ياستى
نايب فؤاد
لابو الربابه
أقول يابابا
والفن زاد
على راسى عمه
لمن أجاد
أبو قلب خالى
للاعتماد
كل اللى يبنى
يقول ياابنى
ويزيد جهاد
وتقول حماتى
ياروح حياتى
فين الايراد
طبله فى ايدى
تقول ياسيدى
مدد مداد
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

تبقى لى مسعدى يافن تبقى لى
وربنا يمد فى أيامى وحبالى
واكتب كتاب فلسفه فى الشاى أبو النعناع
وفى طلعة الفجر والدنيا اللى فى بالى

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:032::032::032::032::032::032:
ياأهل البلد


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
فى ليلة ناديه متشوقه
زى الحمامه المطوقه
ياللى سامعنى اسمع بقى
الليل دا أكبر من الحيطان المحلقه
ومن النجوم المبحلقة
الليل دا قلبى طالب لقا
دقدوقة مركز ايتاى بتصحى ع الدقدقه
يا ابو عزيزه
والنسمه طعمه محيقه
ياخالتى جازيه
شتويه لكن مورقه
الشاى دا باشا فى كباياته المزوقه
أكبش بايدى ما اشبعش سكر بالمعلقه
واسقينى يا ابنى
عاش اللى ساعد واللى سقى
يا سعد أولى صيام فى جامعة عزق وشقا
انت اللى تسند الازيار وتزرع انت النقا
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :
أدق بشويش أبطط عيش أسمعكم
والا انطر الايد لفوق لبعيد أسمعكم
يا اهل البلد قلبى مايبعدش بعيونى
يااهل البلد نورونى انتم الأمه
ما طابت اللقمه غير للى قسم معكم

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:032::032::032::032::032::032:
رادار


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
أنا عينى صاحيه
فى كل ناحيه
عن كل دار
وأنا قلبى دار
زى الرادار
لقيت على الشاشة ارتعاشه
ايدين تهوش
وصوت يوشوش
وطلقه تمشى
ان ماصابتشى
لازم حتروش
كفايه تدوش
بشويش تشوش
وترمى نار
وأنا قلبى دار
زى الرادار
لقيت على الشاشه ارتعاشه
واد عينه ساهيه
بيقول لى سيبك
لا انا تور فى ساقيه
ولا يناسبنى
أبدا أسيبنى
واروح فى داهيه
داهيه تصيبك
مافيش هزار
أنا قلبى دار
زى الرادار
لقيت على الشاشه ارتعاشه
قوم فز واسمع
صوت البروجى
بيقول لك اجمع
للدم تار
فى كل ناحيه
عن كل دار
عيونه صاحيه
زى الرادار
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :
بقوة الفلاحين وبقوه العمال
وبقوه الدم سايل والعرق سيال
احنا العرب شهداء عدد الحصى ورمال
جبيننا مرفوع ولكن صلبنا عتال
قادرين على الحق ما يقدرش علينا ضلال

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:032::032::032::032::032::032:
الحاج زين


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى أروح واجى
منقراتى وبوسطجى
جايب رساله من الحاج زين
على المحطه شايل دورين
شايل معاه السنبلاوين
نورت يابلدينا المدينة
سافرت صايم منين لفين
ايدك فى ايدى زرنا الحسين
الله يزينك يا حاج زين
على حبينك السجتين
أما الحبايب باسوا الايدين
نورت يا بلدينا المدينة
أنا جيت أسحر والحاج زين
ضحك بسنه وغمز بعين
وقال لى صبرك يا ابو جناحين
ننزل نسحر الاتنين سوا
أنا قلت يللا قال لى هوا
نورت يا بلدينا المدينة
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :
ليالى مبروكه بتنقط علينا الضى
يجرى عليها الزمان اللى بيطوى طى
قلبى انعصر لما قال ياشهر عن اذنك
لا أوحش الله منك أهل هذا الحى

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
:032::032::032::032:

يارب


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
أرتاح دقيقه من لفتى
وأرفع ايدى
وتقوم عينى
وقلبى يعلا وشفتى
ياحى باقى
اسمع دعائى
واغفر لى ضعفى وخفتى
يارب عطفك
أنا لولا لطفك
ايدى ماتملكشى دفتى
اهدينى رحمه
ودنيا رحبه
أتقن جهادى وحرفتى
واجعل حياتى
حاضر و اتى
ما اخجلش منها فى وقفتى
ولا جل أم
بصدر مؤمن
يارب بارك فى خلفتى
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

دى هى كلمه لشعبى ولقمه لولادى
ما اطلبش غيرها وغير الحق فى جهادى
يارب ياهادى
أنا بحق الليله دى أسألك يارب
كرامة المؤمن والنصر لبلادى


اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى

الأمل شباب


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى وقلبى داب
منقراتى على الف باب
سبحت للملك والرحاب
وحلفت بالأمه والكتاب
يامسلمين الأمل شباب
دا جرح أطيب من اللى طاب
دى شمس ماتعرف الغياب
دى ريحة الجنه والحساب
أنا الذى ارنجى الثواب
هدانى ربى الى الصواب
أطلع من المر والعذاب
زى الشهيد أبيض الثياب
ياشفتين باسوا فى التراب
يانخلتين راحة المصاب
واحة المآب
يا مدينتين نوروا السحاب
يا والدين الدعا مجاب
المشى طاب لى
و الدق على طبلى
ناس كانوا قبلى
قالوا فى الأمثال :
"الرجل تدب مطرح ما تحب"


و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

ماتت على الجسر تتلفت لأيامها
وسألت الأم لقمه عيش لأيتامها
اسهر تبارك على الطفر اللى أعدمها
ما تنامش الا شهيد مادمت يامسلم
آمنت بالله وجنه تحت اقدامها

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

البسمة هلت









اصحى يا نايم وحد الدايم
وقول نويت بكره ان حييت
الشهر صايم والفجر قايم
اصحى يا نايم وحد الرزاق
رمضان كريم
مسحراتي ومعدي
منقراتي ومين قدي
الطبلة عاليه في احضاني
زي البيان زي النشره
في ستة اكتوبر عشره
من الهلال الرمضاني
كان قلبي صخر الحنيه
في المعركه للحريه
وللسلام اللي هداني
والنسمة هلت بحريه
يا مصر يا شهد الشهدا
الجنة شمسك وترابك
اصوم واصلى في محرابك
واسمع الشط الثاني
الله اكبر وأداني
اه من هواي في اوطاني
اه من شقاي ومن طربني
الارض تتكلم عربي
والدنيا تسمع بوداني
نور الوجود من وجداني
زقاقي يفتح لي ميداني
حبيبي خدني وعداني
المشي طاب لي والدق على طبلي
ناس كانوا قبلي قالوا في الامثال
الرجل تدب مطرح ماتحب
وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي حته من كبدي حته من موال
دخلت دار بعد دار والكل بيحيي
انا اللي حي وشهيد في الجنه وفي حيي
الله اكبر كأن الشمس من ضيي
على ارض سينا في نار المعركه والصهد
وانا والتراب المنور انتصرنا لبعض
وكنت صايم ملكت من السماء للارض
وكنت عطشان ما حدش ارتوى زيي
اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

المسحراتى ...ونتوقف قليلا لالتقط انفاسى ثم نعيد الكرة مرة اخرى
اراكم غدا بكل الحب والخير
فى امان الله

فنان فقير على باب الله
الجيب ما فيهشي ولا سحتوت
والعمر فايت بيقول آه
والقطر فايت بيقول توت
صحيتني ليه يا شاويش يا شاويش
أنا كنت سارح في الملكوت
لما بنام بحلم وباعيش
لما بفوق ما بفوقشي بموت
وتقول على كبير السن
وانا في قلبي ولد كتكوت
وتشوفني ببكي وبانعي وائن
والدنيا لسه بنت بنوت
اشمعنى قلبي ضناه الشيب
من الشقا مهري ومنكوت
قال اللي قال العيب في الجيب
والجيب ما فيهشي ولا سحتوت
والعمر فايت بيقول آه
والقطر فايت بيقول توت
علي المحطة يا ولداه
حتى المحطة كمان حتفوت

مفيش في الأغاني كده ومش كده
تفرقنا عن بعض بالشكل ده
يا مصر اللي جايبة الشجر من زمان
وشايلة الضفاير على البرتقان
وقبل الأوان اللي قبل الأوان
بتحييني أنفاسك المسعده
مفيش في الأغاني كده ومش كده
تفرقنا عن بعض بالشكل ده
يا حلوة كلامك تحبه الودان
يشمسني في الدروه زي الميدان
يمشيني بين الحيطان الغيطان
عروسه وحصان في القمر والعدا
مفيش في الأغاني كده ومش كده
تفرقنا عن بعض بالشكل ده
عنيكي تغمض وتفتح يبان
سطوح الليالي عليه الأمان
وبحر الدره من ورق لامتحان
وبتغني موّالي يا مولّده
مفيش في الأغاني كده ومش كده
تفرقنا عن بعض بالشكل ده
بحبك كأني طليق العنان
و زى العجوز اللي دق البيبان
وزي الكتاب اللي كان ياما كان
وزي الرصيف اللي في السيده
مفيش في الأغاني كده ومش كده
تفرقنا عن بعض بالشكل ده

ليه ما قبلتش أعبد الأوثانْ

ليه ما اكتفتش بأضعف الإيمانْ

سجنوني

ليه قلبي مصري وعيني مصريهْ

وحياتي كلمه في خدمة الأوطانْ

سجنوني

طالب بعدل ونور وحريهْ

وبهدمه للعريانه والعريانْ

وبراحه للعرقانه والعرقانْ

وبرحمه للعطشانه والعطشانْ

وبساعه للغلبانه والغلبانْ

من إنسانيه يعيشها كالإنسانْ

سجنوني

ليه الطيور بتغني ع الأغصانْ

لحن السلام وروائع الألحانْ

سجنوني

ليه مش خسيس مش وغد مش حيوانْ

سجنوني

ممنوع أقول للحق إنت الحق

وأشوف مرائي العينْ من الأحزانْ

أو أسمع المسموعْ من الأشجانْ

ما رضيتش أعيش من غير عيونْ وودانْ

ما رضيتش اعيش من غير فؤاد ولسانْ

سجنوني

ليه قلت طرد الطاغي في الإمكانْ

ليه قلت هان الطاغي قبل ماهانْ

سجنوني

كان صدقي بيفن عمرو إيدن كانْ

عهد الضلام والبغي والطغيانْ

كان شعبي مسجونْ كان فاروق سجانْ

سجنوني

أنا بافتح لكم قلبي

وانا باكدح إلي ربي

في عيني الشوق وفي وداني

يااهل الله ياأوطاني

ماليش غيركم وطن تاني

ولاصاحب ولامطرح

وانا بافتح

مشيت صحرا بلاواحة

ونار الشمس لواحة

تدلوني علي الراحة

أقول ان الشقا أملح

وانا بافتح

وبين الأرض والنجمة

أروح في الورد والنسمة

تحدثكم حديث نعمة

ونقرا لكم ألم نشرح

وانا بافتح

*****

ايام العجب والموت
آدى أيّام العجب والموت
جات بسرعه زى غمضة عين
ليه ماقلتش زىّ لمْح البَصَر
كنت باتقلّب على الجنبين
والكابوس من كل جنب يجيبنى
زىّ أعمى يحسّ لمّا يجسّ
ألقى نفسى والاّ اشوف نفسى
بالتفت من آخر الدنيا
الحمير بتجرجر العَربَات
السما اللى تحت منها حابات
عند كوبرى أبو العلا بتشتى
أنكمش فى جتّتى من البرد
لسّه حارجع طفل تحت المطر
وأنحنى ع الأرض وافضل عجوز
اتوهمت الخوف دهسنى الخطر
كل شئ إلا الخيانه يجوز
ألبس التوب اللى مش توبى
أعمل الممكن مع المستحيل
أمشى زى الخنفسه و البد
جنب حيطه فى ركن ع السلّم
الحجر الاصفر بيتألّم
فيه أثر للعشره مهما تهون
أقبل الظلم اللى فى الأشياء
والليالى بخدّها المدهون
والحياه والناس وحتى فى نفسى
واقرا فى الجرنال كلام تانى
وانتقل فى الماضى واستغرب
وابكى ع المستقبل الفانى
واحمل الضلمه على عينىَّ
وانتبه من نومى واسمع نعى
الزميل جوده سعيد الديب
إسمه بالكامل يا فجر الطيب
اللى ضاعت مَّنى أيّامه
وآدى أيّام العجب والموت