manyaa;9868185:
بنات عايزة اسأل ...
حد جرب او يعرف حد مجرب كريم فرد الشعر اللي هو سوفت اند بيوتفل ؟؟
ياريت اللي جرب يقوللي ايه الاخبار عشان انا طقيت من شعري و جربت اهتم بيه و كل حاجة بس خلااااص تعبت و ناوية افرده ان شاءالله قبل فرحي ب3 اسابيع ..
فحد يقوللي لو يعرف عنه حاجة كويس الله يكرمكم..
بصى حبيبتى نصيحة لوجه الله ابعدى عن الفرد خااااااااالص هيدمر شعرك وهتندمى ندم فظيع هتفرحى بشعرك شهر وتعانى دهر هتلاقى شعرك بقى زى المقشة لو شعرك دلوقتى وحش بعد كده هيبقى اوحش وده مع اى نوع فرد مهما خدعوكى وقالولك انه مش بيضر .
طيب هتقوليلى اعمل ايه هقولك ان شاء الله تقدرى تعملى برنامج لشعرك فى الكام اسبوع اللى باقيين على فرحك ربنا يتمم لك على خير يا رب .
-
- 1- لو شعرك مقصف هتقصيه هو ده الحل الوحيد للتقصيف
- 2- لو شعرك جاف هتاخدى زيت كبد الحوت عشان الاوميجا اللى هى الاحماض الدهنية اللى غالبا هيكون عندك نقص فيها وفى كمان بريم روز اويل هتجيبيهم من الصيدلية
- 3- هتعملى حمام نخاع مرة فى الاسبوع لو شعرك مدمر قوى هتعمليه مرتين فى الاسبوع
- 4- هيكون كده عندك مرة تالتة فى الاسبوع اما تخليها حمام زيت +صفاربيض او تعملى حنة ستاسى
5- لو عنك تساقط هتعملى قبل الحنة توم ولو ملكيش فى التوم يبقى لازم تستعملى لوسيون لشعرك تدليك مرتين يوميا اما انك تجيبى لوسيون من الصيدلية او تجيبى لوسيون دينا الجارم وممكن تجيبى من عندها النخاع ولو عايزة تفاصيل هتلاقى ستاسى ربنا يكرمها منزلة صور الحاجات دى فى المشتريات بتاعتها وهتلاقى على الصور ارقام التليفونات الخاصة بمركز دينا الجارم وهى عندها توصيل لاى مكان ولازم تستخدمى شامبو حلو ممكن تجيبيه من عند دينا الجارم برضه واهم حاجة تشطفى شعرك كويس من النخاع الاول بالماء الدافىء وبعد كده الشامبو ومتكتريش النخاع عشان ميلزقشى شعرك يعنى لو شعرك جاف هتاخدى معلقة كبيرة ممسوحة ولو دهنى هتاخدى معلقة صغيرة ممسوحة
- 7- مهم قوى استخدام حمام الفوطة السخنة مع حمام النخاع واى حمام تعمليه بصفة عامة وبجد لو عملتى كده هتلاقى نتيجة كويسة قوى بعد اسبوعين ويمكن اقل وحاولى تستمرى على النظام ده بعد ما تتجوزى ان شاء الله وشعرك هيتحسن كتييييييييير ان شاء الله
