حوامل بحريننا ، لنستفيد معا !!

جمال الزهره;8027989:
الله يسمع منج و ضيفيني في اللي تبين ,,
بس أي لستــه هذي :rolleyes: اني عفر ماادري وين الله حاشرني

:eek: اللستة بتجمع حوامل البحرين ، قسم التجهيزات ، ما شكلج شاركتي ولا مرة هناك ، قلت اسوي لستة وحدة لهني و هناك

وهذي وصلة التجمع لو ما عرفتيها

http://www.3roos.com/forums/t407060_post8065674.html


اما على سالفة الحبوب ، اني احس وااااااااااايد مهمة ، يعني وانتي تاكلين عدل و كله فيتامينات و تشربين عدل حليب بعد بتحتاجين لها وخاصة بالاشهر الاخيرة لان البيبي يكبر عدل و يحتاج لهذي الامور ولو ما حصلها ياخذها من جسم الوحدة و من العظام والضروس حتى ، لذلك احنا نشربها لنا اكثر منها للبيبي علشان صحتنا و بالنهاية اكيد صحة البيبي


اني مخلية الحبوب بالكمدينة صوب سريري و بالليل اخذ الحبوب كلهم لان حاولت افصل بينهم بس كله انسى ، بحاول اخذ الفيتامينات و الحديد الصبح و الكالسيوم بالليل


اووووووووه ذكرتيني بصالونة الدجاج خخخخخ بسويها الحين بيوم العطلة للعيد الوطني خخخ ، اوووووه الحين انتي مشغولة ببنتج و اللي ببطنج الله يعينج والله ، تذكريني يوم اتصل لاختي قبل العيد ، تقول مو محصلة لبنتها شي يا صغار لبيبي او كبار مو لسنها خخخخخخ ، بس تعالي اي بنت ، اللي ببطنج :ss: او بنوتج الثانية ، رجعت اقرا الجملة حسيتيه عود :ss: ، يعني لو بنتج الثانية جان جربتيه عليها ، مخي افتر من الحمل خخخخخخخ


اي والله على النومة اوووووووووووف يلا الحمد لله على كل حال

اني هالايام لازم ارجع و لوعة من الصبح ، اقول من الزكام يمكن و فعلا تحسين بشي مثل الحموضة و الحومة و التنفس اوووووووف احس بينقطع نفسي و خاصة لو بس امشي او اركب او اي مجهود اسويه ، وبالنوم كلحين على جهة ، اقول لزوجي احس بفطس من التنفس و الحر ، نبطل النوافذ واموت من الحر و اقول بقوم اشغل المروحة وارجع اغير رايي واقول لا يزيد الزكام ليي ، يلاااااااا هانت كلها جم شهر و نشوف بيبياتنا ، عاااااااااد ذيك الوقت نودع النوم خير شررررررررر خخخخخخخخ:D

وقت الي بيصير تخفيضات في المحلات نتفق نروح رحله ونتسوق ... اشرايكم ...

اوووووووه بيفوتني خخخخخخخ ، الحين ناوية اروح اكمل اغراضي ، بس عندي احساس بيسوون تخفيضات بالمحلات على الكريسماس و راس السنة و قلت الاشياء اللي ما احتاجها الحين بنطر عليها ، ولو ما سووا على قولة زوجي ، بروح اشتري ذاك الوقت خخخخخخخخ بس يا خوفي لا اولد قبل الشي خخخخخ ، و بعد ايام معرض الخريف اغلب المحلات تسوي تخفيضات يعني شكلي ما بلحق على الطلعة :o

بس حتى لو ما عندي شي بجي اتسوق وياكم بعد خخخخخخ فضول ابغي اشوف باقي البنات خخخخخ

أم عبود ، تنظيف البشرة كلششششش عادي ، اني الى الشهر السابع كنت اسوي كل شهر، واخر مرة قبل العيد اخذت موعد بس ما رحت له و قلت للصالون ما اقدر ينقطع نفسي خخخخخخ ، الفلبينية ظلت تضحك و قلت لها بجي لج بالتاسع مرة وحدة تنظيف و مساج للولادة

اني عندي تجهزين من البحرين و تفتكين لان ما تدرين ويش بيكون حالج من الثقل و على الاقل اخذي الاشياء الاساسية اللي ما بتشترينها اكيد بسفر و باقي الاشياء مثل الثياب ممكن تناخذ من بره او من البحرين ، بس مثلا القمطة والبسطة و المفرش والمراضع و الخ من الاغراض احس افضل شي البحرين حتى احسن من السعودية و انتي ورايج ، بس الثياب ممكن من بره احسن


ولا تنسين تجهيزج كامل من بره ، بيصير عليج وزن ، يعني ما تفرق و الافضل اهني اريح لج ، يعني الاشياء الكبيرة والاساسية اخذيها من اهني ولو حبيتي تاخذين اشياء من بره اخذيها

اني اختي يوم تسافر مصر اخذت ليي اللي يحملون فيه البيبي مثل سلة موسى بس للطلعات استخدمها

وانتي الحين قلتيها رايحة للدراسة ، يعني اكيد بتتعبين و انتبهي لدراستج احسن و اتركي امور التجهيز لبعدين و اخذي الاشياء اللي تسوى بسسسسسسس و اتركي باقي الامور للبحرين

ام طـلال;8036810:
بكره عادي اروح العسكري آخذ موعد
ولا مافي ؟

اتصلي لهم واخذي موعد ، يبغي لج تشوفين على اي دكتورة ، يعني اني من 3 اسابيع ماخذة الموعد لهذا الاسبوع ومخليني على قائمة الانتظار للدكتورة موزة و موعدي باذن الله هالاسبوع لو الله كتب

والعسكري عيادتهم ما تفتح بعطلة نهاية الاسبوع ، يعني من الاحد للخميس و مسكرة بايام العطل الرسمية ، اتصلي و شوفي لو تحصلين موعد وان شاءالله تلقين وحاولي تتصلين عيادة الحوامل لان الطب الخاص ما بيعطونج موعد قريب اما العيادة بيخلوونج على قائمة الانتظار ، من يصير مجال بينادونج

ام طلال و جمال الزهرة يبغي لكم تريحون و تنامون ، خخخخخخ الحين النوم والسهر ببلاش بعدين ما بتقدرون حتى تغط عيونكم ، اني كنت جذي لازم انتظر زوجي مع انه يسهر صوب البيت ، مسوي له قعدة و زراعة على خفيف صوب البيت و يقعد يبسط ويا الجيران و ربعه بس اني مستحيل انتظره ، لان احس البيبي واني وياها خخخخخخ محتاجين ننام


حلمي الرشاقة ، الله يعينج ، حاولي تعودين روحج و تغصبين على نفسج لان احس صعبة و شوي شوية بتتعودين وما نضحك عليج بالعكس هذا الانسان وما يقدر عليه ، بس اني احس تعودين روحج احسن وخاصة بيجي لج بيبي و بيسوي مثلج بالضبط والله يكتب لج اللي فيه الخير ، اني وحدة من خواتي جذي كانوا يذوبون لها الحبوب و زين بعد تشربهم و يقولون لها اختج الصغيرة اللي اهي اني اشربهم و بس ، والحمد لله الحين اووووووكو و تشربهم عادي

اي ام عبود التوزيعات حلوين من مصر و زين ما تسوين الاشياء الثقيلة من البحرين احسن لج

زوجي حبيبي ما عندي فكرة بس اكيد المستشفى ما بيسوون شي يضرج ، اني عطوني يوم اروح التخصصي طوارئ حبوب للزكام و مضادات واشياء بس سالت الدكتورة و قالت ليي ما بنعطي الحامل اي شي لانها مسؤولية و اكيد ما بياثر على البيبي و توكلي على الله و ان شاء الله هو الحافظ

بنت البحرين ، اووووووووه عندج صور لتوزيعات بنتج قبل ولا تقولين ، يلااااااااااااااا بسرعة خليهم لنا خخخخخخخخ


أم النوح ، اني سمعت محذرين على المستشفيات الحكومية ما يقولون الجنس ، هذي زوجة جارنا ، سمعت زوجي يقول ان زوجها قال له ، السلمانية ما رضوا يقولون لزوجته ويش بتجيب مع ان عندهم بنت وولدين ، اني عندي تروحين لمستشفى ثاني احسن او انج تنتظرين موعدج الثاني و تقولين للدكتورة ، ذيج المرة قالوا ليي جذي ، الحين يبان عدل ؟؟ يعني كانج تسالينها عن صحة الجنس اللي قالوه لج مو عن الجنس وان شاء الله يكون خير واهم شي الصحة والسلامة و الله يرزقج باللي تتمنونه

يلاااااااااااااااا شكلي طولت بالقعدة ، باجر اكمل قراءة الردود لان وراي باجر دوام والسهر فوق السرير اوهوووووووووو كلحين قومة للحمام خخخخخخخخ

يلااااااااااااا تصبحون على خير واحلامكم سعيدة يا رب

اشرايكم بنات اغيرها ؟؟؟ ولا اتم عليها

يارب ادعولي احمل بدون دكاترة ولا شي

بالاول حياج الله بيننا ، و الله يكتب لج الحمل بدون دكاترة ولا شي و يرزقج بالذرية يا رب و تتهنى بالبيبي

اما عن سالفة المراجعة والتغيير ، اني احس لو انتي مرتاحة للدكتورة و تحسين انج قاعدة تستفيدين منها ، واصلي متابعة وياها

يعني اني تابعت بعد ما اتزوجت بسنة عند منى الشرقي و كانت قمة بالروعة والاخلاق بس يوم حسيت اني ما استفدت منها وكنت على سفر للدراسة خبرتها و خلااااااااص ما رجعت لها لما رجعت من السفر

و رحت بعدها عند زينب الجفيري و نفس ا لشي دكتورة روعة و حبوبة ، بس قالت ليي ما فيني شي بوجهي :ss: لانها سوت ليي عملية منظار و ما طلع فيني شي و بعدها ما رحت لها

و تابعت عند دكاترة ثانية والله يسامحهم ، كل واحد يفتي بجهة و الحمد لله على كل حال ، يعني ما فيج شي بس اخذي واخذي و سوي هالتحاليل ، يعني ماديين وايد ومرات يبالغون وايد ومن اول مرات ما حبيتهم

وبعدين تابعت عند موزة بالعسكري والحمد لله حملت بفضل الله و فضلها مع ان مرات اسمع عنها انها مو اوكي و سوالف تجنن الواحد

فلذلك اقول لج لو اتابعين مع الدكتورة فكرية و كنتي مطمئنة لها و تشوفينها حلوة ابقي معاها ولو حسيتي ما تستفيدين منها ، غيريها الى دكتورة ثانية بوقتها ، ولا تسمعين كلام اهني و هناك لان كل واحد و تجربته الشخصية والله يكتب لج كل خير والحمل بدون مساعدة دكاترة يا رب

! أنــثــى !;8069389:
بنااااااات بسألكم !


انا ولادتي بالصيف ان شاء الله يعني شهر 4 !


الحين ابي اجهز لما يخلص تخلص اول عشرة ايام من محرم حتى ما يزيد علي الثقل .. الاسواق اغلبا شتوي !! شسوي ؟ :(

اني احس بعد محرم ، معظم المحلات تسوي تخفيضات و اغلب البضاعة تكون صيفية لان الشتا الى الان موجود

ولو ما صار ، بدي بالاشياء الرئيسية اللي ما لها علاقة بالطقس ، يعني قماطات و بسطة و مفرش و مراضع والمعقمة و ثياب لج و تجهيزج و سرير للبيبي والمستشفى التجهيز و الخ و اتركي الثياب الى اخر شي ، لا تسوين مثلي اول شي اتخرعت و اشتريت الثياب و احس الحين نفسي بثياب ثانية بس اقول اللي عندي كافي ، يعني بدي بالاشياء الثانية احسن و اتركي الثياب للنهاية و استغلي التخفيضات قدر الامكان

هلا زوجي حبيبي ، تسلمين والله كلج ذوق

اني احس افضل وقت للتجهيز نهاية الخامس الى حدج نهاية السابع

الحين اني بالثامن والتعب والثقل متعبين و الى الان ما كملت تجهيز بس الحمد لله على كل حال و قلت بروح افتر شوية هالايام واكمل الباقي والاشياء اللي تسوى بتركها للتخفيض ولو ما صار بالكريسمس باخذها على طول ، خخخخخخ زوجي يقول ليي ، ذيج الايام عليهم تخفيض و تقولين ليي بعدها وقت نشتري هالاغراض والحين تبغين تنتظرين التخفيض خخخخخخخ ، اني قلت بنطر احسن ولو ما صار كلها فرق اسبوع الحين و بشتري الشي

المهم بدوا تجهيز من الحين علشان التعب لا يزيد عليكم بعدين

أحلى شوق ، لااااااااااااااااااااااااا بالعكس ، مع اني اكره وزارة الصحة و تبعها المراكز والسلمانية بسسسسسسسسسسس وايد حوادث و سوالف تصير من جنس البيبي

يعني اللي تطلقت من زوجها لانها 7 مرات تحمل ببنات و حلف يطلقها لو كانت حامل ببنت للمرة ال 7 و يطلع بعدين غلط و يكون فيها ولد بالنهاية بس فات الاوان

واللي يجهضها زوجها من الضرب بسبب الحمل ببنات و سواااااااااااااااااالف وايد سمعت فيها بصراحة

واللي يصارخ ويا زوجته بالمستشفى و اشياء ما تخطر على البال فمنها منعوا الشي ينقال بالحكومة و اقتصروا على الخاص

bent el ba7rain;8074252:
مراحب شخباركم وشعلومكم؟؟
غربة عندي مال بنتي الاولى الحين بنوتي عندي اياهم بس مااشتغلت عليهم بعد الولادة اكيد بنزلهم

بنزل لكم صور بنتي الاولى

هلا والله بنت البحرين ، بخير نحمد الله وانتي شخبارج و شخبار الامورة و البيبي ، واني من رايج بعد الولادة ، كل وحدة تحب التميز بالتوزيعات بس التجهيزات احس عاااااااااادي تشاركين فيها بس التوزيع احس صعبة

:D:o:D:oبتقولين عني الحين فضولية ، خخخخخخ اني يعجبني اشوفهم حتى لو كانوا مال قبل ، صور بنتج الاولى خليهم بس اللي الحين للكتكوتة الجديدة اني وياج ما افضل تخليهم ، احس حلو لو كان مفاجاة التوزيعات بس التجهيزات حلو تخليهم بس التوزيع لاااااااااااااا ، ناطرين الصور تخليهم

خطيبة عماد;8074502:
هلا بنات شخباركم

اسمعكم تقولون تجهزون

يعني الحين انا بدخل الخامس اجهز من الحين ؟؟ والا بعد وقت

اخاف ينزلون اشيا احلى بعدين

عاطيني ولادتي 22/5/2009

احس بعد في وقت

هلا والله خطيبة عماد ، احنا بخير نحمد الله احنا و بيبياتنا :D

هو فعلا كلامج صحيح يمكن تلاقين احلى ، بس حاسبي للثقل والتعب

تقدرين تبدئين بالاشياء الاساسية اللي ما تطلع لها كل يوم موضة ، يعني مراضع و معقمة والخ واحس احسن وقت بنهاية الخامس ولا تنسين بعد تستغلين التخفيضات بهذي الامور

و اتركي البسطة والقمطة والثياب لوقت ما تدشين السادس لان بتحسين نفسج كل مرة ودج شي جديد تاخذينه ، ولا تشترينهم دفعة وحدة ، يعني جزئي الشي لمراحل علشان تستمتعين بالتسوق خخخخ و ما تشترين شي و بعدين تلاقين شي احلى ، يعني التجزئة افضل شي والتمهل بس مو لدرجة البرود ، بس افضل شي من نهاية الخامس الى نهاية السابع مخلصة امورج ، و بالثامن تكونين بادية بالتوزيعات ، هذا افضل شي بس الواقع خخخخخخ اني عندي تخربط بس احسن لج تبدين و ترتبين امورج ، اني لولا المرض والحين غفصة البيت كنت خلصت شوية بس الحمد لله على كل حال

واكيد باقي البنات بعد بيفيدونج لان كل وحدة عندها خطتها و طريقتها بترتيب امور التجهيزات و بالتوفيق وان شاء الله تخلصين كل امورج مثل ما تحبين