] - إهداء خاص

انا أطالب خواتي المشرفات انه يثبتون الموضوع

والله مفيد لليوم وبكره وللسنوات الاتيه ان شاء الله

ولا اشرايكم يا بنات ؟؟

انا اشوفه يتثبت احسن بوايد

ما شاء الله تبارك الرحمن :)

والله يا أخواتي إن ردودكم دائما تثلج صدري .. و تفرحني وايد وايد وايد ..

و أنا ما بي لكم غير المنفعة و الفايدة .. و الأجر على الله ..

جزاكم الله خير .. تشرفني متابعتكم ..

حياكم الله جميعاً .. و متابعة مفيدة بإذن الله :)

.
.
.


[[ سنة أولى زواج ]]


- حياتي تعيسة و السبة زوجي ! -

تابعوا معاي هالحوار .. بين صديقتين ( و هو حوار ممكن انه يواجهج ) ..

اتصلت مها على أمل مرة .. و من بعد السلام و السؤال عن الأحوال ..

أمل سألت مها : كم تزورين هلج في الأسبوع ؟

مها ردت مستغربة : يعني على حسب بس تقريبا مرتين في الأسبوع ..

أمل : تدرين إني ما أزور أهلي إلا مرة كل أسبوعين .. و بكت ..

مها تركتها تبكي و تطلع اللي في خاطرها .. و عقب سألتها : ليش ؟

جاوبتها أمل بعصبية و حرقة : ريلي ما يبيني أزورهم جذي من غير سبب !!

مها : طيب أنتي ليش معصبة ؟

أمل متعجبة : ليش معصبة !!! لأن خواتي كل خميس يتجمعون عند هلي .. جمعة و ( وناسة ) .. أما أنا قاعدة قلبي معورني

و مقهورة .. افففف شهالحياة التعيسة !

مها : زين جاوبيني أنتي تحبين زوجج ؟

أمل : اي أحبه .. و هو نفس الشي .. و عمره ما قصر علي في حاجة الا هالموضوع !

مها : اوكي متى آخر مرة ضحيتي فيها عشانه هو ؟

أمل : امممم ما أتذكر .. بس أخبر من شهرين كان مريض .. قعدت معاه و ضحيت بجمعة هلي عشانه .. و ما أنكر انه

شكرني على هالموقف ..

مها : حلوو .. بس في ظنج لو رحتي كل أسبوع مرة .. و هو مب راضي .. بتكونين مستانسة و بتحسين بالوناسة ؟

أمل : مادري بس ...

.
.

موقف مثل هذا راح يواجهج في أول سنة زواج .. و اللي عاشوا سنتهم الأولى أكيد مروا بهالموقف أو ما شابه ..

و حريم وايد .. لما يصير لهم نفس الشي .. تكبر الموضوع لدرجة انها ماتشوف و لا تفكر الا فيه .. لكن لو تريثت شوي

وفكرت بتلقى ان المسألة مش مستاهلة انها تصيح و تزعل و تعصب و تسويها مشكلة و تشوف ان حياتها تعيسة ..


يا أختي صبري شوي .. شلون تشوفين حياتج تعيسة بس عشان حاجة بسيطة ما استوت لج ( مثل جمعة هلج .. و هالكم

ساعة اللي بتروحينها ) .. حكمج على حياتج غلط و متسرعة وايد ..


للعلم يا حبيباتي .. خاصة اللي بيبتدون حياتهم الزوجية .. الحياة مب وناسة بس .. مب روحة و طلعات و جيات ..

بتواجهين كل حاجة في هالحياة .. الفرح و السعادة و الحزن و الألم .. حياتج بتكون أخذ و عطا .. و تضحيات ..

وفيها تنازلات لو تطلب الأمر ..


إذا منعج زوجج من حاجة معينة و لتكن زيارتج لبيت هلج .. من غير ما يوضح أسبابه .. هني تقدرين توصلين

معاه لحل .. و الطريقة بسيطة جداً .. قعدي معاه و فتحي الموضوع مرة و مرتين .. لكن متى ؟ لما يكون مرتاح

و مستانس منج لأنج سويتي له شغلة معينة .. ( انتهزي الفرص ) ..

و إذا استصعب عليج الموضوع .. أوصيج تطلبين ربج ييسر لج و يسهل عليج أمورج ..

.
.
.



باقي لنا شي بسيط يتعلق بهالجزء بعدها بننتقل لموضوع ثاني :)

الله يجزاك خير ،،،
فعلا الحياه أخذ وعطا....... وكل اللي قلتيه صحيح

موضوع رراااااائع
وجهد مشكور

موضوع رائع
سلمت يمناك
ولا عدمناك

يعطيك العافيه

كملي اختي ولاتقطعين علينا ..

يقل حماس الموضووع بطول الفترة ..

ومشكوورة

عسى ربي يخليك لعيوووني >> وايد استانس يووم اشوف دودووحه تتكلم
احس الدنيا فيها ناس فاهمه وعاقله

مشاء الله عليج يا قلبي

هالنقطه واااااااااااااايد مهمه

خصوصا للمتزوجات تووهم من كم شهر

لان فعلا يا دحدووحه صادني هالموقف

في البدايه كنت افكر اشلون احلها

من طبعي ماحب اقول حق امي او اختي او اي حد من هلي انه هو مانعني ازوورهم في هاليوم مثلا

زوجي ولله الحمد مايمنعني عن اي شي اسويه دام انه صحيح ويرضيه ويرضي رب العالمين

واحمد ربي على هالنقطه

بس اوقات الرجال تجيه عرات ويقول قعدي كنت في البدايه ازعل واسويها سالفه طوييييييييله وعريضه

<< امد بووزي واوقات اصيح برووحي

بس فكرت فيها ليش ازعل عشان زياره هم بيجون لي واوقات يخليني ارقد عندهم وماعترض
على يوم واحد اصيح والله مايسوى علي

وش حلاة حياتي وانا مع زوجي ومع اهله الناس الطيبين

يعني الحمد لله قدرت احل هالمشكله والحين لما قريت الكلام

شفت ان عدل كلامج 10000000000&#37; والله

والله والله اني افرح لنصااايحج واحبج وااااااااااااااااااااااااااااايد

عسى ربي يوفقج يااارب في حياتج ويرزقج بالذريه الصالحه ياااااااااااااااااارب

بنات وربي انه كل كلامها عدل وصحيح وبتجربوون هالشي بعد الزواج

بارك الله فيك ولا حرمت الاجر

والله جزاك الله كل الخير

الله يجزيكم كل خير على ردودكم .. و متابعتكم و إضافاتكم :)

- على فكرة كل إضافة أو تعليق على الموضوع اعتبرهم ذهب -

بووسة حب;4190140:
يعطيك العافيه

كملي اختي ولاتقطعين علينا ..

يقل حماس الموضووع بطول الفترة ..

ومشكوورة

ما عليه يا أختي ودي تعذريني بس ظروفي شاغلتني ..

أنا كان ودي آآجل طرح الموضوع لين شهر 9 .. بس تذكرت إني بانشغل مع الدوام ..

فالعذر منكم .. و أحاول أحط لكم أجزاء أكبر شوي ..

حاضرين ..

.
.

سح سح و نونو : أنا بعد أحبكم و أعتز بمعرفتكم و بأخوتكم ..

يعطيج العافيه دح دح.. عجبتني سح سح ونونو احس شخصيات كرتونيه
بانتظار التكمله يالعزييييزه

الله يعطيج العافيه و نصايحج قيمه الصراحه و نحن في انتظار الباقي

الله يوفقج و يسعدج يارب الله ينور عليج

مساء الخير (f)

.
.

أكمل لكم بقية الجزء اللي فات .. و بإذن الله راح أضيف لكم جزئين اليوم " قولوا إن شاء الله " ..


[[ سنة أولى زواج ]]

الجزء اللي فات .. كان عبارة عن مشكلة من وجهة نظر الزوجة ..

و الحين راح نعرف مع بعض شلون نتصرف لو واجهتنا مشكلة مع أزواجنا ..

في البداية تخيلي معاي .. لو صار لج موقف شبيه مثل اللي مر علينا .. نصيحة : شوفي للموضوع من زاوية ثانية ..

هنا الزوج أمر زوجته انها ماتروح بيت أهلها .. و هي سوتها مشكلة و حكمت على حياتها بسرعة ..

احنا مانبيج تسوين مثلها .. بالعكس أبيج تتذكرين إن لزوجج حق الطاعة .. يعني لازم تطيعينه - مهما كان الألم اللي

تسبب فيه - في النهاية بتشوفين إن انتي الكسبانة .. بس شكسبتي ؟

الأجر و رضا الزوج و محبته <<< يا سلام .. ما أظن يا أختي انج تبين تفرطين فيهم .. صح ؟ لأنج تبين الجنة ..

( الله يجعلنا و إياكم من أهل الجنة ) :)

..

و تفضلي .. هذي أشيا صغيرة طبقيها لو صارت لج مشكلة مع زوجج ..

1. لو الموضوع كبر عن حجمه .. و قط عليج الزوج قنبلة .. حاولي يا حبيبتي انج تكتمين غيظج و لا تزيدين

الوضع أو حتى تفكرين في إنج تردين عليه .. و خلي سلاحج " الصمت " ..

تعرفين لما تلتزمين السكوت و بس تسمعين لزوجج و هو يصارخ و لا هو معصب .. انتي بصمتج تهدين الوضع بطريقة

غير مباشرة .. لأن الريال بيجيه وقت و بيكتشف ان هو اللي يتكلم بصوت عالي لكن انتي ساكتة .. و بيسكر على

الموضوع و بيسكت بالعربي راح ينحرج ..

نصيحتي لج : لما تشوفين ريلج يحاول يهدا .. استأذنيه و روحي توضي و صلي ركعتين أو حتى لو تكتفين بالوضوء ..

و خلي هذا مبدأ لج " ذروة الخلاف تخليني في الأخير أتجه للوضوء و الصلاة " و بتلقين نفسج هاااادية جدا .. وسبحان

الله كل اللي في نفسج بيزول ..

الفقرة اللي بهاللون .. هي إضافة من عندي


2. دائما و أبدا .. عند أي خلاف يصير بينكم تذكري حسناته و ركزي عليها .. الشي هذا بيخفف من أي شعور سلبي

نتج عن هالموقف ..

3. احتسبي الأجر في طاعة زوجج .. و تذكري انه من حسن التبعل للزوج اللي يساوي جهاد في سبيل الله << سبحانك

يارب .. فايدة عظيمة كلنا نبيها ..

4. دايما كوني الأحسن .. و خليه يشوف الغير متوقع منج .. اذا تبين شي يستوي لج " و كان رافضه " .. أحسني له قد

ماتقدرين .. و كوني كريمة في كل شي معاه .. صدقيني بيكافئج و بيحقق لج اللي تبينه .. شفتي شلون ..

5. تحملي تغلطين هالغلطة >>> و من أي خلاف أو تضايقتي منه بسبب موضوع .. تقولين انا ما راح أكلمه و لا اتصل له

و لا راح أسأل فيه .. و تسكتين عنه و لما يكلمج .. تطرين عليه الموضوع و كأن انتهت المواضيع من الدنيا ..

حتى لو كنتي زعلانة حدج منه .. احرصي على انه ما ينام الا و هو راضي و قبل هذا كله .. انهي الموضوع و لا كأن

شي صار خاصة إذا هو سعى عشان يغير الأجواء ..

6. طيب يمكن تقولين في بالج الحين .. شلون جذيه .. يعني أسكت له ؟؟ يعني ما يسوي اللي أنا ابيه ؟؟ على طول

انا اللي باسمع الكلام .. و هو ما يحقق لي حاجة ؟؟؟ و من هالكلام ..

انا اقول لج انتهزي الفرص .. اليوم فتحتي الموضوع و تهاوشتوا و تزاعلتوا و راضيتيه في الأخير من غير ما توصلين لحل

معاه .. من غير ما يوافق لج على اللي تبينه .. ردي افتحي الموضوع بس تخيري الوقت المناسب .. و لا تيأسين

مهما صار .. لأنه ممكن يقتنع و يغير رايه و هالشي بيكون في صالحج ..

" و عن تجربة .. أعند من ريلي ما فيه .. و ساعات يعاند على مواضيع صغيرة بس لأن نظرته للموضوع تختلف يشوفه

كبير .. أول مرة مصر على رايه .. ثاني مرة حاولت معاه و بعد مصر .. بعد فترة بعيدة شوي .. فتحت الموضوع معاه

و اقنعته و خليته يقول ( خلاص سوي اللي تبينه .. الحين انا فهمت إصرارج و ليش تبين تسوين الشغلة هذي ) و تأكدت

انه راضي و عن إقتناع .. و هذي نقطة في صالحي .. "

7 . آخر شي لا تهملين الدعاء بغض النظر لو عندج مشكلة او ما عندج ..




- الفقرة الجاية خاصة جداً جداً للعرايس اللي بيسكنون مع أهالي أزواجهم -





[[ سنة أولى زواج ]]


- راح تسكنين مع أهل زوجج ؟؟! -

إذا جاوبتي بـ " نعم " .. و في نفس الوقت تحاتين تصير لج مشاكل مع أمه أو خواته بحكم الإحتكاك .. عيل اقري

الجاي .. و ركزي معاي ..

- في بداية زواجج قعدي مع زوجج و خططوا لحياتكم .. و تطرقوا لموضوع السكن مع أهل الزوج ..

- انتي الحين جديدة على العايلة .. خلي نفسيتج خفيفة معاهم و محبة .. ولا تحطين في بالج المشاكل او سوء تفاهم أو

شي ثاني .. و لوصار لك موقف معاهم حسيتي من خلاله ان فيه إساءة لج .. برري لهم و حطي لهم أعذار .. و أحسني

الظن مهما صار ..

- دايما تعاملي معاهم بإحترام .. حبيهم و عاملي خواته و كأنهم خواتج أو كصديقات لج .. و اعتبري ان أمه في مكان

أعز و أقرب خالة لج أو عمة ( مابي اقول امج ) .. طريقتج هذي معاهم بتحصدين من وراها خير إن شاء الله ..

- اهديهم بين الفترة و الثانية .. لو عنده خوات في المدرسة ساعديهم في دراستهم و واجباتهم ..

- أهل زوجج مب مثل أهلج .. يعني ممكن تصدر منهم تصرفات تزعجج .. حاولي تمكسين نفسج و تكظمين غيظج

و تذكري أجر كظم الغيظ ..

- تناقشي مع زوجج في عدة نقاط و اطلبي منه :

** ما يبين جدامهم حبه لج .. ممكن يكون هو طاير فيج و يحبج من كل قلبه .. و من زود وناسته يبين هالحب جدام هله

و خاصة أمه .. هنا اطلبي منه ما يظهر هالشي جدامهم لأن ماتدرين ساعات الأم تغار على ولدها و تظن ان زوجته

خذت مكانها و انتي ماتبين مشاكل ..

** الحين العكس .. لو بدر منج تصرف ما اعجبه .. اطلبي منه ما يعلق على الموضوع جدامهم أو يحاول يعدل من سلوكج ..

و خليه يأجل نقاشه لحد ماتكونون بروحكم .. عشان انتي ماتنحرجين منهم .. و تتحسسين من الموضوع ..

** نبهيه ما يصرخ عليج جدامهم أو مثلا يعايرج بحاجة .. دايما جدامهم خليه يعاملج بإحترام .. لأنهم اذا شافوه محترمج

فهم راح يحترمونج غصب ..

** لا يتكلم جدامهم عن روحاتكم و جياتكم و لا الهدايا اللي جابها لج .. و لا عن سفراتكم .. أو على طول مدح فيج ..

مب عشان شي .. بس خله يتجنب الشي هذا على الأقل جدامهم .. يمكن خواته ما عندهم حد يطلعهم أو ما تزوجوا

.. فحفاظا على مشاعرهم .. ينتبه قد ما يقدر ..

- قسموا شغل البيت بينج و بين خواته هذا في حال انهم من النوع اللي يشتغلون في البيت أو ما عندهم خدامة ..

لأن لو تلاحظون و اكيد سمعتوا عن وحدة تقول عن مرت ولدها " هذي ما تدخل المطبخ .. و ماتسوي شي في البيت "

و ممكن يسبب هالشي مشاكل لا سمح الله ..

- اذا ما حبيتيهم لا تكرهينهم .. و خلي علاقتج بهم سطحية .. لكن انتبهي لا تخلينهم يكرهونج .. لأن صعب يحبونج

بعدها مهما سويتي .. في الأخير انتي في نظرهم " بنت ناس و غريبة " فما يهمهم اذا حبوج و لا لا .. لأنهم اذا يحبونج

بتكونين حياتج حلوة .. لكن اذا ماتقبلوج او يكرهونج بينقصون عليج حياتج .. و انتي حياتج مرتبطة بهم دامج معاهم

في نفس البيت ..

- أي شي يستوي عندهم لا تنقلينه لأي حد و تطلعينه برى البيت حتى لو تكلمتي لأمج .. هذي أسرار بيوت .. مب حلوة

في حقج لو اعرفوا انج انتي اللي تكلمتي و لا حلوة في حقهم ..

- عند أهلج و صديقاتج اذكريهم بالخير .. ولا تقولين عنهم كلمة شينة مهما كانت حياتج معاهم .. ليش ؟ لأنهم بيكونون

اعمام عيالج و سمعتهم من سمعتج و سمعة اعيالج ..

- لا تقارنين بينج و بين أهلج في أي شي .. لأن الحاجة هذي تنرفز وااايد .. و ممكن ينفسر كلامج غلط .. يعني

يمكن يحسبون انج تقولين ( أهلى أحسن .. أو مستوى اهلي اعلى منكم .. ) ..

- أخيرا : أنتي بحكم عيشتج مع أهل زوجج .. راح تعرفين شنو اللي يحبونه و شنو اللي ما يحبونه .. و على هالأساس

تصرفي باللي تشوفينه مناسب ..


[[ سنة أولى زواج ]]


- خواتي يشوفوني متغيرة عليهم بعد ماتزوجت .. هل فعلاً تغيرت ؟! -


الفقرة هذي .. بتكون مو لج بشكل مباشر .. لخواتج أكثر خاصة اللي ماتزوجوا أو أصغر منج ..

قبل الزواج كنتي معاهم على طول .. تسولفون عن المدرسة و عن الامتحانات و عن السوق و الطلعات .. يعني كنتي

قريبة منهم وااايد .. فجأة بعد ماتزوجتي صاروا يحسون ان أختهم ما عادت مثل قبل .. ما قامت تقعد معاهم و تسولف

صارت جدية وااايد .. بالعربي ( ما تعطيهم ويه ) .. و لو حاولوا يفتحون موضوع معاها تهربت أو اختصرت و سكرت على

الموضوع ..

فلو حسيتوا يا أخواتي خاصة المتزوجات حديثا .. بهالشي مع خواتكم .. أو حسيتي انهم يشوفونج متغيرة .. او شفتي

انج فعلا تغيرتي عليهم .. انا اقول لج لا تحاتين ..

بيني لهم هالموضوع .. بيني لهم انج مب متغيرة .. انتي لين الحين اختهم لكن :

** بما انج توج في سنتج الأولى .. شي طبيعي بتكونين متذبذبة .. ساعات تشوفين نفسج مع البنات و ساعات تقولين

لا انا الحين متزوجة لازم اكون اكثر جدية ..

** في هالفترة بتشوفين ان تفكيرج مشتت .. عندج زوجج ماتعرفين شلون تتعاملين معاه .. او مع اهله .. مسؤولية بيت

مجاملات و واجبات اللي صارت فجأة في ويهج ولازم تقومين بها .. غير انج مشتاقة لأهلج و لبيتكم فما عندج وقت

تتكلمين معاهم و تسولفين في نفس سوالفكم القديمة ..

** و بما انج عروس جديدة .. شي طبيعي و متأكدة ان بتكون عندج أسئلة واااااااااااايد عن الحياة الجديدة .. ما راح

تسألينها الا لأمج او خواتج المتزوجات .. غير ان سوالفج لا شعوريا بتكون عن حياتج .. فما تلقين الوقت اللي

تسولفين فيه معاهم ..

** و الحين تعتبرين انتقلتي من مرحلة للثانية .. و عادة الانسان لما ينتقل من مرحلة لمرحلة .. يقل اهتمامه بالمرحلة

السابقة .. و يركز على المرحلة الجديدة اللي هو فيها .. بتلقين نفسج تقرين عن موضوع معين .. تسولفين عنه

تتناقشين فيه .. يعني المرحلة اللي انتي فيها الحين .. بتاخذ جزء كبيييير من تفكيرج و اهتمامج ..

- طبعاً هذي مبررات لج .. كعروس جديدة وضحيها لخواتج -

أما النقاط الجاية فهي لج .. أذكرج فيها بحاجات يمكن تغفلين عنها ..

- في البداية يمكن تتفاجئين بهالموضوع .. و تقولين : شلون ؟؟ انا علاقتي معاهم مثل ما هي ماتغيرت .. لكنج في

الواقع تغيرت مثل ما أنا تغيرت بعد الزواج و غيري من المتزوجات ..

- عشان جذي لازم تضاعفين اهتمامج بخواتج .. قعدي معاهم .. ضحكي و سولفي .. كوني قريبة من كل وحدة ..

اسأليها عن دراستها و عن أحوالها .. يمكن تكونين انتي اقرب وحدة لهم ويبون منج اهتمام أكثر ..

- تذكرين الأيام الأخيرة قبل العرس .. و شلون كنتوا مع بعض .. ! تذكرين لما دخلتي القاعة بأحلى طلة .. شلون كانوا

وياج .. شلون كانوا فرحانين لج لدرجة انهم ما قدروا يحبسون دموعهم .. هذا كله لأنهم يحبونج .. فلا تخيبين الظن

فيج ..

- اتصلي على كل وحدة فيهم - من غير ماتكون لج مصلحة - حسسيها بإهتمامج و حبج لها .. هالشي بيأثر وايد في

نفسيتها و بيسعدها ..

- حاولي انج ماتروحين لهم الا وبيدج شي .. حتى لو كانت شغلات بسيطة : بسكويت / كافي / أيس كريم / عصاير ... الخ

الفعل هذا راح يفرحهم .. و يخليهم ينتظرون دخلتج عليهم ..

- اذا حافظتي على علاقتج بأهلج و الزواج خلاج تحفظين علاقتج بهم .. هالشي بيخليج قدوة طيبة لخواتج ..

- تزوجتي صح .. لكن الزواج ما يغيرج تماما من انسانة مرحة الى انسانة في الخمسين .. بالعكس خلي الزواج يصقل

شخصيتج لكن ما يغيرها ..

.
.
.

الموضوع الجاي مهم جداً .. أتمنى تتابعوني :)


- أترككم في أمان الله -

(f)

سح سح حب

خخخخ أختصر ..

الله يعافيج يالغلا .. و لا يحرمنا من متابعتج ..

..

العزيزة

حياكِ الله :)

والله متابعه للموضووع جني الا عرروس وان شاء الله نستفيد فـ المدى البعيد خخخخخ

الله يحفظج يالغاليه ويهنيج فـ حياتج ويرزقج اللي فـ بالج كله والله انج تستاهلين كل خير

بصرااااااااحه
ماعندي شي اقولج
لا كلمة شكراً ولا يعطيج العافيه
ولا ولا ولا كلمه بتوفيج حقج ..

ماشاء الله عليج يا دحدووحتي

والله اني سعيده فيج وفي كلامج

وخصوصا عن موضوع السكن مع اهل الزووج

في نقاااط واايد اعجبتني ولازم زوجي يشووفها ,, لان مفيد للزوج

بخصوص تعامله معاي جدام اهله

حبيبتي اخذي راحتج في كتابة هالموضوع احنا بنتابعج
لاخر مدى

اهم شي احنا نقدر ظروووفج يالغاليه

ومانبي نجبرج على السرعه

وننتظر كل جديدج يا اختي الغاليه

وعسى ربي يوفقج ويسعدج ويثبتج يااارب ويرزقج بالذريه الصالحه

وفديتج يا بنت بلادي

صج الموضوع مفيد بكلم ربعي عن هالموضوع خل يقروونه ويتعلمون منه ابرك لهم

دوحانيه
اختناا الكبيره بعقلها والصغنونه بسنهااااا

فديتتج وفديت كلامج

والله احس اني من بديت اطبق كلامكم ومناقشاتناا
بديت استفيد وايد فحياتيييي
صج الوحده فبدايه حياتهااا اول ماتنخطب تفكر حياة الزواج والخطوبه شي كله وناسه وطلعات وحركات وررومنسيه
ماتفكرر بالمسؤوليه والواقع
وشوي
شوي
تبتدي تعرف انه الزواج شي كبير محتاج عقل يكبر وياه
وانا بصراحه اااااستفدت منكم وايد فطريقة تعاملي ويا زوجي
وطريقه تفكيري فحياتي
والحين فالحياه المستقبليه
خصوصا فقرة التعامل ويا اهل الزوج

انتي كتبتي هالنقطه
يبين جدامهم حبه لج .. ممكن يكون هو طاير فيج و يحبج من كل قلبه .. و من زود وناسته يبين هالحب جدام هله

و خاصة أمه .. هنا اطلبي منه ما يظهر هالشي جدامهم لأن ماتدرين ساعات الأم تغار على ولدها و تظن ان زوجته

خذت مكانها و انتي ماتبين مشاكل ..
مدري انا فالبدايه احسب انه اذا الريال بين حق هله حبه لزوجته راح يحبونهاا هي من حب ولدهم
وغفلت عن سالفه انه ممكن توصل مرحلة الغيره !
بس اكيد بدون قصد
خصوصا لو كانت علاقة بامه وخواته وايد ولو كان هو البجر او هو المسؤول عنهم !

نبهتيني لهالنقطه وايد
انا قبل استانس لو ريلي بين حق هله شكثر يحبني او شي من هالقبيل


وأشدد على نقطه الاحترام
اذا احترمج هو جدامهم هم راح يحترمونج من جدامج ووراج


ننتظر البااااااااااااااااقي


كل جزأيه اهم من الثانيه


مشكوره دوحانيه
ربي يسعدج وهنيج ويرزقج باللي تبينه