تجمع حوامل الثلاث الشهور الأولى1-2-3

هلا بنات اخباركم واخبار كروشاااااتكم

والله انا تمام بس احس بلوعه والله يكرمكم الترجيع معاي ماخف بس الحمد لله بكر عندي موعد والله اني احاتي كثير ابي بس بكر يجي على شان اروح الموعد اتطمن غلى النونو


لبى قلب وليدي... مبرووك ياقلبووو والله يسهل لنا باقي حملنا يارب

loneliness اخبارك انشالله تمام ونتي قريبه مني انا انشالله بدخل الاسبوع 14 بعد يومين الله يسهل علينا انشالله


قمقومه مبروك عقبال التاسع وعن الالم مادري بس انا يجيني الم بس مادري اذا كان بنفس موعد الدوره اولا لاني ماانتبه على التاريخ اذا جاني الالم بس اتلوي من الالم انشالله خير

واخبار باقي الكروشات انشالله تمام

صباح الخير حوامل ... ان شاء الله تكةنةا بخير وصحه واطفالكم بنمو بنمو بنمو مستمر .. ياحليلهم ..\\

صار فترررررررررررررررررررررره طويله مادخلت النت ... واللحين صار وقت اودعكم واروح للشهر الرابع :)
باركوووووووووووا لي عقبالكم وان شاء الله الله يسهل عليكم وعلى كل حامل ... \\
مع السلامه ...

مرحبا يالغاليات

خبرتكن أنه عندي موعد بتاريخ 22 - 10

وسرت الموعد :up:

الدكتورة شافت لي البيبي بالسونار

وقالت لي ما شاء الله حركته نشيطة ووزنه صار مناسب بالنسبة لعمر الحمل

وشفت الدماغ وعظمة الحوض والعمود الفقري وإيدينه وريوله و و و .. فدييييت الكتاكيت

الدكتورة حاولت اتعرف جنس البيبي

لكن بما أنه الموعد كان في العيادة

قالت لي أنه الجهاز مش متطور شرات اللي في المستشفيات ومش واضح وايد :sad:

وعطتني موعد قريب إن شاء الله على المستشفى عشان السونار

طبعاً ما اتحملت

وعلى طول طلعت من العيادة على مستشفى خاص

والدكتورة الثانية اتحاول واتحاول اتعرف جنس البيبي بالسونار

عقب قالت لي البيبي امسكر ريوله :sm229:

إن شاء الله من أسير الموعد الياي في المستشفى ايخبروني :21_182:

عشان أبتدي أتشرى المستلزمات الخاصة بالبيبي بإذن الله تعالى

+++++++++++++++++++

++ ختيه الغالية زهور بنفسجيه ++

هيه والله الحمدلله يوم خف الوحام عندي

تقريباً أحس أنه قام يختفي


بخصوص جنس البيبي

بإذن الله بنبشر بعض كلنا وبتشارك الفرحة

واللي ايي من الله حياه الله

المهم صحيح وسالم ومعافى .. آااامين يا رب


بخصوص الملابس والمقاس

فأنا بعدنيه ألبس الملابس اللي شريتها في زهاب عرسي

من تنانير وبناطلين وغيرهم

رغم أنيه شريت بناطلين للحمل عشان أحس براحة أكبر

لكن نفس الملابس اللي قبل الحمل بعدها مناسبة

وهالأيام قمت أحس الكرشة ابتدت تكبر :21_186:



+++++++++++++++++++

++ ختيه الغالية حبي الغالي ++

يالله يا رب ايرد لج أبو الشباب بالسلامة

وما تذوقين فراقه أبد

ولا تصيحين يعلنيه افداج

واهتمي خلال هالفترة بعمرج وبالبيبي

+++++++++++++++++++

++ ختيه الغالية ted ++

الحمدلله يا رب

كل ما آكل أتذكر وحامي وكيف كان

أتم أردد الحمدلله ياااا رب أنيه ابتديت آكل

والدليل الحمدلله .. أنها الدكتورة هالمرة في المستشفى قالت لي وزن البيبي أوكي

لكن الدكتورة في المستشفى الخاص قالت لي الحديد عندج وااااايد Low

وهالشي أنا كنت أعاني منه قبل الزواج

وقالت لي إذا ما خذتي حبوب الفيتامينات .. فهالشي عادي .. لأنج تاكلين وبتعوضين

لكن الحديد ضروري

وعقب قالت لي خذي يوم كبسولة الفيتامين واليوم اللي عقبه كبسولة حديد

وإن شاء الله خير

+++++++++++++++++++

++ ختيه الغالية اريج_خاشقجي ++

عساج تفرحين بشوفة البيبي يا رب

بخصوص الزعتر

والله أنا وااااايد آكل مناقيش زعتر

يعني قبل الحمل كنت أحب مناقيش الجبنة واللبنة

لكن خلال الحمل كله أطلب مناقيش زعتر

والحمدلله ما صار فيني شي وإن شاء الله ما ايصير شي

المهم الوحدة فينا تتوكل على رب العالمين

+++++++++++++++++++

++ ختيه الغالية ندى الدوحه ++

عسى ربي يحفظ لج البيبي وتقر عينج بشوفته

عليج بالاستغفار والدعاء

وكل شي كتبه لنا رب العالمين .. فيه خير للإنسان

حبوبة لا تحاتين وايد

وتمي اذكري رب العالمين وادعيه

عسى ربي ايثبت حملج وحملنا وايتمم لنا على كل خير

ويرزقنا ذرية صالحة .. صحيحة وسالمة

آااامين يا رب

+++++++++++++++++++

++ ختيه الغالية النفس البريئة ++

مرحبا ملاييييين يالغالية

والحمدلله أنا بخير والبيبي بعد

انتي طمنينا عنج حبوبة

+++++++++++++++++++

++ ختيه الغالية السيدة سوسو ++

الله ايسهل عليج وعلينا يالغالية

وبخصوص النوم

والله كلنا متأزمين

لكن الدكتورة نصحتني بخصوص النوم اليوم

قالت لي نامي على الينب ولا تنامين على ظهرج

سألتها عن السبب

فقالت لي عشان النوم على الينب ايسهل وصول الغذاء بشكل أسرع للجنين

وبالتالي يوصله غذاءه ويكون نموه صح

أما النوم على الظهر

فيمنع أو يأخر وصول الغذاء للبيبي


وسألتها عن التفاف الحبل السري على البيبي لا سمح الله

فقالت لي هالشي بيد رب العالمين وماله خص في الأم الحامل

لأنه البيبي هو اللي يلف ويدور ويلعب في السائل

فحركته هي اللي اتحدد هالشي

عسى ربي يحفظ لنا بيبياتنا .. آاااامين يااااا رب


+++++++++++++++++++

++ ختيه الغالية جوليات ++

ألف ألف ألف مبروك الزواج والحمل

وانتي شراتي

أنا عرست وحملت ما شاء الله

وبخصوص حاسة الشم

فعادي حبوبة لا تحاتين

أنا صار وياي نفس الشي

كرهت كل شي

ريحة العطور وريحة الأكل والبيت

وريلي من النوع اللي يتسبح بالعطور ما شاء الله

فاترجيته ما يتعطر في البيت لأني ما أطيق الريحة

وهو ايراعيني

وأصيح أقول له ريحة البيت بتموتني

وهو ايقول لي ماشي ريحة

وأنا أشم الريحة واتلوع جبدي وأستفرغ الله يكرمج

وأخلي البيت وأسير بيت هليه في العين

كل مرة على هالحالة

لكن الحمدلله من دخلت الرابع

اختفت الأعراض تماماً

يعني إن شاء الله يوم بيخف عليج الوحام

بتشمين كل شي طبيعي :smile:

+++++++++++++++++++

++ ختيه الغالية حبيبة خالد ++

الله ايتمم لج على خير حبوبة

+++++++++++++++++++

++ ختيه الغالية *ضي القمر* ++

إن شاء الله بمرور الأيام أكثر

بتحسين بحركة البيبي بشكل أوضح وأوضح

ربي يحفظه لج وتقر عينج بشوفته

+++++++++++++++++++

++ ختيه الغالية تحفة الأبرار ++

سلاماااات حبوبة وما تشوفين شر

وعسى ربي يحفظ لج حملج يا رب

+++++++++++++++++++

++ ختيه الغالية feedback ++

لا جديد

لكن اتفاجأت من خلال شريط الحمل أنه البيبي في الشهر الخامس

وأنا اللي أعرفه .. أنه الشهر الخامس 18 أسبوع وكم من يوم

لكن الشريط على طول .. من 18 أسبوع .. حسب لي أنيه في الشهر الخامس

صدق اتخربطت :think:


وبخصوص الضغط على المثانة

أنا أعاني شرات حالتج

وكل شوي أراكض على الـ .... :21_112: الله يكرم اللي يقرن ردي

+++++++++++++++++++

++ ختيه الغالية Om Isa ++

الله ايعوض عليج حبوبة فأقرب وقت

وتفرحين بالحمل من يديد

+++++++++++++++++++

++ ختيه الغالية amel01 ++

ما اتشوفين شر حبوبة

واستشيري الدكتورة بخصوص الضغط

عشان لا يأثر نزوله عليج أو على البيبي لا سمح الله

+++++++++++++++++++

++ ختيه الغالية بسبوسة الحلوة ++

الله ايطمن قلبج على البيبي

ولا تنسين اتطمنينا عقب ما اتسوين السونار إن شاء الله


+++++++++++++++++++

++ ختيه الغالية لبى قلب وليدي ++

مبروووووك دخولج الشهر السادس

وعسى ربي ايتمم علينا على خير

ونوصل للشهر التاسع ونحن وبيبياتنا بخير

ويسهل علينا الولادة

آااامين يا رب

+++++++++++++++++++

++ ختيه الغالية قمقومة ... قم قم ++

مبروووووك دخولج الشهر السابع

وعسى ربي ايتمم علينا على خير

وما شاء الله حلو أنج بعدج تلبسين نفس مقاساتج قبل الحمل

لأني دخلت الخامس

وبعدنيه ألبس نفس المقاسات

لكن ما أعرف لين السابع .. خير إن شاء الله :21_207:


+++++++++++++++++++

++ ختيه الغالية حبيبه رائد ++

ألف ألف ألف مبروك يالغالية

لكن ليش اتودعينا؟؟

عادي

ما شاء الله وااايداااات من الخوات وأنا منهن

خلصنا الشهر الثالث من زمااان .. وما زلنا نتيمع في الملف

حياج الله بيننا حبوبة

السلام عليم يا جماعة دى اول مشاركة ليا ويارب متكونش الاخيرة ان شاء الله. انا حامل فى بداية الشهر الثالث بعد اجهاض مرة وانا عندى مشكلة هى وجود ورم فى الرحم والورم دا بيكبر مع تقدم الحمل ودا مسبب ليا مغص وآلام كتيرة وطبعا وجود افرازات بنية يعنى الدنبا ملغبطة شوية .لو حد عارف حالة زى دى ياريت يرد عليا انا محتاجة اعرف حد مر بنفس الظروف انا قلقانة وخايفة ربنا يستر ,حفظكم الله جميعاً.

السلام عليكم ... شحالكم كلكم كل البنات حوامل كبار و صغار و جداد وقداما اتمنى الكم الصحة والسلامة لكم ولي بيبياتكم .. حوامل التؤم ربي يحفظ بيبياتكم ويبعد عنكم كل شر ... ام عيسى الله يعوض خير ..
ومبروك لكل حامل دشت شهرر يديد ..قائدة فرقة الحوامل قمقومة هي اللي تفتتح كل شهر يديد ومن ثم نحنا نلحقها ..انا لي اخر اسبوع في السادس الاسبوع الياي ابتدي شهر يديد .. البارحةكان عندي موعد وشفت الانسة والحمد الله الوزن والطول وحجم الراس والماء اللي حول الجنين بخير .. وقالي بعد 12 اسبوع بيفتح الرباط يعني الحين انا ب الاسبوع 24+12=36 بيكون اخر الثامن يعني استعداد للشهر ا لتاسع يفتح للبيبي الباركنج المسكر ..يارب خير ..عن الملابس خلاص مافي ملابس كلة جلابيات واسعه ماحب الضييييييق ولاني طول اللوقا بالبيت ما خذت شي للطلعه .. تجهيزات البيبي بعدني ولا شي اخت ؤيلي جهزت لي خذت كم بدلة من عند ديور ... واختي بتجهز لي .. انا مخليتنهم على راحتهم اللي بيشتري يشتري باشوف شو بينقصني و بشتري بعد ما اشوف اغراضهم ...ومعضم الحوامل الحين تقريبا ولادتهم بشتاء يارب يسهل علي وعليهم ..
.زهور بنفسجيه لبى قلب وليدي ريمنوف بسبوسة الحلوة اريج حبي الغالي النفس البرئية امل قمقومة امم العذر اذا نسيت حد الكل بالبال ..طمنونا عليكم ..

صباح الخير :flower:

لب قلب وليدي مبروك عليك الشهر الجديد وانا باقي لي اسبوعين واخلص الشهر الخامس على خير (f)

قمقومه ايه عادي لاتخافي في كل موعد الدورة تجي اعراضها وانا مرات تحصل لي هالشي


feedback الله يعينك بغيت اسئلك انت معاي في نفس الاسببوع انا لي 21

ted ماعليه تحملي وانشاء الله قريب ويخف الوحام عنك خاصة انك بتدخلي الرابع بعد يومين

وبشرينا عن موعدك


حبيبه رائد ليش تروحين عنا خليك معانا

Romanove اهلين عزيزتي بعد ماتطلع الكرشة تحسي بوناسه وتحسي انك صج حامل

انشاء الله عن قريب نبشر بعض بجنس البيبي ، خاصة طلبت من زوجي البارحة ان يلخذني مستشفى خاص عشان اعرف ووافق :iagree: ، يقول افضل شهر لمعرفة جنس الجنين الخامس لانه البيبي مايكون مسكر رجوله


mohaaa28 مبروك الحمل وانشاء الله يثبت حملك وتعدي الامور على خير ماعندي خبر عن حالتك


السيدة سوسو
الحمدلله ان امورك بخير مع فتووومه الحلوه وانشاء الله الايام تعدي بسرعه وتفرحي فيها

قمقومة ... قم قم الف مبروووووووووك دخولج السابع وعقبال التاسع يارب اما بالنسبه للألم سمعت ان في بنات يحسون بألم الدوره نفس وقتها يعني شي عادي لاتحاتين

زهور بنفسجيه انتي قبلي بأسبوع فديتج وباجر عندي موعد وان شاءالله اطمن على البيبي فديته واقدر اعرف شو نوعه ولد والا بنت؟؟؟؟؟؟؟ اتمنى بنت وشحلاتهم يجننوووووون

mohaaa28 اف مبروك الحمل والله يثبته لج يارب وتقر عيونج بشوفته

ted الله يعينج عالترجيع والله معاناه الله يطمن قلبج عالبيبي وان شاء الله خير


حبيبه رائد الله يقومج بالسلامه يارب

Romanove الحمدلله انج اتطمتي عالبيبي وان شاءالله عقب بتعرفين شو نوعه .......انا باجر موعدي ويارب يكون بخير واقدر اعرف شو نوعه

السلام عليكم
اول شيء مبروك اللوك الجديد للمنتدى وايد يفتح النفس

ثاني شيء اشلونكم كلكم وشاخباركم
ياحلو ها الدعوات اللي تجي منكم ويارب يجيب دعواتنا ويتمم الحمل للكل والجميع

بالنسبه للتجهيز ما باجهز الين اولد امي بتجيب لي كل حاجتي بوقتها
الجنس مختلف عندي بين ولد وبنت والحمدلله الله يتمهم واشوفهم بعيني سالمين

بنااااااااااااااااااااااااااات فيني كحه ذابحتني ومن اكح احس البيبي بينزل والله خايفه يعورني بطني من الظغط؟؟؟؟؟؟؟

ماتشوفين شر حبيبتي فيد باك..

حبيبتي روحي مستشفى احسن لك... وفيه ادويه في الصيدليه للحوامل مكوناتها اعشاب ماهي ضاره،،، وطمنينا عليك ياقلبي...


هلا حبتيبتي لبى قلب وليدي ،، كيفك ياقلبي؟
انا بخير الحمدلله البارح ماجاني نوم ومارحت العمل اليوم لاني حسيت بتعب،،، صحيت لاصبح وارسلت مسج لمديري اني تعبانه ومراح اجي والحمدلله ارسل لي : ماتشوفين شر..

ياقلبي الله يخليهم لك وتفرحين بشوفتهم يارب انا نفسي يطلعوا ولد وبنت،،، يالله ترزقني اللي في بالي يارب..


سووسو.. كيفك حبيبتي والله يتمم لك على خير يارب
انا بخير الحمدلله ،، عساج بخير يارب،،


موهااااا.. حياك الله معانا حبيبتي.. الله يتمم لك حملك على خير يارب وماتشوفين شر حبيبتي ..



رومانوف،، الحمدلله حبيبتي ان البيبي بصحه وعافيه.. انا مثلج قبل اسبوع كان عندي موعد وشفت مخ البيبات واعمدتهم الفقريه وكانوا ماشاء الله عليهم حركيين..
وان شاء الله قريب ياقلبي تعرفين جنس المولود..

حبيبة رائد،، وحشتينا حبيبتي وكيفك،،

ترا انا وكم بنت معك في الشهر الرابع ،، بس احس التجمع هنا احلى ما ادري ليش،،
طمنينا عليك حبيبتي،،،



قمقووووووومه،، شلونج ياقلبي وكيف البيبي؟ طمنينا عليك حبيبتي..

feedback;4514930:
بنااااااااااااااااااااااااااات فيني كحه ذابحتني ومن اكح احس البيبي بينزل والله خايفه يعورني بطني من الظغط؟؟؟؟؟؟؟

ماتشوفين شر حبوبة .. نصيحتي وعن تجربة سوي لج يانسوون مع بابونج بترتاحين وحطي عسل انا 10 ايام والله تعبت نفسيتي لدرجة قلت بيتبطل الربط من كثر العطسان والكحة ..

ماتشوفين شر حبيبتي فيد باك..

حبيبتي روحي مستشفى احسن لك... وفيه ادويه في الصيدليه للحوامل مكوناتها اعشاب ماهي ضاره،،، وطمنينا عليك ياقلبي...



الشر ما اييج فديتج بس انا عندي موعد بكره وابخبر الدكتوره تعطيني دوا.........

ماتشوفين شر حبوبة .. نصيحتي وعن تجربة سوي لج يانسوون مع بابونج بترتاحين وحطي عسل انا 10 ايام والله تعبت نفسيتي لدرجة قلت بيتبطل الربط من كثر العطسان والكحة



الشر ما اييج فديتج ..........بس يقولون العسل حار مب زين احسن اتريا لباجر عالموعد والله يصبرني

هلا زهور بنفسجيه انشاءالله والله يسمع منج ياااااااااارب .. يلا عشان تخبرينا والله يطمن بالج علييه

هلا أختي لبى قلب وليدي ألف ألف مبروووووووك دخولج الشهر السادس وعقبال الشهر التاسع يااااااااارب

هلا loneliness انا الحمد الله تمام وانتي شخبارج وشخبار بيبياتج ؟؟

هلا فيدباك شلونج ياقلبي ؟؟ أنا بعد تعبت من كثر روحة الحمام الله يعزكم وايد البيبي ضاغط على مثانتي .. وماتشوفين شر ياااااااااربي

هلا قمقومه لا حبيبتي هذا شي عادي لاتوسوسين

هلا ted الله يطمنج على البيبي ياااااارب

هلا حبيبة رائد ليش خيووه بتطلعين خلج معانا

هلا Romanove أهم شي تطمنتي على البيبي والله يفرح قلبج بشوفته .. والله يرد ليي زوجي بالسلامه يااارب

هلا mohaaa28 الف مبروك والله يحفظه لج أنشاءالله ويثبته لج

هلا السيدة سوسو اي تقريبا كلنا بنولد في الشتاء يعني الجوء بارد يبي لنا ثياب شتويه وللبيبي بعد لازم جوارب وقحافي على راسه

هاي بنات اشلووووووووووونكم وحشتووووووووووووووني
انا اليوم سويت سونار والحمدلله البيبي شفت المنبض بس الدكنوره تقول انا البيبي صغير وايد وانا النبض مو قوي يعني النبض لازم يكون ١٨٠ وانا ١١٠ بس
ومادري عطتني موعد الاسبوع الياي وانا قلت لها لا ابي لعد اسبوعين احسن
عشان اطمن اكثر
واذا في احد منكم صارله الي قاعد يصير فيني يفيدني الله يجزاكم خير وانا حد ي احاتي طمنو قلبي الله يطمن قلبكم يارب
هذا كل الشي اليوم

بسبوسة الحلوة;4515745:
هاي بنات اشلووووووووووونكم وحشتووووووووووووووني
انا اليوم سويت سونار والحمدلله البيبي شفت المنبض بس الدكنوره تقول انا البيبي صغير وايد وانا النبض مو قوي يعني النبض لازم يكون ١٨٠ وانا ١١٠ بس
ومادري عطتني موعد الاسبوع الياي وانا قلت لها لا ابي لعد اسبوعين احسن
عشان اطمن اكثر
واذا في احد منكم صارله الي قاعد يصير فيني يفيدني الله يجزاكم خير وانا حد ي احاتي طمنو قلبي الله يطمن قلبكم يارب
هذا كل الشي اليوم

ان شاءالله ما شي الا كل الخير لاتحاتين الاسبوع الجاي تطمين وتكون نبضاته قويه ياااااااااااااارب

بنات انا جديده على التجمع انا
ام هادي داخله الشهر الثالث

مساء الخير على الجميع شو اخباركم ياحلوات اليوم ظهري يعورني من يوم صحيت من النوم وخايفه من هذا وجع الظهر مااعرف هل هو طبيعي او لا يوم الخميس الماضي كنت عند الدكتوره خبرتني انه كل شئ طبيعي والبيبي كويس واني في الاسبوع الثامن وبعد كم يوم بدخل الاسبوع التاسع ادعولي ان ربي يتمم لي على خير ويكون البيبي بصحه وعافيه يارب ......