شو أكلتي ولدج اليوم؟؟

ا

القيوانيه

عروس رائعة

30-04-2007 | 01:49 PM

السلام عليكم...

كل وحده فينا تحتار كل يوم شو تطبخ أو تأكل عيالها....ونشتكي انه ما نعرف وصفات جديدة ومنوعة للاطفال.....فحبيت افتح هالموضوع عشان كل وحده تكتب شو اكلت عيالها من الصبح لين المساء....وشو الوصفات والطبخات اللي اتسوي لهم؟؟

اتمنى انكم تدخلون الموضوع يوميا وتكتبون اطباقكم....راح ابدا

مهاري بنتي عمرها خمس شهور واسبوع...عطيتها اليوم على الغداء خضروات مسلوقة(بروكلي-جزر-كوسا-قرع)....
(f)

b

bj3a

عروس ماسية

30-04-2007 | 02:32 PM

اممممممممم

انا ببتدي اليوم الصبح عطيتها حليب ..

والظهر سويتلها بروكلي واسكواش وبطاط مع عيش سيريلاك

a

angel eyes

مشرفة سابقة

30-04-2007 | 02:36 PM

هلا قيوانيه

ولدي حمودي يكمل 9 شهور

عطيته الصبح صفار بيضه مسلوقه...عصير برتقال و جزر و تفاح ..

بعدين سيريلاك

عالغدا سويت له خضار (بطاطا -جزر-بروكلي-كوسا-كرفس-طماطم-فلفل حلو-شويه كزبره للنكهه) مع رز و قطعه دجاج كله مسلوق و بعدين انضرب في الخلاط...

والحين عطيته خبزه توست يتسلى فيها :)

عقب شوي بعطيه روب

ج

جمـــانة

مشرفة سابقة

30-04-2007 | 03:40 PM

القيوانيه ..!

طبعا من الصبح عطيتها فواكه مهروسة.. والحين هذا...

وقريب المغرب اعطيها ارز مهروس مع الحليب.. وخضار مهروسة

وبالليل اخر شيء شوية سريلاك عشان تشبع وتنام

ا

القيوانيه

عروس رائعة

30-04-2007 | 05:03 PM

بجعه....مشكوورة الغلا على ردج....وشخبار مريومه اليوم؟؟

انجل...مرحبا الغاليه ومشكورة على مرورج الطيب...

جماانه...واااي اشتهييت العصير:gum: هني وعافية على قلب زنوبه...بسألج عن السيرلاك عادي اعطي مهاري الحين والا لما اتكمل السادس واي نوع احسن؟؟

انا عقب شوي بعطيها ارز بالحليب ...

ج

جمـــانة

مشرفة سابقة

30-04-2007 | 05:48 PM

الغالية انصحج لاتعطينها ولاشيء... انا اخذته لأن صحة كان مخلص من السوق... وانا ما حب مليوبا ولا هيرو
فاخذت سيريلاك بالارز مع حليب... وخففته بالماي عدددددل خليه مول سائل.. وبعد تمغصت منه...

فما صدقت ريلي اتصل فيني يقول حصلت صحة تبين اخذه؟ قلت له ايه .. والحين موقفة السيريلاك.. او قليل كلش اعطيها... لأن العلبة حده ا شهر من تنفتح وبس خلاص بعدين...

ا

القيوانيه

عروس رائعة

30-04-2007 | 05:54 PM

مشكووره حبيبتي جمانه على ردج...وفعلا السيرلاك وايد ثقيل كان يسوي حق سعودي امسااااك.... بس منتجات صحه رهيبه:ok: وخاصة الارز بالحليب مهاري واايد تحبه....جربت ميلوبا بس سوالها مغص... الحين حتى الاعشاب اشتري لها من صحة...

b

bj3a

عروس ماسية

30-04-2007 | 06:28 PM

الحمدلله مريومه زي الفل ...

على فكرة امس اول يوم احطلها يح مع الفواكه وانا ااكلها اشوفها موصخه عمرها بطنها سيرها ..

واليوم بطنها سيرها 5 مرات ما اعرف من اسنانها يمكن ...؟؟

ا

القيوانيه

عروس رائعة

30-04-2007 | 09:29 PM

بجعه...يمكن ما احملت اليح وسوا لها اسهال....

*

*جوهرة الدوحة*

عروس فضية

01-05-2007 | 12:45 AM

أنا ولدي اليوم ما أكلته الا على الغدا (أرز مع سمك)
لان اليوم صايده اسهال ويرجع من أعطيه أي شي
ووديته العيادة قلت يمكن من الاسنان(القواطع)
بس لا يوم وديته قالت لي الدكتورة ان الحين اغلب اليهال مودينهم لها والسبب هالفيروس
وعطته ابره توقف الترجيع
ومحلول اشربه ياه في البيت وقالت لي اليوم لاتعطينه اي شي حتى الحليب عطيه شي بسيط...
ان شالله لما يصير احسن بكتب لكم ايش اكلته

ا

القيوانيه

عروس رائعة

01-05-2007 | 11:31 AM

هياوي ...ما يشوف شر ولدج...اتحملي عليه والله يعافيه ان شاء الله...هو كم عمره؟؟

ا

القيوانيه

عروس رائعة

01-05-2007 | 02:32 PM

مرحبا ياحلوات...

وينكم اليوم..

عالغداء عطيت مهاري خضروات مهروسه(جزر-بطاطس-بروكلي-كوسا)

والحين بعطيها عصير برتقال...

*

*جوهرة الدوحة*

عروس فضية

02-05-2007 | 12:41 AM

هلا أختي القيوانية
بالنسبة لولدي له الحين سنة و4شهور

ا

القيوانيه

عروس رائعة

02-05-2007 | 02:07 PM

مرحباا...

وينكم يا حلوات؟؟ شو ما أكلتوا عيالكم اليوم؟؟:gum:

اليوم الساعه 9 الصبح عطيت مهاري رز بالحليب...والساعه 2 الظهر خضروات مسلوقه...

افكر اعطيها فليل شوفان شو رايكم؟؟ وكيف يسوونه؟؟

ت

تراتيل ملكوتيه

عروس مشرقة

02-05-2007 | 09:12 PM

جمانة يعني انتي تعطين بنتش صحة بالرز والحليل وبعد تسوين اليها رز بيت وتهرسينه او هو نفسه ؟؟
وهذا عصير شنهو جح ؟؟
وبالنسبة للفواكه اشلون تهرسينها هل تطبخينها بالاول شوي وبعدين بالخلاط ؟
اني بصراحة اعطيه لحد الحين بس صحة بالارز والحليب الصبح وبالليل والعصر عصير تفاح ..
فاليوم قررت اسوي اليه بطاطا مسلوق واهرسه اليه حق العشاء فويش رايكم عادي اعطيه بطاطس او لا ؟؟

ا

ام احلى حمود

عروس مبدعة

03-05-2007 | 12:34 AM

موضوع حلو

انا الصبح اعطي حمودي سيريلاك بلتمر لاني احسه ثقيل عليه لي اعطيه بلليل ويتعب فعطيه اياه من الصبح ويستانس بطعمه الحلووووو

وعلى الغداء لاسوي له وجبه متكامله فيها كل الانواع الا وهي شوي ارز مع قرع وكوسا وبابا وشوي ذره وفندال واحط معاه تمرتين ونصف تفاحه وافووحهم واهرسهم ويطلع الطعم يجنن حمود واااايد يحبها الطبخه

وبلليل اعطيه ارز مع حليب

و

وفا مجروح

عروس جديدة

03-05-2007 | 12:45 AM

الحين ولدي توه داش الشهر السادس ممكن حد يخبرني شو اللي زين حقه وشو المضر
لحد الحين ما عطيته غير الكوسا والبطاط المهروس وبعد من الفواكه التفاح وساعات الموز والتمر
واخذ له السبع حبوب من ميلوبا وطبعا الحليب
ومب عارفة شو لازم اسوي له بعد
ممكن حد يخبرني ويزاه الله كل خير

ا

ام احلى حمود

عروس مبدعة

03-05-2007 | 01:17 AM

وفا مجرووح ماشاءالله كفيتي ووفيتي خلاص خلج على هلاكلات لما يدخل السابع انشاءالله وبعدجين ضيفي له اللحوم في الاكل ماله وتقدرين تعطينه صفار البيض

اما اللحين خلج على الاكلات الي قلتيها

ا

ام احلى حمود

عروس مبدعة

03-05-2007 | 01:21 AM

عطيه كل الخضار عادي

جزر كوسا بابا قرع فندال بروكلي وكللللللللللل الخضااار وبعد كللللللل الفواكه عادي

ا

القيوانيه

عروس رائعة

03-05-2007 | 01:59 PM

تراتيل ..شخبارج يا حلوة؟؟ بالنسبة للعصير اللي محطتنه جمانه هو فعلا عصير يح...كم عمر ولد؟؟

ام احلى حموود...يا هلا والله..ما شاء الله شو هالاكلة الحلوة جامعه الفواكه والخضروات..بس كيف الطعم:gum:

وفا مجروح... هلا وغلا فيج...مثل ماقالت لج ام حموود تقدرين تعطينه كل انواع الخضروات والفواكه...وارز بحليب...

بنات محد رد عليه عن الشوفان عادي اعطي بنتي الحين والا لاء؟؟

انا اليوم الظهر عطيتها رز بالحليب...