SHREEFA:
السلام عليكم ورحمة الله وبركاته
شلونكم يا بنات المنتدى بخير ان شاء الله
ام المهند
كيف الحال بخير ان شاء الله
عساج دووووم يارب
يالله ميخالف المدير وين مايروح مارده راجع لج راجع هاهاهاهي
وبرجوووعه تزيد الطلبات والاوامر والشغل
الله يعطيج العافيه ان شاء الله
وبخصوص التجهيز
الله يسلمج رحت يوم الاربعاء دخلت السوق قلت باخذ لي جم قطعه بس جم قطعه الحمدلله اني ماشريت السوق هاهاهاهاي
ام المهند انا وايد اتعب من المشي احس رجولي تنتفخ واصابع ايدي يمكن تعب
فقلت خل اخلص شغلي والله خذيت تبانات ( ملابس داخليه ) مجموعه مع بعضها
واخذت افورولات ( الكامل اللي يغطي الرجل ) اخذت الله يسلمج 12 حبه الوان بين الوردي والزهري والبنفسجي والاصفر والابيض قطن 100% صناعة انجليزيه
واخذت فوطة للاستحمام
واخذت لفات كم حبه
واخذت عدد 4 اطقم قبعات مع دس لليد وللرجل
واخذت عدد 2 اطقم كشخة كشخه كامل طقة وحده يعني موديل واحد يتكون من لفه وقبعه وملابس داخليه وخارجيه وللرجل
واللي تمنيته وماخذيته الفساااااااااااااااااااتين روعه بس يكون المولود في فتره النفاس والاشهر الاولى حرام عليه هالملابس احس انه حيل حيل صغير
ومو بحاجه لهم بحاجة لشي يدفيه ويخشه عن البرد
وان شاء الله لاحقه على هالاشياء
بس والله تبعت من السوق وخليت شغلي على يومين على الويك اند والحمدلله احس اني بالشي هذا خلصت للبيبي لفتره النفاس
بس بقى التجهيز لنفسي بحاجة الى ملابس للنفاس
منها الفساتين الستان الحلوه اذا مر علي ضيوف البسها
وبحاجة الى كفر حلو للفراش لفتره النفاس
وودي يكون الكفر والقميص طقم
والله يسهل برتاح شويه ويمكن على الويك اند
وودي احط لكم الصور بس مالي خلق اصور اشوووف احاول :)
انا بنات بطة متينه :) وزاد وزني مع الحمل تقريبا 4ونص كيلو لحد الحين
مايندرى شكثر راح يزيد بولدي زدت 9 كيلو
بس كان حجمة صغير يوم ولدته يعني كان 2كيلو و700 جرام
والبيبي في بطني الحين وزنه 700 جرام يعني انشالله من الحين لي الولادة يكون اوكي
انا بقى لي يومين وادخل السابع
والله يتمم علي وعلى الجميع بالخير يارب
اشوفكم على خير
دمتم سالمين
اختكم شريفة
هلا بالغالية أم سعود شخبارك يا وخيتي
أنا بخير يسرك الحال دام أشوف طلتكم المنورة هالأيام ، أحلى خبر إن مديري مدد إجازته لين الخميس هذي ومثل ما تعرفون إن مديري سعودي وهناك الحين إنعقاد القمة العربية الله يوفقهم قولوا آمييين .. فحب إن ه يمدد الإجازة ليومين غيرهم ، يا حظهم والله أحسدهم الدولة عطت الهيئات الحكومية والخاصة في السعودية إجازة رسمية من الدولة بسبب هالمؤتمر .. بصراحة أغبطهم هههههههه .. ونحن بإذنه تعالى راح ناخذ بعد إجازة في السلطنة يوم السبت القادم بسبب المولد النبوي الشريف ( كل عام وإنتوا بخير ) والله يديم هالمناسبات بالخير يا رب ..
للمعلومة ( السلطنة لسه ما طبقت نظام إجازة الويكيند اللي هم الجمعة والسبت ) يعني لا تستغربي لما أقولك عندنا إجازة يوم السبت خخخخخخخخخخ ..
وبالنسبة للتسوق ياااا ما شاااء الله عليك سويتها تقريبا وخلصتي نفسك نوعا ما .. وطبيعي عزيزتي هالأيام أو الشهور الباقية بتكون كذا تعب وإنتفاخ ووووو عشان كذا بجد بجد الأفضل إنه نتسوق من الحين والتأجيل ممنووووع ..
غريضاتك للبيبي تجنن يا هناها هذي الدلوعة اللي بتشرف بإذن الله .. وأما الفساتين بصراحة يا شوشو أنا ما فوتهم وااااو أنا قبل لا أحمل وأنا أحلم فيهم فشريت لي كم فستان مال بيبيهات صغار يهبلواااااااا وحتى بربك كل يوم أطالع عليهم خخخخخخخخخخخ بس طبعا ما كثرت ، ركزت أكثر على الفانيلات واللي بدون أكمام والأوفرولات وراعيت إنها تكون مناسبة للصيف ..
بالنسبة للمستشفى لسه ما شريت شي محدد أقصد الأطقم وما شابه ولا لحافات ووووايد أشياء ناقصتني أتمنى إني أخلص نفسي هالأسبوع عشان أتفرغ لموضوع النفاس بعد .. وأشد الهمة قبل لا أثقل أكثر .
على فكرة زيادتك لوزنك أشوفها مو وايد تبارك الرحمن يعني هذا المتوسط الطبيعي بس الأهم لا تزيدين أكثر لأنها في النهاية تتشكل لدهون صعب التخلص منها بسهولة .. أقول شوشو واسي روحك بأننا خلاااص عدينا المرحلة الثانية من الحمل والحمد لله ما باقي إلا القليل والأيام تمر بسهالة ، تصدقين لما أسمع وحدة والدة يجيني ذاك الشعور إني متى أولد أنا بعد وأرتاح وأحضن ضناي فديتها . فخرابيط الحمل واردة مهما كان بس عاد الوحدة تتحمل ومأجورين بإذن الله ..
