بنات مصر: فرحك خلاص قرب.... طيب ايه خطتك في الشهور اللي قبل الفرح

نورتى المنتدى يا ارابيسك واهلا بيكى معانا .
بالنسبة لمشكلة شعرك فمش انتى بس اللى بتاعنى من شعر خفيف انا كمان من بعد ماكنت مش بقدر اسرح شعرى من كتر طولة وكثافته بقيت فاقدة فى الامل فى انه يرجع حتى نصة .
المهم ... انا مش بقولك كدة عشان تيأسى بس نصيحة منى وعن تجربة متستعجليش نتيجة العلاج واستمرى علية حتى بعد ماتلاقى تحسن فى شعرك ، لان اكتر حاجة كانت السبب فى انى شعرى ميتحسنش انى كنت باخد العلاج لفترة وبعدين اقطعة .

وعلى فكرة اكتر عقار استخدمتة وفعلا بيجيب نتيجة هو عقار اسمة( مينوكسيديل ) الدوا دة حقيقى ممتاز ونتيجتة مضمونة ان شاء الله بس هو غالى شوية .

اما الوصفات بقى فأنا احترت معاها جربت منها كتير لكن برضة مكنتش بستمر ، كنت كل لما اقابل وصفه جديدة اجربها ويمكن دة اللى دمر شعرى اكتر.

وعايزة اقولك كمان انك مهما اخدتى فى ادوية وعملتى فى وصفات من غير ماتكونى بتتغذى كويس يبقى ولا ليها اى فايدة ،،،،، يعنى اتأكدى فى الاول انك مش عندك انيميا وحاولى تعالجيها لان احنا اغلبنا عندنا انيميا ......... وركزى اوى فى اكلك على الخضار والحاجات اللى فيها حديد زى الجرجير والسبانخ والباذنجان والموز......... الخ

والغسيل بلاش يبقى كتير يعنى كفاية اوى مرتين فى الاسبوع او 3 على الاكثر فى الصيف .

واوعى تنسى ان الحالة النفسية والتوتر ليهم دور كبير فى تساقط الشعرى فهدى اعصابك وبلاش توتر خالص .

اخر حاجة بقى عايزة اقولهالك ان انا ان شاء الله رايحة لدكتور خلال الاسبوع دة بس مش دكتور جلدية لانى فقدت الامل فيهم ،، انا هروح لدكتور اخصائى تجميل واشوفه هيقولى ايه .
وان شاء الله لما ارجع من عندة ابقى اقولك عملت ايه .

سلام ياقمر ويارب اكون قدرت افيدك.

بما اننا بنتكلم هنا عن خطتنا فى الشهور اللى قبل الفرح فأنا ان شاء الله بكرة هنزل اشترى ليفه وصابونةمغربية علشان قررت اخيرا انى اعمل حمام مغربى لانى سمعت انة فوايدة كتيرة .

وكمان انا اشتريت امبارح 4 عبايات خروج عشان المشاوير وكدة ولسة باقى لى كمان 2 على كلام ماما دول الصيفى .
البايات انا جبتهم واحدة جينز بس شكلها جديد خالص ب180 جنية
وواحدة سمراء ب210
وواحدة عبارة عن قطعتين كنت اول مرة اشوفها جبتها ب280
والاخيرة مش هعرف اوصفهلكوا هى ب200
وكان فى واحدة عجبتنى اوى اوى بيقولوا انها مغربية وكان نفسي اجيبها لانها كانت عليا تحفة لكن للاسف مش لاقيت منها المقاس بتاعى طلعت واسعه اوى عليا ومش ينفع تضيق علشان فيها تطريز من الجنبين .
المهم الحمد للة قدر الله وماشاء فعل ومش من نصيبى تكون بتاعتى .

بس دى اخر اخبارى.

انا سعيدة اوى انى في ناس كتير شاركوا في الموضوع وبالنسبة ليكى يا ارابيسك ممكن تجربي زيت الحية الاصلى في كتير بنات بيشكروا فيه ربنا معاكوا

على فكرة ياندى انا اعرف انى الموسكى في لبس داخلى حلو موووووت وبالجملة ابقي روحي هناك وان شاء الله تجيبي كل اللى نفسك فيه

ندى ممكن اسأل العبايات جبتيها منين؟..جزاك الله خيرا

انا اليوم رحت انا وماما وبنت خالتي وبنت عمتي واختي فرشنا الصيني في اماكنه والدولاب بتاع حجره النوم فرشناه مش فاضل غير السجاد والستائر وفرش المفارش بنات ادعولي ربنا يكرمكم ان الفتره دي تعدي علي خير بكره ان شاء الله بتاع الستاير حيجي يركب البلتكانات وكماليات الستائر والسبت اللي وراه حيركب الستائر نفسها بأذن الله وربنا معاكم خلاص انا فاضل لي 12 يوم ومشغوله جدا جدا

ربنا يتمملك بخير ياااااارب يا امة الله ولينا كلنا باذن الله

ربنا يتمم لك بخير يا امت الله

و الف شكر يا ندى على المعلومات القيمه جدا" دي

و يا رب لما ترجعي من عند الدكتور تقوليلي هتعملي ايه

موضوع جميل جدا ومميز

وانا مش مصرية ولكن حبيت اشارككم بتجربتي علشان جميع العرايس الحلوة تستفيد

بالنسبة لي عرسي بعد 4 اشهر على بداية السنة وانا تقريبا خلصت تجهيز ملابسي

3 طقم شورت وكت حرير
3 بجامات حرير
6 baby doll
2 قميص نوم حرير واحد طويل نبيذي وواحد قصير مع روب جلد النمر
1 طقم قميص نوم ابيض مع روب لليلة الدخلة
روب ساتان طويل وبكم
روب للنوم شتوي
5 بيجامات قطن
3 طقم شورت مع كت قطن
طقم سنتيان مع كلوت
طقم سنتيان مع كلوت حرير
2 طقم شباح وكلوت دانتيل ابيض واسود
كلوتات واطقم داخلية دانتيل وريش وبرق وشغل دلع
طقم رسمي محتشم بنطلون وبودي اسود وعليه جاكيت ابيض مرصع بالكريستال
عباية
ثوب تطريز فلسطيني
4 بلاطين للطلعة الوان زهر وازرق وكحلي
9 تنانير للطلعة من كل الالوان
4 بلايز للطلعة شييك
2 قميص للطلعة شييك
طقم بلوزة مع برنص شتوي للطلعة
2 جاكيت شتوي شييك
8 حجابات ملونة ومشغولة تلائم الملابس
2 صنادل حلوة شييك
2 شباشب كعب رفيع شييك
1 جزمة شتوية
4 شنط مشغولة وشييك
طقم روب للحمام للعرسان
ملابس للبيت فايعة 3 تنانير قصيرة
مجموعة من البوديات المزلطة (للبيت)
3 برمودا ( للبيت)
1 طقم مفرش للسرير فاخر لونه ذهبي
مفارش للطاولات مطرزة وللخداديات
طقم بشاكير ومناشف
صندوق مجوهرات ارابيسك
علبة خياطة رقيقة وجميلة على قدي
ملابس للصلاة وسجادة جميلة من السعودية هدية من قريباتي في السعودية
مستلزمات العناية بالشعر ( سبراي، كريم ، مشط، ربطات، بكل، دبابيس .....)
مستلزمات العناية بالبشرة ( كريم ليل وكريم نهار من جونسن اغراض للاظافر مزيل مكياج من جونسن ،...)
ماكياج ( كل شيء يخطر في البال وقد احتاجه من كريمات وبودرة واقلام تحديد وشادوهات ..)
مجموعة من العطورات وكريمات العناية بالجسم من Lutshi



بصراحة لا اعرف ادا نسيت شيء اقولكم


تبقى علي اجيب ملابس داخلية ان شاء الله الشهر الجاي رح اشتري :

2 فانيلات قطن
2 شباحات قطن
10 كلوتات قطن
2 طقم سنتيان محشي للطلعة
2 طقم سنتيان دانتيل
كورساج
2 شلحات تحت التنانير
سنتيان سيليكون ... ما جربته ولا مرة بس رح اجيبه لاني سمعت انه كويس
2 جراب نايلون


وبقي بعض الاغراض الشتوية وانا انتظر فصل الشتاء حتى اشتريها وهي :


معطف طويل وفخم
جاكيت طويل اسود
جاكيت جلد
2 بلوزات شتوية حلوة
2 بيجامات شتوية مع ارواب
1 قميص نوم شتوي
سكارف وقفازات شتوية حلوة


بقي علي اشتري كذلك :

سشوار للشعر
ماكينة نزع الشعر ماركة Philips فيليبس
واقي للشمس
غسول جيد للبشرة
شامبوهات استحمام
وبعض الهدايا لعريسي ممكن بيجاما حلوة وطقم العناية بالبشرة للرجال
بعض المتفرقات متل دبابيس للحجاب وقطن طبي وغسول للمنطقة الحساسة شبشب ريش وشبشب شتوي للبيت ......)


وانا حاليا شغالة في شعري علشان يطول ويصير فيه لمعة اعمل حمامات زيت ولكن اذا لم ينفعوا من الان لبعد 4 اشهر القادمة سوف اوصي على وصلات للشعر من اجل تسريحة العرس

استعمل الآن زيت جوز الهند يوميا
وكنت استعمل صفار البيض مع زيت السمسم مرة في الاسبوع لمدة شهرين وهو جميل للمعان الشعر
واستعملت زيت الخروع لمدة شهر ادهنه على شعري قبل النوم جعل شعري ناعم جدا وفيه لمعه حلوة ولم يعد يتساقط
والبارحة حضرت ليتر زيت العافية ووضعت فيه قطع فلفل حار وسأتركه 10 ايام واضع منه على شعري بقولو بطول الشعر بشكل كبير
ولقد قصيت عند الكوافيرة اطراف شعري المتقصفة قبل اسبوعان تقريبا

والآن انا اتبع نظام حمية نقصت 7 كيلو وهو عبارة عن فطور كويس وغني غداء خفيف وبدون عشاء وآكل السناكس كل فترة والتانية بكميات قليلة قبل الغداء

وألعب تمارين للبطن والارداف واحد التمارين هو وانا جالسة على الكمبيوتر اقوم بأخذ شهيق من الانف حتى يمتلىء بطني وثم زفير واشفط البطن للداخل عدة مرات واشرب الماء بكثرة جدا وهو مفيد فعلا للبشرة والرشاقة (( مع اني مش سمينة ولكن خطيبي عاوزني اكون مشدودة القوام واحافظ على كسمي الحالي ))


قبل العرس بشهر :

نظام غذائي يعتمد على الخضروات والفواكه والعصائر الطازجة والابتعاد عن كل مسببات الانتفاخ في البطن وعن المعلبات (( الله بعين هالشهر ))
وقبل العرس بشهر حعمل بلياج لشعري ( حصبغه بني واحط فيه خصل ذهبية )
وبعد ذلك رح اصير اروح عند الكوافيرة مرتين في الاسبوع علشان تعملي حمامات كريم علشان الشعر بنشف بعد الصبغة ...
وقبل العرس باسبوعين رح اروح عند طبيبة الاسنان علشان تعملي تبييض لاسناني وحنقل اغراضي والعفش لبيتي الجديد
وكذلك قبل العرس بأسبوع حروح عند خبيرة التجميل تعملي جلسة لتنظيف البشرة والتبييض
وحعمل سكر (( حلاوة )) واشيل الشعر الزائد من جسمي ووجهي وحواجبي قبل العرس بثلاث ايام ويمكن اروح عند مركز التجميل واعمله تفاديا للزراق والاحمرار
وقبل العرس بثلاث ايام حعمل قناع في البيت من اللبن والخيار واللبن والفراولة مع شرب الماء والاسترخاء والنوم الباكر


ان شاء الله تعالى

ازيكم يا بنات وحشتوني كلكلم العروس سوسو اهلا بيكي معانا واحنا طبعا مبسوطين جدا بيكي ويلريت تكوني معانا علي طول
علي فكره انا افتكرت حاجات كتير عايزه اشتريها لما كتبتي اللي اشتريتيه زي صندوق المجوهرات الارابيسك وكمان لبس الصلاه مع اني كنت حطه في بالي اني اشتريهم بس نسيت خالص
وكمان عايزه اشتري ارواب لللحمام
ارابيسك انا دلوقتي بعمل لشعري خل وليمون عشان تطلع القشره وعملتها امبارح بس مش كلها طلعت هعمل تاني انهارده انا وراها والزمن طوييييييييييل
امه الله ربنا يكون في عونك يا حبيبتي انا عارفه ان الشغل صعب اوي في الايام دي
امه الله انتي جبتي الستاير منين هي والسجاد؟؟؟؟

ندا انا كنت عايزه اسالك هتجيبي الحمام المغربي واليفه منين عشان عايزه اعمل حمام مغربي يا ريت لما تيجبيهم تقوليلي

اميره انتي ورفيده فينكم من زمان ؟؟؟ ايه اخباركم

انا يا هوبه من اسكندريه السجاد جبته من النساجون الشرقيون اللي في رمادا اما الستائر من العطارين فيها كل حاجه وكل الازواق يا قمر

2paradise:
ندى ممكن اسأل العبايات جبتيها منين؟..جزاك الله خيرا

حبيبتى انا شريت العبايات من توكيل فى المنصورة اسمة العباية الفريدة وممكن تلاقى لية فرع فى القاهرة .

امة الله الف مبروك مقدما وعقبالنا كلنا يارب .

انتى ماشاء الله مش محتاجة نصيحة لانك منظمة وقتك كويس ربنا يتمملك على خير ويسعدك فى زواجك .بس اوعى بعد الجواز تنسينا ابقى احكيلنا عن اخبارك.

العروس سوسو

اهلا بيكى بين بنات مصر انتى بجد نورتينا .

وميرسى جدا حبيبتى على مشاركتك اللى اكيد استفادنا منها وفكرتنا بحاجات كتير مهمة كنا ناسينها
ربنا يتمملك على خير ان شاء الله.
وعلى فكرة انا كمان سمعت عن وصفة الفلفل الحامى مع الزيت وبفكر اجربها بس خايفه .
من فضلك مادمتى هتجربيها ابقى قوليلنا اذا كانت جابت نتيجة فعلا معاكى .

hoba555:
ندا انا كنت عايزه اسالك هتجيبي الحمام المغربي واليفه منين عشان عايزه اعمل حمام مغربي يا ريت لما تيجبيهم تقوليلي

ازيك يا هبة وحشتينى .
للاسف انا خرجت ونسيت خالص اشتريهم .
لكن عموما أسألى عليهم فى محلات مستحضرات التجميل او عند العطارين وانا لما اشتريهم هقولك ان شاء الله جبتهم منين بالظبط .

على فكرة يابنات كنت حابة اسألكم عن حاجة
انا كنت سمعت ان الشبة المطحونه بتزيل ريحة العرق وبتبيض ؟؟؟؟
فهل دة حقيقى؟
انا بعد ماقررت اجربها فى بنات خوفتنى وقالت انها بتسمر مش بتبيض ؟؟؟
عشان كدة انا محتارة
ياريت تفيدونى ..

سلاااااااااااام

السلام عليكم

ازيكم يا عرايس مصر
على فكرة انا من اسكندريه << بس لسه مش عروسه

فيه حاجة انا مجرباها لتعطير الدواليب قويه قوى

مش بتخلى بس ريحه الدولاب حلوة لأ

دى كمان بتخلى ريحة الهدوم نفسها حلوة

ممكن تستخدميها للفوط و اللانجيريهات بتاعتك
هدوم زوجك طبعا - هيكون لها تأثير رااااااائع -

عارفين الفواحه الفخار بتاعت العربيات اللى

فيها سداده و بتتباع عند المحلات اللى

بتبيع العطور المركزة و التركيب

هى الساحرة المستديرة دى تجيبيها و تشيلى

السداده بتاعتها و تحطى فيها الاسانس

المركز اللى تحبيه - انا بمووووت فى الياسمين -

و بس علقيها فى الدولاب او حطيها فى الدرج

على فكرة ممكن تخففى الاسانس بالميه لو

ريحته جامدة قوى خصوصا الرجالى

و بث خـــلاص
و يا رب تكون مشاركه مفيده

شكرا يا ندا على ردك علية
امة الله ربنا يتمم لك على خير وتكوني احلى عروسة في اسكندرية اليوم ده ان شاء الله
العروسة سوسو ماشاء الله حاجاتك جميلة..ربنا يتمم لك على خير ان شاء الله
roseario جزاكي الله خيرا على فكرتك وان شاء الله نشوفك عروسة قريب وتحكيلنا على تجهيزاتك

سلامي للجمييييييييييع وربنا يوفقكم يا بنات