رابطة امهات ديسمبر... حيااااااااااااااااكن هوووون !!

هلا و غلا بكل البنات..

ههه كنده ضحكتيني اي والله كمه على كيفنا :)

بس اذا احساسج دايما يصيب قوليلي عشان اجهز نفسي من الحين هههه :):)

والله اسمع يقولون البجر تتأخر..

لكن خواتي و وايد ناس يصيرولي اشوف يولدون قبل موعدهم بعشرين يوم و عشر ايام!!

الله كريم المهم اووووووووولد بالسلامه وطبيعي و يطلع البيبي صاحي و سليم..

أجمعين ان شاء الله..

هلا واللة يابنات

ام فروحة انا بعد سمعت ان البجر تتأخر بس خواتي كلهم مجدمين سبوعين عالاقل امي تقول لي مستحيل تظلين لين شهر 12 اكيد نهاية 11 بتولدين..

يوم السبت عندي موعد بالمستشفى راح اخد ابر الكزاز الثانية واعمل تحليل سكر ...اتصلت على الدكتورة لانها ماقالت لي اصوم او لا قالت لي لاتصومين لان هذا تحليل بو ساعة مو اربع ساعات...مادري متى بو اربع ساعات..

المهم انا سمعت انه اذا دخلنا السابع بيكون الزيارة كل اسبوعين مو 4 اسابيع حد منكم قالت له الدكتورة هالشي؟؟

بنا بعد بسألكم بالنسبة لشهر رمضان شو ناويين تسوون؟؟ انا اختي لما كانت حامل بداية الاشهر برمضان كانت دوم ترجع فماصمت الشهر كله سألت شيخ؟؟
انا مو متخيلة طول اليوم مافي اكل من دشيت الخامس وانا دوم جوعانة؟؟ الله يستر علينا

قوووووووووة بنوتااااااااااات

اي والله بنت البحرين حتى انا كل جوعااااااااااانه واعطش بسرعه...

بنات ترى البيبي في الشهر السادس ياخذ واااااااااايد حديد منج فمحتمل ان الحامل تصيب بفقر دم وانا اليوم الدكتورة قالت لي فيج فقر دم مع اني واااااااااايد اكل سلطات والدم كان عندي بدايه الحمل فوق الممتاز فحاسبو ولازم تاكلون الفولك اسد اللي مع الحديد...

بالنسبة للالتهابات أي وحده معاها التهاب لازم اتعالجه لانه يسبب ولاده مبكرة والالتهاب يشق كيس الماي والبيبي على طول ينزل والله يحفظ بيبياتنا يارب

وعن تحليل السكر لازم تكووووووونين صايمة بس نسيت أسأل الدكتور كم ساعه راح عن بالي واللي عندها فكره اتقولي

يعني اشوى مو بس انا المفجوعة هههههههههه

انا قدمت بولادتي الاولى 6 ايام قبل موعدي اللي ماعطيني اياه.. وبصراحة جتني حالة نفسية من ترقب الولادة... عيل لو كنت طوفت الموعد اكيد كنت بستخف ..

اذكر بالتاسع كنت كل يوم بالليل اقعد اصيح متى ياربي بولد وبفتك !!

ان شاء الله هالمرة بس ادش التاسع اولد مباشرة ...

من كم يوم رحت مجمع السيف عندنا.. وطالعت ثياب الاطفال.. بصراحة مافي على مذركير ... ألوانهم وخاماتهم وايد ممتازة.. طبعاً اقصد مذركير الاصلي.. واخذت نموذج للمقارنة وهو الشباحات .. او اللبس الشبك الي يتسكر من تحت بطقاق.. نفس المنتج .. وافضل سعر كان عند مذركير بعد..

رحت للادوات مثل حوض السباحة وجهاز الشفط الخ.. للاسف ما عليهم تخفيضات الا اشياء محددة .. وشفت كريم البطن للحوامل وتذكرت بنت البحرين... سعره دينار ونصف فقط !! بس للاسف مخلص كريم البطن.. ومافي الا كريم الصدر فقط..

بالنسبة لتحليل السكر.. تحليل بو الاربع ساعات يسوونه فقط اذا طلعت نتيجة تحليل بوساعة مب زينة يعني السكر مرتفع ... وااااع الله يساعدج اختي بنت البحرين.. لا تروحين بروحج .. اخذي معاج احد.. لأن يمكن تحتاجين مساعدة... ان شاء الله ما تحتاجين...

الصيام عااااااااادي وبالعكس بتحسين روحج خفيفة.. اهم شيء تتغذين زين وقت الافطار.. ولا تاكلين وجبة كبيرة عند الافطار.. كثري من السلطات وهالاشياء المغذية.. وبعدين اكلي اللي تحبينه... هع هع يعني بيصير الليل كله اكل .. كل نص ساعة رايحة بصحن ورادة بصحن..
في رمضان بنصير ان شاء الله في السابع و الثامن.. وهني البيبي بيكبر حجمه وراح يضغط على المعدة فمن جذي انصح كل وحدة اكولة لا تاكل شبعتها... عشان ما تقعد ترجع لا سمح الله..


اختي بنت قطر ذكرتيني... بالنسبة لكبسول الحديد + الفولك اسد.. هل تاخذون كبسول واحد او 2 في اليوم؟؟؟؟؟
لأن الدكتورة قالت لي اشرب كبسولتين .. وانا استغربت وايد.. ليش انه دمي وايد زين ومرتفع وانا احافظ على اكل الاشياء اللي تخليه مرتفع دووم.. وفي حملي الاولي ما قط قالوا لي اخذ حبتين رغم ان نسبة دمي كانت اقل.. فطنشتها وانا الحين اشرب بس حبة وحدة في اليوم..


الالتهاب غربلني بحملي ورغم اني حاولت اعالجه قبل الولادة باسبوع لكن ما راح كله.. وظل ولدي لمدة شهرين او ثلاثة يعاني من التهاب بعينه اليمين.. ودايم كانت ترمي وصخ..



بنات ... بطني من تحت يألمني.. خصوصا من اقعد على الكمبيوتر حتى لو مدة قليلة... بالتحديد فوق عظمة العانة بالضبط ... ساعات يجيني وسواس اقول لا يكون ولادة مبكرة :( خصوصا اني سمعت قصص وايد محزنة عن ثنتين واحدة منهم بنت جيران بيت اهلي والثانية من قرايبنا من بعيد.. الاولية كانت دوم تجهض ويوم حملت هالمرة .... ااااووووووووو بكمل مرة ثانية حسين مستخف مب مخليني...

السلام عليكم ورحمة الله وبركاتة


كيفكم ياحوامل ديسمبر اناحابة انضم معكم واناموعد ولادتي 25/12/2006 انشالله على خير

الله انشالله يعطينى الطلق السهل ويهون علينا والله اني بموووت من الخوووف

انا مغص عادي مااتحمل ماني عارفه ايش بسوووي :sad:

المهم انا بكره على خير الي هو السبت راح ادخل السادس ولسى ماعرفت اذا بنت او ولد؟

وعلى طاري رمضان الله يبلغنى فيه يارب شكلي ماني قادره اصوووم انا الحين اذا جلست ساعتين من غير اكل اصير كاني مجنونه

الحمدالله والشكر والمشكلة الاكبر اذا مااكلت يجين مثل الحرقه في بلعوم وكانى برجع

وعلي دين من رمضان الي فات ومانى قادره اصووم

ايش اسوي بنات امي تقولي تصدقي عن كل يوم والحامل ماعليها حرج بس انا ماني عارف بكم

اتصدق ياليت الي تعرف او عندها علم تقولي تاخذ فيني اجرر وانا ماابغى يجي رمضان وانا على دين

لعنبو داري طولتها وهي قصيره سوري بنات بس متحمسه اشوي مبسوطه اني داخله السادس

ياللله بنات نشوفكم وقت ثاني

شخباركم بنات..
سويت حااااااااااااادث بسيارتي من كم يوم والى الحين متكسرة..
اسناني ما اقدر اكل منهم ورقبتي واكتافي يألموني عدل,,اهم شي تطمنت على البيبي الحمد لله الدكتورة تقول زين وكل شي طبيعي ,,,

بنات خايفة لان موعدي مع الدكتورة في العام بعيد شوي وهذا اول موعد لي في العام..اخاف الابر اللي طافتني تأثر عل او على الجنين..طمنووووني بنااااااات,,

مرحبا بنات .. شخباركم

انا داخلة اسلم عليكم .. الله يسلمكم مشغولة شوي هالاسبوع وبتصيدني طلعات وايد وظهري من الحين معورني .

اخباري الحمد لله كلها تمام .. البيبي ما شا الله ماخذ راحته على الآخر وكل ضرب ورفسات فيني هههههههههههههه

ودي اطلع اروح السوق لكن ما عندي مجال هالاسبوع .. خاطري اجهز اي شي ، اجهز للبيبي او اشتري ثياب للعيد او القرقيعان .. من يومين وزعوا على البيوت نشرات مال اكبر سوبر ماركت عندنا في البحرين " جيان " ومنزلين اغراض شهر رمضان .. صار خاطري اروح اشتري من الحين ههههههههههههههههههه :shy:

صمت الامل الف الحمد لله على سلامتج وسلامة البيبي وما عليكم شر ان شا الله ..

بالنسبة عن الصيام انا مو خايفة من الجوع لان للحين شهيتي ما انفتحت عدل وزين مني اذا اكلت وجبتين في اليوم .. لكني خايفة من معدتي والحموضة اللي ترتفع ، الله يستر :sad: ما تعرفون شي ممكن يهدي الحموضة ؟؟؟ :confused:

اخيراااا .. بدا بطني يوضح شوي وانا لابسة العباية " انا البس عباية الكتف " ، لكن على خفيف طبعا .. وملاحظة ان رقبتي بدت تسمر شوي وامس زارتني صديقتي اللي صار لي فترة ما شفتها وقالت لي ان خشمي بدا يفرش شوي :shy: بس الكل متفق للحين ان هالحمل محليني :shy: :shy: الله يستر من اللي جاي .


يالله .. اشوفكم على خير ان شا الله (f)

اول شي الحمدالله على سلامتك ياصمت الامل واهم شي انتي والبيبي بخير اي شي ثاني يتعوض


وشكرا على ترحيبك اخت كنده 88 والله يسمع منك وتصير الولاده سهله وماهي مؤلمه الى الدرجه الى انا متخيلتها الله يسهل علينا اجمعين

ماما حسوو ن وانا بعدني ماتقضيت لنونو ابي اعرف بس هي ولد ولابنت وانشالله راح انطلق بعون الله في المشتريات

والله مشوار الله يعين على السووق والمشكله حر عندنا ورطوبه ماهى طبيعيه وانا بعد من حملت كله حرانه ومااستحمل شي لاتعب ولا حر صايره حرك تبلش

حتى اذا وقفت اطبخ من اول عشر دقايق تعالي شووفي احس شي ثقيل على قلبي وكان قلبي بيوقف الله المستعان

بنات من فيكم من الشرقية ةتحديدا الدمام ؟

أهلاااااااا بنات شلونكم ان شاء الله تكونون انتوا و البيبيات بخير :)


اولا سلامات يا صمت الأمل و حمدلله على سلامتك و سلامت النونو...!!! شلون صار الحادث؟ :(

انا كل ما اطلع بالسيارة استغفرالله العظيم اتخيل بيصير شي..الله يستر...و صايره ما احب اسوق ابد..الله يعيين..


ماما حسون بالنسبه للحموضه انا سامعه ان الرقي (بالكويتي) او اللي يسمونه بالسعودية حبحب ما ادري شنو تسمونه عندكم بالبحرين..هذا يوخر الحموضه..

كثري منه :)

البرازيليه حياج الله..و انا مع كلام كنده..ترى اذا تقدرين تصومين لا تأجليييييين ولا يوم صومي من بكره..و جربي..

و اذا ما قدرتي سألي فيها شيخ و لا تاخذين فتاوي من اي احد حتى لو اهلج لازم تسالين شيخ عشان ما يصير بذمة احد من اهلج..

ولا بذمتنا..لان في ناس عادي عندهم الفتوى..و ممكن ماتكون صحيحة..

انا الحمدلله امي دايما تحرصني و تاكد علي اول ما يخلص رمضان بس نفطر بالعيد و بعدها على طول انصوم..لان النهار يكون قصير و بعدين ما تضمنين عمرج..

ربي يتمم علينا ان شاء الله..

انصحكم في هالشي و بترتاحون :)

هلا ام فروحه والله انا ودي اصوووم ورمضان ماله طعم وانتي فاطره بس ايش اسووي

وفوق هذا كلة عندي دوام دراسة

واكيد اني بحاول اني اصووم بشووف قوة استحمالي وانشالله الله يقويني واقدر اني اصووم هالشهر المبارك


نراكم قريبا

موفقه يا الغالية..

و ربي يعينج عالصيام ان شاء الله :)

كتبت رد شطوله وانمسح بالغلط... مالي بارض اعيده الحين... :(

بعدييييين برد اكتبه :(

هلا بنات شلونكم؟؟

صمت الاكل ماتشوفين شر وسلامتج..

جمانة انا بعد اشياء حلوة ن مذركير وخت المسبح كان عليه تخفيض بس كانت اخر قطعة وانا رحت اول يوم بالسيل
بالنسبة للكريم امس كان موعدي بالمستشفى طبعا الدكتورة استغربت لمل شافت الخطوط الزيارة اللي طافت ماكان فيه وقالت لي خدي كريمات طبية مو تجارية اللي من الصيدلية قلت لها انا استخدم زبدة االكاكو قالت هذا تجاري ولامنه فايدة..

المهم يابنات انا الحكة انتشرت بالجسم كله مو بس بالبطن وظليت احك بالذات بالرجل وصارت المناطق حمرة ولما خبرت الدكتورة امس قالت يمكن عندج حساسية بالدم وخدت علي تحاليل بالدم وقالت بتجيك الكبد بعد للعصارة اللي تفرزها وعطتني كريم وحبوب بيضان ضغااار اخد وحدة عند النوم..احس شوي خفت اليوم راح تطلع النتايج بعد الدوام دايركت بروح للمستشفى..

خدت الابرة الثانية وعملت تحليل سكر بوساعة اليوم بتطلع النتجة الله يستر يوم واحد بس ماكلت جوكليت كنت خايفة وبس رديت من المستشفى هجوم سيدة كليت جالكسي..

قالت الدكتورة حمدلله كل شي طبيعي بس خوفتي من امرين وياريت يابنات اللي مرت مثل حالتي تطمني..

اولا قالت لي اذا الحكة ماراحت من الجسم نستعمل حل ثاني ونعطيج ابر لان خذي الحكة تؤدى الى ولادة مبكرة..
ثانيا قالت لي كل شي طبيعي والحمدلله طول انه مافي تقلصات وعنق الرحم مو مفتوح مافي خوف.. انزين شنو التقلصات انا احس بالام خفيفة خاصة الحين من ثقلت وبالذات اذا اقلب في النوم من جهة الى جهة او اذا اصلي او ساعات حتى اذا قاعدة ماسوي شي .... وشلون اعرف اذا عنق الرحم مفتوح او لاااا..


ياريت يابنات اللي عندها فكرة تخبرني..

مراحب بنات ..
سلامات اخت صمت الأمل وما تشوفين شر..
اخت جمانة حتى آنه تصيدني نفس الالام واقعد اوسوس ومن كم يوم صاير تجيني الام بالبطن والظهر فضيعة واقعد احاتي واخاف وآلام من الأسفل ..ياريت تطمنوني ..
وسلامتكم الف سلامة

سلام حوامل كيفكم ان شاء الله بخير .انا باقي على ولادتي ان شاء الله كم يوم ادعو لي الله يسهل علي بس حبيت اقول للي خايفين من الصيام في شهر رمضان ترى الصيام عادي جدا والله يسهلها انا في حملي الأول اخذت التاسع كله ماخليت ولا يوم ولدت في يوم العيد والحمد لله جبت ولد مثل القمر وهو اللي تشوفة اللحين والله يسهل عليكم كلكم ويثبت حملكم بس انتوا لاتحاتون ومافي الا كل خير ونسألكم الدعاء.

هاااااااااي حوامل شلونكم وشخباركم؟؟؟

بنات اتصدقون كل ماروح اسوي سونار ماشوف البيبي كل يعطيني ظهره بس المحة اول مايحطون الجهاز على بطني عقب ينقلب وترفس في الجهاز بشكل فظيييييييييييع خاطري اشوف ملامحة وكل مسكر ريولة ابي اعرف جنس الجنين بس مافي فايدة.

وابي أسألكم في أحد يحس قبل وجبه الفطور أو اذا تأخر عن الفطور برعشه في اليد ودوخه والقلب تزيد دقاته؟ بنات هالحاله صايدتني من دخلت السادس وخاصة الرعشة شي فظيع ياليت اتفيدوني

بنات هل اصابكم مثل ما اصابني ، حيث اني من بلغت منتصف السادس بدات اشعر بآلام في اسفل الظهر وآلام في البطن من الاعلى وفي الجوانب احيانا وفي الاسفل وايضا المنطقة السفلى ..فهل هذا الامر طبيعي أم ماذا ؟؟ ارجوكم افيدوني ولكم مني دعوات خالصة ..

تراتيل انا يجيني ألم بس شي بسيط ..

التعب يابنات ودقات القلب السريعه شي غريب والله واحس بمعدتي مادري كبدي بتنفجر ويابنات الجوووووع وزياده الشهية والله كني جايه من مجاعه كل أبي اكل واذا اوقف عن الاكل جبدي تقلب وأحس بلوعة

هلا بنات شلونكم و شلون النونو و حركته معاكم؟ :)

جمانه ماعليه تصير فيني وايد يله بانتظار الرد (f)

بنت البحرين سلامات حبيبتي ما تشوفين شر..بس بصراحه ماعندي فكرة عن شلون تعرفين اذا الرحم مفتوح ولا لا..و ان شاء الله البنات بيفيدونج..

الحين انتي اي اسبوع من السادس؟؟

احس مبجر على هالالام و الحكه :( ربي يعينا و ياجرنا..