رابطة امهات ديسمبر... حيااااااااااااااااكن هوووون !!

ماشاء الله خوووووووش يمعه يمعتكم..توسع الصدر..

شكرا جمانة على افتتاح الرابطة..الله يزيد و يبارك..:smile:


انا آخر دورة لي كانت يوم 25\3\2006

و في أحد المواقع يقولي أن يوم ولاتي بيصادف آخر يوم بالسنة ان شاء الله :think:


لكن دكتورتي معطيتني موعد ثاني و بانتظار اخت قوارير تقولي الموعد..:yes:


بالنسبة للادوية اللي آخذها..

1- حبوب الدفتسون.
2- بيبي اسبرين.
3-فوليك اسيد.


طبعا مع ابر التثبيت مازلت عليهم من بداية الحمل..الله ياجرني..

لأن تنزل معاي افرازات بنية لم الحين..


بنااااااااات في وحده منكم يصيرلها مثل اللي يصيرلي ان تنزل معاها افرازات..و شنو قالتلها الدكتورة؟؟ او حتى لو سامعين حالة مثل حالتي ياليت اطمنوني..:eek2:


بانتظار ردودكم

الله يهون عليكم ..

اهلييييييين حوامل

شخباركم امهات ديسمبر .. وشخبار بيبياتكم .. ان شا الله بخير


جمانة لا تحبطيني .. بروحي من ذاك اليوم للحين ما حسيت بحركة ثانية ، يمكن بعد من الغازات والله اعلم كع اني يوم احس بالحركة كنت منبطحه على جنب .. يمكن البيبي كان على جنب ورفسني وانا حسيت :bigsmile:

بالنسبة لحبوب اللوعة فأنا اشرب نافدوكسين لكنه ما يسوي اي مفعول معاي على عكس حملي السابق ولما سألت الدكتورة قالت لي صارت عندج مناعه منه وهي تضحك :angry:

اول موعد لي قربته وبيكون في 12 \ 6 وراح اسأل الدكتورة ان شا لله عن الحمل والسفر واذا في خطر على الموضوع اولا .. وان شا الله خير :shy:


اما عن اخباري الحالية :: الحمد لله الوحام خف شوي عندي لكنه يرجع بين فترة وثانية وتجيني لوعة .. بس للحين ما انفتحت شهيتي للاكل ، وللحين ما اقدر ابذل مجهود كبير لاني احس بتعب بسرعة وادوخ واحس روحي بطيح :sad:



الاسبوع الجاي امتحاناتنا .. ابتدي 10 \ 6 واخلص آخر الناس في تاريخ 19 \ 6 ، ادعوا لي بالتوفيق يااااا رب


يالله .. نشوفكم على خير ان شا الله

هلا هلا ام فروحة ، اسفرت وانورت، حيا الله بنات الكويت..

اختي حسبت لج موعد الولادة طلع 30/12/2006

ان شاء الله تولدين اول يوم في السنة الجديدة... اعتقد المستشفيات يعطون هدايا وخرابيط ههههههه وعندنا في البحرين يحطونهم في الجرايد بعد :)


الله يثبت لج حملج اختي، ودام ان الدكتورة وصفت لج الدفاستون وهو مثبت بإذن الله ما عليج ضرر ، بس اذا زاد كمية الدم او صار عندج الم، لا تسكتين على عمرج... لازم لازم تروحين المستشفى..

الله يثبته لج ويتمم حملج على خير..
ما قلت لنا، اول حمل لج هذا؟

اختي العهد مشكورة يا عمري على دعائج.. ها مالج خاطر؟ ههههههه


[line]

القائمة:


nawaray
4/12/2005

جمانة 5/12/2006

ghada2
5/12/ 2006

bent el ba7rain
5/12/ 2006

ماما حسون اخترت اقرب موعد 9/12/2006

سحابة حب 27/12/2006

أم فرووحة30/12/2006

الله يزيد ويبارك...


********************************************************************************


هلا هلا بالغايبة ماما حثووون..
كل هذا دراسة للامتحانات؟ الله يوفقج ان شاء الله يالغالية..

ذكرتيني بالسفر..
انا بعد راح اسافر ان شاء الله شهر 7 ، يعني على نهاية الرابع وبداية الخامس ان شاء الله..
ان شاء الله يرتفع دمج اختي وتسمح لج الدكتورة بالسفر ...


يالله عاد بنات محد سوا سونار... والله ميتة ابي اعرف من الحين جنس البيبي..


انزين سؤال ثاني عشان نخمن،

البيبي صاير اي صوب في بطنج؟؟ على جنب ولا في الوسط؟
انا صاير لي في الجنب اليسار ، وهو بالضبط مكان ولدي الاول،
من جذي اتوقع انه ولد بعد ..

بالنسبة للحبوب اللي اشربها من بداية الحمل كتبت ليي الدكتورة على فولك اسيد ومن كم يوم وقفت عن الفولك اسيد وقمت اشرب فيتامينات Pregnacare بعد استشارة طبية ..

وجتني فترة كل اعاني منه آلام البطن " بعدما نطيت " قفزت " بالغلط في الجامعة " ولما رحت المستشفى سووا لي التراساوند وطلع كل شي اوكى وكتبوا ليي على حبوب اشربه عند اللزوم بس ما شربته ..



وبس :shy:

حبيت انضم لكم انا ولادتي بنص شهر 12 واخر دوره كانت بشهر 2 بس صار حملي باخر شهر 3

تحياتي لج اختي جمانه على هذا الموضوع بصراحه استانست يوم شفته وفرحت وايد لان تخيلت نفسي اكون ام في شهر ديسمبر ياي الله يتم لي ولكم بالصحه والعافيه طبعا انا اول حمله لي ومتزوجه سار لي3 شهور اللحين .

انا اخر دوره لي كانت في 14/ 3 انا اللحين في الاسبوع 12 وعندي موعد آخر هذا الاسبوع

وعطاني الدكتور الفولك اسيد وحبوب ثانيه بعد ماذكر اسمها كلتها مدة عشرة ايام بس وقال لي لانها تنشف الدم اللي حولين الجنين وقال لي احتمال ينزل عليج دم بس الحمدلله عدة المرحله اللي قالي فيها وماسألته متى موعد ولادتي بس على حساب اختي لي تقول في 19 / 12

بالنسبه للأعراض لوعه من غير ترجيع ولايعه جبدي من الاكل والقهوه والشاي واشياء وايد

اختي جمانه انا دايما يشد عندي الجنب اليسار واحس الجنين هالجهه تهقين ولد والله انا خاطري اعرف بعد شنو اللي في بطني متلهفه الله يتمم لنا بالصحه والسهاله يارب ...

تحياتي لج

اختكم في الله / الموناليزا

هلا فييييييج جمانه..هلا والله بأهل البحرين..عاد تدريين؟؟:salam:

اموووووووووت على لهجتكم تونس..الله يحفظكم..:shy:

إي والله هذا أول حمل لي جمانه ربي يتممه على خير..لأن سبق لي الحمل و ماكنت أدري اني حامل و سقط بالشهر الأول..:sad:

ادعولي ربي يتممه على خير..


مشكورة على حسابج لي موعد الولادة..تخيلي عاد أولد بداية السنه اليديدة و يحطون صورته بالجريدة..و أنا وراه أسوي باي حق الكاميرة هههههههههههههههههه :cool2:

بس ولا مره سمعت ان يعطونا هدايا!! ما ادري احس المستشفيات الخاصه بس يبون ياكلون الفلوس أكل..ما يعطون شي..

اذا ماراح يحطون صورته بالجريده بيي عندكم أولد بالبحرين اشرايج؟؟ (r)


انا احس البيبي بجهة اليمين..معقوله يكون يمين بنت و يسار ولد :gum: !!

عاد والله كنت افكر فيها شنو الفرق بين البيبي اللي يكون عاليمين او الوسط او اليسار؟؟!! تعتقدون في فرق؟؟




ماما حسون توقعتج متخرجه ..يله ربي يسهل عليج امتحاناتج..(y)

هلا بنات شلونكم...انا امس رحت الموعد وشفته.. ياياياياي.. اول مرة اشوف شكله اخد شكل البيبي الصجي قبل كنت اجوف بس قطعة دم الحين اجوف هيئة الراس ومت من الوناسة وطنتني الدكتورة الجمدلله ان كل شي طبيعي..بس كا وايد يتنطط وقلت لها شنو جنسه انا توني داشة الرابع قالت مايبين انشالله الشهر الجي بتخبرني وانا انطر على احر من الجمر..
الاخت ام فروحة انا عندي بعد وايد افرازات وامس قالت الدكتورة اذا مالها لون وريحة هذا الشي طبيعي جدا..بس اذا في حكة ممكن ان عندج التهاب لاسمح الله..وسلامتكم

الحمدلله رب العالمين على النعمة...

ما تصدقون شكثر اقرأ ردودكم والابتسامة شاقة ويهي عدددل :D

حتى ولدي يا وقعد يضحك عباله اطالع شيء funny في الكمبيوتر هههههههه


[line]
bride2004

هلا اختي .. يعني ان شاء الله ولادتج راح تكون في 15 /12/2006؟؟

الله يتمم لج بخير ان شاء الله..
ويالله جاوبي على الاسئلة المعتادة هههههههههه من اولها استجواب..
هذا اول حمل لج؟
وشنو تاخذين من ادوية؟
وتأخرتي في الحمل بعد الزواج؟ .


حياج الله الغالية معانا... ولا تستحين دردشي هني وقولي كل اللي في خاطرج..

[line]

الموناليزا
هلا ومرحبا بأختنا الجديدة معانا في الرابطة.. شرفتي.. حياج تفضلي دشي دشي... القهوة يا ولد !!


اووووو نسيت انج متوحمة ما تبين القهوة ههههههههه خلاص ييبولها عصير...

الحمدلله على ثبات الجنين في بطنج وزين انج عديتي فترة الخطر.. الحمدلله على النعمة.. والله يتمم لج بخير يا رب.. ويحقق لج مناج بشوفة النونو في ديسمبر..

حسبت لج موعد الولادة طلع بالضبط مثل ما قالت لج اختج، في 19/12/2006
شوفي بعد السونار شنو يعطيج من تاريخ..

والله بالنسبة لجنس البيبي ههههههه والله مدري شقولج،

بس انا من زمان في حملي الاولي، سويت بحث في الركن عن طرق تحديد جنس البيبي، طبعاً الطرق القديمة مب بالسونار وهالسوالف، وماا تذكر منها الحين الا هالشيء... انه البنت تكون في وسط البطن بينما الولد في احد الجوانب.. وانه في الاشهر الثلاثة الاولى اذا كان كيس الجنين على شكل قرص يعني بنت ، واذا على شكل هلال يعني ولد !!

عاد مب بالضرورة تصدق.. لا... هذي تخمينات الاوليين.. ساعات تصيب وساعات لا... بس ناخذها من باب التسلية مو اكثر :)

حياج الله يالموناليزا، واللي يي من الله كله كله خير..

[line]

ام فرووحة..

الله يتمم لج هذا الحمل على خير، وان شاء الله الحمل اللي راح يكون لج شفيع يوم القيامة وطير من طيور الجنة...

افا عليج حياج عندنا في البحرين اذا ما شالتج مستشفياتنا تشيلج عيووونه هههههههههه عاد اذا ولدت قبلج مالي شغل فيج... حدي اداري روحي مو بعد اولدج ههههههه

الهدايا صراحة انا سمعت عندنا اللي تولد بالعيد الوطني يعطونها.. وخمنت يعني يمكن بعد رأس السنة يعطون...


بالنسبة لمكان الجنين، .. اعتقد ماله شيء غير بس اونه المكان اللي التصق فيه في جدار الرحم لا اكثر.. وشيء طبيعي بعدين بس يكبر ويبتدي يتحرك ما راح يتم في مكان واحد :)

[line]

مبرووووووووووك اخيت بنت البحرين... قرت عيونج بشوفة جنينج ههههههههههه ومن هذا لشوفته بعد الولادة ان شاء الله...

القائمة:


nawaray
4/12/2005

جمانة 5/12/2006

ghada2
5/12/ 2006

bent el ba7rain
5/12/ 2006

ماما حسون
12/12/2006

bride2004
15/12/2006

الموناليزا
19/12/2006

سحابة حب
27/12/2006

أم فرووحة30/12/2006

الله يزيد ويبارك...

وهذا هو شكل الجنين في الشهر الرابع




هذا الشهر الرابع من سلسلة مرموم لشهور الحمل.. فيه معلومات عن الحمل وايد حلوة.. اذا للحين ما شفتوه، تفضلوا اقروه ..

http://www.3roos.com/forums/showthread.php?t=66259&highlight=%C7%E1%CA%D3%DA%C9

انا قعدت بعد زواجي سنه ونص ما حملت وحاليا اخذ فوليك اسيد وديفيستون وهذا اول حمل لي انتمى الاخوات يفيدونا من تجاربهم لاني من الحين افكر في الولاده

هلا والله في بنت البحرين...ماشاء الله البحرينيات شايلين القعده شيله :clap:

بصراحه اهي مو افرازات عادية اول الحمل كان ينزل علي دم..لكن الحمدلله بعدها صار بني..

و الله كريم..تقولي الطبيبة أهم شي الراحه..و هذا اللي قاعده اسويه ..و أدعي ربي ان تعدي الاشهر الاولى على خير بسررررعه..لأني مو متعوده على القعده و عدم الحركة :no:


و حبيت أبارك لج على شوفة طفلج ألللللللللف مبرووووووووك :up: عقبالنا ان شاء الله



************************************************************************************************************



جمانه


مشكورة حبيبتي عالدعوة الحلوة...و تسلملي عيووووونج:shy:



اي احنا بعد نفسكم اللي تولد بالعيد الوطني يعطونها هدايا..(g)


عاد شنو ما أدري ؟! :think:


يمكن درزن بامبرز :dd:


على فكرة الصورة وايد حلوة..يعني بعد شهر باذن الله بنشوووووووووووفه جذي ؟؟


يارب تبلغنا و نشوفهم يمشون و يركضون جدامنا (y)



@@@@@@@@@@@@@@@@@@@@@@@@@@@@@@@@@@@@@




تقبلوا تحياتي..أختكم أم فروووووحه :shy:

مرحبا .. شخباااااااااااااار ؟؟ :salam:

كلكم رحتون مواعيدكم الا انا عاطيني اول موعد متأخر ما ادري ليش ؟؟ :sad: يالله باقي اسبوع تقريبا ع الموعد وان شا الله كل شي اوكى :shy:

بالنسبة لاحوالي فالحمد الوحام كل ماله وقاعد يخف بس مثل ما قلت من قبل ان للحين شهيتي ما رجعت مثل اول ، اما عن مكان البيبي فأنا للحين ما احس به مثلكم ما ادري ليش :qaq:

في حملي الاولي كان حسون متركز في الجانب الايمن من بطني .. بنشوف هالحمل وين بيستقر البيبي ..


شكرا على دعواتكم لي وما تقصرون(f)

نشوفكم على خير ان شا الله

أنا بالنسبة للوحام وايد متعبني..:qaq:

بس لوعه بدون ترجيع..بس مرات اتمنى أرجع من كثر اني مو قادره اتحمل اللوووووووعه..:sad:


و أكثر شي يتعبني ريحة الطبااااخ :angry:


ما أقدر أتحملهااااااا..فقمنا نطلب من برا او نيب من أهلي أو أهله :(


يله ربي يعدي هالشهرررر على خير و ان شاء الله تخخخخخخف...



انزين بسألكم..شنو أكثر شي تفكرون فيه و أنتوا بهالفترة :gum:


هل كنتوا تحاتون صحة البيبي واااااايد مثلي :sad:

وايد كنت أحاتي صحته..لكن قلت خلاص لازم أبعد عني الوساوس و ان شاء الله يكون بصحه و عافية يا رب..



و هالايام أفكر شنو أغراض البيبي اللي بشتريها :shy:


وقاعده افكر بعد شنو ممكن أسوي بوقت فراااااااااااغي .. ودي أتعلم شي يديد أو أسوي شي أستفيد منه..اذا عندكم أفكار ساعدوني :pain:

احم احم.. اليوم ياية مخصووووص افوشر عليكم

دشييييييت الرابع رسمياً :D

ويوم السبت موعدي عشان اشوف وش هست داخل بطني ههههههههه

ايه امس بعد حسيت بحركة البيبي والحمدلله كان مروق، ناديت زوجي وحس فيها هو بعد... استانس واااايد

اختي فروحة، تقدرين على قعدتج في البيت تدورين في الركن، وتقرين كل ما يتعلق بالحمل، الحين متعبنج الوحم بس اذا خف، سوي جذي، عشان تصيرين مرجع لكل سوالف الحمل..

بعد عسعسي في النت على اغراض البيبي ، والله شغلة حلووة.. وشوفي ثياب الجنسين، واذا عندج مقدرة سوي لج اوردر من المواقع العالمية اللي مالها فروع في بلدج..

اقرأي، كتب مجلات جرايد... لأن بعدين عقب الودلاة بتتحسفين على نتفة فراغ تشوفين روحج فيها..
بعد اقرأي عن التكيف مع البيبي الصغير اول الايام بعد الولادة.. واهم مشاكله، على الاقل تكون عندج خبرة هذا اول حمل.





اممم بديتي تاخذين لج سوالف النفاس؟ اسألي امج شنو ياخذون عندكم الحريم من سوالف الاعشاب ولا الحصى او اللف اللي يلفون به البطن بعد الولادة... عشان تتجهزين دامج فاضية الحين...
اقرأي في المنتدى ما يقصرون ما شاء الله عليهم.. كل من ويابت خبرتها..


بس ، هاللي في بالي الحين..

اف ولدي مو مخليني بروح اشوف شنو يبي...

انا الحمدالله من كم يوم دشيت الرابع بس ما زلت تعبانه من اللوعه والم في المعده وما اشتهي آكل ما ادري لين متى .... الله يتمم علي حملي إن شاءالله وعلى جميع البنات ...

بس انا مستغربه من البنات يقولون يحسون بحركه البيبي في الشهر الرابع وانا ما احس ابدا .. هل هذا عادي

هلا ومرحبا ختي شيخة البيت معانا ..

اي عادي ، لكن ممكن اذا كان اول حمل لج انج ما تحسين فيه او ما تعرفينه ..

انا لأن هذا ثاني حمل لي، فعرفت الحركة مع انها خفيفة وااايد ( مثل النملة اذا تمشي على يدج )

انتي استرخي على ظهرج فترة ، سكتي لا تتكلمين هههههههه لأنه يوقف اذا تتكلمين.. وان شاء الله تحسين فيه..

في حملي الاولي ما حسيت فيه الا بداية الخامس.. فعااادي..