تجهيزات أحلى عرايس مصر - الجزء الرابع

هانيا يارب يخليكي .. والله يسلمك

انا الحمدلله بشكر ربنا كل يوم وعارفة ان دة قدره بس الي مزعلني اني داخلة علا جواز وعايزة انزل كل يوم اشوف حاجتي..

جزاكي الله خيرا ياهانيا ياحبيبتي علا سؤالك.. ومعلش عيزة اطلب منك طلب

ممكن تبعتيلي انا كمان اسماء المحلات وعناوينها وتلفونتها لفساتين المحجبات عالخاص.. وميرسي ياقمر

برافو عليكي يا جويرية يا قمر الموضوع دة حلو جدا طبعا كالعادة زى كل مواضيعنا بصي يا ستي بما انى انا اول عروسة ححكى عن حاجتى
1- في الشبكة اجرت فستان بيستاج بس تحفة بس طبعا الخطأ الرهيب اللي عملته انى مش عملت بروفة على الفستان الا يوم الفرح و قطعا لاقيت الفستان بايظ و عيط :cry:و بهدلت الدنيا علشان كدة لازم البروفة تتعمل قبليها بفترة على الاقل 3 ايام و دى حاجة مهمة اوىىىىىىىىىىىىى
2-اما بقي الحاجات و التجهيزات انا مكنتش ماما جايبالي اي حاجة لانها مؤمنه ان الحاجات و الأذواق بتختلف علشان كدة انا جبت كل حاجة على ذوقي اينعم دوخت بس مبسوطة و فرحانه (r)اوىىىىىىىىى بيهم
اشتريت تقريبا كل حاجة الحمد لله حتى العفش اتفقت عليه لان انا فرحى في اول 8 بس فاضلي هدوم الخروج الصيفي و الحاجات البلاستيك بس زى الباسكتات و كدة يعنى اما بقي الافكار اللي بفكر فيها مش عارفة بس انا حاسة انى متلخبطة في كل حاجة حاسة انى فرحانه اوى و متلخبطة اوى و ناقصنى حاجات كتير بالرغم من تقريبا خلصت
عموما حكتبلكوا تانى سلام دلوقتى عندى كبسة شغل باي :eek2:

تيتو حبيبتي و كل البنات الحلوات القمرات:up: وحشتونى اوى اوى اوىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى
بس انا زى ما قلتلكم كان عندى فرح اختى و الحمد لله كان تماممممممممممم عقبالكم كلكم يا رب
تيتو مبروك حبيبتي على الموضوع الجديد و انا معاكم زى المواضيع اللي قبلكم و معاكم على طول في التحدىىىىىىىىىىىىىىىىىىىىىىىىىىىىىىىىىىىىىىىىىىى
رجعتلكممممممممممممم وحشتونىىىىىىىىىىىىىىىىىىىىىىىىىىىىىىىى:shy:

الف مليون المليون سلامة عليكي يا رورة معلش حبيبتى و على رايك دى عين جامدة اوى بس ربنا يعديها على خير و الحمد لله على كدة احنا احسن من غيرنا كتير
ربنا معاكى و يقومك بالسلامة يا رب

روره سلامتك الف سلامه عندك حق العين صعبه اوى حاولى متحكيش عن خطيبك كتير لصحابك و قاريبك خلى باللك

اولا يا بنات السلام عليكم والف سلامه عليكى يا روره و ربنا يحميكى من العين انشاالله بصوا بقى يا بنات انا فرحى في اخر 8 و محتاسه اخر حوسه ومش عارفه اعمل ايه وحسه انى الفرح معاده قرب خالص و انا لسه معملتش حاجه و انا من المنصوره فلو في حد هنا من المنصوره ممكن يسعدنى فيا ريت انا طبعا محجبه ومش عارفه هعمل ايه في لفه الطرحه دا غير ان في بلاوى في جهاز المطبخ ناقصانى ومش عارفه حسه انى ناسيه حجات لانى اصلا بنت واحده ومحدش من صحابى لسه اتجوز ومحتاسهو من كتر التفكير خسيت جدا دا غير انى مش مليانه اساسل وهختفى قريب

رورة حبيبتي

ألف سلامة عليكي

جبس :eek2:

يا نهار

دي عين جامدة أوي يا رورة

ربنا يستر

معلشي يا حبيبتي
رربنا يعينك

أنا أتجبست كتير قبل كده
رجلي اليمين إتجبست مرتين أو تلاتة
و رجلي الشمال مرة وإيدي اليمين مرة

محترفة يعني

بس متقلقيش يا حبيبتي ومتخافيش إن شاء الله شهر بالكتير

ومتستعجليش أنا رجلي اليمين أول مرة أستعجلت وكانت ضعيفة وفضلت فترة كبيرة كل شوية أتجزع وتورم والحاجات دي
لغاية ما عالجتها صح

بصي بقى خلي بالك من نفسك وداري على شمعتك تقيد

وخدي بالك مين اللي ممكن يكون بيحسدك

ومتتكلميش عن نفسك أنتي وخطيبك كتير
وربنا يكفيكي شر الحسد إن شاء الله

(f)

على فكرة أنا زعلانة منكوا كلوكوا

أيه مبروك دي

لعلمكوا بقى الموضوع ده مش بتاعي ولا حاجة

ده موضوعنا كلنا
ومن غير وجودنا مع بعض هيبقى ولا حاجة

كل اللي عملته بدل من رد سريع عملت إنشاء موضوع وكتبت مشاركة عادية زي اللي كنت باكتبها في موضوعنا

أسحبوا مبروك دي بسرعة وإلا هزعل جامد

بس أنا مقرش أزعل منكوا

بحبكوا وي

خلاص هعديه المرة دي
سماح

هنيا

معلشي ممكن تبعتيلي أنا كمان محلات المحجبات وربنا يخليكي لينا دايماً

vetdody

أنتي فين أحنا مستنيينك


نونة الشعنونة
منور يا جميل
أنا الصراحة معرفشي حاجة في المنصورة بس خليكي معانا أكيد هتستفيدي

ممكن حد يرد عليا ان نفسيتى بقت تحت الصفر طب سؤال اعتقد اجابته سهله بس للأسف معرفهاش ايه هيه الحجات الى بتتحط في النيش غير الكاسات و انواعها و عددها ممكن حد يعرفنى
و ايه هوه احسن نوع طقم صينى و ابقى اسئل على الحجات التانيه لو فيه حد بدء يساعدنى و رد عليا

بصي يا هنيا

أنا مش عايزة أعمل فرح

أنا عايزة أعمل حنة وكتب كتاب ونسافر شهر عسل
هل أشرف علام ممكن يفيد في حاجة زي دي

قصدي مفيش wedding يعني

أختي العزيزه هنيه ميرسي أوي انك هتسأليلي
انا عايشه في قطر بس ان شاء الله هتجوز في مصر ,,
:) أنا بابا مصري وان شاء لله هتجوز مصري
بس المشكله اني مش بعرف أي شيئ عن مصر نهااااااائيا علشان كده فرحت اوي بالموضوع دا وأحب أهني الكل عليه لان الكل راح يستفيد ان شاء الله

ألف سلامه عليكي يا رورة
حاولي تقرأي قران كتير اليومين دول وتواظبي على أذكار الصباح والمساء
ربنا معاكي
وسلامي لكل البنات الحلوين هنا

الاخت الحبيبة هانيا

بارك الله فيكي وجعل ما تفعليه في ميزان حسناتك

نونة الشعنونة اهلا بيكي فموضوعنا كلنا عشان تايتو متزعلش..

بصي تابعي معايا الموضوع دة.. وان شاء الله هتعرفي ايه الي ناقصك وايه الي خلصتيه.. انا عملاه عشان منتوهش.. ولو عيزة تتناقشي في اي حاجة في الموضوع دة احنا كلنا تحت أمرك..

http://www.3roos.com/forums/showthread.php?t=169315&page=1&pp=15

اتمنى اكون أفدتك



كل البنات الي سلمو عليا وسألو عليا.. جزاكم الله خيرا.. والموضوع فعلا قضاء وقدر وسببه العين..والحمدلله على كل حال..

انا متأخرة معاكو شوية في الجدول لأن حتى الحموم مش عرفة استحما...... هههههههههههههه

بالنسبة لموضوعي جهاز العروسة.. انتو لو تلاحظو اني سايبة الماكياج شوية مش بتكلم عليه خالص دلوقت.. هخلص تجهيز الشقة غرفة غرفة.. وبعدين ان شاء الله هتكلم عن شنطة ماكياج العروس

والسبب الي مخليني مأجلة لحد دلوقت.. لأني بنزل الف وبشوف احسن حاجة وايه هي الحاجة وحشة.... واول مشتري اكيد طبعا هشتري احسن حاجة.. ومستنية لحد مشتري عشان اكتبلكو..

بس يابنات معلش الموضوع محتاج تعاون شوية

تايتو ياريت تدخلي عالموضوع وتبدئي تطبقي عملي.. يعني تكتبي فموضوعي للبنات حاجة حاجة تجبها من فين.. لأني معرفش.. من الأول للآخر..

وأي بنت تعرف الحااجات دي نجبها من فين تتفضل وتقول ومتبخلش علينا وعلى بقية البنات...

وربنا معايا ومعاكو

نونة الشعنونة

بصي يا سيتي

بالنسبة للنيش بيتحط فيه الكاسات يكونوا مقاسين على الأقل 6 أو 12 على حسب مساحة النيش بتاعك
لكن عموماً لازم يكون عندك طقم كاسات 12 علشان لو جالك ضيوف أكتر من 6 مينفعشي تقدمي لكل واحد كاس شكل

لكن الكوبايات العادية لأ متتحطش في النيش
ممكن الكوبايات اللي فيها دهبي (تقريباً أسمها بوهيمي مش متأكدة من الأسم) أو الكوبيات اللي متداخل معاها ستانليس
دي بتكون معمولة للزينة في النيش

وبيتحط فضيات وكمان كريستالات من كريستال عصفور

االصيني بقى أنا بقى عندي خبرة كويسة فيه لكن لسة مشترتهوش لأن فلوسه أتصرفت مني
لكن أنا لفت 3 شهور علشان طقم الصيني

والصيني بيتقيم بـ
1- عدد القطع
2- بلد الصنع
3-السعر طبعاً
4- مدى خفته (الخفيف هو الجيد)

بالنسبة لعدد القطع

أولأ: أطقم 57 قطعة وهذه تتكون من
6 أطباق كبير مسلطح
6 أطباق كبير غويط
6 أطباق حلو مسلطح (جاتو)
6 أطباق حلو غويط (مهلبية)
2 قطعة سلطانية الشربة (السلطانية + الغطاء)
1 سرفيس غويط
1 سرفيس مسلطح (دائري أو بيضاوي)
2 قطعة براد شاي (البراد + الغطاء)
12 قطعة طقم فناجين قهوة (6 فناجين + 6 أطباق للفناجين)
12 قطعة طقم فناجين شاي (6 فناجين + 6 أطباق للفناجين)
1 قطعة لبانة
2 قطعة سكرية (السكرية + الغطاء)
هذه هي القطع الأساسية وبعض الأطقم تزيد في عدد السرفيسات
أي أن الرقم 57 قطعة غير ثابت ويختلف من موديل لأخر وقد تصل في بعض الأطقم إلى 70 قطعة

ثانياً:
أطقم 110 قطعة وهذه تتكون من
12 أطباق كبير مسلطح
12 أطباق كبير غويط
12 أطباق حلو مسلطح (جاتو)
12 أطباق حلو غويط (مهلبية)
2 قطعة سلطانية الشربة (السلطانية + الغطاء)
2 سرفيس غويط
2 سرفيس مسلطح (دائري أو بيضاوي)
2 قطعة براد شاي (البراد + الغطاء)
24 قطعة طقم فناجين قهوة (12 فناجين + 12 أطباق للفناجين)
24 قطعة طقم فناجين شاي (12 فناجين + 12 أطباق للفناجين)
1 قطعة لبانة
2 قطعة سكرية (السكرية + الغطاء)
2 قطعة ملاحات (ملح + فلفل)
هذه أيضا القطع الأساسية وقد تزيد في بعض الأطقم لتصل إلى 122 قطعة و أطقم أخرى تصل إلى 140قطعة

ثالثاً: أطقم 192 قطعة
لم أبحثها جيداً لعدم إنتشارها في السوق
ولكن بها طقم يشبه الصواني يدخل الفرن بدون أن يتأثر
ويزيد فيها السرفيسات
وقد يكون عدد الوحدات 18 بدلأ من 12 ولكن غير متأكدة من هذه النقطة



بالنسبة للمنشأ والسعر في حالة الطقم من 110 إلى 140 قطعة
1-الأفضل على الأطلاق هو الألماني والفرنسي ويتراوح السعر من 5000 إلى 6500 (مشفتش أغلى من كده لكن سمعت أن فيه أغلى)
(لا أعلم ما هي عيوبه )
2- يليه التشيكي والبولندي ويتراوح السعر بين 2000 إلى 3500 (عيوبه ليس خفيف بما فيه الكفاية )
3- المصري الألماني وهو خامات ألمانية صناعة مصرية ويتراوح السعر من 1100 إلى 1800 (نفس ثقل التشيكي والبولندي ولكن الأطباق يوجد بها أحياناً تموجات ويقال أنه ليس صيني و أنه بورسلين مغطى بطبقة صيني ولكني غير متأكدة من هذه المعلومة)
4- الماليزي و الأندونيسي ويتراوح السعر من 700 إلى 1000 وقد يكون أقل من هذا (أخفهم على الأطلاق ولكن يوجد بالقطع عيوب مثل نقط بارزة صغيرة )

أماكن الشراء :
بالنسبة للنوع الأول أبحثي في المحلات الكبرى
بالنسبة للثلاثة الأخرين أفضل مكان هو حمام الثلاثاء بجوار منطقة الأزهر

ولكن في جميع الأحوال يجب أن تتأكدي من كل قطعة و أن تفرزي قطعة قطعة على حدة
وتتأكدي من عدم وجود شروخ أو كسور أو تموجات في الأطباق


يا ريت تكوني أستفدتي


رورة عروستنا الأقمر

من عينيا حاضر


باقي البنات أنتوا فين وفين التحدي
أيه الكسل ده

معلشي يا بنات هسيبكوا دلوقتي علشان الشغل

جويرية حبيبتي

أنا هشارك معاكو و أحكيلكوا تجربة الخطوبة

بس معلشي مش هقدر دلوقتي علشان الشغل

أنا بس حبيت أسلم عليكي و أقولك أحنا معاكي

سلام يا قمر

تيتو روح قلبى احنا اهو ومعاكى ومستنين التحدى
رورة انا بجد مش عارفه اقولك ايه بس معلش يا روح قلبى استحملى وربنا يحميكى يا جميل يا رب وويديكى الصحة ان شاء الله وكل اللى اقدر اقولهولك عليكى بربنا وهو الوحيد اللى قادر يحفظك ويشفبكى إن شاء الله والقران الكريم صدقينى هو خير حافظ .

ازيكم ياعرايس ... الف مبروك عليكم جميعا ...

مش عارفة انتو يمكن مش عارفيني ... انا عراقية بس خطيبي مصري ( عشان كده عم اخذ كورس مصري بالكلام) ... حابة ادخل معكم واتعلم شوية شوية واذا عندي اي حاجة اعرفها :shy: ححاول اساعدكم .... انا عمري مانزلت مصر بس فرحي حيكون بشهر 8 ... انا من سكان الامارات ولسى تعبانة بالجهاز بعدني بالبداية وربنا يعينا بجد الموضوع مرهق ومتعب للاعصاب ....

بس انا قلبي اتفتح ليكم جميعا ... والف سلامة عليكي يارورة ...

وانا محجبة كمان فياريت تفيدني خواتي بربطات جميلة وناعمة ... انا حشتري فستان فرحي من الامارات بس حابة اسئل بالنسبة للطرحة لازم تكون شكل معين عشان ربطة الحجاب او اخيط معاها قطعة تانية عشان الحجاب الي تحت الطرحة ... انا دوختكم بس بجد حاسة اني تائهة ....