تعرفون سر الغيبة اللي غبتها؟؟ حسون بغا يروح مني :( :(

السلام عليكم ورحمة الله وبركاته


كيفكم بنات.. والله وحشتوني..
موبيدي هالغياب.. والله كان ما افارقكم..



من يوم الاربعاء اللي فات.. بدأت القصة..

كنت الاحظ على ولدي حسين نشاط زائد على الحد...من قبل 3 ايام..من يصحى من النوم الصبح.. ما ينام الا وقت نومته بالليل.. تقريبا 11 الى 13 ساعة متواصلة مستيقظ..
حركة دائمة.. وربشة
حتى ما يرضى يهدأ عشان يرضع ..

لما جاء يوم الاربعاء بالليل... كالمعتاد تعشى معانا.. وحممته.. ونام على الوقت ...

نصف ساعة بس واستيقظ .... مرة واحدة بدأ كل شيء..
ترجيع واسهال وصخونة.....
كله كوم..
والكوم الثاني..
سعال وحشرجة.. وزكام مرة وحدة انسد خشمه موول..

ليلتها ما نمت وانا معاه.. وهو يصيح طبعاً تعبان يبي ينام بس مو قادر يرضع والاسهال جنه شلاااااااااال...
:( :( :(

اصبحت من الصبح وطيران على المستشفى.. الحكومي لأنه كان اقرب الخيارات
دخلت وشرحت للدكتور..

قال لي انه فيروس في الجو.. ومنتشر هالايام..
وعطاني خمسة ادوية وبخار وقطرة انفية عشانه..
رجعت وبديت معاه مشوار التعب والمعاناة..

اي شيء يدخل بطنه .. على طول يرجعه.. حتى الدواء..
والاسهال مو راضي يوقف...
داخ وطاح علينا...



وديته الطوارئ... مباشرة تحليل.. طلع عنده جفاف.. عطوه مغذي.. بالايد.. تنشط شوي، وقعد يلاعب وكلمنا.. فرررحت وقلت الحمدلله.. رجع ولدي مثل اول...

لكن هيهات :(

بس ردينا البيت مع الادوية الجديدة.. رجع المشوار مرة ثانية..
واللي خذاه بالمغذي كله طلع بالاسهال والترجيع..

صرت مثل المجنونة ما ادري شنو اعطيه من ادوية وشنو لا...
صار عندي صيدلية اكثر من 10 غراش مصفوفة...

وكل من يشور بشور غير... لاتعطينه المضاد يزيد الاسهال.. لا تسوين جذي سوي جذاك..

حالته صارت حالة وانا ما قدرت اتحمل... صرخت في زوجي وعصبت.. لازم تشوف حل.. ما يصير ولدي بيموت اذا استمر حاله جذي..


وين نروح ؟ اليوم الجمعة واخصائي الاطفال مسكرة عيادته...

رحنا عيادة الرسالة.. صح طب عام.. لكنها عيادة خاصة.. ارحم من الحكومي..

وديت لها الادوية كللللللللللها والتحايل وصفيتها صف قدامها.. وطبعاً شرحت لها بالتفصيل القصة مع الدموع..

اول شيء هدئتني.. وبعدين مسكت الادوية واحد واحد..
هذا ما ينفع .. المضاد ما يصلح مع الاسهال... فيه مضاد خاص بهذي الحالة..
البخار حل مؤقت ، لكن البلغم في الصدر لازم حل علاج حتى لو قوي شوي.. لكن كثرة السعال تحرض على الترجيع..

الحمدلله بعد الزيارة، واشترينا الادوية .. اللي كانت غااااالية لكن يفداها قلب وليدي ، حتى لو ما ظل عندي فلس بشتريها له..

الحين خفت الصخونة والترجيع صار مرة او مرتين باليوم.. بس الاسهال للحين مو فاج.. :(
وصدره صار اشوى من السعال.. والزكام انتهى..

وقام ياكل.. شوية.. لكن معليه.. اهم شيء ياكل..



مسامحة سردت عليكم قصة حياتي.. بس وايد وايد تأثرت من مرضته ..
اول مرة يصيدني جذي...

للحينه حسوني نايم بفعل تأثر الادوية، وصح انها 3 ايام بس هزل وااايد جسمه..

اسألكم تدعون له بالعافية.. ولي بعد.. لأن شكلي بمرض انا بعد من التعب والسهر..