حسبي الله ونعم والوكيل ....المبالغة في الأسعار...

السلام عليكم ورحمة الله وبركاته

هلا اختي شهادة وهلااا بالجميييع ..

ليه اتحسبين وتقولين حرام .. لو التجارة حرام كان الله حرمها ..والتاجرة على كيفها تحط السعر اللي تبيه براحتها ..ولاهوب حراام ..

اهم شي المشتريه اذا عاجبها السعر بتشتري مو عاجبها والله محد راح يغصبها ..

وانا مع كلام الأخوات : المزيونه 2000 و دانة قطرية .. وكلامهم صح ميه بالميه ..

يعني انتوا تبون التاجرة بعد ماشرتلكم البضاعه وشحنتها وتعبت عليها وضيعت وقتها بالنت وبالتلفون وعلى فكرة النت والتلفون مايبيله فلووس ؟!!..وتبونها تعطيكم نفس السعر
او زياده ريالين ..

مب عدل بحقها ابد ..

الا انتوا اللي حرام عليكم ..

وقسم بالله .. اني اتعب تعب مع البنات كأني اجاهد بالتجارة ..
اروح اطلبلهم طلبيتهم واحول مبلغ طلبيتهم يعني اروح البنك وروحت البنك ماتحصلي بكيفي ..
وبعد كذا اروح اشحنها لهم وشركة الشحن بعيده عني واااجد بمنطقه ثانيه ..

وبعض البضايع اللي عندها تكون هي مندوبتها .. والحرمه اللي تاخذ منها البضاعه حاطه سعر فيها والمندوبه مالها دخل طبعا بالسعر الا انها تزيد شوي على السعر وهذا من حقها ..

وهذا كله يرجع لصالح المشتريات لأن احنا نوفرلهم اشياء مو موجوده بديرتهم ..

ولا أنااا غلطانه ..؟؟؟..!!!

واللي ماتبي تشتري منااا على راحتها .. ترى احنا نكسب برا النت ..

وعلى فكرة يااختي شهادة انتي بموضوعك هذا يمكن تقطعين رزق وحده ..
لأن فيه بعضهم مايقدرون يسوقون بضاعتهم الا بالنت ..

ياليت تراجعين كلامنا وتراجعين نفسك ...

والله يسعدك ويوفقك ...

المشكلة نحط روحنا بخدمتهم وفوق هذا يدعون علينا و يتحسبون بعد
أنا طلبت آية أو دليل شرعي يمنعني أحط السعر اللي أبيه و محد رد علي
محد يجبر الثاني يشتري و لو و حدة ما عجبها السعر تقدر تدور لروحها مو معقولة وقتي على النت و روحاتي و رداتي للبنك ومكتب البريد و اتصالاتي و تعبي كله ببلاش يا ليت كل اللي يقولون حرام علينا يحطون روحهم بمكاننا و بعد يا ليت الادارة تمنع هالمواضيع لأنه مو هذا مكانها

الحلم الهادىء:
شهاده...معاج حق والله....انا من كم يوم دشيت وسويت بحث على الملابس هذي...وشفتها وشفت الاسعار ...فررررررررررررق كبير ...نفس الصور ونفس البضاعه اللي عارضينها (بعض الاخوات)...للاسف الاسعار مضاعفه !!!

والمضحك بالموضوع ان هالمواقع توفر الشراء مع الشحن (مجانا) والله مجانا !!! واذا تتطلب عنوان في امريكا الحين اراميكس يسوون هالخدمه...يعني انا من قطر مثلا بس عندي عنوان مال اراميكس في امريكا احط عنواني هناك واراميكس يجيبونه لي لين بيتي في قطر !! وماخسر شى ابدا

هذا للعم واتمنى البنات ينتبهون ويفكرون عدل قبل لا يشترون لان فيه (البعض) يستغفلونكم عشان يتنفعون !! بس اتمنى انهم يتقون الله لان خداع الناس مستحيل يجيب لج رزق حلال !

وسلامتكم

وأرامكس يوصللكم مجانا !! ؟؟ والمواقع توصللكم مجانا ؟؟!! يا سبحان الله أول مرة أعرف هالشي

بس علشان تتبلون على التاجرات !!! تألفون أشياء ما صارت لحد


أختي شهادة طرشيلي المواقع اللي تقولين عنها على الخاص

صارلي سنة تقريبا أشتري من النت وما مر علي موقع يشحن مجاناً إلا لداخل أمريكا وبقيمة شراء لازم تكون كبيرة


خبرينا عنه يمكن نحن ما ندري عنها ومبتلشين بمواقع تدفعنا تكاليف الشحن ( وأثاريها مجانية ونحن ما نعرف)

يزاج الله خير و جعله في ميزان حسناتج

عجبني رد المزيونة و خاصة في تفكير بعض البنات ان التاجرة محتاية
كلنا بنات ناس الحمدلله و مش محتايين و لكن التجارة مهنة مثل باجي المهن و شغل وقت الفراغ احسن من الفراغ اللي يهلكنا و يدمرنا

ثانيا : الوحدة لما تعرض البضاعة ما تغصب اي شخص او اي زبونة على الشرا كل وحدة برغبتها تشتري و انا عن نفسي ما اراكض ورا البنات بالرسايل 24 ساعة و اجبرها طلبتي سعره يعني لازم تشترين وين عايشين ؟ حبت تجرب اشترت نفعها كان بها ما نفعها انا شو ذنبي ؟؟؟؟؟؟؟؟؟؟؟؟ يمكن طبيعج تختلف عن باجي البنات كل شي فيج يختلف فلا تعقين اللوم على غيرج ... و خاصة انج منزلة موضوع و قريتي الردود يعني عرفتي ان في فئة استفادت بشكل كبير و فئة ما شافت شي؟؟؟؟؟؟؟؟ شو تبيني اقولج اذا انتي تبين .....اقولج لا تشترين ؟؟؟؟؟؟؟؟؟؟؟؟؟؟ عجب والله وفي النهاية يعقون اللوم على التاجرة ؟؟؟؟؟؟؟ و المشكلة في بنات ما يستخدمونه صح و الا يومين و ماشافوا نتيجة قالوا غشتنا؟؟؟؟؟؟؟؟؟؟؟؟؟

الحمدلله انا واضحة مع الزبونات من البداية و ابين لهم كل شي حتى الصور الاصلية من غير زيف ...........
و الاسعار واضحة و مبينة ... تبغين حياج الله هذا اللي اقدر عليه ما تبغين على راحتج يالغالية ......... شوفي اللي يناسبج ....

كلمة اخيرة ,,,,,, و هاي الكلمة قالتها مشرفة في منتدى ثاني يوم وحدة كتبت موضوع مشابه
قول الله تعالى : (و أحل الله البيع و حرم الربا )
كل تاجرة حرة في وضع اي سعر يناسبها دام انه حلال و ماشي دليل شرعي على تحريمه ,,,,,,,,,,,, و عقب اغلقت الموضوع على طول ....

جربوا التجارة و عقب احكموا .....

و الله الموفق

بصراحة كفيتي ووفيتي

السلام عليكم و رحمة الله و بركاته

هلا بكم أخواتي...

الموضوع أخذ حقه و زيادة في النقاش...

كل واحدة الحمد لله أبدت وجهة نظرها...

ألخوات المشتريات...ابدوا وجهة نظرهم في غلاء الأسعار...

و الأخوات التاجرات دافعن عن رأيهن ...و جابوا لنا الأدلة ...

و فعلا...كما قال الله تعالى ( و أحل الله البيع و حرّم الربا )...

الأخوات ما غشوا أحد...البضاعة موجودة...و الأسعار موجودة...

اللي يحب يشتري...يقدر يشتري...و اللي ما يريد...ممكن ما يشتري...

و هذا لا يطلق فقط في المنتديات و عالم الشراء على النت...

حتى في المحلات في المجمعات...

ممكن تشتري علبة مكياج مثلا من محل...و تمشي بعده بمحلين و تلاقي نفس العلبة بنصف السعر...

يعني هذه تعتبر حرية شخصية...و كل واحد يقدر يسأل قبل لا يشتري و يتأكد...

و بالنسبة للأخوات التاجرات...أكيد لازم يكون لهم نسبة في الربح...نظير تعبهم و المجهود اللي يقوموا بيه...

و هم أكيد مدركين إنه لو في واحدة تغالي بشكل مبالغ فيه في السعر...عمرها ما راح تكسب زبونة...و الواحدة لو إشترت من عندها مرة...ما راح تشتري الثانية...

أشكركم أخواتي مرة أخرى...و الموضوع سيغلق الآن...