حسبي الله ونعم والوكيل ....المبالغة في الأسعار...

إماراتي الحبيبه اشكرتج على المرور ..,القهر اهو الي خلاني اكتب الي كتبته....

حاشمه_نفسي....بس الواحد ما يسكت على الظلم الغاليه

شمووه...صدقت اسعارعم ناااااااااااااااااار...بس لاحيله

الغاليه...جبال وسهول انا دوم متعوده اشتري من النت ..عمره ما استوت معاي هذي الحركه اهمه يخبروتج بالتفصيل الي لتج والى عليتج وبعدين اذا بغيتي كان بها واذا هونتي كان الله غفور رحيم....

lura ...بعد هذا مرض ثاني ....الواحد مب عارف سو يسوي ...وايد منتشره امراض النفوس ...والله حاله الواحد يدور الرخص والثاني يدور الغالي بس علشان القهروالغيض

لا الغالية اناا مب زعلانه منج ولا اقول انج طريتيني بالعكس

كلامج ما عليه زود والله الشاهد ..

انا اتكلم بشكل عام وبالذات عن المندوبات لأنه مالهم القدرة في التحكم على السعر ...

واما عن موضوع انه تتري كم طلبية عشان اتطرشين الفلوس ترا مب دوم تتيمع الطلبيات وصعب انأخر الناس عشان نتريا الغير صح واللا لا ؟؟

اذا ربحج في القطعه كان 30 درهم او اقل مثلاً وما ياج غير طلبين او طلب .. ما استفدتي شي 35 راحن و 30 شحن ..

جي الوحدة تدفع من عندها ..

الله يهدي الجميع ان شالله .. وان شالله فايده هالقسم تعم على الجميع واهم شي عشان الوحدة مننا تتوفق انه تستحضر الله في نفسها في كل خطوة هيه اتسويها عشان ربي يبارك لها في الرزق ..

والله يغنينا بحلاله عن حرامه

غريبة أختي شهادة ؟ شو هالموقع اللي ما يحسبون عليج ضرايب ويشحنونلج مجاناً ؟؟!!


خبرينا عنه >>> يمكن نشتري منه

أنا صراحة شايفة الفواتير بعيوني

البضاعة سعرها في الموقع 44 دولار وبعد الشحن والضرايب وصلت 62 دولار.. ومتأكدة من هالأرقام


ولا يمكن علشانج ألحينه في أمريكا والوضع مختلف

بسوالحمدلله عزيزتي

ما بتصدقيني

عندي قناعة والحمد لله ودايما اقول اذا ما حصلته في الدنيا احصله في جنتي ان شاء الله

وما انظر لغيري كيف عايش
لو اني اقارن وضعي بوضع خواتي بحصل فرق وايد

لكن الرزق من عندرب العالمين وما اتبطر على النعمة
وامعودة عيالي على نفس الاسلوب
لانه في غيرنا ما يحصلون واحد في المية من اللي عندنا ونحن في خير ونعمة دام انه قوت يومنا عندنا والله ساتر علينا

عزيزتي جبال و سهول

في امريكا بعض المواقع لما توصل الطلبيه سعر معين يكون الشحن مجانا

اختي شهاده
اغلب المواقع تحسب الشحن بسعر البضاعه مو بالوزن عزيزتي
و شحن المواقع غالي مو مثل لما تشحنين بنفسج من البريد
و يزيدون عليه ضريبه handling fees

انا ما جربت اتاجر من امريكا لكني كنت اطلب لنفسي

بس مجربه اني اتاجر من دول ثانيه
و الشحن يطلع علي مقارب لسعر البضاعه و مرات اغلى لانه وزنها كثير
مثال:

سعر البضاعه الاصلي( الحبه) 160
الشحن للحبه فوق 100 درهم

اسمحي لي اختي كلامج كله مغالطات وظلم لكثير من الأخوات اللي قاعدين يترزقون الله ..

اول شي احب اقول ان الاسعار هذي موجودة للي بغي يشتري واللي مايبي مو مجبور انه يشتري .. ببساطة اللي يحب ياخذ ومافيها اي استغفال دام الانترنت موجود والمواقع موجودة يقدرون الاخوات يشترون من المواقع مباشرة ..

وبعدين اللي بتجيب بضاعة من امريكا مثلا .. انتي ماتحسبين قيمة الاشيا الثانية اللي تكلفها ؟ مثل الشحن اللي ذكروه خواتي .. والاشيا الثانية الغير متوقعة مثل ان توصل قطعة مشقوقة او نوع القماش مو زين .. هذي يعني مابتروح ولاحد بيشتريها وطبعا التاجرة الامينة واللي تخاف الله مابتبيع شي خربان على الناس ..

هذا غير ان التاجرة شي اكيد مابتبيع كل اللي عندها .. يعني مافكرتي ان في جزء من بضاعتها بتركد عندها ومحد بياخذها ؟؟

بعدين بما انج في امريكا فأنتي ماتعرفين اسعار البضائع عندنا .. تقدرين تقارنين الاسعار الموجودة اهني في اسعار البضاعة لكن مو تروحين تقارنين بسعر البلد الاصلي ..

وتعتقدين يعني التاجرة بتحط لها ربح عشر دراهم او عشرين درهم يكفي ؟؟ بالله عليج بيتزا صغيرة من بيزاهت الحين قيمتها 25 درهم ..

يعني اذا بتكلمين خلج واقعية ولاتضرين غيرج بهالكلام .. لان في ناس تترزق الله وتحب تستفيد بالحلال ..

عيل لو انتي قاعدة بالصين وشفتي اسعارهم اهناك وقارنتي اسعارهم في اسعار بلدانا شبتقولين ؟؟ الشي اللي قيمته درهم ينباع اهني ب 10 دراهم يعني عشر اضعاف .. ومحد قال شي .. وانتي طايحة في خواتج !!

اكيد محد يرضى بالاستغلال بس صدقيني هذا لا هو استغلال ولا احتكار عشان نقول حرام .. ((احل الله البيع وحرم الربا)) فرجاء لاتحرمين بكيفج ..

انه اذا لقيت الشي اللي يناسبني وبسعر معقول مقارنة بالموجود في سوق ديرتي بشتري وماعندي مانع .. افيد بنات ديرتي احسن من حد ثاني

نسيت شي ثاني وهو ان هناك جمارك من الدولة اذا كان حجم البضاعة كبيرة غير قيمة الشحن من امريكا ..

قوارير كفت ووفت واسال مجرب انا كنت اشتري من فكتوريا وابيع وصراحه عقب الخساره بطلت

وهم فالوده كلامها عين العقل واختي دام تشوفين انه فيه مبالغه ليش ماتبيعين جربي بيوم تشترين للبنات وتبيعين وشوفي الاسعار والجمارك والشحن واخرتهاالتوصيل للبنات دبل دبل السعر لايغرج سعر المنتج بالموقع ترا فيه رسوم توصيل تنحسب على اللي بره الدوله وفوقها جمارك وفوقها رسوم وفوقها رسوم شحن للبنت وفوقها عموله بسيطه وفيه رسوم البريد لانه ساعات يرفض تسليم الاغراض من الفيديكس للبيت فنضطر ندفع رسوم لشركة شحن مغصوبين عليها تتعامل بالباطن مع البريد وحصل معاي هالشي وفوقها اسعار التغليف والخ ماتخلص هالامور لا تلومون التاجرات ترا يتحملون اكثر من طاقتهم كافي مجابله النت ومهيته بيتها عشان تشتري وتراجع حواله وبنك وتوصيل وبريد والخ ووفرتلج المنتج لي باب بيتج تستكثرين عليها هالشي اللي مو عاجبها تشتري بنفسها او اذا احد سافر يشتري لها صراحه انا لو ماعجبني سعر شي مااشتري اسكر الصفحه وامشي مو لازم اعلق واقول الاسعار نار والخ مااعرف شنو ظروف التاجره فمااظلم ولا احط بذمتي

مشكوره يالغاليه...كلامج صح واكتشفت هالشي بالصدفه .. بس ماقدر اطبقه لى الكل اكيد البعض يخاف ربه

اختي كانت تجهز لعرسها وكان خاطرها بجلابيات كويتيه.. وماكانت تقدر تسافر الكويت قامت طلبت من وحده من الخوات جلابيات
وانتوا كلكم تدرون ان اللي يبيعون جلابيات كويتيه بالموقع وووايد والاسعار مرتفعه البعض ب 500 و600 وبعضهم يبيعون ب700 ..

المهم اختي شرت من البنت وتوقعنا ان هاى السعر الاصلي مع زيادة الربح ماقلنا شي البنات يبون يترزقون و يستفيدون بعد..
بالصدفه بعد فتره قالت لي وحده ان الجلابيات اللي تنباع هني هي من مجمع موجود بالكويت يصمم جلابيات تقليد مابي اذكر اسامي
وان اسعارهم على 120 و200 وان كثرنا 300 ..تخيلوا من 120 ليييييين 700 شوفوووا الفرق حرام والله.. انصدمت السعر خيالي من قلب
خافووا ربكم

انا مابي اظلم البنات اللي يبيعون بس حبيت اقووول هالكلام اللي سمعته لاني انصدمت هالشي تم يدور في بالي ومادري من الصاج ومن الجاذب

ارجع اقول

انه في صح بنات مبالغين بالاسعار بصوره غير طبيعيه
بس الكلام ما ينطبق على الكل

اللهم اغننا بحلالك عن حرامك و بفضلك عمن سواك

مشكورين الغالين على الرد...بس عندي رد للغاليه فالوة....
شوفي الغاليه صدق الي يبا يشتريي والى ما يبى خلاص....بس لاحظي السعر فيه ناس غشيمه في الاسعار وعبالها السعر عادي وهو في الاصل مو بس غالي لا تلقين البضاعه ماتستاهل السعر الى محطوط....
وبعدين الغاليه انا قارنت البضاعه بامريكا لانه البنات يقولن هذي البضاعه من امريكا ...وبعدين بالنسبه للشحن ...الغاليه انا قلت كذا مره انا اطرش لخواتي من كريمات وقمصان نوم وبدل اطفال وماتاخذ سعر كبير بالعكس كان سعر اغلى صندوق طرشته مايقارب40 دولار والكرتون فيه بلاوي...
لو حسبت سعر الشحن مع العلم انه الوحده ما بطرش قطعه او قطعتين بطرش على الاقل 20 قطعه ومافيهن وزن شو بتكون تكلفه الشحن ولا شي بالنسبه لسعر السلعه بروحها....
انا ما اريد اغلط على حد ..الكل عنده حريه الراي انا كان في خاطري شي وقلته وما كان قصدي اغلط في حد لو ودي اغلط شان ذكرت اسماء وعناوين وغيره...وانا ما اطري الكل لا والله البعض والحمدالله يشرفتج التعامل وياهن ويكفي المعرفه والسمعه الطيبه ...وبصراحه فيه بنات ولا ارقى في التعامل والدب والاخلاق...بس اتقولين السمكه الخايسه اتخيس الكل ...
والسموحه لو غلطنا

انامن الناس الي انضحك علي والله لايسامحها في منتدى عروس بعد مااستلمت الفلوس ارسلت لي كميه ناقصه مره وقلت لهارديلي الفلوس وإلا ارسلي لي الكميه المطلوبه ولا عاد ردت علي وما اقول إلا الله لايسامحها

السلام عليكم ورحمة الله وبركاته

الاخوات فعلا ردو و اجابو بكل التفاصيل

احب ان اوضح شئ....

انا مثلا اشترى الملابس من امريكا..
و بيكون هناك
اولا ثمنها
ثانيا شحنها
ثالثا الجمارك فى مصر
رابعا الشحن لبلد الزبونة
خامسا مكسبى
سادسا مكسب المندوبة

و ببيع بنفس السعر اللى بتبيع بيه غيرى فى بلدها يعنى ممكن ما يكون عندها جمارك ولا شحن من بلد الى بلد مثل البند الرابع عندى...

حبيباتى يا ريت تضعوا نفسكم مكان التاجر :)

و الف شكر لكم...

انامن الناس الي انضحك علي والله لايسامحها في منتدى عروس بعد مااستلمت الفلوس ارسلت لي كميه ناقصه مره وقلت لهارديلي الفلوس وإلا ارسلي لي الكميه المطلوبه ولا عاد ردت علي وما اقول إلا الله لايسامحها

تعرفى حبيبتى..
انا كمان انضحك عليا..

ناس جعلتنى اشترى بضاعه و هى قالت انها جاية مصر فى العيد بتعطينى ثمنها و طبعا ولا كلمتنى ولا اخذت ثمن البضاعه
و اخرى جعلتنى اشترى بضاعه بـ 1300 ريال و ما حولت المبلغ ابدا حتى اليوم
و ما كتبت مواضيع ولا اشتكيت على العام
بس اشتكيت لربى و قلت اذامعاهم عذرهم خلاص انا مسامحة و انا كلى ثقة ان الله سيعوض على :)

حتى انا الاحظ بعض الاخوات يبالغن وايد....مب بس في سعر البضاعه....بعد في المدح....

وانا خلالالالالالاص ما ارح أشتري من أي وحدة في المنتدى

للأسف نحن على الإنترنت وممكن أي وحدة تكتب باسم وتدخل باسم ثاني وتدعي انها اشترت من نفسها

و بالنسبة للمشكلة اللي صارت في المنتدى آخر شي

شفت انه التاجرات مسوين عصبة مع بعض لو حد تهجم على وحدة منهم الكل دافع عنها بدون ما يتأكدون مين الصح ولا مين الغلط

بس عسب شيلني وأشيلك

والمنتدى شايل إيده من الموضوع ، عيل شو ضماناتي كزبونة ، كيف أثق فيهم!!!

الصراحة الواحد يشتري من المحلات أبرك له

بالنسبة لكلامج عن اللانجري التنكري و انه اسعاره ما تزيد عن 100 درهم مو صحيح هذا الكلام و انا على استعداد اراويج الاسعار الاصلية و سعر الشحن ينحسب مرتين مرة من امريكا الى عندي و مرة ثانية المن عندي الى الزبونة و سعر الشحن من امريكا انتي عارفته يبدأ من 5 دولار و لو كان الشحن على صندوق بريد أضيفي بعد تكلفة الشحن زيادة على هالخمسة 8 دولار ثانية اما البحرين فسعر الشحن للبريد الممتاز يبدأ من 4.5 دينار و انا مستعدة اعطيج رقم ادارة البريد و انتي اتصلي و اسئليهم ... و احسبي معاها عمولة البنك لو كنت راح اجيب البضاعة من برة و عمولة البنك 50 درهم و لو بالويسترن يونين تكون نسبة من المبلغ و بعد تبدأ من 50 درهم و لو عن طريق صرافة فعلى حسب المنطقة فالتلكس يبدأ من 30 درهم و لو عن طريق بطاقة ائتمانية فالنسبة 1.43 من قيمة المبلغ الكلي شدعوة هذا كله ماله حساب؟؟؟
و لازم تتأكدين من كل جوانب الموضوع قبل ما تنزلينه و تتسببين في قطع ارزاق البنات
عزيزتي ماله داعه التهجم على التاجرات و اتهامهم بالطمع
و ثانيا انا ما سمعت لا حديث و لا آية قرآنية تنهى التاجر من انه يحط السعر اللي يبيه يعني كلمة حرام عليكم ياليت تشيلينها من العنوان

انا مع صاحبة الموضوع انه فيه جشع واستغلال...بقول لكم سالفتي

شفت وحده عارضه قمصان نوم حلوين وفكرت اشتري منها....واسعارها معقوله نوعا ما ...المهم..اتفقت معاها والحين بصدد استلام الطلبية...وعقب فترة لقيت وحده ثانيه من بلد ثاني عارضه نفس البضاعه بالضبطططططط...لكن باسعار غير...وااااااايد رافعه الاسعار...يعني الاولى حاطه مثلا قميص نوم بسعر 200 ريال.....ونفس هالقميص عند الثانيه...بـ400 !!!....نفس البضاعه ونفس الصوره بالضبططططططط

شتسمون هذا؟؟؟

يعني انا حظي اني شفت الثنتين...والا كان ممكن اشتري من الثانيه على عماي وتستغل عدم اطلاعي على اسعار هذه البضاعه !

اتقو الله !!!