كيف هي علاقتك مع زوجة أخو زوجك؟؟؟

السلام عليكم و رحمة الله و بركاته

شكرا يا رانيا على موضوعك الحلو...

زوجة أخو زوجي مش معايا في نفس البلد...

بس لما نسافر لهم أو يسافروا لنا...أحب أقعد معاها و أتكلم معاها...

بحكم البعد...ما دخلت فيها كتير...و لا هي كمان...

بس هي ما شاء الله طيبة...و بنت ناس...

السلام عليكم ورحمة الله وبركاته

انا مرت حماي حسودة وحقودة

ودائما تنقل الكلام وتحب اتكون هي الأفضل

تطالعني في كل شئ اسويه واتسوي نفسي

مااقدر اوصفها من كثر اللى فيها

وزوجها وراءها في كل شئ ماله شخصية

منافقة تنقل كلام الى واتروح اتسوي فتن بيني وبين اهل زوجي

الحين مااختلط فيها بس سلام

مرموم، حيا الله أم مريم.. الله يديم المحبة إن شاء الله بينكم....

شهباء.. كان الله بالعون، بس زين أنك أبتعدت عنها والحمدلله خليك على السلام وأشولنكم وشو أخباركم وكفاية’’’’’’

السلام عليكم بنات موضوعك جاء في وقته اختى انا عندي تسكن في البيت زوجة اخو زوجي وزوجها وبنتها وصار لها اربعه اشهر حاولت اكون صديقتها بحكم قعدتنا مع بعض وطلعتنا مع بعض لكن فشلت هي غامضة وماتتكلم الا بالنادر مااعرف من وين ادخلها هي يوم نطلع تمشى ويا ريلها وانا ريلي يباني امشى وياها وهو مع اخوه بس صراحة التعامل وياها صعب احس اني مو داخلة مزاجها مع انا زوجه الكبير وصار عش سنين متزوجة وهي اصغر منى وصار لها سنتين متزوجة هي ساكنة عندي في شقتى وتتصرف وكان البيت بيتها واحنا الضيوف ساعدوني بنات الله يخليكم بحل او طريقة للتعامل وشكرا

الحمدلله للحين ماعندي لان اخو زوجي توه صغير في الابتدائي

يعني توى الناس

والله موضوع مهم وجى في وقته..انا ان شاءالله زواجي راح يكون في الصيف ومن بعدها بسكن في بيت اهلي زوجي وعنده اخوان اكبر منه متزوجين..وبحكم صلة القرابه اللي بيني وبين زوجي صارت معرفه بسيطه وحلوه بيني وبين زوجات اخوانه الثنتين,,يعني احسهم حليوين وفي حالهم بس ما يندرى شلون بتكون الاوضاع لما ان اسكن معاهم! ياريت يا خواتي تفيدوني في هالموضوع اكثر..يعني شلون اتعامل معاهم..هل اعدهم كاخوات واخذ واعطي معاهم ولا تكون علاقتي بهم سطحيه ومحدوده لان من خلال مشاركاتكم حسيت ان الموضوع مب سهل وانا وحده ما ابي مشاكل وماودي يكون بينا كره وحقد واحنا في بيت وااحد فلبيز فيدوني اكثر من خلال تجاربكم

تحياتي..
اختكم,, حــ قــطــر ــلا

والله اني حاتها وعاملها اب منتهى الطيبة ودوم امدحها او اراضيها اذا احد كسر خاطرها بس شتقولين عاد فاللي قلبه صخر

الحمد لله علاقتي بيهم كويسه وعلاقتهم بي كمان كويسه بالرغم أن أحنا ساكنين بمنطقه وحده وجيران بعد


بس أهما أهل زوجات اخوان زوجي يعني وحده تنادي الثانيه خالتي ( صله القرابه جدا قريبه )


مرت حماي الكبير خالت مرت حماي الصغير وعلاقتهم تمام التمام وأني الغريبه فيهم بعد يعاملوني منهم وفيهم



والحمد لله ماعندنا مشاكل بالمره كلش كلش

[align=right]مون لايت، مسامحة على السؤال ، ليش ساكنين معاكم؟؟ مفروض أن هي في بيت مو بيتها تحترم نفسها... حاولي ماتحتكين فيها..

نبع الكوثر، ماشاء الله وايد زين أن أخو زوجج صغير، على مايتزوج نكون احنا عجزنه مالنه خلق مشاكل...

حلا قطر، مبروك على الزواج مقدماً، نصيحة من متزوجة ولادغتها مثل مايقولون الحية، حطي بالج وأبتعدي عنهم، يعني لا تقصرين عليهم بمناسبات او مواجب، بس لا تيبيين سيرة أهل زوجج بشي غلط ترى البعض ينقل كلامج ويزيد عليه بعد.. وإن شاء الله يبقون على حالهم>>

حبيبة ريلها، الله يكون بعونج ويسهل أمورك..

أحلى شهد.. الله يديم هالعلاقة ومايغير عليكم..

عن نفسي هي تزوجت قبلي بس ما باركت لي بعرسي
و لا حتى يوم حملت وولدت
كلمة مبروك ما سمعتها تقول و لاتتصل بي
و انا هي يوم ولدت اتصلت لها و يوم حد يتوفى من اهلها على طول اتصل و اعزيها
من شكلها مب مستسيغتني
وعلى فكره هي ساكنه عند عمتي لكن اول ما تعرف اني بروح تطلع تروح عند اهلها
و ترد آآآآآآآآآآآخر الليل يوم تتاكد انا نحن نايمين

انا علاقتي جدااااااااااااااااا رسميه
بسبب المشاااكل الي سببوها لي هم ثلاث غيري وحده حياديه وبحاله وثنتين الي تحتي ياربي والله كلما يشوفوني دخلت يسكتون
اكره هالحركه واذا كنا بعزيمه يجلسون جنب بعض ودددددددد سوالف ما شاء الله وما كنني جنبهم الحقران يقطع
بس والله ما ابالغ انا الموظفه الوحيده منهم والي لبسي الحمد لله شي والله ما اشوف نفسي ولا شي بس هم كذا
لدرجه صرت اذا كانوا عند اهله ما اجي خلاااااااااااااااااااص شريت راحتي شدعوه اضغط على اعصابي جتني حاله نفسيه منهم
انا ديهم بالعزايم مايجون واذا عزموا رحت مو بكيفي زوجيييييييييي مررررررررررره يذبحني رووحي رووحي واذا بينت له انهم مايجون عطاني محاضره بالاخلاق لين صرت احس نفسي بلاقيمه
تخيلواا دخلت مستشفى وطلعت سويت عمليه ما جووا ويوم طلعت البيت جواا وكلهم عطووور ومك اب الحمد لله بس وش الحل مع هذا ولا
الاشكال !!!!!!!!!!!!!!!!
المشكله العزايم لازم ارووح واشوفهم والله من اشوفهم امرض من نظراتهم .................يالله بنات نبي حلووووووووووول

لاحول الله يافطامي، أحنه بعد أحيانا أحسهم لما يعرفون أن حنا رايحيين بيت أهل زوجي ما يجون، ولما نخرج يزورونهم... وايد تغار من ولدي... مع أني أحسهم يعاملون بنتها نفس ولدي ومايفرقون بينهم...

مناهل، فعلا نبي حلول، أنت المشكلة عندك ثلاث يعني العدد كبير فالقهر يزيد أكثر عندك...
ماعرف ليش يسون جذي ، مفروض العكس نكون مع بعض ، نطلع، نتزاور..
آنه مافي مناسبة ماروح لها، بس هي إذا من ناحيتي لازم كل مرة عذر، آخر مرة سويت ينون حق ولدي وكل الأطفال موجودين قالت آنه مزكمة وتعبانة ماقدر، قلت لها خليها مع أهل زوجي والشغالة معاهم علشان تراقبها، قالت لا....
تعودت على تطنيشاتها، المشكلة أنها بالأربعين وتتصرف كأنها وحدة ضغيرة من لبس وشعر وماكياج، تصدقون زوجها يصرخ على خواته على عباياتهم او شعرة طلعت من شعرهم وهي سفور وماشوفه يتكلم....

^
^
^
^ ^هلا رنووونه
شوفي على لبسها وهي بالاربعين حلوو بس سفووور نوووووووووووو الله يهديها بس
تدرين انا بجيب حل تدرين صرت اضحك مع الاطفال واعلق على ولدي واسولف معه وكأنهم مو عندي اقهرررررررهم وش اسوي

قصص تشيب الراس

الله يكون في العون

ملاحظة بسيطة : متأكدة ان معظم سبب المشاكل هي الغيرة يعني اذا الوحدة شافت زوجة حماها مرتاحة مع زوجها وتلبس احسن لبس ومعاملته راقية معاه ودائما مع بعض

اكيد بتحس بالغيرة خاصة لو كان زوجها مو معطيها ولا شي من اللي زوجة حماها تتمتع فيه

وبتقلب حياتها وحياة غيرها جحيم

تصدقون صرت ادعي ان اخواتي ما يتزوجون الا وحيد امه او اخوانه صغار .. رغم ان وحيد امه بعد سالفة بس يمكن اهون من زوجة الحمي

يارب تصبرنا بس والله اني تنكدت ايام العيد مو من زوجي من زنت خوانه فووق راسه
تخيلوا رايحه لهلي وهم جابو حريمهم وانا بالعيد ابي امي سووها سالفه وانا عارفه انه مو منهم من حريمهم
وزوجي معصب علي يقول العيد الجاي عندددددددددهم

أنا عاد عندي ثنتين ... والله عليهم من ثنتين


الأولى من الأهل وأعرفها من قبل لا ياخذها أخو ريلي (مع العلم بأني ماخذه أخوهم الأكبر)
وهي تقريباً في حالها ومالها خص في حد



بس من دخلت الثانية ... يلا عاد بدت المشاكل

مع إني أنا إلي رحت وياهم نخطبها .. وكنت أمدح فيها وإنها حبوبة واجتماعية

وبعد ما ملج عليها كنت اتصل فيها وأسولف وياها .. عشان تكون العلاقة زينه قبل لا تدخل عليهم البيت (والله إن نيته كانت صافيه وكنت أبغيها تكون مثل أختي وما ابخل عليها بشي من النصايح .. لأني أعرف أخوه عصبي وايد) لكن سبحان الله .. ما أدري شو إلي جلبها علي مرة وحدة ..

يوم عرسها قالت لريلها ما تبغي عيال أخوه يحضرون العرس (أونهم شياطين وبيخربون عرسهم) ،، المهم قلت حق عموتي (أم ريلي) إذا عيالي ما حضروا العرس أنا ما بحضر بعد .. وهم (أهل ريلي) حاولوا ويا أخو ريلي إنهم يدخلون الصغارية وإن عموتي بتهتم فيهم .. قالو : لا... مستحيل يدخلون ... وأشوفهم وهم يتحايلون عليه إنهم يدخلونهم ، لكن منو يقول مصرين على رايهم

وأنا عن نفسي قلت خلاص ما بحضر .. وفعلاً ما فصلت ولا سويت شي .. ويوم العرس يلست عموتي تصيح وتقولي إنتي بديتي المشوار ويايه وليش ما تكملينه .. قلتها عموه الضنى غالي مثل ما انتي غاليه وعشانج وعشان ريلي بحضر العرس بس ما يزعلون هي وريلي مني.

هذا موقف صار لي معاها (وما خفي كان أعظم) ومع هذا كان ريلي دوم يقولي كوني أحسن عنها مع العلم انها أصغر مني
ودوم أسمعهم في البيت يشتكون منها ويقولون إنها ياهل .. وإني أتم بعيد عنها أحسلي ..

ودوم أشوفهم مع بعض حريم إخوان ريلي سوالف وضحك ....


وأدري إني طولت عليكم وايد

والسموووووووووووووووووووووووووووحة منكم

مدام أنفنيتي قصتك كأنها قصة صديقتي كانت تحكيها لي قبل كم يوم،،، حماها عمره 46 وتوه خاطب، المهم خطيبته عمرها 32 وتتصرف كانها في العشرين، تقول حق صديقتي أنت شلون تتحملين بنتج وايد شيطانة لو أنه ماتحملها ، وسألتها بعد الملجة أنت متعودة تاخذين بنتج الأعراس؟؟ قالت لا، قالت لها ليش يبتيها خطوبتي، يعني عمها بعد ماتروح، والحين مصرة يوم العرس مافي ياهال.. قبل يومين أجتمعوا على الغده جان تقول للبنت الصغيرة شلونج يالشيطانة؟؟ تخيلوا أحد يقول عن عيالكم جذي..
مالك الا الصبر عليهم، مثل ماقالت رومي يغارون منك، وفي حريم مايسون شي في بيتهم حق أزواجهم من طبخ وترتيب فلما يسمعون أنك غير عنهم يحترون بس بعد مايغيرون من نفسهم...

خوفتوني من زوجة حماي إللي لسه ما شفتها... الله يستر...

أنا أشوف أمي عندها 2. وحده أكبر منها ب 15 سنه...
حتى عندها بنت بعمر أمي تقريبا... الفرق بينهم بس سنه وحده...

وتغار منها غيره ما تتخيلوها... لأن أمي أصغر منها...

وعندي مرة عمي الثانيه بعمري بالضبط يعني أصغر من أمي ب 18 سنه تقريبا...

فما تجلس مع أمي ولا مرة عمي أبدا... دايم تجلس مع البنات إللي بعمري...

فتحسوا فرق بين تفكيير أمي وتفكير زوجات عمامي...

فأكيد ما راح تجلس معاهم....

حبيبته ريلها سلفتك هذي وقحة اجل تسأل وين الحية؟؟؟ ش البلية مايضحك