ختان الاناث

مرحبا خواتي
موضوع ختان الإناث صاير حديث الساعه هالأيام خاصه عقب القضيه اللي صارت عندنا بديرتنا وبطلتها الزوجة التي أصابها البرود الجنسي ولجأت للمحكمة للإنتقام من الذي كان السبب !

موضوع ختان الإناث موضوع حساس جدا وأبداً ما كنت عارفه انه موجود في مجتمعاتنا الخليجية، توقعته فقط موجود في مجتمعات عربيه قليله ............. بس الصدمة يوم عرفت ان هناك أشخاص معاي مروا بهالتجربه المؤلمة والتي يدفعون ثمنها غاليا الآن

أحدى الأخوات كانت تحكي معاناتها مع زوجها حيث انها تشعر ببرود جنسي معه، أخبرتني بإنها أبدا لن تنسى ذلك اليوم التي أتت فيه تلك المرأه وهي فتاه ذات التسع سنوات وسلبت من عندها ذلك الإحساس الجميل وإلى الآن لا تستطيع إخبار زوجها بالسبب .......... حادثه أخرى، ان هناك أمرأه متزوجه لا تتكلم مع أمها منذ أكتشفت بإن المعاناه التي تعيشها مع زوجها، أمها السبب الرئيسي فيها.

في اعتقادي انه موضوع لا أساس من فعله، ويجب عليهم ان يفهموا ان هذا الشئ غلط ولا يجوز في حق المرأه.

insana

اشكر مرورك و تفاعلك في الموضوع....و شكرا لسرد الحكايه اللي اول مره اسمعها الصراحه...عن الوأه اللتي تريد الانتقام....

لا ادري كيف تستطيع ام ان تفعل ذلك ببناتها!!!!

من شو خايفه عالبنت؟؟؟ انها تكون ذات رغبه جنسيه و تغلط!!؟؟؟؟
هذا الامر لا يحل بالختان انما بالتربيه السليمه....التربيه على اساس الدين والخوف من رب العالمين وليس بارتكاب جريمه في حقها ...ستعيش تعاني اثارها طوال حياتها

شوفي حبيبتي أنا إلي أعرفه من الأهل إنه من السنه بس عن نفسي للحين ماشفت شي يدل على إنه من السنه ومن ناحية إيجابياته والله ماأعرف شو أقول لج يعني عن نفسي ماأعرف لأني مقتنعه مثلكم إنه عفة البنت تكون بتربيتها والوازع الديني إلي بقلبها مش بالختان لكن إلي حبيت إني أبينه لكم إنه في أكثر من نوع للختان طريقه سليمه ومالها أي أضرار وطرق خطأ وأقدر أقول عليها جريمه بحق البنت

وبالنسبه لصديقة خالتي إلي عرفته إنها كانت تتضايق لما تكون مع زوجها :o :pain: ماأدري شأقول لج يعني كانت تحس بألم والسبب إنها ما تختنت لأنها إرتاحت بعد ما تختنت الختان الصحيح

والله أنا عن نفسي للحين محتاره من هالموضوع ولأنه وجهات النطر مختلفه وحتى من ناحية الدراسات العلميه وأنا لاني مع هالظاهره ولا ضدها

شكرا حبيبتي على ردك....

رجعت

الحمدلله اني تربيت لأم وأب عقولهم متفتحة واكرر شكر ربي على هالنعمة

الختان يكون للولد فقط لما له من فوائد من ازالة قطعة جلد زائدة تسبب له تهيج مستمر والتهابات ... وهالشي معروف للجميع

اما ختان البنت فجريمة ترتكب من قبل من يقرر ان يقوم بالشي لبنت من بناته ... الختان مايختلف اثنين عندهم عقل انه يسبب خلل في شعور الزوجة خلال العلاقة الزوجية ... يمكن مايسبب برود بس يؤثر بدرجة كبيرة على احساسها بالمتعة ..

الختان من انواع كثيرة يختلف على حسب المنطقة والمجتمع والتقاليد السائدة .. يعني يزيد حجم الجزء المقطوع على حسب اجرام من تقوم به سواء من نساء العائلة او قابلة او غيره ... وهالشي يتم في اجواء مخيفة وغير مهيئة طبيا وغير معقمة قد تؤدي الى حدوث التهابات للبنت ... بخلاف الرعب النفسي المصاحب له

مرة من المرات جونا بنات عمي الصغار وهم في حالة رعب ... وهم عمرهم مازارونا الا نادرا ... امي استغربت كثير من زيارتهم بس طبعا استقبلتهم وجلست معاهم لانها حست ان في عيونهم كلام ، شوي وجلسوا يبكوا ويصارخوا يقولون ان ابوهم وامهم يبون يودوهم عشان الختان !!!

لأول مرة في حياتي اشوف ابوي اللي هو من النوع الهادئ جدا رفع سماعة التلفون على عمي الكبير وعطاه كم كلمة في العظم ... قال له انت اسأل اي شيخ اذا قال لك ان الختان واجب عندك حق غير كذا انا ماراح اطلع بناتي ( اللي هم بنات عمي ) من بيتي

بصراحة ما ادري ايش صار في القصة بعدين بس الظاهر انهم سووا اللي في راسهم وللحين ابوي زعلان من عمي وانا بكل صراحة اقولها انه متخلف !!

الدنيا تغيرت .. والعادات الشعبية بدت تختفي خاصة الضار منها .. وهو يفكر بهالطريقة

ومرة بعد كنا نتكلم مع زوجة خالي الصغير وقالت ان الختان عشان البنت ما تحس وما تفكر انها تغلط !!! ايش هالمنطق سبحان الله .. انتوا الحين ربوا بناتكم زين وعلموهم امور دينهم ودنياهم وخلصوا ضميركم ... مو تسوون هالشي بزعم انه يمنع البنت من الغلط

ما احد يقدر ينكر من الختان يؤثر على شعور المرأة بالمتعة في العلاقة الزوجية ... اي انسان دارس وفاهم يعرف هالشي بالاضافة طبعا للمشاكل اللي تصير بسبب الالتهابات في المجاري البولية خاصة اذا كان القطع مشوه للجهاز التناسلي .

انا ضد الختان ولو كان الامر بيدي كنت تبنيت مشروع حتى لو كان صغير عشان اعلم الناس بمضاره وآثاره المستقبلية على بناتهم

أختي السهر

[size=3]وبالنسبه لصديقة خالتي إلي عرفته إنها كانت تتضايق لما تكون مع زوجها ماأدري شأقول لج يعني كانت تحس بألم والسبب إنها ما تختنت لأنها إرتاحت بعد ما تختنت الختان الصحيح[/size]

الحمدلله رب العالمين احنا ما عمرنا مر علينا شئ اسمه (ختان الإناث - أقصد بالعائله وحتى خارج العائله) بس محد منا شكا انهم متضايقين ولا موب مرتاحين مع أزواجهم ........ بالعكس ، أشوف اللي صار لهم الختان هم اللي يتشكون ويتضايقون من هذا الشئ والدليل البنت الوحيده اللي أعرفها اللي قالت ان هذا طعن في حقها وشئ بيلازمها طول حياتها مع زوجها ......

بعدين أنا اول مره اسمع انه من السنه ختان الإناث .... بنظري هذا الشئ سلبي للغايه ولا تحمد عواقبه ابدا

انا مع اختي insana اللي اسمعه واعرفه ان البنات اللي صار لهم هالشي هم اللي يقولون انهم متضايقين من اشياء كثيرة سواء قبل او بعد الزواج

وحدة من صديقاتي تقول .. انها للحين ما تنسى الرعب اللي كانت فيه خاصة انه يتم في سن تفهم البنت ايش اللي يصير حواليها .. وهي تكره هاللحظة واللي سوته لها

لو كان هالشي في مصلحة البنت كان شددت عليه الشريعة ... وانتشر بصورة اكبر

انا اقولها

الختان = تصرف متخلف تمتهن فيه كرامة المرأة

يعني وحدة عمرها 8 او 9 سنوات وتكشف عورتها قدام حريم ... وين حكم الشرع في هالشي ؟

insana أختي الغاليه أنا ذكرت إني مستغربه من كلامها وحتى تقدرين تقولين اني مش مصدقه

أنا مش مع ظاهرة الختان بس إلي أبي أبينه لكم إني محتاره أنا سألت وحده من خالاتي المتزوجات مع اني كنت خجلانه بس من كثر ما الموضوع محيرني سألتها إذا كان الختان مأثر على علاقتها الزوجيه قال انها والحمدلله لاهي بارده جنسيا ولا إنها غير قادره على الإحساس بالمتعه

وأتمنى من البنات إنهم مايوقفون ضدي لأني قاعده أذكر الأشياء إلي أعرفها

الأخت RoOoOmy_M
فعلا كلامج عين الصواب ... هذه الظاهره سلبيه للغايه وخاصه على نفسيه الفتاه ... أتوقع ان الشئ صاير تقليدي .. يمكن عشان الأم صار لها ختان فهي تبي تطبق نفس القاعده على بناتها بدون ما تفكر ماذا سيحل عليهم .........

نفس ما الأخوات قالوا ، إذا كان الأساس من الختان هو المحافظه على الفتاه من الشهوه الزائده أو انها تغلط وتنحرف فهذا الشئ لا يعتمد على الختان أبدا وليس له صله بالموضوع بتاتا..... وين راحت التربية والأساس المتين من بدايه حياه الطفل/ة؟

هذا الشئ مؤلم للغايه لمجرد التفكير به، وبصراحه أي بنت قد قاموا الها بختانها اتمنى من كل قلبي ان لا تفعل هذا الشئ ببناتها. فمثل ما قالت الأخت رومي :

الختان = تصرف متخلف تمتهن فيه كرامة المرأة

عزيزتي السهر
محد واقف ضدج .. على العكس احنا قاعدين نفيد بعض بتجارب الآخرين ..بس للأسف التجارب كلها سلبيه ... أتمنى ان هالموضوع يوصل ويتفاعل معاه عدد أكبر لأن الموضوع هذا حساس وايد وأنا أرد و أقول : أنا ضد هذا الفعل وهذا التفكير وهذه العقليه !!!!

والله يعطيج العافيه :)

حبيبتي السهر

محد واقف ضدك نحن بس نتناقش في الموضوع و عادي انتي قولي وجهه نظرك مثل ما نحن نقول وجهه نظرنا...

Rooomy

كالعاده ...قلتي كل اللي في خاطري باسلوبج الحلو المقنع :) يسلم فمك يا عسل

مادري كيف يمكن لحد انه يكشف عوره بنته وهي في هالعمر......

insana

موضوعي منور بوجودج :)

حبيباتي

بوظح لكم كم نقطه

أولا المفروض إنه هالشي يصير قبل لا تكون البنت بعمر 4 أو 5 سنين وثانيا تكون القطعه صغيره جداااااااااااااااااااااااااااا وثالث شي هالشغله ماتألم تكون مثل شكة الإبره ولوما الحياء جان قلت لكم شي بيضحكم

خواتي الغاليات إلي أبيكم تعرفونه في طريقه صحيحه وسليمه وماتضر وفي طرقه العكس بالضبط


وأتمنى انه الكل يفهم وجهة نظري

الحمدلله انا مااشوف من الاشياء اللي ذكرتوها

من انه البنت عايشه في رعب وحاله نفسية او عقد نفسيه

وغيره وغيره

وطبعا ختان البنت يسوونه مب علشان فايده طبيه لانه ماله اي فايده بس لانه صار مثل التقاليد
اللي توارثوها الاهل

بس اللحين الحمدلله العلم والكتب موجود تفقه في اموور الدين
وعرفوا الاهل انه ماله داعي يسوون هالعملية لبناتهم

للمشاكل اللي تصير بسبب الالتهابات في المجاري البولية خاصة اذا كان القطع مشوه للجهاز التناسلي

هالشيء من اثار النوع الافريقي او الفرعوني الذي يختلف بتاتا عن المنتشر في الخليج

يعني ممكن نقول برود جنسي بسبب اتباعهم للختان الوحشي الفرعوني

اما الختان العادي اللي نعرفه غير مرتبط بالبرود

يعني لازم مانعمم ونقول انه اللي ماتختنت فهي لاتعاني من البرود <<<<<<<<<<<< لانه يوجد الكثير ممن يعانون بالرغم من عدم وجود ختان

والشهوة الجنسية لاتعتمد فقط على هالمكان فقط





وليس معنى انه قطع جزء صغير جدااا منه معناته قطع نصف الاحساس بالرغبه
وليس وجوده كاملا معناته انه الرغبه موجوده كامله

نووووسه شكرا على المرور..

بس حبيت اوضح نقطه....المنطقه التي تقص هي اكثر منطقه حساسه واثاره في جسم المرأه و تسمى البظر...يعني قصها منطقيا يقلل الرغبه و الشهوه عندها....و بعدين..اذا ماله فايده ليش يسوونه!!! يعرضون بنتهم لهال جريمه الوحشيه من غير اي فايده طبيه او دينيه!!!!! لمجرد العادات والتقاليد!!! لماذا؟؟؟ يعني فيه عادات و تقاليد من زمن الجاهليه....كيف نسمح بحدوتها و نحن في القرن الواحد و العشرين....اذا ما كان لها اي فايده...

و سواء كان القص لمنطقه صغيره او كبيره ...ليييييييييييييييش؟؟!!!

ما فيه اي فرق بينه و بين اللي تسمونه فرعوني....كلها اساليب وحشيه من ايام الجاهليه

يعني التطور صار في كل النواحي ....ليش وحشيه الجاهليه بعدها؟؟!

موضوع حلووو و النقاش فيه شيق بس للأسف ما عندي علم فيه و لا أفهم طريقته شلون علشان جذي اسمحوا لي !!!

يعطيكم العافية

منورة

نسيت نقطه

الاخت نوووسه قالت انه "يعني لازم مانعمم ونقول انه اللي ماتختنت فهي لاتعاني من البرود <<<<<<<<<<<< لانه يوجد الكثير ممن يعانون بالرغم من عدم وجود ختان"

انا معك...بس ليش نخلي مجال ان هالمسكينه يصيبها بروود؟؟؟ تخيلوا وحده بارده اصلا و بعد يختنونها!!! هالمسكينه شو مصيرها؟؟؟؟

شكرا منوره حبيبتي...

نورتي الموضوع بمرورك....:)

اتمنى انج تستفيدين منه

اي والله استفدت وايد بس ماقدر اناقش فيه

انا اهلي عندنا عيب نتحجى بهالسوالف
حتى الدورة الشهرية نستحي منها :o

منوره...حتى نحن نفس الشي بالبيت...بس الواحد لازم يتثقف....ويعرف اللي يالس يستوي حوالينه لانج باجر بتستوين زوجه وام.....والام لازم تكون مثقفه من كل النواحي عشان تعرف تربي عيالها صح :)

معاج حق والله علشان جذي قاعدة اقرا موضوعج :)