لأول مرة اشكي لكم!!.. تعالوا عزوني في ملجتي وبكون شاكره لكم

بصراحه أنا ما أدش الموقع وااايد بس موضوعج شدني حيل وحبيتج من طريقة أسلوبج

ووصلني بالضبط شنو تبين وفهمت من كلامج شني شخصيته

أنت وحده مثقفه و واعيه تبين واحد يعرف يكلمج ويحاورج وقبل هذا يحبج ويحس فيج وطريق قلبج أنه يملكه بكلامه وبأسلوبه ويجذبج بصفات الرجولة ويحتويج

أهو من كلامج فرق المستوى العلمي بينج وبينه سبب من الأسباب وهو بلأساس مو مشكله لكن المشكله فيه أهوه أنه ماتغلب على الدراسه بالثقافه وعارف شلون يتعامل مع البنت ويتقرب منها ويكون لبق وياها

وشوفي من كلامج فيه صفه حدها متعبه وتخرب بيوت وهي نقله للأحداث الي بينكم يعني الحين توكم وهو ينقل مواضيع تافه باجر لو تزوجتوا وصارت مشكلة كبيرة الله لا يقوله بيمشي ويقول

نصيحتي لج أول شيء إذا فعلا مثل ماوصلني من كلامج هذي عيوبه أو عيوبه ممكن مع الوقت تتعدل وقادره تعدلينها تعوذي من الشيطان وانسي أن اهلج غاصبينه وشوفي الشيء الزين فيه وتقبليه

إذا مثل ماقلت هذي عيوبه وحاسته أن راسه يابس وماله بهالسوالف ويعتبرها تافهه ومن الريايل الي يالله بتزوج وبس شلون الزواج والبنيه شتبي مايهمه تبي فلوس أخذي بس حنان واحتواء ماعنده أقولج حبيبتي صدقيني محد بيفدج حتى أهلج ... روحي لأمج وابوج قوليلهم أنا مابيه أهو فيه جذيه جذيه ومستحيل اتقألم معاه شنو انفصل الحين احسن من ما أرد باجر مطلقه والله لايقوله وياي ياهل

وعجبني فيج سالفة الماديات ماتهمج ... أنا مو مع الخوات الي يقولون اصري على بيت لايهمج هالسوالف إذا اقتنعتي فيه وبمميزاته إن شاء الله تسكنين بالسطح مايهم

شوفي حبيبتي صدقيني من كلامج واضح حيل شخصيتج واااااااااايد حساسه ( عندنا وعندج خير :) ) درسي الموضوع شحقه اكرهه وشنو عيوبه الي الواحد مايبلعها وانسي سالفة اهلج واهما غاصبينج وبجذيه بتعرفين الحل لأن صدقيني مهما نحجي عليج ومهما اهلج حجوا عليج هذا إحساس داخليج وقناعه فيج شنو تبين شريك حياتج تقدرين تقررين

وارد انصحج لاتغامرين على حسب مصلحتج صدقيني محد يفيدج ولا تسمعين حجي صبري وصبري .... الطريج بأوله معاج فكري بمنطق شوي وشوفي الصالح لج وأخذ القرار بقوة وأصري عليه وتحملي عواقبه

والله يوفقج حياتي والله حبيتج واااااااااايد بالتوفيق وسهليها محد بيفيدج غير نفسج باجر يصير فيج والله محد يدري عن هواء دارج واهتمي بدراستج عزيزتي

وسلام

سؤال

هل يحق لولي الأمر أن يجبر بنته أنها تتزوج غصبا عنها؟؟

ما أعتقد!!

شو الحكمة من هذا الشي؟

لازم أتكون في حكمة...

أتخيلوا أن في حد يجبركم تاكلون أكلة ما اطيجونها مع أنها لذيذة و حلوة... بس أنتوا من داخلكم ما اتحبون هالأكلة اللذيذة!!!

يعني لو هذي الأكلة معروف إنها لذيذة لازم الكل أيحبها!!!

مب من شوي المشاكل الأسرية و خراب البيوت...

ليش و الله هي ترضى بإنسان ما أتكن له أي مشاعر غير الضيج و إنها (مجبورة) عليه؟؟

مب حرام في حق هالريال؟؟

وحدة أعرفها ريلها قبل ما ياخذها كان مالج على وحدة من أهله.... و هو كان طاير فيها... لكن البنت كانت مجبورة عليه... مع إنه ملتزم و مصلي و لا يسمع أغاني و وظيفته حلوة.... البنت ما كانت تباه !! آخرتها انصدم و اكتشف إنها انجبرت عليه... اتضايج وايد... و طلقها في النهاية.... بعدين اتقدم لربيعتي إلي اتحبه وايد .... و عايشين مع بعض و بينهم حب متبادل...
و إلي كان ماخذنها عرست و مستانسة في حياتها

عزيزتي..... أنتي مب مجبورة تاخذينه..... عندج أخو .. كلميه و وصيه ايرمس إلي خاطبنج علشان ايخبره أن أهلج ضاغطين عليج و أنتي ما تبينه أو تعتبرينه مثل أخوج و ما اتشوفينه كزوج

يا حبنا للهم و يا حبنا لممارسة الضغط على أنفسنا..... صح عسى أن تكرهوا شيئا و هو خيرا لكم..... لكن .... لا يكلف الله نفسا إلا وسعها.... إذا الإسلام عطنا الحق في الأختيار.... و حفظ حقوقنا... ليش أحنا نضغط على عمارنا و انقول لا يمكن الريال يطلع زين في النهاية.... طيب في النهاية بيكوون في ظلم في حق الريال!!!!

ما جد سمعت أن وحدة أنجبرت على الزوج عاشت سعيدة! السوالف إلي اسمعها ... أن هالحريم ايخونون أزواجهم ... و اذا مب خيانة... أتكون أتعس ما خلق ربي

الله ايفرج همج يا عزيزتي و تنحل مشكلتج

اللهم صل على محمد و ال محمد
حبيبتي قبل مده سمعت عن قصة وحده اهلها غاصبينها الا تتزوج الريال اللي متقدم لها
و اهلها زهبوا للملكه و عزموا الناس و اخذوها للصالون و تعدلت و اتكشخت
و انتظروا حتى يجي الشيخ يعقد عليهم

عقب ما اجه الشيخ حتى ياخذ موافقة العروس
و سألها هل انتي موافقة؟؟
ردت عليه:







لا يا شيخ انا مو موافقه و اهلي غاصبيني عليه
و طبعا الشيخ بس سمع كلام العروس خله و قام يبي يطلع و اخوانها يسحبون فيه لا يا شيخ ما يصير لازم تعقدها و ما اعرف ايش لكن الشيخ ما قبل و لا عقد لهم
و البنت المسكينه حصلت طراقات من اخوانها و سب و شتم بس بالنهايه قدرت تاخذ القرار السليم في الوقت المناسب و قبل فوات الاوان و قبل ان تهدم حياتها مع شخص ما تريده

اسال الله ان يفرج عنج كربتج و يسهل عليج

اااااااااااااه ياقلبي والله ذكرتيني بمأسااااااتي

انا كنت اعاني من نفس مشكلتج بالضبط

والله وانا اقرا الموضوع قاعدة اصيح عورني قلبي عليج

لاني عايشة هالوضع

لكن انا تميت تقريبا 6 شهور مب سنتين

وانا نفسج حساسة
ووافقت عليه بدون ماتقبله بس لانهم مدحوه وكانو يصرووووووووون عليه مع اني رفضته من قبل لكن مع اصرار اهلي تقدم مرة ثانية ومن الضغط اللي كان حولي وافقت

واللللللللله كنت احس اني مغصوبه وماكنت احس بالفرحه لما اروح اجهز واشتري اغراض العرس

لكن سبحان الله قبل العرس ب 3 شهور تقريبا الله سخر لي ناس من اهلي وقلت لهم مشكلتي
وشجعوني اني اتكلم واوقف في وجه اهلي

والحمدلله قدرت اوقف التمثيلية اللي كانت صايرة
وقلت لهم ما ابيه

والله العظيم اني ارتحححححت يوم انفصلنا

بالرغم من ان اهلي كللللللهم عارضوني وقالو لي ان تفكيري غلط ومن هالكلام
لكني ادرى بحياتي منهم
وكنت عارفة اني ماراح اتقبله

وعلقوني شهرين تقريبا قالو لي يمكن تردين في كلامج

لكن تميت عند رايي لين مانفصلنا

والحمدلله انا مرتاحه نفسيا واايد الحين
وماحب حتى اتذكر ذيك الايام

اهم شي اني ماندمت من القرار اللي قررته

على فكرة انا قبل لا اقول حق اهلي استخرت ربي اكثر من مرة
والحمدلله الله سهل علي المهمة

لكن باقولج شي
عن تجربه

استحملي اللي بيجيج لو فكرتي تسوين نفسي

لان عقب مانفصلنا تغيرت معاملة اهلي لي 180 درجه

وبتصيرين حساسة على اقل كلمة يقولونها لج

انا وايد اشياء صارت لي لكن استحملتها لان هالقرار كان قراري ولازم اتحمل كل عواقبه
الصراحه انا انصحج تفكرين بحياتج

خاصة في امور الزواج فكري بنفسج لاتفكرين بحد غير
لان عقب محد بيفيدج

وانا مع اختي اشواق لا تنتهي في كلامها

ان شاء الله افدتج بردي
لاني عانيت من نفس مشكلتج وحبيت اني اساعدج

:)

الحمدلله على كل حال

وتاكدي حبيبتي اذا كان هالشخص هو نصيبج محد راح يقدر يفصلكم حتى انتي ماراح تقدرين
واذا الله مو كاتبه لج صدقيني ماراح تاخذينه حتى لو شصاااار

استخيري ربج
وان شاء الله تتسهل امورج

الله يعينك
عن نفسي ممكن اساير في امور
الا الامور المصيريه

طمنينا عليك اختي

بسم الله الرحمن الرحيم



الله يعينج ياحبيبتي الله يعينج يارب

اللي انتي فيه وايد شي يظايق ويتعب ويميلل!!


اذا كلمتي الولد نفسه.. هل تتوقعين انه بيرضى ياخذج وانتي ما تبينه؟؟؟


اذا شفتي ان الموضوع خلاص لا مفر منه..

ما لج الا الدعاء
وعسى ان تكرهو شيئا وهو خير لكم


وحاولي انج تستانين .. حاولي انج تنسين من اهو.. واستانسي بالثياب والذهب..

ما اعرف شاقول لج


ادعي الله وايد وايد


الله وياج ان شاء الله

مرحبااا اختي

الله يعينج فديتج على اللي انتي فيه

بس بقول لج شي .. كل واحد يتكيف قدر المستطاع مع مشكلته .. يعني كووني مرررنه

اول شي وشهي الاسباب اللي اتخليج انج ما اتطيقينه ؟؟؟

شنو الحلول حق هالاسباب .. ؟

انتي فضفضي حبيبتي و احنا انشالله بنساعدج كيف تتغلبين على هالاسباب .. و مافي شي مستحيل يعني .. ما تدرين يمكن هو صلاح لج ..

انتي استخيري يمكن تشوففين او اتحسين بشي زين ...

والله كريم يا رب

يا بنات شالسالفه وين الأخت business_girl صار لها فتره مختفيه إذا حد منكم يقدر يتواصل معاها يطمنا عليها

بسم الله الرحمن الرحيم
السلام عليكم ورحمة الله وبركاته

تعالي معي قليلاً أختي الغالية

ولنتذكر آيات بينات في كتاب الله

( قل لن يصيبنا إلا ماكتب الله لنا )

( وعسى أن تكرهوا شيئاً ويجعل الله فيه خيراً كثيرا )

( وعسى أن تكرهوا شيئا وهو خير لكم وعسى أن تحبوا شيئا وهو شر لكم والله يعلم وأنتم لا تعلمون )

ثم لبحر في كلام المصطفى

( واعلم أن الأمة لو اجتمعوا على أن ينفعوك لم ينفعوك إلا بشيء قد كتبه الله لك ولو اجتمعوا على أن يضروك لم يضروك إلا بشيء قد كتبه الله عليك رفعت الأقلام وجفت الصحف )

فيا غاليتي

توكلي على الحي الذي لا يموت صدق التوكل فإليه نب بشكوانا وحزننا

ولا ترمي بنفسي في ويلات التفكير المدمر لحياتك

بل عيشي كما قسم الله لكِ وحاولي إسعاد نفسكِ


استخيري الله وحاولي يا غاليتي أن تعودي إلى أسرتكِ اللتي لا غنى لكِ عنها فأنتِ الوحيدة التي تستطيعين أن تؤثري على مشاعرهم وابدأي بوالدكِ وحاولي أن تقفي على الاسباب التي دعتهم إلى فرض هذا الزواج عليكِ

وإذا لم تفلحي

حاولي البحث عن شخص مقرب من العائلة ومحبوب يستطيع أن يؤثر عليهم بكلامه ووضحي له وجهة نظركِ في الموضوع لعل الله أن يفرج كربتك وأن يكتب لكِ الخيرة من أمركِ


دعواتي الصادقة لكِ بسعادة الدارين

الدنيا والاخرة

تفضلوا بزيارتي هنا

http://www.3roos.com/forums/showthread.php?t=133071

أختكِ
المرتحله

السلام عليكم.........الاخت الحبيبه بزنس جيرل اطلب من المولى القدير انه يكتب لج الي فيه الخير والصالح انشالله
اتمنى انج تكونين اتخذتي قرار نهائي وتكونين مرتاحه انشالله بقرارج
عسى الله يوفقج يارب

وعسى ان تكرهو شي وهو خير لكم

الغاليه هونيها وتهون .. ماسمعتي باالمقوله اللي تقول ما محبه الا من بعد عداوه والله لا يجيب عداوه انشاء الله

خلي ايمانج بالله قوي واذا هذا نصيبج والله كاتبنه لج لازم ترضين باللي كتبه الله لج لانه هذا مقدر من الله من يوم ماخلقج ومثل ماقالو الخوات يمكن تكونين ظالم الريال ويمكن يكون انسان زين وطيب ..
الغاليه وكلي الله واحسبي اجرج عند الله والله ما بيخيب ظنج ..

وقلبي معاج

وينك حبيبتي

وكيف امتحانك وش صار عليك

ان شاء تكون وراء هالغيبة كل فرج وترجعين لينا وانتي مرتاحه

على مااظن تمت الملجه

شفت الموضوع في قسم الاعلانات والمناسبات

مشكوووورين خواتي ما قصرتوا وقفتكم معاي ما تنسى وهونتوا علي وايد وماقصرتوا في نصايحكم ودعواتكم

تأخرت عليكم بس حبيت أقولكم أني خلاص ملجت بموافقتي طبعا وادعوا لي الله يوفقني ويوفق الجميع ان شاءالله

والسموحه من اللي ما رديت عليهم خصوصي بس خلاص ما احب ارجع للماضي.. لأني قررت افتح صفحة جديده من حياتي..

:flower:

مبرووووووووووووووووك حبيبتي

والله يوفقنا واياك

يابنت الحلال.....اشعر انك ظالمة زوجك
تقولي انه ملتزم وبار بوالديه وفيه صفات حلوة.....لكن انتي تركتي كل مميزاته وكبرتي عيوبه في نظرك منها مثلا انه نفس طولك
او ان تفكيره اقل منك بسبب انك جامعية وهو ثانوي
وانت اكيييييييييد تعرفين انه كم من اناس لا يملكون شهادات عالية او حتي شهادات متوسطة وتفكيرهم وثقافتهم تعلو علي اصحاب الشهادات العليا
كمان نترك الشكل الجسماني جانبا لان العاقلات لا يخترن بالشكل يعني انتي كرهتي قلبك فيه بالعافية حتي لم تعطي نفسك فرصة تشوفيه بعيون حلوة

هل سالتي نفسك يوم..ماسبب معاملته الجافة معك؟؟؟؟؟ارجح لكي سببين
1)بسبب الظروف العائلية والمشاكل اللي بينكم فحتي الان تشعري انك في جبهة وهو في جبهة اخري مع عائلته وطبيعي كل واحد ينحاز لعائلته مع ان المفروض تكونوا جبهة واااااااااااااحدة وباقي العالم في جبهة اخري
2)بسبب معاملتك انت الجافة معه....هل مرة مثلتي عليه وتفوهتي بانك اشتقتي له او عبرتي له عن اهتمامك به في لبس او مرض او مستقبل همل او دراسة
صدقيني رد فعل طبيعي...والرجل رد فعل لمعاملة المراءة تعطيه حنية واهتمام وحب يعطيكي احلي
تعطيه نكد وتكشير وعدم اهتمام ولا مبالاه وكان وجوده زي عدمه راح يخليكي تكرهي حياتك

يابنت الحلال...افتحي قلبك له حاولي تتقبليه لا تعاقبيه علي ذنب اهله واهلك
صدقيني اسمعي كلامي.......غيري اسلوبك 180درجة عامليه كانك تعشقيه رسايل شوق واهتمام وكلميه اخبريه انه وحشك احكوا سوا ولو علي الهاتف حتي تتعرفي عليه اكثر عن قرب
لكن صدقيني غير كدة انتي بتظلمي نفسك قبل اي حد ثاني بتضيعي علي روحك احلي ايام عمرك
افرحي بزوجك وبترتيبات زواجك

وبالنسبة لاهله صدقيني دقيني صدقيني تقدري تغيري وجهة نظرهم للافضل تماما بحسن معاملتك وزوقك واهتمامك بهم في الصغيرة قبل الكبيرة خليهم يحبونك واتركي المعاملة الجافة الباردة
وحتي لو فرضنا انك لم تستطيعي لسوء بهم هم...خلااااااص كل شئ يوضع في ميزان حسناتك ولا شئ يروح في الارض
اتمني تكوني فهمتي كلامي
وتنفذيه
حاولي
حاولي
حاولي
لن تخسري...بالعكس هتكسبي كتييييييييييير وحياتك هتنقلب للافضل بامر الله

السلام عليكم ورحمة الله وبركاته

ألف مبرووووك أختي business_girl...

الله يوفقك يا رب...و فعلا تقدري تفتحي صفحة جديدة في حياتك...و تكون صفحة حلوة و مشرقة دوما...

إضغطي هنا لتهنئة الأخت business_girl