تجربتي الخاصة في علاج الهرمونات و التخلص من الشعر الزائد بإذن الله

الله يعينج يارب و يوفقج

اذا فعلا فيج لخبطه ( و يارب مافيج ) لا تحاتين أغلب المشاكل اللي عندج بتروح ان شاء الله مع العلاج حتى الحبوب بتشوفينها تختفي مع الوقت

ما وصيج حبيبتي قوليلنا عن آخر تطوراتج و خليج معانا على طووول

:)

لسلام عليكم

عزيزتي : أنا آسفه ادري إني طولت عليك حيــــــــــــل ... بس الظروف

وأنا جيت ألحين مثل ما وعدتك وقولك قصتي لعلك تستفيدين مني وأستفيد منك

:):):)

أنا لي سنتين تقريبا متزوجه وقبل زواجي كنت أعاني من الدوره بس عكسك لأني أنا تجيني لكن تطول معاي تظل معاي

أسبوعين ومرات 3 أسابيع ومرات أكثر وبغزااااااااره ( الله يكرمك ) ... تعبت كثيـــــــــــر

وقلت لازم أروح المستشفى ... رحت للمستشفى وطلع معاي تكيس في المبيض

وقالت لي الدكتوره أنتي أكيد معاك لخبطه في الهرمونات لكن حتى لو عندك أنا ماأقدر أسوي شئ

ولا أبدأ معاك علاج إلا إذا تزوجتي وأنا أكتفي حاليا بتنظيم دورتك فعطتني حبوب تنظيم لمدة 3 أشهر

وبعدين أقطعها لكن لمن أتركها بعد 3 شهور تلخبط معااااااي أكثر من أول وأروح لها وتعطيني لمدة 3 أشهر بعد

وتقولي إقطعيهم ويصير معاي مثل ما صار في المره الأولى ..... وكل ماتلخبط أروح عندها ووووو وهكذا

إلين تزوجت ...على ما أظن يعني إستحدمت هذا الكور لمدة 4 أو 5 .........

تزوجت وعملت لي تحليل للهرمونات وطلع معي إرتفاع في هرمون الحليب أعطتني علاج والحمدلله ... قالت لي الدكتوره

إن ممكن الهرمونات ترتفع وممكن تنزل وأنتي ماتدرين لأن لها دخل في النفسيه وكل ماكانت نفسيتك سيئه راح تتلخبط عندك

الهرمونات وهذا الشئ طبيعي في جسم أي مرأه !! المهم إني ماحملت وخفت إن هذا له سبب من أسباب لخبطة الهرمونات والتكيس

وبالفعل كان له سبب كبير لكن الدكتوره تقول لا تخافين لأن اللي مثل حالتك كثير وهذا لا يعتبر عقم !! بل إنشاءالله بتحملين

لكن راح تتأخرين شوي وأعطتني حبوب أستخدمها لأنها تقول إن التبويض عندك مره ضعيف !! ماأدري بصراحه هل هذا له

سبب في الهرمونات !

المهم إستخدمته أكثر من شهر أتوقع4 مرات ولكن توقفت عن العلاج لأني تعبت كثيرا وصابني خوف ..

لإن في وحده أعرفها أضرها كثير وعمل لها مشكله كبيره بالمبايض وطلقها زوجها !!

فأثر على نفسيتي ولي زمان تاركه العلاج أتوقع سنه واللي تعب نفسيتي أكثر إن بعض الدكاتر اللي راجعتهم قالوا لي

إن معاك تكيس في المبيض .. وبعضهم قالوا إن مش معاي تكيس

[color=#330099]الإستشارين = نفو التكيس × الأخصائين = أثبتو التكيس

وقالوا لي بعد إن من كثر ما أخذت وأكلت من الحبوب سبب لك تضخم في المبيضين !!!!!!!!

وهذي قصتي كلها وأنا متوقفه الآن عن العلاج تماما ... وأفكر أروح لمرأه تمرخ حاليا أما المستشفيات فتعبت وزوجي بعد

وإتفقت أنا مع زوجي إن إنشاءالله إذا خلصت دراسه السنه هذي على خير ولا حملت راح أبحث على العلاج بشكل جدي

وأما حاليا فأفكر إني أروح لمرأه تمرخ لأن كثير نصحوني بالتمريخ وقالوا إنه زين
معليش أدري طولت عليكم بس تحملوني والله أعتبركم مثل خواتي ..

الله يجزاكم خير

ويرزق كل محروم بالذريه الصالحه ويرزقني وإياكم يارب ويشفي جميــــــــــع مرضى المسلمين

:):):)[/color]

بسم الله الرحمن الرحيم
وعليكم السلام ورحمة الله وبركاته


الله يرزق كل محروم بالذريه الصالحه ويرزقني وإياكم يارب ويشفي جميــــــــــع مرضى المسلمين

اللهم آمين


حبيبتي fofo2 حياج الله معانا مرة ثانية نورتينا بوجودج يالغالية

ما تشوفين شر يارب و عسى ربي يعوض صبرج خير و تشوفين ذريتج و عيالهم و عيال عيالهم بعد

أول شي استغربت شلون الدكتورة تأجل علاجج لبعد الزواج ؟ للأمانة انا ما عندي خبرة واسعة بهالمجال لكن دكتورتي شجعتني اني أعالج الحين قبل الزواج على قولتها عشان لما أتزوج أكون مرتاحة و وضعي يكون طبيعي ان شاء الله

يالغالية تحكمي بنفسيتج ولا اتحاتين أي شي .. انا بكمل سنتين بعد جم شهر و يمكن انتي شايلة هم لأنج متزوجة بس صدقيني كل تأخيرة فيها خيرة و عسى ان تكرهوا شيئا و هو خير لكم .. صبري و ربي بيعوضج خير و بالعكس مدام توج عروس استمتعي بهالوقت و خلي أيامج كلها شهر عسل لحد ما ربي يكتبلج العيال .. شوفي النص المليان .. النص الحلو

من ناحية التمريخ مادري يالغاليه ما عندي علم فيه لكن اذا تبين نصيحتي .. راجعي دكتور ثـــقة و شــاطر و استمري معاه للأخير و لا تقطعين العلاج
أقولج شي تستغربين منه ؟ التكيس انا بعد مره يقولون عندي و مره يقولون لأ و بالأخير الدكتورة قالتلي ان التكيس هذا شي طبيعي يصير كل شهر قبل الدورة و هو بنفسه يطلع و يكبر و ينفجر و ينزل مع الدورة .. يعني لما يقولون عندج تكيس هذا شي طبيعي و لما يقولون مافي أيضا شي طبيعي لأنه يكون نازل مع دم الدورة

لكن أكيد لما يكون التكيس مرضــي ضروووري يحتاج علاج و تستمرين عليه مدة طويلة و متواصلة لأن الهرمونات سبحان الله صعب انها اتغير بيوم و ليلة .. يبيلها صبر

لا تحاتين و مدام زوجج معاج تطمني و حمدي رب العالمين و لا تشيلين هم .. و تبين أقولج خبر يفرحج ؟ أختي كان عندها لخبطة أكثر مني و ظلت سنين تعالج و بعدها اتركت كل شي لأن جسمها اخترب من الأدوية بلا فايدة و ظلت أكثر من سنة حتى الدورة ما اتييها .. تخيلي كل هذا و هي متزوجة !! سبحان الله فجأة احملت و تعدل جسمها و تعدلت هرموناتها و صارت وحده ثانيه و الدورة صارت طبيعية ما شاء الله

لا تفكرين حبيبتي .. توكلي على رب العالمين و تصدقي وايد بنية الشفاء و استغفري يالغالية .. بسم الله الرحمن الرحيم {اسْتَغْفِرُوا رَبَّكُمْ إِنَّهُ كَانَ غَفَّاراً * يُرْسِلِ السَّمَاءَ عَلَيْكُمْ مِدْرَاراً * وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَاراً}

و يااااارب المره اليايه اللي أشوفج فيها اتكونين حامل .. قولي آمين

:)

هلا حبيبتيmiss B (قريب من لقبي B2forever)بس عندي سؤال انتي متزوجه؟؟؟؟؟؟
لاني عندي نفس الحال قبل لا اتزوج كنت استخدم حبوب دايان لمدة 4 اشهر مع الليـــــــزر
بس بعد الزواج اهملت الليزر
اللحين الحاله صعبة كثير الشعر صار اثخن واقسى من قبل:(....... ولاصقزين زين في الجلد تعبت والله وما اعرف ايش اسوي
عطوني حبوب السكر الجلوكوفيج اخذه مع الفوليك اسيد ....... بس تعبت وبطلت اخذه
.. انا صار لي 2 سنه من تزوجت ولد الحين ما جبت بيبي
ربي يرزقني بالخلف الصالح وتقر عيني وعين ابوه ويفرح قلبنا ويرزق كل محرومه
ويشفيني ويشفي كل مريض .. آآآآآآآآآآآآآآآآآآآآآآآآآآآآآآآآآآآآآآآمين


ربي لا تذرني فردا وانت خير الوارثين
رب هب لي من لدنك ذرية طيبه انك سميع الدعاء



قولو لي ايش اسوي ................ ارجع لليزر ولا كيف ؟؟؟؟؟؟؟؟؟؟؟؟؟؟

مشكورة خيووو على الموضوع

لج تحياتي

B2forever

الله يشفيج يالغاليه و يرزقج الذرية الصالحة .. أسامينا حلوة صح ؟ :cool:

شوفي حبيبتي .. لما بدت فيني المشكلة فكرت بالليزر بس الدكتورة قالتلي الليزر ماراح يسويلج شي لأن أساس المشكلة من دااااخل و لازم نعالج الخلل بالأول و بعدين الليزر يكون حل نهائي و فعلا هذا اللي سويته الحمدلله

الليزر حل وقتي و بس تتركينه بيرجع الشعر لأن المشكلة ما انحلت .. لازم تعالجين بالأول

انا مو متزوجة و ظليت على دايان 10 شهور و كان المفروض أكثر لأن ماشاء الله مفعوله روعة بس حيل زاد وزني و الدكتور اقطعه لأن زيادة الوزن بحد ذاتها تأثر على الهرمونات .. الحين آخذ بس ألدكتون

لا تملين من العلاج ولا تقطعينه لأنه محتاج سنة على الأقل و هذا كلام الدكتورة .. خلي الحبوب روتين بحياتج لا تفكرين تقطعينها الا اذا ربي كتبلج الشفاء و طبعا اذا حملتي لازم تقطعينها .. اذا وقفتي العلاج شي طبيعي تنتكسين و بيتأخر شفاج .. صح ولا لأ ؟

راجعي الدكتور مره ثانيه و ان شاء الله هالمره ربي يرزقج الذرية الصالحة اللي تقرين عينج فيهم

خليج معانا يالغالية و بشرينا عن أخبارج

:)

أرجوحة الزمان

حياج الله حبيبتي

:)

يسهل عليج وان شاء الله كل امورج اتكوون اوكي

بس اختي حبيت اسئلج شغله مهمه بنت عمي تجيها دورة فقط يومين الى يومين ونص عندها وتكون خفيفه مع للعلم امها نفسها فماادري وراثه او يمكن تكون نفسج فيها شي لاسمح الله

وهل راح يؤثر فيها للحمل؟

عادي تكون دورة فقط يومين او حتي 3 ايام وخفيفه

السلام عليكم و رحمة الله و بركاته

أختي الغاليه عروس الدوحه

اعذريني حبيبتي ما عندي خبرة بهالمواضيع يا دوب مشكلتي اللي عرضتها عليكم
اذا عندها أي مشكلة تراجع الطبيب أحسن

ما تشوف شر يارب

:)

السلام عليكم

انا عمري 22 و نص و عندي حب شباب من سنين مو راضي يروح
مع انه مو وايد بس وايد مخرب على شكلي خصوصاً اني ما احط مكياج
الحمدلله الله هداني و رحت عند دكتورة وايد زينه مالت جلدية و سوتلي تحاليل طلع عندي هرمونات الذكورة و التبويض وايد مرتفعين
عاد اليوم انشالله انا رايحة المستشفى اسوي سونار لان يمكن فيني تكيسات المبايض
و هم بشوف دكتورة غدد صماء انشالله
عاد انا منصدمة من حالتي ما توقعت هاللخبطة
و خصوصاً ان يمكن احتمال كبير مافيني تبويض :sad:
الحمدلله على كل حال و انشالله اليوم يبين كلشي
و تقول الدكتورة احتمال كبيييييير فيني متلازمة تكيسات المبايض PCOS انا وايد ضاق خلقي بس الحمدلله على كل حال
مع اني مو متزوجة بس خايفة على مسألة الانجاب

اي و انا مافيني شعر زايد كلش بس هم هرمون الذكورة مرتفع وايد
قالتلي دكتورة الجلدية بتعطيني دوا مال ضغط الدم هم ينفع للهرمونات لان حبوب دايان ممكن يسببونلي جلطة لا قدر الله لان في من اهلي صايرة فيهم جلطات فا تقول ممنوع آخذه
مادري بصراحه شي وايد يديد علي و كلش مو متوقعة جان زين تطمنيني يا Miss.B

مشكورة وايدأختي

انا رديت من المستشفى طلع مو اليوم السونار
عطوني موعد 16-4 انشالله و دكتورة الغدد راح يدقون علي حق الموعد
عاد انا مستعيلة مافيني صبر بس يالله شسوي بعد هذا اللي الله كاتبة

:smile:

بسم الله الرحمن الرحيم
السلام عليكم ورحمة الله وبركاته

أحلى ملح

ما تشوفين شر يالغالية .. ليش خايفة ؟ ترى الموضوع مافيه شي ان شاء الله
بيعطونج حبوب تاخذينهم و بس

و ترى زين سويتي انج بديتي من الحين .. انا بعد كبرج و مو متزوجة و الحمدلله حيل مرتاحة من العلاج لأن مثل ما قلتي ما اتحاتين سالفة العيال .. الدكتورة قالتلي بعد الزواج راح انهد كل الحبوب و اذا كلش كلش بس تغير النوع بحيث انج تحملين بدون مشاكل

لخبطة الهرمونات مو كلها تأخر الحمل .. في ناس صح تأثر عليهم و في ناس لأ ما تسويلهم شي لأن الهرمونات مو نوع واحد .. كل وحده حالتها تختلف عن الثانية

تبين شي يونس ؟ ترى الحبوب اللي مضايقتج بإذن الله بتروح مع العلاج و صدقيني انا لي أمس امي تطل ابويهي تقولي شمسوية انتي هههههههه انا بكمل سنتين ان شاء الله على شهر 6

اذا دايان مو زين عليج لا تاخذينه .. في بدائل وايد و انتي شوفي الدكتورة شتقول و امشي على كلامها و لا تقطعين العلاج من نفسج بدون استشارتها لأنج اذا قطعتيه بتزيد اللخبطه و بتضطرين اتعيدين كل شي من الأول

خلي الحبوب يمج و اخذيهم بوقت معين عشان ما تنسينهم و بتعودين .. يمكن بالأول راح اتضايقين بس بعدين بيصير شي عادي و روتيني وماراح اتفكرين فيه أصلا

ها لي الحين خايفة ؟

واااي مشكووووورة بعد عمري
يزاج الله خير طمنتيني وايد ما قصرتي
انشالله دايماً بشارك بهل موضوع و اقولكم التطورات
:up:

السلام عليكم

Miss.B ما عليج امر بغيت اعرف دكاترة الهرمونات اهمه نفسهم ملوت الغدد الصماء؟
و تعرفين دكتورة زينه هناك؟ يعني عندها ضمير لان انا مريت اب تجارب مع الدكاترة الله لا يعيدها استغفر الله بعض الدكاترة ما عندهم ضمير و هذي صحتي و ما ابي اروح عند اي احد
و يطول الموعد حق الدكتورة؟ انا قالولي راح يدقونلي بس خايفه تطول السالفه
بلييز اذا ممكن تقولينلي لان انتي عندج خبرة بهالموضوع

:smile:

و عليكم السلام و رحمة الله و بركاته

هلا و الله بأحلى ملح

انا أعالج بمستشفى مبارك و ما شاء الله عليهم كلهم زينين
أول شي تروحين المستوصف تاخذين تحويل و بعدين تروحين على موعدج للمستشفى و خلاص تبدين التحاليل و المواعيد عادي و صح الغدد الصماء نفسها الهرمونات

علاجي تحت إشراف الاستشاري كمال الشومر بس مو دايما اهو اللي يشوفني .. معاه بنفس الغرفة دكاترة ثانين و كل ما اروح موعدي ألقى دكتور ثاني بس مو مشكلة كلهم ما شاء الله عليهم ممتازين و دكتورج الأساسي غالبا يكون موجود و علاجج أصلا ماراح يتغير .. الموعد بس عشان يشوفون تحاليلج و يطمنون على حالتج

المواعيد الله يسلمج كل 6 أشهر .. شكلج شهقتي
الهرمونات تغييرها بطيييئ و تاخذ وقت عشان جذي يبعدون بين المواعيد بحيث تسوين التحليل على آخر دورة قبل موعدج عشان بيوم المراجعة يشوفون آخر وضع وصلتيله و بعدها بـ6 شهور نفس الشي تسوين تحليلح قبل الموعد و يشوفونه لج

لا تستعلين علاجنا يبيله طولة بال .. كنت مثلج بالأول بس الحين تعودت خصوصا لما تشوفين التحسن بترتاحين وايد
أهم شي سمعي كلام الدكاترة .. خلج مطيعة و اذا قالج سوي رجيم سوي رجيم ههههههههه

:)

طمنينا عليج

شحالج ... شخبارج ؟؟ يا Miss.B

أنا قريت موضوعج قبل أكثرمن سنة ..رغم أنه في وقتها ما كان يخصني ..بس حبيت أعرض حالة صديقتي .. وانقطعت عن المنتدى لمدة سنة .. والحين رجعت (سبحان الله ) بعد مارجعت وأنا فيني نفس المشكلة ..من شهرين أو 3 لاحظت كمية الدورة قلّت بعد ما كانت 5 أيام صارت يومين فقط.. ولاحظت بدت تطلع لي لحية سميكة بعد ما كانت عادية خفيفة..سرت المستشفى سوولي تحليل الهرمونات ..وقالولي بعد تعالي (في ثاني يوم للدورة) مرة ثانية بنسويلج التحليل..

ولأني مستعيلة أبغي علاج (والدكاترة من تحليل الى تحليل) قلت بدور بروحي على العلاج أدري بتقولين غلطانة المهم دشيت في بعض المواقع اللي يتكلمون عن هالموضوع (لخبطة الدورة وزيادة الشعر) فوصلت أنه سببه ممكن من زيادة الهرمون الذكورة.. وعلاجها غالبا بيكون حبوب منع حمل ديان 35 (اللي انتي تاخذينه) .. فرحت طيران أشتري هالحبوب .. وقريت النشرة شفت مكتوب لازم آخذه من أول يوم للدورة ..والحين أتريا الدورة..

بغيت أسألج يا Miss.B ..أنتي يوم كنت توقفين الحبوب هذا بعد كم يوم تييج الدورة ؟؟
أخاف مافهمتي اللي مكتوب في النشرة وكنتي كل مرة تاخذينه من أول يوم للدورة وهذا غلط .. مكتوب أول مرة تبتدين تاخذين تبدأين تاخذين من أول يوم للدورة ..وبعد ماتخلصين 21 حبة .. تبدأين تاخذين أول حبة من العلبة اليديدة بعد سبعة أيام ..مثلا بعد ما خلصتي العلبة بعد 3 أيام يت الدورة ..لا تاخذين أول حبة من أول يوم لا .. في هاي الحالة لازم تبتدين تاخذين أول حبة من رابع يوم لأنج بتكملين 7 أيام من خلصتي العلبة السابقة..أتمنى فهمتيني.. لأنج يمكن كنتي تحبسين الدورة كل مرة ماكنتي تخلينها تنزل..

على فكرة أنا متزوجة وعندي عيال الحمدلله..بس وقفت فترة .. يمكن السبب في اللولب

السلام عليكم و رحمة الله و بركاته

هلا فيج حبيبتي ملكة النحل

ما تشوفين شر يالغالية بس شلون تشترين دوا و تاخذينه من نفسج ؟؟ لالالا ديري بالج لازم تحت إشراف طبيب لأن مو كل الحالات نفس الشي
التحاليل بروحها تاخذ كم يوم و الفحص و السونار و الأعراض لازم يشوفها الدكتور لان الحالات تختلف و الهرمونات تختلف و الأجسام بعد تختلف .. لا تستعملين دايان الا لما يشوفج الدكتور و مثل ما قالت أختنا أحلى ملح في حريم يسببلهم جلطة الله يكافينا

ولا تحاتين يالغاليه ما كنت آخذه غلط لانه أصلا بعد ما تتركينه الدورة ما اتييج الا بعد 7 أيام .. اذا ياتج خلال هالسبع أيام يعني فيه شي غلط ولازم تروحين للدكتورة
لما اتخلصين ال21 حبة و تخلص العلبة نطري أسبوع و سبحان لا تقدم ولا تأخر 7 أيام بالتمام و بتييج الدورة و يومها فتحي العلبة الثانيه

بس ما وصيج روحي للدكتور .. ترى كل جسم يختلف عن الثاني لا تستعيلين حبيبتي و صدقيني حتى لو بديتي اليوم ماراح تفرق معاج النتيجة لأن العلاج أساساً ياخذ فترة طويلة .. يعني أسبوع ولا شهر ماراح تفرق لأن بكل الحالات بتاخذينه سنة و طالع
كملي تحاليلج منتي خسرانة و بالعكس الدكتور يقولج كم تستمرين عليه و بيسئلج عن الحمل و بيعرف جسمج شنو محتاج بالضبط هذا غير الأعراض الجانبية و قابلية جسمج للأمراض
ما تدرين يمكن بالنهاية يعطيج دايان بس عالأقل تكونين متطمنه و تحت إشراف متخصص

مشكووووورة حبوبة عالموضوع وعلى عرضج لتجربتج

و أتمنى لو ألاقي دكتورة ممتازة جي

الصراحة كل يسون لي فحص دم ويقولون الهرمونات OK

عيل هالشعر كله من وين

تصدقين أحيانا من كثر الغيظ أقول مافي داعي احف شالفايدة اليوم أحف وبعد يومين يظهر الشعر

أحلى ملح .. تقولين كان عندج كيس ولا التكيس لأنه في فرق بين الأثنين..

أنا مثل ماقلتلكم باخذ ديان 35 عشان دورتي كانت ملخبطة شوية وزاد شعر جسمي ..

المهم ماقدرت أكمل العلبة من اللوعة وأكتئاب و..و.و..وأنا آخذهم كنت أحس بشوية ألم مكان المبيضين .. فقلت في نفسي يا أشفي أو العكس الصحيح..

فرحت المستشفى فسوولي السونار قالولي عندج تكيس في المبيضين ..:qaq:

صراحة استغربت وخفت لأني الحمدلله ما كنت أعاني من شئ قبل..كنت سليمة وعندي عيال ..

فقلتله أنا خذيت حبوب ديان هل السبب منه ؟؟.. قالولي لا .. أونه التكيس يجي مع العمر .. شورايكم؟؟.. رحت لعدة الدكاترة لعلاج التكيس كل وحدة تقولي شئ ..في منهم تقول بعملية المنظار ..ومنهم تقول يوم تحملين بيستوي كل شئ زين مثل قبل ..ومنهم تقول ماله علاج كل اللي يقولونج غير جذا كلها جذب ..!!!

فبسألكم ..هل هناك علاج للتكيس ؟؟

علما أنهم قالوا في كسل بسيط في الغدة الدرقية