تجمع امهات شهر مآيو لشهر شوآل^_^

حبيبتي انا اسويه لها وقت روقانها هههه يعني بين الساعه 3 ونص والساعه 5 كذا حسب متى اخر رضعه لها بحيث انها تكون جوعانه بس مو جوعانه لدرجة ماتطيق شي ههههه عاد انتي احسبيها احاول اخلي ساعتين ونص او 3 ساعات بين اخر رضعه والسيريلاك وبس الحمدلله الحمدلله ماجاها امساك مع ان هي اصلا من لما انولدت جاها امساك بس اصلا اصلا انا اسويلها السيريلاك بالحليب المخصص للامساك الي هي تشربه عرفتي! احط 30 مل ماي وملعقة حليب يطلعو تقريبا ملعتين سيريلاك وانتي شوفي قوام السيريلاك لو حسيتيه باقي جامد زيدي عليه مويه لو حسيتيه مايع زيدي شوية سيريلاك بالتقييم كذا بس طبعا اول اسبوع مستحيل تاكله نونتك كذا خخخخ بتخلي تقريبا نصه بس انتي ذوقيها عرفتي شوي شوي بتلاحظي اكلتها زادت انا للحين جوجو تقريبا تخلي الثلث ماتاكله كله بس عادي دامها هي الي تشبع وماتبي خلاص ماحب اغصبها زياده
طبعا انا لو عندي وقت كان اعطيتها كمان بالنهار! بس مابي اعذب عمتي وامي هههههه لان باقي جوجو تجنني شوي لما ااكلها بس مو زي اول اجلس ساعه ونص وتاكل كم ملعقه ههههه لما تتعود ع اكل السيريلاك بدون قلق بخليه مره الصبح ومره كذا بين العصر والمغرب وبقول للدكتوره كمان اذا صح او لا!
انتي مو ضروري الحليب قل لا ممكن هي تبي اشيا ثانيه زياده ولاتنسي تشربيها ماي حرام جوجو تعطش كثيير وصرت اعرف لما تبي تشرب ماي ولما تبي تشرب حليب ونصيحه نصحتني اياها حماتي بس مااخذتها ع محمل الجد الحين اشوفها صدق البيبي قبل ماينام رضعيه ماي لان طعم الحليب الي بفمه بيخليه يصحى كل شوي عشان يرضع حتى لو كان نص جوعان ولو قدرتي مثلا تخليها بعد ماتشبع الا شوي تعطيها ماي تكمل وتنام عليه يكون ممتاز كمان
العنب ماشاءالله ماسوالها شي؟ ياختي انا متخوفه اجرب اي شي مع جوجو الله يعينها علي خوافه بشكل انا ههههه

اليوم كان تطعيم كتكوتتي على عمرري كسرت خاطري صاحت من قلب ولما سألت الدكتورة عن الأكل قالت لي بآخر اسبوعين من الخامس يعني ع نهاية الاسبوع الجااي ابتدي معاها لان بيصير لها اسبوعين وعطتني كتيب للتغذية قلت بقراه وبكتب اللي استخلصته ... ولما سألتها عن البقعه الحمراا قالت لي اللي صووب الرقبة من تحت هاذي الحماره طبيعيه لان ضغط الراس وكله ينام عليه الطفل والشعر من جي ويروح بروحه واما اللي صاير لها ورا راسها حساسية ولازم كلشي قطن100% خصوصي المكان اللي تنام عليه وادهنها بزيت وكتبت لي مرهم كورتزون !! اقولها يضر البيبي تقولي مهوو لكم يوم !! فالبالتالي ماراح استعمله وبداوم على الزيت زيتون والسبوح لان الوالدة تقول اني كنتي مثل بنتي لما كنت صغنونه فاضطرت تقص لي شعري ...

الحلووة فعلاا شربة المااي مفيييده جدااا بس بنفس الوقت نسبة الماي بحليب الام كبييرة ونفس الوقت الحين علمت ميمي انه مو كل وقت بقعد لها واخليها تفتح عينها واحقرها شووي وترد تنييم نفسها بنفسها جي احسن للسرير ...

العنب انا توقعت انه يسبب لها امساك طلع بالعكس يعدل لها التبرز ماشاء الله !! ,, ميمي الحين كله تبغي على بطنها ! واليوم لما خلصت تطعيمها مصــــرة إلا تقلب على بطنها وكل ما تقلب يألمها وتصيح بعد فترة وارد اعدلها وتررد ترجع وتقلب !!! بس الاحظها الأول اول مابدأت تتقلب تقدر ترجع على ظهرها بس الحين ماتعرف ترجع عدل ....

شهوودة غايبة عنااا جم يووم مايندرى شخبارها وشخبار الكتاكيييت .؟؟ !

الله يحميها جوجو تطعيمها بكره الله يعين والحمار الي تحت رقبتها زاد احسه! مدري انا خفت يكون تسلخ او شي حطيت لها من كريم التسلخات
والبقعه الحمرا الي براسها هذي اكيد اكزيما لازم تحطيلها مرهم الكورتيزون عشان تروح وبعدها تبدي بالقطنيات وهالشي نبهت عليه انا من قبل مانولد لان هالشي صار مع ولد اختي بس ورا اذونه والحمدلله الحين ماعليه الا العافيه وان شاءالله تصير احسن ريمي,اليوم لاحظت جوجو تحك اذنها اخاف تكون ملتهبه الله يستر بس
انا اليوم وصلني خبر عفسني عفاس ولد خالي عمره سنتين امس غرق وحالة خالي حاله طبعا هو وزوجته وانا احس خلاص ضايق صدري كل ماشوف جوجو افكر فيه استغفرالله واتوب اليه انا لله وانا اليه راجعون الله يصبر امه وابوه يااارب ويصبرنا

الله يساعدك على التطعيم !! كل مايكبرون أحس تزيد المعاناه بهالسالفه ,,, انزين برايك احطه لها ؟؟ يعني بصراحة احس انه مفترض جسمها مايجي صوبه هالسوالف !! وبعدين انا استعملت لها يازعم شامبو خاص لهالسوالف وزاد عليها يعني قامت تتحسس منه والادهى ان بنتي حروووره معناه لازم ما اطلع فيها مكان لان كل ما احترت كل ما البقعه تصير حمره ,, انا قلت ببقى معاها اسبوعين اذا ماخف عليها بالنظام اللي انا ماشية عليه من جم يوم وبزيد عدد سبوحها وان شاء الله بخلي لها ملابس لهالسبوعين من القطن وبشوف امرها ...

يمكن تحكـ اذنها من التراكي ؟؟ انا ميمي تحك الاول على بالي انه في شي يحكها بس طلع انها طبيعتها جيي حزة النومة او حزة الجوع يعني تحب تحرك اياديها جذي بالضبط مثلي ومثل ابووها ,, انتي شوفي اذا تحك وتحاول تدخل اصابعها وتصيييح وماتهدأ دايما منزعجة معناه عندها مشكلة ...

عن ولد خالك ,, على عمرري عورتي قللبي عليه والله ماتخيل وضعهم على عمرري الظناا غالي غالي واشووف هالحالة زاايده عندنا وعندكم يعني توه بس من جم يووم زوجي يقولي ولد فلانه عمره 4 سنوات ماشافواه الا طافي على سطح البحر ! وبنفس اليوم لقوا طفل ثاني راح يلعب بالبحر ودوروه الا هو غرقان لاحول ولاقوة الا بالله ,, ربي يرحمه ويخليه طير من طيور الجنة ان شاء الله ويصبر أهله يااارب ...

التفاحه احلى حلوه شلونكم شخباركم للاسف بدا دوامي :'(والاحد مدارس عيالي يعني وداعا لراحه وبتقل دخلاتي عالمنتدى

تسلم عليكم هنوده ملاحظه عليها هاليومين نظرتها متغيره احسها بدت تفهم اللي يصير حولها وتميز وفعيونها كلام اسمالله عليها

شهوودة ,, ربي يساعدكم !! الحين حسيت فيكم انتي واختي !! عندكم اكثر من واحد وفوقها ياروضه يا مدارس والله ربي يعيينكم ويعطيكم العافية و الثوااب ياررب ,,, ماعليه حبيبتي اهم شي بين فترة وفترة تطمنينه عليش وعلى الكتاكيت ربي يحفظهم ويخليهم ويبعد عنهم كل عين يارب ,,, وعن هنووودة العسل ماشاء الله تبارك الله وصلوات على محمد و ملح بكل عين حسودة >> المرة متعقدة من العين خخخخخ ... ربي يخليها وسبحانه الخالق يعني كبروا كتاكيتنا وهم بين احضانه ولا حسينه يعني انا كله احس انه ميمي للحين صغنونه بس كل يوم تفاجأني بحركة والأمس موتتني ضحكـ لما دخلنه ع الدكتورة للفحص قامت تتفل عليها بقووة كأن واحد كبير ومتعمد هههههههه والدكتورة تقول بآآ ايه ده ؟؟ اقولها تحاول تتكلم وللأسف دكتورة اطفال شكبرها تزعل وتبرطم من طفل بهالعمر وهي تعرف ان الحركة طبيعيه !!! والأخت اللي عندي كل ماتجي صوبها الدكتورة تزود الجرعه ولما حملتها انا وقفت عن الحركة ولما ردت جات الدكتورة تبغي تفحص عينها ماشووف الا وحده ترافس وتتفل ههههههههه لا اراديا ضحكت وذيك عيونها طلعت براا من الحركة ,, فعلا بنتي ارشحها لأفلام بومبي بقوووة ع ابووها هالإجرام خخخخخخ ...

شهوده
الله يعينك يارب واكيد الحين خلاص بدو يفهمون احس طمنينا عنك لاتنسينا هههه
تفاحه
اي والله الله يصبر اهاليهم يارب امس كل ماشوف جوجو احس فيني الصيحه خليها ع ربك
اما جوجو مفاجئتها الكبيره لنا قالت ماما وبابا!!!! لا والمفاجئه الاكبر ان قالتها قبل لكل الناس قبل لاتقولها قدامنا خخخ امس طلعت من الدوام رحت لبيت امي وريحت العصر الا اختي تصحيني تقولي قالت ماما قلت لها كذااابه تقول والله واليوم ابوها شايله قالت ماما وبابا الا يوم جيت بقول لعمتي تقول اييي الصبح كلااا وهي معاي تقول ماما وبابا خخخخ واحنا اخر من يعلم واليوم عدا التطعيم مبدئيا على خير بس اشوفهم شطبو واااجد تطعيمات حشى كم شي في بهالابره خخخخ ابره طبعا بكل فخذ واعطوها تطعيمتين بالفم وحده روتا والثانيه مدري وش! بس دكتورتها ماكانت موجوده والدكتور ماااعجبني وكمان قال البقعه الحمرا اكزيما بس قالي ماراح اوصفلها المرهم الي فيه كورتيزون بدري عليها هنا تذكرتك خخخخ بس تخيلي طعمها وطلع!!!! ماامداني اسئله ولا اسوي اي شي مطيور قلت برجع بعدين بوديها لدكتورتي واسئلها عالاكل

الحلووة ,,, حمستيييني ههههههه عقبال ميمي اشوفها كله تتفل وكله على هالبوبو او اماه اذا بغتني وابوها كل ماتتفل يقولها عيب خخخخخ اقوله قاعد تحاول تحجي!! وانتي جوجو ماشاء الله تبارك الله شببيها يا اختي!! والله تعقدت من سالفه العين لان فيه ناس ماتصلي على النبي وخصوصي عاد اذا شافوا البيبي صغنون بس نشيط وذكي ....

بالنسبة للتطعيم اللي بالفم هذا البوليو اللي عبارة عن شلل الاطفال وهو مستحدث في التطعيمات و باقي التطعيمات كلها يدمجونها في ابره وحده اللهم النيموكوكال لازم بروحها بابرة ... سالفة هالاكزيما بس !! ,, انا قلت ماني مستخدمه شي لميمي لان عرفت شنو السر بالموضوع وهوو اولا حــــــــر وثانيا النومة على المنطقه خصوصي بهالعمر يعني ليمن شوي تكبر بتروح وحتى لو حطيت الكريم مافي فايدة لانها بتنسدح على راسها وبيروح ! وثالثا وراثه يعني انا كنت جذي وراح بعدين لما قمت اتقعد فأفضل حل هو زيت الزيتون لانه شوي يبقى بجلده الراس وطبيعي للترطيب ,, انتي قولي دكتورك صاحي فيه عقل شوي ماكتب لها كورتزون انا الافندية كتبت لي كريم بتاع الكبار يعني الجرعه مضاعفه موصاحية حشى ....

ليش احس ان اذا دكتور رجال يصير ماله مزاج للأسئلة عاد خصوصي اذا جاته أم مع ولدها ! ههههههههه كلمتين ويقول مع السلامة >>> مجربة خخخخ ..

بالنسبة للكتيب اللي عطوني اياه مكتوب ان لازم تكمل على الرضاعه الطبيعيه للشهر السادس عشان تكون معده الطفل مهيأه ولكن نقدر نعطيه بالخامس اي نهايات الرابع اذا كانت الام تحس ان رضيعها دائم الجووع يعني الحليب ماقاعد يشبعه تمام ....

بالبداية تقدم :: الرز , شوفان , خضار ( بطاطس, كوسا, قرع ) , فواكه ( موز, تفاح, عصير برتقال ) كل هذه تقدم على هيئة حساء او شوربة غليظة مهروسة جيدا في الخلاط بحيث يتم تقديم نوع واحد من الطعام والانتظار ليومين او ثلاثة للتأكد من عدم حساسية الطفل لها ,,, واما الفواكه فتقدم مهروسة بالملعقه او على هيئة عصير يقدم بالكوب ( حتى يتعلم الشرب من الكاس ) ...

عدد الوجبات باليوم :: وجبتان رئيسيتان تقدم بعد الرضاعه ( ظهر ومسا ) بمقدار 2-3 ملاعق بكل وجبة ...

هاذي الوجبات مخصصه لعمر 5-7 شهور وبعدها يتغير الجدول ...

تفاحه
فعلا انا قريت ان الطفل لما يرضع طبيعي الافضل بعد الشهر السادس تبدين له اكل! الله يعينك ويقويكي ياختي! وفعلا الدكاتره الذكوور ههههههه مالهم خلق اسئله!
بس الدكتور الاستشاري الي خذتها لعنده لما كنت مفكرتها مزكمه كتبلها على مرهم جيبيه وادهنيه لها وبتدعيلي والله العظيم دهنته لها امس بس بعد ماغسلتلها وقبل النوم ماشاءالله اليومفوق 70 بالميه راح! والحمار تماما اختفى وقريت عليه كله زيوت طبيعيه اسمه bepanthene انا طبعا حطيته كذا قلت ترطيب! من مخي خخخخ وفعلا فادها ماشاءالله جربي وان شاءالله مابتندمي
عالوجبات اوكي حلو يعني زين انا اعطيها 3 ملاعق هههه بس للحين وجبه وحده بس احسها بدت تكره الرضاعه*_* وانا خايفه من هالشي مدري ازيد لها الوجبات اخليهم مرتين باليوم صبح ومسا زي مايقولون ! انا قلت بنتظر لل6
الا تعالي بسئلك سؤال عبيط شوي هههههه الحين الحليب الي استخدمه مكتوب عليه من 0-6 تتوقعي لما تتم ال6 شهور اغيره ولا لما تدخل ال6؟! مسئله محيرتني الصراحه ههههههه

اي والله ربي يعييين بس الحين قعدتها بالليل قلــت ماشاء الله بس المشكلة يختي صارت فيني !! يتحجر الصدر عندي يالله خذ هههههه ماقول الا الله يعطيهم العافية امهاتنا قبل عانوا مناا ,, انا مقررة ان شاء الله على نهاية الاسبوع الجاي بتكون دخلت بالاسبوع الثالث بس حاليا اعطيها عصاير متنوعه يعني آخذ الفاكهه واعصرها بفمها لان ماشاء الله عليها لما نقعد على سفرتنا تبغي تهبش الأكل من ايدي او تطالع اللقمة بيد ابوها وامس ببيت أهلي ماتم أحد ماقالي عطيها لو شووي لانها تهبش اللقمه من اليد اللي صوبها ههههههه ...

عن الدووا ان شاء الله باخذه وبجربه والحين الاحظ ان البقعه لما احط عليها زيت زيتوون تصيررر بيضه يعني ترجع طبيعيه اللهم اذا طلعت فيها و تحتر ,, وبشووف اللي قلتي عنه ....

عن الحليب لما تتم الست شهور يعني نهاية الشهر السادس وبعدها تبتدين معاها الحليب الجديد ...

والله شوفي مالك الا انك تنامي بعدها بمده وتشفطي الحليب! اوه صح هي ماترضع بالرضاعه ههههه ازمه بنتك الله يحميها!
يختي انا اخاف ااكلها اي شي وغالبا ماتكون جالسه معنا عالوجبه الا بالويك اند غدا انا وابوها نتغدا بالدوام وباليل تنام قبل عشانا ههههههه شفتي كيف الحياه؟! مرات افكر اقول مدري كيف احساس الاطفال الي امهاتهم يشتغلو بما ان ماماتي كانت ربة بيت فقط احس شي غريب واحاتيها مرات بس احاول طول ماهي صاحيه العب معها اناغيها وحتى ابوها يرجع من الدوام طوالي عليها يادوب يلحق كم ساعه يلاعبها وتنام الله يحفظها! وصارت كل يوووم موعد للقومه! مره الساعه 11 مره 3 ماصرت اعرفلها صراحه وكله كووم ولما تستقعد لي وتصحى كل ساعتين او 3 هنا انا انهار هههههه الله يعين بس

مرحبااااا
دعواتكم حبيباتي
تعبت نزيف صار له اكثر من اسبوع مجهول السبب
تحاليل وفحوصات ومافيه سبب

جوفان
حبيبتي ماتشوفين شر يمكن لخبطة ادويه خذيلك بريك 6 شهور يرتاح جسمك من الادويه والخرابيط والتحاليل وترتاح نفسيتك كمان
طولي بالك (إِنَّ مَعَ الْعُسْرِ يُسْراً)

الحلووة ,, والله ربي يعييينك صدق احساس مو حلوو بس ساعات الواحد مجبوور وخصوصي بهالزمن يعني هالشي اول وأخير عشانها يعني انا اصبر نفسي بهالكلام بس جاات خيرة من رب العالمين سالفه هالرضاعه لاني اكتشفت اني ماقدر ابعد عنها بشكل مو طبيعي هههههه صرت انا الجاهله مو اهي !! ,,, انا تصدقيين مجننتني على سالفه القلاب هاذي وين ما اخليها تبغي تقلب حتى لو بحضني ولا تعالي خليني اقلب والعبي ويايي غير هالسالفه ماعندها !! اذا عصبت عليها تتفل يالله خذ هههههههه ...

سالفه نومة جوجوو حاليا هذا معناه انها قاعده تعدل بنومتها شوي شوي عشان تضبط ع نهاية هالشهر وتكون نومتها وحده ليما الصبح ...

تعالي صدق الا كنت بسألك تطمنتي على وزن جوجو ؟؟ لان كنتي تحاتين هالسالفه موو ؟؟ انا ميمي ماشاء الله صار وزنها حلووو بس كان خاطري تصير مربربه لانه احب البيبيات وهم جي .. يالله الحمدلله اهم شي الصحة ...

جووووووووفان ,,, سلامااااااااااات ياقلبي ان شاء الله مافي الا كل خيررر ومثل ماقالت الحلووة يمكن من لخبطة الادوية اولااا ومن الحالة النفسية ثانياا بس اهم شي ان مالقوا اي مشكلة بالرحم ...

لااا نهائي مااخذ اي ادويه اصلاً
هو في شهر رجب اخذت كلوميد وابره تفجيريه وبعدها مااخذت شي

جوفان
خلاص اجل ان شاءالله خير هذا كله تنظيف تنظيف يتنظف الرحم وتحملين ان شاءالله^_^
تفاحه
هي وزنها رقميا اوكي بس شكليا مدري وين رايح هههههه لان انا للحين مو مستوعبه انها تلبس من 0-3 تخيلي والله كل يوم اقول بيضيقون ولايضيقون عليها سلامات قاهرتني هالبنت بس خليها براحتها
طبعا بنتي والحلق قصصصصصصصصصه للحين ضيعت حلق ذهب وضيعت تسكيرة حلقها الالماس صرت ماالبسها اياه واليوم البسها انا حلق فيه كوره فوشيه كذا كبيره شوي بارزه تخيلي اليوم اشيلها من سريره الا الحلقه كان احد كاسرها وحاطها عالسرير تخيلي الكوره مفصوله عن العود وهو ذهب وملحوم عدل!!! رحت وشريت لها طال عمرها حلق ثاني نتتتفه هالمره قلب صغيرون ذهب بشوف وش بتسوي فيه بعد هالمره
الله يحفظها تذكرتك امس عمتي تهاوشني انا وزوجي وحمواتي تقولهم محد يحط صورتها في ناس واجد ماشافوها تجيها عين وكل يوم تشببها تقولي شوفي شوفي العين وانا والله كل يوم احصنها بس شسوي حمواتي وفرحانين فيها وزوجي نفس الشي! مقدر امنعهم وكلت امري لله الله يحفظها ويحميها مابيدي غير كذا

جووفان ,, حبيبتي دام ماشافوا ا مشكلة بالرحم فالحمدلله هذا اهم شي , فيمكن يعني ان بويضتين نازليين ساعات يصير جذي او انه عشان الدورة تتعدل من نفسها وربي يكتب لك الحمل هالشهر ياااااااااارب وياسلام عااد الفرحة فرحتين فرحة حمالك وفرحة شهر الحج ....

الحلووة ,, تحملي من سالفة الحلق لان دام انها بدت تفهم والدليل انها تشيلهم وانتي ماتدرين معناه في امكانيه تسحبهم لفمها وخصوصي بهالعمر كلشي يحبون يتعبثون فيه ,, انا كنت بسوي لها تراكي وبلبسها الذهب بس شفتها حركية شووي وصايرة تفهم فقلت بأجل الشي ليمن شوي تكبر ع اساس اولا محد يحط باله عليها وثانيا تكون انشغلت بشي ثاني واختي ماا حطت لبنتها ذهب الا بعد ال6 اشهر ع اساس يبقون عليها وماتتعبث فيهم ...

هااا شفتي يعني اشوة مو بس انا اخاف من العين ههههههه ,, انا و زوجي مانحب احد ياخذ صورها خصوصي عاد ان اللي عندنا ياخذونها وينقلونها من واحد لواحد !! الله يحميهم ان شاء الله ويكبرووون ونشووفهم عراايس .....

شهوودة ماطلت علينه ان شاء الله امورها بخير يااااااارب

رحت اليوم المستشفى وعرفت شنو فيني
:(

شفيش جوفاان ؟؟ عسااه خير ان شاء الله ؟؟؟ خبررينه

دوفان
لاتطيحين قلوبنا تطمنينا عليك عسى خير!!
تفاحه
المشكله الحلق ينلف ويتقفل عدللللللل الله يصلحها بس هههههه
والصور فعلا الحين احس كل العالم حفظوها خخخ