تجمع امهات شهر مآيو لشهر شوآل^_^

اهلييين ام ميمي
لا جديد عندي
دعواتج عندي موعد بكره بسوي تحاليل وتشيك بشكل عام

هلا ام جوجو
احلى دعوووه والله
الله يسمع منج والسنه الجايه اعيد وضناي في حظني

تفاحه
انا بنتي الحمدلله تحب تسبح وااجد امي عودتها من يوم كنت بالاربعين تسبحها كل يوم هههههه صراحه ماقصرت امي حببتها بالسبوح والماي وسوتلها نظام الصبح ترويشه وقبل النوم تغسيل جسم وتنظيف وللحين ماشيه عليه,اما عن وهي جالسه للحين خايفه اشيل الشبك ذاك الي بمغطس الاطفال بس اتوقع هالويك اند بجرب اروشها فيه بدونه
على ريمي ان شاءالله يارب مايتعبها التطعيم ولايجيها اسهال ويمر بيسر وسهوله يارب عليها وع جوجو
انا بنتي راسها بدا يقشر,بس لاحظت شي على صدرها تحت الرقبه بشوي في بقعه حمرا بس كانها متحسسه من شي او شي هذي لاخظتها من اسبوع ورجعت شفتها محمره امس! انا كنت احسب نفسي شمختها بالغلط او شي بس حسيت انو لا حساسيه الظاهر او شي بس بتذكر اقول للدكتوره الخميس ان شاءالله! ياكثر الاشيا الي ابي اسئل عنها واخرتها انسى ولا اقول شي هههههههه
وهالخطوبه ادري الحين بتسوين زيي تجلسين تفكرين وتحاتين واخر شي مابتروحي كلش خخخخ بس حاولي تروحي عالاقل تغيري جو وتحسي نفسيتك صارت غير لو ساعتين
انا الزواج الي حضرته كان لي 10 ايام طالعه من الاربعين وجلست اتلكك فعلا مابي اروح بس عمتي لزمت علي مرره لان ماعمري حضرت لهم زواج خخخخ حتى لما تاخرت الكوافيره انبسطت قلت يارب ماتجي عشان مااروح ههههههه

جووفان ,, ربي عطى اختي بعد انتظار يعطييييك ويفرحك ياااااااااااارب ومايدور عليك الحول الاا انتي تنتظري قدووم البيبي وتفرحييينه بالاضحى بخبر حملك ياااااااااارب ...

الحللوة ,,, ايي جربي معاها انا ميمي ماخذيت لها ابو شبك لا اخذت العادي بس فيه تشكيلات تحب تمسكهم فخليتها قاعده وهي تضارب برجولها ويدها على بالها ينمسكون وبعدها اخليها على ظهرها وامسك بس رقبتها وراسها واخليها تطفوو والله تستانس بهالسالفه ومنها تسوي لها تمارين .... عن الحمارة اتوقع حساسية وساعات تطلع اذا معرقة يعني اذا زاد الحر والرطوبة >>> مثل ميمي دب قطبي خخخخخخ ..

والله العرس ياختي شكلي مابروح الا حفلة الملجة وخلص والسبب اني كل يوم والثاني اخلي بنتي عند ابوها ويازعم اروح اسوي شغله علشان يازعم اتعود واشووف رده فعلها طلعت السالفه موو هي اللي يبغي لها تعوويد لاا إلااا أمهاا !!!! انا من اطلع من البيت ليمن ارجع الله وكيلك اسوق السيارة بدون تركيز و لما اروح السوق مادري شنو ابغي وشنو اشتري !يعني مخي شغال عليها والسبب الرضاعه الله يهديها بس ... فيعني ماعتقد فيه تغيير جوو وانا احاتي على اعصابي ,, ان شاء الله بعد جم اسبوع لما تبتدي تاكل هني اخلي لها وجبة قبل النووم وبجذي اقدر اروح واجي واصير شوي ريلااكس ..

الحلووة ,, شنوو بتبتدين اوول مع جوجو من اكل وشنو بتعطينه بالتدريج بعدين ؟ يعني الجدوزل بتاع جوجو كيف؟؟ انا اختي تقولي ابعدي عن النشويات الدسمة مثل البطاطس بالبداية ...

شهوودة لها وحشة ماشوف لها طله ...

مساكم وصباحكم ورد وياسمين شخباركم لكم وحشه فديت اللي سالت عني انا هنيه توني واصله بما ان الحلوه زارتنا بديرتنا قلت لازم ارد لها الزياره مايصير خطفت ريلي انا وعائلتي الكريمه وزرنا الخبر وبما ان الخبر قريبه من البحرين قللت مايصير بعد مازور ديرة التفاحة علشان ماتزعل وخذنا يومين حلويين استانسنا فيهم بس عندي سوال يقرقع فقلبي شسالفه الشباب والهبه الجديده اللي هابين فيها شسالفه الكشه مالت الستينات اللي انقرضت اشوفها راده بقوه ونفس شي في البحرين واااااي على سيتي سنتر البحرين احس مابرد قلبي من الشوبنغ

ههههههه شهوودة الدار داركم حبيبتي وانا اشوووف امس اقول لزوجي غريبة الرطوبة قليلة أمس طلعتي انتي والكتاكييييت مشرفييينه ,,, بس زين غيرتي جووو واستانستووا ربي يأنسكم دنيا وآخرررره ان شاء الله وعودييها حبيبتي .... انا بعد مستغربة من سالفة الكشوش !! والأحلى منها ان بعد الكشة يحطوون شباصه فوقها ههههههههه يذكروني بشعبية الكرتون ... الستي سنتر حلووو انا احب محل بي اج اس الاشيا اللي عنده وخصوصي البنطلونات بانواعها رووعه و يضبطون الخط الرفيع فيه فيكون باللبس عجييب ...

شهوودة ,, شخبار هنوووده العسل ؟؟ و شنو التطورات عندش ؟

شهد
ياهلا والله فيكي نورت ياقلبي وعالكشه هههههههههه شتسوين احنا شعورنا ناعمه ونحتر اجل هذول شلون احس خياااس هههههههههههه الله يهديهم وفعلا السيتي سنتر اكثر من روعه عشان كذا لما بغيت اشتري لجوجو للعيد رحت له تلقين كللللللللللل شي فديت البحرين واهلها والله^_^ ولا يهونون اهل قطر
تفاحه
والله مااعرف قلت بشوف الدكتوره وش تقترح! انا بنتي اصلا من النوع الي يجيها امساك من يوم ماانولدت عشان كذا ماتوقع بسويلها بطاطس الا ااخر شي ومو بروحها!
امي تقول السيريلاك يكون الصبح لان جوجو ترضع اخر شي 4 الفجر مثلا وتقوم 6 شبعانه نوم وماتبي ترضع تتم لين 8 او 9 الا كذا!وتكون رايقه اتوقع هذا بخليه وقت السيريلاك وتقول بعدها بكذا 4 او 5 ساعات وجبة خضار خفيفه! بس الحين احترت متى ادخلها التفاح المسلوق! ومتى اشربها عصيرات يووه مخي فيه الف فكره وفكره! بس نبهتني امي اني مااكلها شي ثقيل باليل زي السيريلاك لانها مثلنا مايصير تثقل باليل ولا مابترتاح بنومتها ونشوف
انتي وش حاطه ببالك؟! واهم شي وجبة ماقبل النوم ههههههه

يوووه انا حاطه ببالي اعطيها سيريلاك عشان يثقل راسها بالليل وتناااام ليمن الصبح ! بس بعد مثل ماقلتي الوالدة واختي نبهوني اليوم من هالشي !! بصراحة ابغي ارتاح بنوومتي احس نفسي مررررهقه من قلب هي صدق مسكينه تناام لها فترررة حلووة بس بالي كله معاها يعني نص نص نايمة عشان اكون واعيه لها ولو اخلي نفسي اناام عمميق ماراح اقعد اولا ومابحس لها مسكينه أخخخخخخ بس على النووم قبل اشتااقه شوووق ,, هذا بعد لو اداوم شيصير ؟!! شغل بيت وشغل ميمي و مناسبات ياماشاء الله ماتخلص وناس تعزم عمرها ببيتي على الطالع والنازل ونااس تشتكي لزوجي قلة روحاتي لهم !!! ....

عن الاكل انا هالشهر اكيد بيعطوني جدول بشووف شنو مكتوب فيه وبعلمك ,, بس من كلام اختي وتجربتها مع اولادها ان باربع شهور ونص تبدي تعطيهم نوع واحد كل اسبوع او كل يومين عشان تشوف اذا يتقبله او لاا ومنها العصاير يعني نوع نوع وبالاول لازم تكون باليوم وجبة وحدة والباقي كله حليب وشوي شوي اذا قربت تخلص الخامس يبتدي تخلطين لها وجبتين او 3 من فواكه وسيريلاك وخضروات ,, انا قلت بسوي جيي لان 24 ساعه فيسي بفيسها ههههههه ياعمري على فيسها فديته يعني مابستعجل بخلي الموضوع ع راحتي وبنفس الوقت بخلي الوجبة حزة طلعتي او شي ع اساس تشبعها جم ساعه وانا ارتاح شوي ...

عندي سؤاال غبي ,, الحين حجم الصدر يرجع طبيعي بعد توقيف الرضاعه ؟؟ احس انه اوووفر عندي ! الله يستر بس !

تفاحه
والله انا ودعت النوم العميق! حتى لو تنهدت افز من نومي هذا وانا بطبعي نومي ثقيل نوعا ما ههههه
بالنسبه للصدر انا احسه رجع عادي بس خذله بعد ماوقفت وعلى مانشف خذله شهر ونص شهرين خخخخ بس لاتنسين انا مارضعت واجد! يعني يادوب اول شهر
بس بكل الاحوال ان شاءالله بالاهتمام اتوقع يرجع لحجمه الله يعينك ويقويك عالرضاعه ياارب
انا امس اول مره تسوي فيني جوجو كذا تخيلي قايمه الاخت 2 ونص الفجر تضحك وتلعب وماتبي ترضع !!!! بغيت اموت الا شوي جلطتنيييييييي اخر شي خليتها بسريرها وتركتها لما ملت قامت تصيح سويتلها رضاعه والحمدلله رجعت نامت هذا طبعا الكلام كله خذله ساعه ونص ااه ياقلبي بغيت انتحر وردت قامت عالساعه 4 قلت والله مالي شغل فيها ههههه قاملها زوجي شربها ماي ولعبها لين مانامت اول مره يسويها بس شكله حس فيني خخخخ
من امس بديت مع جوجو طريقه جديده انا جبت لها لعبه مخصوص لسنها وقت النوم على شكل فرس البحر تضغطي بطنه ينور ويطلع موسيقى هااديه مع صوت امواج بحر مره حلو وخاافته احطها بسريرها بحزة نومتها واحطه جنبها هو مدته 5 دقايق يخلص تكون مدروخه شوي اعطيها الرضاعه وهي بالسرير بدون مااشيلها ولا اهزها والحمدلله بعد محاولات وتصيح تبيني اشيلها رضت بالامر الواقع ونامت خخخخ نشوف وش مجهزتلي الاخت فلم الليله بس الحمدلله انه ويك اند

هههههههههه الله يعييينك بس فعلاااا تعببببببب جذي يعني انتي دوام على عمرري ويالله تلاقين السرير والله يهداها جوجوو تسوي افلامها حزة التعب ! ان شاء الله الليلة تنااام و ماتسوي شي عشان تعوضين شووي بالنووم ...

تصدقين على السرير لحد الآن ابحث ولقيت بمذركير حلووو وعجبني لان اللي شفته بالموقع لحد الآن مافيه للطلبيات بس في حدود بلدهم بريطانيا انقهرت ,, قلت هالشهر ان شاء الله بعد مانخلص من هالمناسبات بروح آخذه لها واسوي لها خزانة تفصيل لان بعد مالقيت اللي براسي ...

تصدقين على سالفه النوم انا اشووف الاجانب من اول شهر وهم حاطينهم بغرفه نوم لوحدهم ويرتاحون من البداااية ويريحون راسهم !! انا بغيت اسوي الحركة لكن الوالدة وزوجي الله يهداهم أكلووووني خخخخخخ ...

اليووووووووم ميمي تكمل 4 شهووور ماشاء الله واشووفها اليوم تمسك برجايلها ومعجبة فيهم هههههههه تعلمت كل ما اجي ببدلها تمسكهم لي فديتها ...

الحلووة ,, متى بتطعمين جوجو ؟؟؟ يتراوى لي خلصت الاربعه موو ؟؟

تفاحه
اليوم كملت جوجو 4 شهور انا ولدت ب 30-4
طبعا رحت اطعمها اليوم بس صحيت متاخر! ولقيت الدكتوره طالعه رحت المستشفى الي ولدتها فيها قالولي المواعيد فللل طبعا اخذتها ورجعنا خخخخ راحت للاسبوع الجاي ان شاءالله
الحين هي الحمدلله تعودت ع سريرها الحمدلله بس اصلا خطر احطها بغرفتها الحين علميا قبل ال6 شهور ممنوع لان ممكن لاسمح الله تقلب ع وجهها وماتعرف ترجع وتختنق! لما تصير تقلب عالجهتين اوكي وتناام ماتصحى الا مره وحده بس مثلا انقلها اما اني اطق مشاوير بين غرفتي وغرفتها لااااا هههه

مساء الفل عالناس الفل

جوفان ,, مساء العسل لكل العسل ... اخبارك ؟؟ شنو صار بالموعد ؟؟

تفاحه الدكتوره سوت سونار وقالت مافيه تبويض����
قالت احتمال تبويضك متاخر دام الدوره تتاخر عندك وحولتني على استشاريه
والموعد يوم الاثنين

جوفان حبيبتي ان شاء الله مافيش الا كل خيررر ياااارب ,, بس ماشوف له داعي هالدكتورة تحولش الى استشاري بس بسبب تأخر الدورة !! انزين انا كنت عكس الناس ! بدل ما تقدم كل شهر كانت تأخر يوم يومين او اكثر ليماا رست على كل 35 او 30 يوم ... انا اتذكر وحده من خواتي قالت لها الدكتورة مثل كلامك وعطوها جلوكوفيج على اساس تنظم دورتها ...

جوفان
انا مع تفاحه اجل ولي يقولك ان دورتي والله العظيم كانت تتاخر اسبوعيين!!!! وفعلا جات فتره خذت جلوكوفاج ومليت ووقفته وفعلا تقطعني بالهشرين وانا متزوجه اما وانا بنت كلام ثااااني كانت تقطعني بالشهوور, بعدين والله يوم ملييت ووقفت كل شي حملت حتى جلست مابي احلل خلااص تناحه وقطعتني الدوره كم 3 شهور وانا صامله مابحلل ههههههه لان فعلا مريت بشهور صعبه ولما اشوف الدوره احس كان حياتي انتهت ويضيق صدررري وهذا انا وزوجي اصلا مو مستعجلين بس خلاص حزت بخاطري وصرت اتضااايق وسعي صدرك ادري الكلام مايفيد مره بس حاولي تهوني ع نفسك وربك كريم مثل مارزقك اول مر بنوته زي العسل ان شاءالله بيرزقك لها اخ احلى واحلى^_^
تفاحه
اخبارك واخبار ريمي العسل؟ وش جديدكم ههههه انا جوجو طايحتلي بحركه التفلان مو صاحيه خخخخ عمتي تقول لانها بتنطق تبي تتكلم بس مو عارفه قلت ان شاءالله

الحلووة ,, انا الحمدلله بخير وميمي بخييييير .... ههههههههه ياعمري ع جوجو ربي يخليها ويطول بعمرررها وفعلاا هالحركة معناه تبغي تنطق بالكلام وانتي ساعديها قولي لها بالبطئ بابا وداد وتي تي ,, ميمي الحين فيها هالحركة وتحاول تقول بابا بس كله تقولها بوبو ...

الحلووة وديتي جوجو للتطعيم ؟؟ شنو اخبارها ؟؟ احاتيها واحاتي ميمي هالاسبوع تطعيمها ,, وألاحظ هالبقعه الحمرة براسها زادت شووي معورة قلبي وفعلا صدقت انها عين !! لاني لما رحت جمعه بيت اهل زوجي وكانوا النسوان الله يهداهم كل وحده تتحلطم علي وتبغي الجاهله و اللي شعرها احلى من بنت فلانة واللي تقعد تتفحصها!! ومريومة ذابحه عمرها من الصراخ والصياح وبالاخير لما رجعت البيت شفت البقعه زاايدة ,, توبت اروح شهالحالة ....

تفاحه
تدرين انا عمتي لو اودي جوجو مجلس حريم تقول لاااازم الكل يحملها ويبوسها عن العين! وداايم الله يعطيها العافيه تاخذ الغسول حق الحريم لما يجون جمعات هنا وخصوووصا بالعيد خبرك تزيد الكشخه ههههه وبعدين بعد طلعات كذا شببيها وكمان حصنيها بعد المغرب وبعد العشا وربك الحامي وش نسوي بالناس!
انا جوجو صايبها زي نشفان بخدها اليمين خخخ حطيت لها من كريمها ماشاءالله من اول مره يروح,عالكلام اقولها دادا تيتا بس هي تقول اببببببببب وتبدا تتفل ههههه
جوجو ماشاءالله عليها محظوظه ماتطعمت الخميس بس باذن الله هالخميس بحجزلها موعد وروح اطعمها الله ييسرها من عنده! لما نخلص تطعيمات بجي نقارن ملاحظات هههه اكيد بتقولك الدكتوره اكليها اشيا وانا كمان بستفسر هع ونشوف ندور نظام يعجبنا نمشي عليه خخخخ

الحلووة ,, زوجي قالي مثل كلامك عن العين وان شاء الله انطبق شنسوي ...

عن الجدوول الغذائي انا فعلا ابغي يجي يوم تطعيمها بسرعه عشان هالسالفة لان الاحظ بنتي الحين كل ماتشوفنه ع السفرة تبغي تقعد ونعطيها شي فاعطيها عنب خخخخخخ وماتبغي وحده لو ثنتين لااا طول ماهو حلووو واصلي اعطيني والله مابسكت ههههه فأحس انها مستعده لسالفة الاكل بس مشكلتي ماعرف بالضبط شلون اسوي لها الاكل يعني الخضروات والفواكه ..

شوفي انا قلت لك ال دكتورتي نصحتني قبل التطعيم باسبوعين اعطيها سيريلاك الرز والحمدلله بنتي كانت يوم تتقبله ويوم تهبل فيني الحين ماشاءالله خلاص مشت فيه وعجبها لا وابشرك عدد قومتها باليل قل! الحمدلله يارب صرت انام هههههههه صارت تصحى مره الفجر ترضع ومره الثانيه ع موعد قومتي الساعه 6 كذا
وبرضو بستنى موعدها الاربعا واشوف اذا كل شي اوكي لان اخر مره لما وديتها عشان الزكام وكذا كان الدكتور قال ان وزنها قليل ع عمرها بس بشوف دكتورتها وبسئلها لان اصلا وزن بنتي لما ولدتها كان كيلوين 300 جرام والحين ملابس ال0-3 توهم بدو يجو مقاسها عالمضبوط! مدري مرات احس وزنها اوكي بس جابلي الوسوسه هالدكتور!

الحمدلله صلوات على محمد ربي يدييم جوجو على هالشي وماتتغربلين معاها يارب ... عن الوزن انتي حسبي لها ومفترض تزييد دام انه بديتي معاها الارز ...

انا ميمي الاحظها جم يوم تجوع اكثر وبسررعه حتى امس اقول لابوها اشك انه حليب اللي عندي قل مع ان اللي اشوفه العكس !! فقبل جم يوم بديت اعصر لها رمان وعنب حلو بملعقتها لان من نقعد على السفرة عيونها على الاكل ولو تطيح يدها على ملعقه شوفي شنو تسوي هههههههه ....

بس سؤال الحلووة ,, متى تسوين لها السريلاك يعني نهار لو ليل ؟؟ وماسبب لها امساك ؟؟ وشلون مقاسات الارز والحليب ؟؟