قصة ولادتي بطفله من متلازمة داون (الطفل المنغولي)

حبيبة قلبي .. فديتها وفديت روووحها ا ...الله يخليلج اياهاا وتفرحين فيهاا....ع فكره انا شفت اطفال جيييه ,,,, صدقني قدره التعامل ويااااهم وااايد زينه يعني اختلاف بسيط عن الطفل الطبيعي .,,,, انا بس قريت الصفحه الاولى وشاركت والحين بكمل وياااج ...وصدقني هذي الطفله بتشفع لج باجر يوم القيامه ....وما بترضى ادش الجنه الا اذا انتي وابوهاا دشيتوااا قبلهااازززشو تبين اكثر من جييه يا الغلااا

الله يخليها لج والحمد الله على كلحال

ام هدى نحن متابعين عزيمة الام المثاليه

0000رعاك المولى

الغالية أم هدى

موضوعج جميل جدا ومثابرتج وعزيمتج شجعتني إني أكون أم وأهتم بولدي أو بنتي شرات ما تهتمين بهدى ( اللي يخليها لكم )

بس لي عتب عليج ): ليش إتقولين لمعارفج وأهلج أن بنتج عندها متلازمة داون ؟؟؟؟

البنت شكلها طبيعي وأحلى عن الطبيعي وتصرفاتها رائعة وتقبلها للمهارات ممتازة ما شاء الله عليها اللي يحفظها فـــ ماله داعي انج اتقولين لهم !!! صدقيني البنت طبيعية لا تقنعين الناس وتقنعين عمرج أن فيها شي

واتمنى انج ما تزعلين من كلامي يالغالية والله يحفظها لكم ويحفظكم لها وتابعي قصصها الحللللوة لأننا متحمسين وفي الإنتظار

السلام عليكم ورحمةالله وبركاتو الله يسعد البطن الي شاللتك على شجاعتك وقوتك وانا احكيلك ماشاء الله بنتك احسن من الطفل الطبيعي حبيبتي يا الغالية ولله اني اقرا القصة واقول ماشاء الله عنها وعن امها واحترم زوجك ما شاء الله عنو احسست انو حنون ويموت فيها الله لا يفرقكم عن بعض يا رب حبيت اساعدك بلنسبة لرسم الدائرة وانشالله انها تساعدك هي طريقة عملية مو منهجية جيبي صحن قهوة مدور او اي شكل مدور وحطي على الورقة وخططي على حدود الصحن بشكل دائري وخليها بعدين تعمل مثلك مرة مرتين ثلاث وانشالله تستفيد يا رب ان شالله اكون ساعدت

كلمة الشكر احسها صغيره ما ادري شو اقوللكم هالمره الله يعلم اني فصلاتي ادعيلكم من دون ما احدد اسماء
احس انكم قريبين مني وايد وايد ولازم تعرفون اني مستحيل ازعل من اي ملاحظه الاخت ما تزعل من اختها دايم تبالها الخير وانا لين الحين ما كلمتكم كيف خبرت اهلي واهل ريلي وانشالله بكمل

واحنا ننتضر تكملين الباقي بفارغ الصبر الله يوفق هدوي يارب

حبيبتي ام شهد والله دايم ما تقصرين وايد وايد وايد يفرحني مرورج

نكمل
بعد ما كملت هدويه السنتين وديتها المستشفى وقالولي فيها فتاق وتحتاج عمليه وقالي الدكتور اختارو الوقت قلت احسن انسويها وحبي صغيره بتنا اول يوم فالمستشفى وثاني يوم سوت العمليه وثالث يوم طلعنا وكانت سهله الحمد لله بس ما كانت المشكله فالعمليه الحريم الي فالمستشفى كيف كانو يطالعونها ويطالعون حركاتها لاني ما قدرت احبسها فالغرفه اول يوم بنت صغيره وتبا تلعب والكل يسالني عنها ولي يجيب حد من اهله يسلم عليها وهي اتسلم والصراحه ماشاءالله تلفت الانتباه وكنت اقرا عليها خفت لا يصيرلها شي وكانو يقارنون بينها وبين عيالهم المهم طلعنا من المستشفى وهي نايمه وتوقعت عادي وصلنا البيت البنت ما تتحرك ولا تمشي ولا تسولف بس فاتحه عيونها وطالعنا قلت يمكن تعبانه من العمليه ومر يوم وحبيبتي هدويه نفس الشي والصراحه انهرت لاني ما تعودت اشوفها بهطريقه ووديناها المستشفى وقالولنا ما فيها شي وبوها قرا عليها وانا قريت ويت وحده تمت تقر عليها وقالتلي هذي عين ومر اسبوع والبنت نفس الشي وأسوا وكنت طول الوقت اصيح وعيوني ما شافت النوم اقول ابا اشوف ابتسامتها وكنت اذكر شوكانت اتسوي وكيف تلعب ويايه واشتاقلها وهي فحضني وحتى الاكل ما تاكل ومر الاسبوع الثاني وديناها مره ثانيه المستشفى ونفس الشي ما فيها شي وانا طول وقتي أصيح الصراحه خفت لا افقدها بسم الله عليها انشالله يومي قبل يومها هذي حبيبتي هدويه الدنيا اسودت فعيني ونفسيتي تعبت وحرمت نفسي من الاكل اذا هدويه ما تاكل كيف اسيحلي القمه وصارت وحده ثانيه ضعيفه وايد خسرت اكثرمن نص وزنها ولا تمشي تخلينها على الارض اتصيح وبتسامتها الحلوه اختفت وفالاسبوع الثالث قتله خلاص انا ما بتريا البنت تموت ونحن انطالعها انا بروح بيت اهلي يمكن احصل حل والصراحه احنا ما خبرنا امي لان امي حساسه ووايد اتصيح ورحت بيت اهلي وامي تمت تقرا عليها وقالتلي حد شفها وفرح فيها ودوها عند مطوع يقرا عليها وديناها ويا الاسبوع الرابع وهدويه نفس الشي وخلصنا الشهر وانا تعبانه وخايفه لان ما في شي يعوضني بهدويه يااخوت هذي حبيبتي انا ما شوف غيرها وهي وايد اتحب يدها الي هو ابويه قلت بجرب اتكلمه فتيلفون لانها قبل كل يوم اتشل تيلفوني وتكلم يدها وتم اتسولف وياه ولا تفهمين منها شي وهو وايد يحبها واتصلت وخليته على السبيكر وهي تتطالعني وتم الوالد يكلمها وهي ساكته وقتله خلاص ما بتتكلم ويوم بندت عنه تمت اتصيح وعرفت انها تبا اتكلمه واتصلت مره ثانيه والحمد لله اتكلمت اشوي ومن يومها بدت تتحسن والصراحه خفت انها نست كل الي علمتها اياه وبديت اذكرها وردت هدويه الحلوه من اول ويديد وبدت صحتها ترد مثل قبل ولوشفتوني كيف اصيح من الفرحه بتقولون حد متوفي عندها الحمد لله وهذا الكلام من شهر
وبقوللكم قصة ربيعتي الي قلتلها ان هدويه داون بس لاتخبرين حد لين انا اقول الموضوع وكنت واثقه فيها واتصلت فيني بالغلط تتوقعون شو سمعت بنكمل

الله يخليج كملي بسرعة وايد متحمسين

والله يحفظ حبيبتج الصغيرة من كل عين ومن كل شر

شوقتيني اعرف القصه اختي الغاليه ابي منج مساعده بنتي في الشهر التاسع ابي اعلمها تقول ماما وبابا شلون ابدا معاها؟

ماشاء الله عليج
بعد عمري عطيتيني دفعه تفاؤل كبيره
انا ولدت من شهرين وعندي ولد معاق فيه ضمور المخ واحاتي اشلون بارعاه وشفت كلامج وحمدت الله وقلت حتى انا باكون قدها والله يرزقنا الجنه من وراهم

وصج بعض الكلام ياثر بالنفس انا بجيت بجي لمن كتبوا بشهاده ولدي شديد الاعاقه بس ربج كريم

السلام عليكم ورحمةالله وبركاتو حبيت اساعدك بلنسبة لرسم الدائرة وانشالله انها تساعدك هي طريقة عملية مو منهجية جيبي صحن قهوة مدور او اي شكل مدور وحطي على الورقة وخططي على حدود الصحن بشكل دائري وخليها بعدين تعمل مثلك مرة مرتين ثلاث وانشالله تستفيد يا رب ان شالله اكون ساعدت ويا رب الجميع يستفيد يا رب

حبيبتي حب الحياه اول شي اختاري الكلمه الي تحسين انها بتقولها او تنطق اي حرف من حروفها ودايم وانتي تعلمينها خليها اتشوف شفايفج وقولي الكلمه ببطأ وبتحسين انها تركز وتشوف انتي شو تسوين ويمكن فنفس الحظه اتشوفين التجاوب ومع التكرار الدائم وقوليلي شو يصير معاج

لبى قلب وليدي;5604982:
ماشاء الله عليج
بعد عمري عطيتيني دفعه تفاؤل كبيره
انا ولدت من شهرين وعندي ولد معاق فيه ضمور المخ واحاتي اشلون بارعاه وشفت كلامج وحمدت الله وقلت حتى انا باكون قدها والله يرزقنا الجنه من وراهم

وصج بعض الكلام ياثر بالنفس انا بجيت بجي لمن كتبوا بشهاده ولدي شديد الاعاقه بس ربج كريم

الحمدلله على كل شي واختي لا تتاخرين سجليه فاي مركز وابدي وياه من الحين وصدقيني ماله غيرج انتي لازم تهتمين فيه واهم شي الصبر ودايم اتفائلي

كملي حبيبتي لا تشوقينا واجد ..

فديت عمرج .. والله صرت من متابعين موضوعج ... وشوقتيني اربي ولدي شرات ماربيتي بنتج ...
والله يفرحني بشوفته ويسهل علي ولادته ياااااااااااااارب ادعولي

نكمل
اول ما ولدت بهدويه اتفقنا انا وريلي انا ما نخبر حد لين ما نشوف التحاليل ونتاكد انها داون وعلى اخر الاربعين يتني ربيعتي وهي عندها اخو داون بس مات الله يرحمه وعندها خلفيه وشافت يدين هدويه وهي شالتنها وانا حسيت انها عرفت لانها كانت اتقولي بنتج وايد حلوه بس من شافت الخط الي فايدها اتغير شكلها فقلت احسن اقوللها لا تتوقع اي توقع وكنت اثق فيها حتى اكثر من خواتي انا وياها من زمان وفعمري ما سمعتها تتكلم على حد ويوم بغت اتسير يا اخوها واختها وحرمةاخوها يشلونها طبعا نزلن يسلمن عليه فقلتلها ما ابا حد يعرف اوعديني لين انا اخبر قالتلي مستحيل ولاتخليني ازعل منج نحن عشره وسبحان الله يوم يبا يكشف حد توها طالعه من بيتي هي ولي عندها حتى بعدها ما وصلت السياره رن تيلفوني الا اشوف انها متصله وانا على نيتي قلت يمكن نست شي رديت الو الو محد يرد عليه وكنت ببند قلت فضيحه يمكن متصله بالغلط عيب اسمع سوالفهم وتوني ببند بدا الصوت يوضح عندي توقعت انها بتكلمني بس سمعتها اتقول شفتو بنتها ردو عليها ماشالله عليها غاويه قالتلهم لا ما لاحظتو عليها شي مثل شو بنتها داون والله ان الدنيا دارتبي وتميت اتنافض والصراحه انهرت خمس دقايق وبكمل اسمحولي

نكمل
وبديت اسمع شو يقولن عن بنتي وركبن السياره وهن فنفس الموضوع لا وتقولهم لا تخبرون حد لا يقولون الموضوع طالع من عندي شكلها مستحيه تخبر الناس انها بنتها داون الله يعينها فتربية هالبنيه والي تعبني اكثر تعليق الي عندها وبعدين انا بندت التيلفون ما قدرت اسمع اكثر تميت اصيح الا شوي وهي متصله اكتشفت ان تيلفونها دق بالغلط وشافت الدقايق وعرفت اني سمعت كل شي وانا رديت عليها عادي بس عرفت اني يالسه اصيح وقالتلي صدقيني انتي فاهمه غلط قالتلها انتي عن شو تتكلمين قالتلي انتي فاهمه واعرف انج سمعتي بس صدقيني هم عرفو بروحهم انا ما قلتلهم قلتلها انا سمعت كل شي وعادي لا تحطين فبالج وانسي الموضوع وبندت عنها لاني خلاص ما ابا اسمع اي كلام زياده منها اعرف انها بتكذب والصراحه انا ما كنت انزاد فذاك الوقت ان حد يضايقني الي فيني يكفيني وهي ما قدرت اتسير البيت وردت مره ثانيه عندي اتصيح وتقول ما عندي اي كلام اقوله لج بس ما اباج تزعلين مني وكانت وايد اتصيح وتترجاني ما ازعل وانا هاديه وجدامها ما نزلت ولا دمعه كنت اقولها خلاص روحي مهما يكون نحن ربايع انتي روحي البيت وانا بتصل فيج و الصراحه ما بغيت اصيح جدامها وحسيت اني مخنوقه واني ما اقدر اثق فحد وتمت اسبوع اطرشلي مسجات تتاسف وتقولي ادري لو شو اسوي ما بتسامحيني وصدقوني هذا درس لكل وحده توعد ربيعتها وتخلف فوعدها
وفي وحده بعد ما كملت هدويه سنه قالتلي ليش ما تيبين عيال قلتلها هدويه بعدها صغيره قالتلي هذي لا تحسبينها من العيال لانها ما منها فايده معاقه لازم تيبيلج عيال بعد ريلج يبى يشوف عياله صدقوني ما قدرت ارد عليها تميت ساكته لان هنوعيه من الناس شو تفهم فيها والصراحه كلامها وايد ضايقني والحمد لله هي عندها ولدها طبيعي وكبر هدويه وما يعرف يسوي نص الي تسويه حبيبتي هدويه
بكمل بعدين احس ان العبره خانقتني

الله يجزاج خير يا قلبي ..
و الاجر كله محسوب .. وصدقني يا بخت بنتج فيج ..
و بنتج ما فيها الا العافيه ..وما عليج من هالناس الجهله و تفكيرهم المتخلف ..
الله يطرح البركه في بنتج انـ..شأالله ..
...
تحيااااتي
أختــــ غواااني ـــــج