تجهيزات احلي عرايس مصر (الجزء السادس)

السلام عليكم ازيك يا مارو و ازيم يا كات يا رب دايما بخير قولولى متعرفوش كوافير حلو فى منطقة فيصل او الهرم و اللى تعرف يا ريت المكان والاسعار لو امكن و يا رب دايما منورين:clap:

ولاء حبيبتى سورى اوى كان نفسي اساعدك بجد بس للاسف انا مش بروح ناحية الفيصل والهرم خالص , ياريت حد من البنات يكون عنده خبره و يقولك ,
داليدا حبيبتى انتى فين وليه مادخلتيش انا اون لاين انا وكات .

يابنات عايزين دكتور صيدلى كويس يقولنا ايه اكتر الكريمات اللى بتفتح وممكن استخدامه بالمناطق الحساسة ليكوسيد ار +بيتادرم , ولا بيتادين , ولا دريم وومن , ولا موون لايت ياريت يابنات لو تعرفوا حد صيدلى يدلنا ايه احسن كريم واللى ممكن نستخدمة بامان فى المنطقة الحساسة

يا بنات متعرفوش ارض المعارض فيها ايه الايام دي انا سمعت ان فيه معرض مفروشات هايتعمل فى شهر 7 اللى احنا فيه ده بس هل ده حقيقي ولا اروح ويطلع فشنك اللى تعرف تقول على طووووووووووووووووووووووووووووووول:shy:

انا بقولك يا امارو انا رحت للصيدلى وسالته قالى درييم وومن و مون لايت للمناطق الحساسة كويس ومش بيعمل التهابات بس انا خايفة يكون بيقول كده علشان اشتري وخلاص واتدبس :sad: علشان كده خفت اشتري الا لما اتاكد من صيدلي تاني بس انا مش فاكرة مين بالضبط قالت ان خطيبها صيدلي يا ريت تسأله و تقولنا و ساعتها بس هانتأكد :ok:

e_walaa:
يا بنات متعرفوش ارض المعارض فيها ايه الايام دي انا سمعت ان فيه معرض مفروشات هايتعمل فى شهر 7 اللى احنا فيه ده بس هل ده حقيقي ولا اروح ويطلع فشنك اللى تعرف تقول على طووووووووووووووووووووووووووووووول:shy:

صباح الخير ياجميل(f)

انا بعدى من هناك كل يوم وانا راجعه من الشغل
اللى موجوده دلوقتى هو قاعه واحده ومش حلو قوى :sad:
بس فى واحد اللى هو بتاع السياحه والتسوق هيبدا فى 20/7 الى 20/8
ده بيكون كبير جدا وتحفه :clap:
انا عندى واحده من اصحابى جهزت كل الحاجه من هناك ولا عتبه ولا حمام التلات لنهم بيكون هناك عارضين برده وممكن كمان تفاصلى معهم ده غير السورين والصنين بيكون كتير جدا

المهم قولنا انتى فرحك امتى :clap:

معلش يا أمة الله عشان خاطرى ماتزعليش منى
انا أسفة أوى بس لما المواضيع بتتقفل بتعملى تشتت وتخلينى أنسى أرد عليكو كلكو
وأنا متشكرة جدا عالمعلومات والله إنتى فعلا أفدتينى بجد
هو إنتى متجوزة ولا لسة زينا؟
قوليلى إنتى ساكنة فين عشان ممكن نطلع ساكنين جمب بعض
وانا فعلا محتاجة لأى مساعدة من أى حد عشان للأسف كل صحابى اللى إتجوزوا مش قاعدين فى إسكندرية فمش بلاقى حد أسأله
بصى يا أمة الله تعرفى كوافير أو مركز تجميل بيعمل الحمام المغربى ويكون مضمون؟ لإنى بصراحة بخاف من الحاجات اللى فيها قلع هدوم برة البيت ومش ممكن أجازف
وكمان معلش سؤال تانى هو يعنى إيه الزيوت العطرية ؟ قصدك اللى بتتحط فى الفواحات دى؟ ولا حاجة تانية ؟ يعنى فايدتها إيه؟
وكمان عايزة أعرف لو فى كريم موجود فى مصر وبيكبر حجم الصدر بس يكون طبى ومضمون ؟


بالنسبى لكريم ليكوسد أر دة سعره أربعة جنيه بس وأنا جربته بس على أماكن جروح وفعلا فتح لونها بس مش عارفة دة ممكن يتحط عالمناطق الحساسة والباط ولا إيه؟
وحلى بالكم عشان فى منه المستورد بسبعين جنيه بس نفس التأثير وبالعكس المصرى الرخيص دة أحلى منه إوعوا تتدبسوا وتدفعوا فلوس مالهاش لزمة

والوصفة بتاعت التفتيج هى ليكوسيد مع بيتاديرم ولا بيتادين؟ لإن دة حاجة ودة حاجة وعايزة أعرف سعر البيتادين

على فكرة عايزة أقولكم على حاجة جربتها وعجبتنى اوى

فى مكواة شعر السيراميك بتتباع عن وليد الجي جى فى لوران
ودى سعرها 150 جنيه
أنا جبتها وجربتها هى أمان جدا على الشعر مش بتقصفه ولا بتحرقه وبتفرد الشعر زى مكواه الكوافير بالظبط
أنا قولت أقولكم عليها لأنها أسهل فى التحكم من السشوارات وطبعا ما بتعملكيش سخونية ودوشة زى السشوار وبتحسى إنك مالكاها كويس يعنى أنا مثلا كان عمرى ما عملت شعرى بمكواة وأول مرة جربتها عرفت أظبط شعرى
وفى ناس بتبيعها أغلى من كدة فى ب200 وفى منها أنواع بس دى حلوة أوى

انا بس عايزة أشترى سشوار حلو عشان هى مش بينفع تعمل الشعر وهو مبلول يعنى بضطر أسيبه شوية مفرود على ضهرى عشان أتأكد إنه نشف فطبعا بيهيش أوى

يلا يا بنات قولولى رأيكم فى فكرتى

صباح الخير لكل الناس
أول حاجة أحبكم فى الله بليز إوعى تكونى زعلتى منى أولاً أنا عملت سيف لكل الداتا اللى أنت قولتيها لأنها حلوة جداً وأنا من أنصار الطب البديل والتداوى بالأعشاب ومنى ليكى يا جميلة ابعتيلى إيميلك على الخاص وهبعتلك فايل لدكتور عبد الباسط اللى بيجى فى المسلمون بتساؤلون فيه برضة وصفات ممتازة بس إوعى تزعلى منى أوكى يا قمراية
كات
مارو
ولاء
قطة شيرازى
أمة الله
بوسى كات
صباح الفل عليكم كلكم
مارو أنا شوية وهاجى أون لاين إن شاء الله
ومبروووووووووووووووووووووووووووووووووووك لجويرية ويلا بقى ارجعى معانا واحكيلنا على العقد كان إزاى ويا ريت تحطيلنا صورة فستانك دة كان حاجة بنات الجزء الأول بيعملوها كل واحدة تتجوز كانت بتحط صورة فستانها عقبال ما كلنا نحط صور فستاينا يا رب
قطة شيرازى
بصراحة أنا بفكر أوى فى سشوار براون اللى بالفرشاة لأنه سهل وسريع وحتى ممكن لو انت مكسله تخلى الكابتن يتسلى شوية ويعملك شعرك :shy:


كنت عايزة اسألكم إية رأيكم نعمل موضوع يكون لكل البنات المقبلين على الزواج عن التجهيزات النفسية أو أى أسئلة جوانا متعلقة بالحياة الجديدة ومسئوليتنا يعنى من دلوقت بدور وافكر على الوسائل اللى تمنع دخول الملل للحياة لأن التعايش اليومى دة شئ تانى خالص وطبعاً فى مواضيع كتير وأكيد فى أسئله كتير جوانا فإيه رأيكم نعمل موضوع بالخصوص دى لأن أنا شايفة زى ما مهم أننا نكون فى أجمل صورة نبقى فى حالة نفسية ومزاجية جيدة يلا قولولى إيه رأيكم

داليدا انا معاكى فعلا ده شىء كويس ان زى ما نظبط شكلنا لازم نظبط نفسيتنا وخصوصا ان اى راجل مش بيحب الست النكدية

داليد انا موافقه 100%
اصلى عندى حاله رعب من فكره انى اكون مسئوله عن البيت وشخص كمان وانا
مع انى نفسى اكون مع خطيبى النهارده قبل بكره

جوريه الف مبروك واحنا مستنين التفاصيل وياريت الفستان كمان

صباح الخير لكل البنات الحلوين .. شكرا احبكم على المعلومات الجميلة ... وانا معاكي في الراي يا داليدا .... وانا عندي قريبي دكتور هساله عن موضوع الكريمات دة واجيبلكم الكلام المفيد ان شاء الله

والله يا جماعة أنا مبسوطة أن الاقتراح عجبكم أنا هطرح الموضوع بس اخلص شوية شغل وعلى بال ما انزله يا ريت كل حد مننا يقعد يفكر إيه الحاجات النفسية والاجتماعية اللى بيفكر فيها فى موضوع الجواز مش بس مشاكل لأ إيه الاقتراحات اللى ممكن تخلى حياتنا أسعد إيه العيوب اللى جوانا وممكن تتعدل وإيه اللى صعب يتعدل وإزاى نصاح أزواجنا إن شاء الله بالعيوب دى ونطلب منهم التأقلم عليها يعنى كل حد يفكر شوية كدة عشان لما نفتح الموضوع يتحرك على طول إن شاء الله ولو أنتم مجمعين أفكار حد يبتدى الموضوع لغاية ما اخلص واجمع حاجات واكتبها فيه
تانى حاجة رأيى الشخصى فى موضوع كريمات التكبير أنا مش مع كدة خالص لأن يا جماعة الحاجات دى هرمونات بحتة فبلاش اللعب بالهرمونات وبعدين منطقة الصدر دى ذاتاً خطيرة وده يخلينى احذركم تانى يا جماعة من أى اسبراى مكتوب عليه anti perspirant أو مضاد للتعرق زى دوف وريكسونا وبرجوا وكذا مجموعة من أوريفليم دول أثبتت الدراسات أنهم السبب الرئيس لسرطان الثدى ربنا يكفينا شره يا رب عشان كده اللى يجين اسبراى يكون deodranrant يعنى مضاد لرائحة العرق مش للتعرق. نفس الموضوع للكريمات يعنى موضوع الكريم اللى بيقشر ده مقلق شويه لأن التقشير ده ممكن يكون قوى على بعض البشرات الحساسة أنا رأيى الشخصى واللى هعمله إن شاء الله خلطة تبييض- بيتادين لأنه مطهر مفيش منه مشاكل-حمام مغربى-صنفرة العروسة-غسول نسائى-شورت -تنشيف المنطقة على طول وبعدين يا جماعة لازم نبقى واثقين فى نفسنا وده شئ بديهى أن المنطقة دى تبقى غامقة شوية وإحنا هنحاول معاها إن شاء الله بس بالحاجات الطبيعية حتى لو طولت وبعدين طالما نيتنا إننا نعمل كدة إرضاء لأزواجنا إن شاء الله فلازم نثق أن ربنا هيوفقنا بس إحنا نداوم

يابنات انا خطيبي دكتووووووووور صيدلي وهو اللي قالي عليهم وانا استعملتهم ع رجلي قبل كده من فترة وقشر والجديد طلع افتح وصحبتي جربت ع المنطقة الحساسة وفتح ولازم الاتنين ع بعض علشان الجيل بيخفف الالم معلش لسه جاية من الشغل حصلي وارجع اقولكم

هو الكريم اسمه بيتادين ولا بيتاديرم ؟ انا اتلغبط خالص

انا لسه شرياهم الاتنين ب6,5 وع فكرة لازم يبقي البيتاديرم كريم واللكوسيد ار جيل علشان الجيل بيرطب وخطبيبي بيقولي كان فيه بنات بتعمله علشان وشها بس هو بيقولي كده حرام ع اعتبار تجميل وكده وربنا يكرمكم جميعا وياداليدا انا مش زعلانه وانا معاكم لحد العصر علشان نازلة حمام التلات ماما عايزة تجيب طقم صيني او اركوبال ليها:gum:

:shy: ياناني البيتادين ده شئ تاني وليه استخدامات كتير منها انه مطهر حلو جدا لاي مكان بالجسم بس كل منطقة ليها بيتادين خاص بيها وع فكرة بتادين المنطقة الحساسة بتحطيه في حبة ميه علشان الالتهابات وكتير من المتزوجات بتستخدم علشان كده

أحبكم فى الله طيب قوليلى يا قمر أنت بتقولى استعملتيه لرجلك أنا عندى اثر حرق بستعمله ديبروزون بس مش حاسة بمفعول فقوليلى إزاى بتخلطى الاتنين يعنى بتخلطيهم برة وتحطيهم مخلوطين ولا بتحطى واحد على مكان الإصابة والتانى فوقه والكميات متساوية ولا إيه
بس أنا برضة قلقانه من استعمالهم للمنطقة الحساسة بصراحة