التجمع الثالث لأمهات ديسمبر 2011 لشهر جمادى الاول

إزيكم يابنات


معلش غبت بقى لى كام يوم

لان كنت تعبانة جدا والحمد لله

ظهرى بيألمنى بقى له فترة أكتر من شهر

ورحت لدكتور العظام وحولنى على دكتورة امراض روماتزمية

وقالت لى إن فى شد عضلى شديد فى العمود الفقرى

وطلبت منى الراحة وعدم الوقوف وكتبت لى على مراهم وادوية

وقالت لى لو ما اتحسنتش خلال 3 أسابيع أروح لها تانى علشان تزود لى

جلسات علاج طبيعى

بالنسبة لعمار اليومين دول هو كمان متضايق وبيبكى كتير ومش عارفة إيه السبب

وديته للدكتورة قالت لى إن عنده إكزيما فى راسه وقالت ده نتيجة جفاف فى

بشرة رأسه وكتبت له على كريم لراسه وينفع لجسمه كله

بس هو لسه مقريف ومتضايق وأنا بصراحة حاسة إن الموضوع له علاقة

بالتسنين لأكتر من ملاحظة لاحظتها عليه :

أولا لعابه زايد قوى وزى ما بنسمى فى مصر بيريل كتير وعلى طول

تانى حاجة لما بيرضع بيقعد متضايق ويرفس كتير وبيبقى متنرفز قوى

تالت حاجة بيمص فى إيده جامد قوى وبضيقة وعصبية

بكائه وضيقته بقت أمر غريب وجديد عليه لانه بقى على طول متضايق

وبالطبع نومه متأثر ومش بيعرف ينام وقت طويل زى الأول

لا ده يفضل يقلق كتير فى وسط نومه وما يعرفش ينام وقت طويل على بعضه

ولما خليت الدكتورة تكشف على لثته قالت مافيش بوادر للتسنين بس انا

مازلت معتقدة إن الموضوع له علاقة بالتسنين

والنهاردة الحمد لله أخيرا نجح فى محاولاته المستميتة وقدر يتقلب على بطنه :thumbs_up:

كارو ياب تكون قضيتى عيد سعيد إنتى واسرتك كلها :)

رونق ألف سلامة على زنوب ربنا يعافيها من كل سوء

دكتورة سمسمة فكرتينى بالجامعة وتخصصى

أنا اصلا تخصصى تربية لغة عربية ودراسات إسلامية لذوى الإحتياجات الخاصة

درسنا حاجات كتير قوى

ولما نزلنا التدريب العملى لقينا نظام مختلف تماما غير اللى درسناه فى

الجامعة طوال أربع سنوات

ولما سألنا عن اللى درسناه قالوا لنا إنسوه واتعلموا بس اللى بنقول لكم

عليه

يلا يضيعوا علينا سنين فى الدراسة علشان فى الآخر يقولوا لنا انسوا

اللى اتعلمتوه واتعلموا حاجات تانية مختلفة

فما تعتمديش على كل اللى درستيه

لان اوقات الواقع بيبقى مختلف عن اللى موجود فى الكتب

مش عارفة يارونق

يعنى النهاردة كمان الفجر لاحظت عرض جديد عليه

وهو شد اذنه بشدة

أول ما شفتها خفت ليكون عنده التهاب فى اذنه لكن لقيته مش بيتألم منها

هو بس عمال يشد فيها جامد

ولما بحثت عن اعراض التسنين كل ده من أعراض التسنين

بس لما بصيت على لثته ما عرفتش أشوف إذا كانت متورمة ولا لا

ربنا يسهل ويكون تسنين فعلا علشان ما تكونش القريفة والتعب ده كله على

الفاضى لأنى مع تعبى مش مستحملة ضيقته دى

ونفس النظام مع عمار يارونق

برضه عايزنى أشيله على طول وياريته كمان بيهدأ لما أشيله يفضل يتحرك

بضيقة ويتحرك كتير وتعب ظهرى مخلينى مش مستحملة

وزوجى مسافر

يعنى مافى بديل عنى معاه

ربنا هو المعين ويعافيهم بسرعة من التعب ده

هى زوزو أكبر من عمار ب3 ايام بس صح يا رونق ؟؟

اهلااا ام زياد
يارب يكون ابنك بخير