تجهيزات الولادة للبنات البحرين

قصة ولادتي
انا من دشيت التاسع قمت اكل اناناس وتمر عشان اولد مر الاسبوع الاول والثاني وكلش ماولدت حتى كنت كل يوم اتصل في مي اقول لها ماولدت
كانوا عاطيني موعد الولادة ٤ ديسمبر و ٧ ديسمبر
وانا من دشيت التاسع تصيدني آلام تحت بس كنت اتمشى واقعد بماي دافي ويروح الالم
تاريخ ٢٨ نوفمبر كنت راقدة وجان يصحيني الم قوي في بطني مثل الم الدورة طنشت الالم ورقدت وكان اتوقع الساعة ٤
٤:١٤ رد رجع الالم واستمر يجيني كل ربع ساعة لحد ست وربع اتصلت في امي اخبرها قالت لي شكله ولادة روحي المستشفى وكانت قبلها بيوم ام زوجي توصيني اذا حسيتي بتولدين خبريني عشان بتروح معاي لانه امي بعيد بيتهم
عاد بعد ماتصلت في الوالدة الالم هدأ وقلت خلاص مابروح المستشفى لانه اوردي عندي موعد نفس اليوم بس بالليل مع دكتورة فرح
على الساعة سبع رد رجع الالم وزوجي اصر علي يوديني المستشفى
رحنا المستشفى خبرهم زوجي اني بالتاسع وتعبانة مباشرة جوا لي الممرضات ودخلوني وجابوا جهاز التخطيط قالوا لي دكتورة فرح عندها راوند بالجناح بتجي دكتورة آمال
لما سو التخطيط جافوا عندي طلق بس مب منتظم قالوا بيجيكون كم متوسعة
اخ ويا ليتهم ماجيكوا خلوني اصرخ من قمة راسي
قالت لي الدكتورة بس ٢سم بعدها جت لي دكتورة فرح وقالت لزوجي ودها تتمشي ورجعها عالساعة ١٢ قال لي زوجي بنروح جزر امواج نتريق ونتمشى بس قلت له شمس بدوخ ورجعت اتمشى بشقتي
بعدها مرة حماي عرفت انه عندي طلق عطتني ماي زمزم اشربه وادعية اقراها
وظل الطلق يروح ويرجع
بالليل قلت لزوجي بروح اتمشى وطلعت مشيت كيلومتر ودخت عقبها شربتةحليب بالزعفران وعصير اناناس
ونمنا
ونفس الفيلم انعاد الساعة اربع الفجر قعدت من الالم وحسيت خلاص بولد قلت لزوجي خلاص بولد ودني المستشفى وخبر امه تروح معانا ورحنا
طول الدربةالالم فظيع دشيت المتشفى الا الالم هدأ وصرت كأني جذابة
سووا لي تخطيط وطلع في طلق بس مو منتظم
وجيكت لي دكتورة الشفت اذا في توسع او لا وكان ٣ سم جاني احباط قلت يوم كامل وبس ١سم زاد التوسع
وكان الطلق حده يعورني جافوني اتالم وايد بس مو منتظم جيكوا لي بعد ساعة الا صرت ٤ سم قالوا لي ٩٩٪ بتولدين اليوم
وطبعا التخطيط علي كانوا يقولون عندي مشكلة الكلق كبش مو منتظم بس قوي
قرروا يبطون الجيس عشان بنتظم بطوه ونقلوني غرفة الولادة عالساعة سبع الاربع وكنت وقتها اكلم اختي عالواتس وصتني لاتصرخين بتتعبين قلت لها لاتحاتين مابصرخ
جيكوا التوسع عالساعة ٨ وصلت ٧ والمصيبة الطلق نفس الشي
قرروا يحطون لي طلق صناعي وعقبها وصل التوسع ١٠
والطلق مانتظم
لماةوصل التوسع ١٠ نادواةدكتورة فرح عشان تولدني
لماةجت جافت الطلق مو منتظم قالت لعم زيدوه ثلاثة اضعاف
وكنت بموت من الالم
كان وياها طالبتين تدريب جفتهم قلت لها انا مابي احد خله يطلعون����
طبعا طردت زوجي من غرفة الولادة وامي واختي بس ام زوجي استحيت اطردها لكن اهي ماتحملت تجوفني جذي وطلعت بره
ولما اشتد الالم عدل ناديت زوجي جى حقي قلت له بموووت
هههه طبعا نسيت اني قلت مابصرخ اظن صراخي وصل لاخر المستشفى
والدكتورة تحاول معاي دفعي وانا اقول لها مو قادرة وحسيت بعطش كل ماقول لهم ابي ماي تقول لهم بللوا شفايفها اخر مرة قلت لها مابي يبللون شفايفي ابي ماي قالت بعد ماتوادين
وكنت احس الم في رجلي من كثر ما وقفتهم قلت لها ابي امدها قالت للمرضات يمدونها
وعقب قلت لها ابي اقعد قالت لي قعطي
قلت لها خلاص سووني قيصرية
قالت لو اسوي قيصرية مانقدر نطلع البيبي بالقيصرية
قلت لها انزين عيل شفطوه قالت مو الحين
قلت لها وسعوني انزين قالت ماتحتاجين
ووحدة من طالبات التدريب تقول لي اتحنلي شوي نجوف راس البيبي
اخر شي وسعوني
وع الساعة ١٠:٣٤ سمعت صوت صياح البيبي تلقائيا قلت ياعمممري
سالتها ولد؟ قالت اي
وتحمطوا لي بالسلامة
الا شوي يقولون لي بعد دفعي قلت لهم مافيني توم قالوا عشان نطلع المشيمة وشوي وطلعت
وعطوني البيبي اجوفه
عقب قالت الحين بيخيطوني
قلت لها نطروا شوي قالت مب زين بعدن تنزفين
عقب ماكملت خياط دخلوا اختي وامي وام زوجي يتحمدون لي بالسلامة
واختي تقول لي ها الحين ندش؟

يقولون لي خليتينا كل نصيح
حتى زوجي مسكين صاح
لما جى لي ابوي يقول لي هذا النتفة اللي صيحج��

وولدي سميته عبداللہ
ادعوا له بالهداية

مخمليات;16351714:

هلا ام نوف

اذا انتي بتسوين البسكوت عند بسكاتو والورق عنب من روشيه احس اوكى لانه بعد فيه حلويات

بالنسبة للمستشفى ، الحين الأسعار متقاربة ، يعني انتي في العسكري جم كانت بيطلع عليج

امممم ماادري الامريكي وايد قديم ومكانه زحمة وما في باركات مااحس يسوي الوحدة تولد فيه

عندج اللي اسعارهم قريبة من الامريكي ابن النفيس والكندي واثنينهم يعطون إبرة الظهر لانه دكتور التخدير دوم موجود وحتى لو مو موجود ينادونه لانه بتطلبينها في ملفج قبل الولادة ، بس نظامهم لازم على الاقل اخر ٣ مراجعات تكون عندهم عشان تولدين عندهم

رويال البحرين أغلى الولادة الطبيعية ب ٨٠٠ ، اما اللي فوق في حدود ال ٦٠٠ وحتى الامريكي

والتخصصي نسيت لانه رفعوا اسعارهم

العسكري الحين الطبيعي ب850 والقيصريه ب1450 والتخصصي ماتذكر بجم الطبيعي بس القيصريه تتبتدي من 1350 لي 2750 على ما اعتقد بس انا البكج اللي ابيه في التخصصي ب2130 جنه باجوف ورقة الاسعار اذا وصلت البيت :o

أنا والحب
الحمدلله عالسلامه ويتربى عبود في عزج

وشوقتوني كلش اشوف اغراض محل بوتري بارن وين يصير المحل؟

السلام عليكم
مشكورين بنات على المعلومات المفيييده
ابي اسالكم انا قاعده اجهز وابي عطر عود للبيبي بس ابيها عود خفيف وحلو
من وين تقترحون اخذ؟
واذا في اقتراحات ثانية حق عطر فيدوني لو سمحتوا
شي ثاني ابي محل حق بالونات للمستشفى
وين تقترحون علي؟

ya kreem;16354427:
السلام عليكم
مشكورين بنات على المعلومات المفيييده
ابي اسالكم انا قاعده اجهز وابي عطر عود للبيبي بس ابيها عود خفيف وحلو
من وين تقترحون اخذ؟
واذا في اقتراحات ثانية حق عطر فيدوني لو سمحتوا
شي ثاني ابي محل حق بالونات للمستشفى
وين تقترحون علي؟

للبيبييات استخدم عطر شاهين من عطورات البيان ريحته روعة وثابته
ولدي عمره سنه وللحين استخدم له نفس العطر

احد فيكم جرب ضيافه سلطانه ؟؟

زين اكلها ولا شلون ؟

ابي اطلب حلويات وموالح من مكان واحد

وشنو تنصحوني اخذ موالح تارت وبسكوت او معجنات احسن ؟؟

ولسويت اخذ كب كيك او جوكليت ؟

السلام علييكم

حصاصي متاكدددده 850 لان قبل فتره متصله قالت لي من 500 لي 650 معقوله رفعو الاسعار مصخوهاا احسس الله يعيين

انا والحبب الحمدلله ع السلامة حبيبتييي حسيت اني عشت الطلق مررره ثانيه الله يعين بس وربي يحفظ لج عبودي يارب

مشكووورة مخمليات

شكلي بتوكل وبطلب منها

الله يسلمكم
ويسهل عليكم يارب

هلا ام نوف

لا زيييين يعتبر سعرهم الحين كل المستشفيات رفعوا اسعارهم

والله لو في طاقم عدل وأجهزة كافية في مستشفى الملك حمد جان ولدت هناك وفكيت عمري ، بس ادري انه للحين ما عندهم امكانيات عدلة من ناحية الدكاترة والأجهزة

لانه هو اقرب مكان لي ، ووايد زحمة عليهم لانه اريف بندوه


مونزي

ماماز اند باباز مب كل عليه تخفيض اشية مختارة ، أخذي فرة وشوفي احتياجاتج ، انتي الحين المفروض تكونين مخلصة

انا و الحب الحمدلله على سلامتج

انا بعد اليوم الصبح ولدت و يبت الجوري

الفال لكم بنوتات تفرحون بالبيبيات

مخاوية الهم;16355776:
انا و الحب الحمدلله على سلامتج

انا بعد اليوم الصبح ولدت و يبت الجوري

الفال لكم بنوتات تفرحون بالبيبيات

الحمدلله ع سلامتج
وتتربى بعزكم
احلى الاسماء كان هالاسم من الاسماء المختارة اللي بسيميها لووكانت بنوتة

الحمد لله على سلامتكم

ويتربون بعزكم

بنات الي عندها لستة يالتجهيزات الهامة للبيبي تكتبها لي تساعدني

امس رحت سمبلي سويت وفصلت لي مفرشين مع قماطاتهم وبساطاتهم

الحين ابي اخذ لي مفرش ابيض بو نفر بطقمه ويه مفرش المستشفى تهقون وين احصل بسعر مناسب ؟

الحمد لله على سلامتكم مخاويه الهم ، أنا والحب