حلوووة ودلوووعة;15991967:
السلام عليكم :02:
آنه رجعت لكم بعد حفلة خطوبتي وملجتي
يوم الملجة
الشعر: فاطمة الدوسري (سوت لي شيء حده ناعم بس تاخذ وايد الصراحة)
المكياج: نادية زيد (تينن هالإنسانة حدي حبيتها ومكياجها روعة روعة روعة ستايل لبناني وناعم مبدعة)
الحفلة كانت في بيتنا ركبنا الليتات على البيت وشلنا الكراسي وكان الوضع وناسة
يوم الخطوبة
الحفلة: مارينا كلاب (النادي البحري)
المكياج: حبيبة قلبي شريفة فولاذ
الشعر: باتشي لوتشي (ديدام شغلها وايد حلو وماشاء الله عليها سريعة)
الفستان: من السعودية بسيط حددده شك وكررستالات صوب الصدر ومن ورى وردة ونفس اللي يمشي وراي ذيل اللون كان البيبي بنك
المسرح: أماسي (أحمد ماقصر معاي كفى ووفى الصراحة شغله وايد مرتب وحلو)
الباقة: نوال (كانت الستايل انه الوردة مدورة للأسف طاح الورد مادري ليش كانوا ينقصون من الغصن مالهم وتوهقت الصراحة)
الاكل اللي على الطاولة: كله من روشيه في العدلية
التوزيعات: كانت كيك عقيلي ملفوف وملاعق البستاشو بعد من روشيه
التصوير: سكوب (يحليلاتها اللي صورتني فالقاعة كانت عايشة الجو تصور وترقص)
الدي جي: دي جي فهد ستايل وماقصرت أم فهد خلت الكل يردح
ألحين نيي للي صار
آنه حطيت عند الباب خدمات أمن ذلين اللي يفتشون الصراحة آنه ماحب الحركة بس الحين انصح الكل يسويها عقب ماطلع هالبيبي والسوالف لأني منقرصة من قبل وحدة بدال ماتطرش صورة العروس والمعرس حق أختها طرشت لي انه بالغلط فمابالج لو مطرشتها حق ريال، آنه قلت حق الكل ترى بيأخذون تيلفوناتكم اللي يبي اييب تيلفون بدون كاميرا وجان تصير العفسة شوي وعجبتني مالت الأمن ماتخلي احد يدش وعلى ذي والله العظيم اللي مدخلة التيلفون الله يعزكم في جوتيها الا مادري شنو الله يستر على الجميع
المهم
انه حفلتي كانت عائلية فماسويت بطايق فاللي صار انه احنا عازمين وحدة او ثنتين من بيت على الخطوبة الا اهل البيت كلهم يايين فأضطرينا نزيد الكراسي والبوفيه حق 50 شخص صج تنرفزت وتضايقت بس قلت يله مابخرب ليلتي على جذي والحمد لله تيسرت الأمور
أشتغلت زفة شيخة الزينات لحسين الجسمي توه الشعر بادي وتوني حاطة ريلي للباب البراعي مال القاعة للحين مادشيت جان أجوف الناس كلهم يطالعون الباب جان ارد ريوس:089: مادري شصادني عوار بطن:047: مو طبيعي وكنت صج اتنافض حتى خطيبي يقولي يقول قلت لا مرتي مابتدش امي تقولي جدمي إنزين اقولها لا نطري شوي جدمي لا نطري تميت اقرأ فقلبي المعوذات وآية الكرسي وتوكلت على الله ودشيت والله الموقف مرعب ريولي ماقاعدة تشيلني وريلي مسكين ماخاف كثر ماخفت انه وطول الوقت مهوس على يدي ويطالعني تميت اتلفت اتلفت ادور ربعي حبيباتي ماجوف الا اللي قايمين لي ويضحكون واللي تعطيني بوسة واللي اجوفها تصيح المهم هديت شوي ووصلت المسرح بالسلامة وكان الوضع وايد حلو الكل يرقص والنقوط وعفسة ولوية بس كان حلو
طلع خطيبي من هني الأ ربعي ركيض من الصوب الثاني وصيحوني الله لا يحرمني منهم يا رب
كل شيء كان اوكي والشيء الحلو اللي عجبني انه في كل صوب قاعدين يرقصون فالحفلة كانت حلوة مو مملة
طبعا الحركات مالت التصوير اللي على المسرح مع ريلي محذرتها انه وقلت لها مابيها اي صورة فيها حركات جذي فالاستوديو
اي ورقصوني بعد والله ماذكر على اي اغنية الصراحة
وطلعت من القاعة على الساعة 1 وطبعا اهمه خلصوا الحفلة ماطلعوا الا 2 ونص
والحمد لله كل شيء صار مثل ما كنت ابي
بس يا بنات لازم العروس تحصن روحها يوم العرس آنه قريت سورة البقرة كاملة وطول اليوم كنت اذكر الله واستغفر
مسامحة طولت عليكم بس حبيت أشارككم فرحتي ويا رب الله يوفق كل وحدة عرسها جريب ويرزق اللي للحين ماعرست يا رب
أحبكم عروسات
ما شاءالله تبارك الرحمن
الف الف الف مبروك حبوبة الله يوفقج ويهنيج والفال حق باقي البنوتات ياربي
وااااااااي رجعتيني جم شهر ورى :'(
انا بعد خطوبتي كانت في المارينا ... حسيت بنفس الاحساس اول ما تمشين الا تجوفين الصالة متروسة اوادم :o كل المشاعر حزتها اتييج . يلة الحمدلله الي عدت على خير.
تعالي شنو موضوع الأمن يعني انتي يبتي ناس حق الأمن ولا من الصالة نفسها ؟؟ لان انا يوم حجزت عندهم ما كان في امن وغير جذي مثلج انا ما سويت بطايق لان الحفلة عائليه والمكان صغير . اذ يبتي أمن من وين وجم كلفج لاني حق العرس ضروري بحط وما بقول حق احد اني بحط عشان محد يخشش .
مبروووك مرة ثانية ويعطيج العافية على الوصف العجيب رجعتيني جم شهر ورى :'(:L:
