واحة الحب..;15904067:
سؤال يا امهات بما انى ام لاول مرة لسه بتعلم
طبعا احنا بنغير البامبرز كذا مرة كل يوم هل المفروض اشطف البنوتة كل مرة وللا مرة واحدة بس؟
وبالنسبة للاستحمام المفروض يكون كل اد ايه؟
واحة الحب ... ربنا يباركلك في رضوى ويخليهالك ...عجبني اسمها جدا على فكرة لاني مش بحب الاسماء المنتشرة ولا اسماء الموضة ربنا يباركلكم فيها وتشوفوها احلى عروسة انا كمان سميت اسامة على اسم اخويا لاني بعزه اوي اوي اوي ربنا يباركله في صحته ورزقه ومراته واولاده يارب ... قولوا امين
بالنسبة لتغيير البامبرز الدكتور قاللنا بلاش الويبس (المناديل المبللة) ياريت قطنه مبلولة مية دافية ... دا لما كان لسة مولود علشان مش هنعرف نشيله على الحوض نشطفله
وقاللنا كمان لازم بعد كل غيار ندهنله كريم الزنك (اوليف زنك) دا يحميه من التسلخات
فمعنى كدة ان لازم تشطفي للبنوته وقت كل غيار دا طبعا لو انتي في البيت اما لو بره البيت في مكان مش واخدة فيه راحتك يبأة الويبس مؤقت وتلبسيها البامبرز لحد ما ترجعي البيت
لان لو ما شطفتيش بعد كل غيار هيجيلها تسلخات لا قدر الله ربنا يحميها وبعدين لما تشطفيلها هتفوق وتفرفش وتاكل وتنام مرتاحة
بالنسبة للاستحمام علشان احنا في الشتا والاطفال ممكن يجيلهم برد بسهولة جدا ربنا يحميهم فالاستحمام الدكتور قاللي في الاول بلاش لحد ما السرة تقع ونظفيه بقطنة مبلولة
ولما السرة وقعت وحميته قاللي لييييييه كدة .. كدة غلط ومش صح علشان كدة هيجيله برد وادي اهه الولد مخنفر جامد وصدره بيشخلل
قلتله يا دكتور امال ينظف ازاي انا كدة احس انه قرفان من نفسه
فقاللي الاطفال في السن ده مش بيتوسخوا ... قلتله يا دكتور ازاي طب مافيه لبن وقت ما بيرضع بيقع في رقبته ... فقاللي في السن ده بيستحموا (سبونش باث) يعني بتكوني لافة نصه الفوقاني وبسفنجة مبلولة تمسحيه من تحت كويس وتلفيه من تحت وبالسفنجة تمسحيله من فوق وتلبسيه بسرعة بس خلاص