التجمع السابع للحوامل اللواتي سيلدن بمشيئة الله في ديسمبر 2011

ماشاء الله اللهم بارك

خبرين ولادة فى وقت واحد :D

أم حفصة مبروك وصول هاجر:adore:

أم صغنونة مبروك وصول خزامى :adore:

بورك لكما فى الموهوب وشكرتما الواهب ورزقتما برهما وبلغا أشدهما

أم حفصة ابنى وبنتك من عمر بعض هههههههههه

بس أنا وأبو عمار نوينا نسجله متأخر يوم ;)

يعنى يوم 26 زى ما كان نفسى يوم واحد مش هيفرق بس ربنا يسهل والامور

تمشى تمام من غير مشاكل

سبرينج سول حبيبتى أنا كنت نسيت إنك متابعة فى نفس المستشفى

بصى بقى ياستى

أنا باتابع مع شركة بوبا والشركة دى لازم موافقة مسبقة منها قبل اى خدمة

علاجية المهم يوم السبت لما الدكتورة لقتنى على وش ولادة حجزت لى غرفة

ولادة تانى يوم

طبعا الموافقة جات لى يوم السبت بالليل

رحت الأحد ودخلت على طول طوارىء الولادة وعلى ما زوجى ملا الأوراق

المطلوبة وشرحوا لنا إن كل الخدمات متغطية بالتأمين ماعدا المرافق

الليلة ب315 ريال تقريبا

والختان ب750 ريال وبيتم فى أى وقت أنا عايزاه

وبرضه تخريم أذن البنت خارج التأمين بس ما سألناش لأنه المفروض إنى حامل

فى ولد واللى يهمنا الختان

المهم نزلت لى ممرضة هى اللى كانت مسئولة عن غرفة ولادتى

طلعنا الدور الاول النظام إن كل واحدة هتولد بتبقى لها غرفة لوحدها متجهزة

بكل شىء للولادة وحتى سرير تدفئة و شفط السوائل عن الجنين والتاكد من

كل أموره وقت الولادة

الممرضة بصراحة كانت رائعة حتى لما كنت أقوم أدخل الحمام قبل الطلق ما

يزيد عليا كانت بتقفل لى مريول المستشفى من وراء علشان تسترنى :thumbs_up:

طبعا الغرفة فيها حمامها الخاص

برضه هم بيعطوكى الحقنة الشرجية أول ما تدخلى بس للأسف حقنة واحدة

ما كانتش كفاية معايا رغم إنى قبل ما اروح المستشفى الصبح ما كنتش أكلت

اى شىء غير تمر مع حليب

بس وقت الدفع كانت فى امور تانية بتطلع برضه :-#

المهم الدكتورة بتاعتى جت وكنت لسه واخدة الحقنة الشرجية فقالت هتيجى

ليا بعد ما ادخل الحمام بس بعدها ما جاتش غير لما خلاص دخلت مرحلة الدفع

بس كانت فى دكتورة تانية برضه كويسة هى اللى كانت بتدخل تتابع حالتى

وهى اللى فتحت لى كيس ماء الجنين فى البداية وفضلت معايا لغاية المرحلة

الاخيرة لما جات دكتورتى وولدتنى وخيطتنى

بصراحة طقم التمريض اللى قابلته فى كل مكان وفى كل وقت راااااااااائعين

بفضل الله وطول الوقت تلاقيهم داخلين خارجين عليكى يقيسوا ضغطك

وحرارتك والتنظيف على طول مش بتحتاجى تنادى لحد

عندك فى غرفتك شاشة تى فى كبيرة فى من ضمن القنوات قناة كاميرا

مراقبة لسرير ابنك لو هو فى الحضانة يعنى طول ما هو مش موجود معاك فى

غرفتك تقدرى تشوفيه هناك فى الحضانة

وكمان طول ما أنا عايزاه يفضل معايا فى الغرفة بيسيبوه لى وماشاء الله على

طول بيغيروا له ملابسه

تعليقى الوحيد على الاكل:-#

زى ما بيقولوا اكل عيانين بس فعلا هو ده أصعب حاجة

طعم الأكل صعب قوى بس بأضطر أكله علشان الخضار يساعدنى على تجنب

الإمساك :thumbs_down:

إيه تانى كنتى عايزة تسألى عنه ؟؟

سمسمة زوجى وماما عارفين إنى كنت ناوية أعمل بث مباشر من

المستشفى ولما حاولت ادخل وأنا فيا الطلق بقى يقولى إنتى فى إيه ولا إيه

أقول له بالعكس ده يشغلنى شوية عن تعب الطلق:worn_out:

والحمد لله إنه ما نشفش دماغه ورفض:D

بالنسبة للمستشفى هو لو عليه عايزنى اخرج من إمبارح

لكن هو بيقولى أنا عارف إنك هنا هيراعوكى بشكل افضل وربنا يسهل وترجعى

بيتك بالسلامة:)

أم مشمش الله يسخر لك حماتك دى شكلها موسوسة قوى

بس لو ياقلبى إنك تعتمدى على شفط حليبك وإعطائه فى الببرونة لابنك

هو ده اللى مخليه لغاية دلوقتى مش عارف يمسك صدرك ويرضع منه كويس

وبينام بسرعة لما بتحطيه عليه

لان الببرونة طريقة مصها أريح وأسرع من مص الحلمة

وكمان مصها بيطلع كمية أكبر بمجهود اقل من مص الحلمة

فطبعا أسامة عرف الفرق وبقى بيتعب ومش عايز يتعب لما ترضعيه من صدرك

بقى يستسهل الببرونة فلو عايزاه يتعود على صدرك لازم زى ما قالت

سمسمة تحطيه كل ساعتين على صدرك وتصبرى عليه حتى لو نام صحيه

وما تقوليش صدرى صغير ولبنى خفيف

معظم الأمهات الجدد صدرهم بيبقى صغير وده ماله علاقة بكمية الحليب

وطبيعى إن صدرك ما تقدريش تطلعى منه غير رضعة واحدة لأن ده رزق ربنا

بيبعته له وقت بوقته

الحلمة صغيرة علشان لسه أسامة ما عرفش يمسكها كويس

إوعى تستسلمى يا أم مشمش لو استسهلتى الببرونة

خلاص ابنك هو اللى هيرفض صدرك بشكل نهائى

هى أول أيام بتبقى أصعب أيام بس لازم نستحمل علشان ما يجيش يوم

ونحس إننا قصرنا معاهم