سنعات19،، ناجحات متفائلات متفاعلات

صباح الخير ،،

ام هيوني ،،،

يارب انك تعطيها الصحه والعافيه

وتكتب لها الاجر ،،،

،،،،،،،،،

امس نمت مع عيالي ١٠ وصحيت

١١ ونص ، وابي ارجع انام طار النوم ،،

سولفت واتس اليييين تقريبا ٢ ورجعت سريري

غصبت عمري غصب ونمت الين ٥ ،

راحت بنتي وانا جلست احفظ علي اختبار اليوم

وحمودي قايم مع اخته ، ويوم جت الساعه ٨

قال ابي انوم ، مسكته ووديته سريري وانسدحت

جنبه ونمت قبله خخخخخ

حطيت المنبه ١٠ عشان اكمل حفظي وشغلي

وقمت تقهويت ، وبنشر دفعة غوامق ،

وانظف مطبخي واكوي اللبس حق الدار ،،

مع السلامه ،،،

مساءالورد
كيفكم جميعا
انابخيرولله الحمد
بدء العدالتنازلي هاليومين مشتته جداااااا
مابين تحاليل لولدي عشان الصفاروالدكتور
رفض نختنه لين يروح الصفار
ومابين شيل عفشي
وتدريس عيالي والضيوف اللي تسلطو
بأخر الايام الله يعين
..........
مهاوي
سألتي عن اخوي الله يسعدقلبك
الحين ولله الحمد دخل دوره عسكريه ننتظرتخرجه
بإذن الله وموضوع الدخان الله يصرفه عنه
صارمن يوم كان صغيربسبب اصدقاء السوء
ويقول اجاهدنفسي على تركه بس ماعمرنا
شفناه اوشميناه يجاهر بالخفاء بس
وابوي ناقشت معه الموضوع من فتره وكأنه
شاك بالموضوع بس مايبي يعرف الحقيقه
الطامه الكبرى أخوي اللي اصغرمنه شاكه
انه مثله آآآه بس زمان العجايب ابوي الله يطول
بعمره رباهم احسن تربيه بس حسبي الله على
اصدقاء السوء انا كل مره اجي لأهلي
اكتشف شي جديد الله يهديهم يارب
ويكفيهم شرمن فيه شر.

حابه انعش التجمع شوي
بس يالحوامل لاتخافون ترى الولاده
تختلف وان شاء الله ربي يهون عليكم
وتحون تكتبون قصة ولادتكم
ترى من زمان كاتبتها في الملاحظات
وتوني فضيت.

قصةولادتي
طبعا انا قلت لكم ان المستشفى بيعطوني
موعد للطلق
الصناعي بأول الشهرالتاسع 
كان موعدي
الاحدقبل الماضي
 وقالو دقو بنفس يوم الموعد
نشوف اذا فيه سرير وكنت كل يوم ادعي
ربي يكتب الخيرجهزت شنطتي
واغراض عيالي
ونظفت بيتي وغسلت الغسيل,,,ههه  
كلن على همه
 دقيت بنفس اليوم وقالو
مافيه سرير ماتعرفون قدايش فرحت
ودقيت اليوم الي بعده ونفس الكلام
وبعده معد دقيت وزوجي 
يسألني واقول ايه ادق وادق ومايردون
وانا معد دقيت من الخوف 
وقال زوجي امشي يمكن تجيك ولاده
وكل يوم بعد المغرب او العشاء
امشي والله يابنات تقطعت رجولي مشيت
عند الممشى اللي جنب مدينةالملك فهدالطبيه
والممشى اللي عند كبري الثمامه
امشي مسافه طوووووويله وزوجي يقول خلاص كفايه 
وانا اقول لا ابي امشي
ارجع البيت مهدوده ونفسيتي زفت
واحط رجليني بمويه وملح ورجولي شاده
طوال الوقت يالله ذكريات صعبه
ولا حسيت بأي اعراض ولاده ابدااااااا
من يوم الاربعاء بديت اكسل وقلت
خلاص ماابي امشي وقرفانه 
ودايم مكشره حتى الابتسامه مااعرفها
وكل شي يزعلني ويضايقني
شايله هم بشكل فضيع 
جاء اليوم الصعب  يوم الجمعه آآآه
قال زوجي جيبي الرقم ادق قلت لا خلاص
دقيت وقالو مافيه اخذالرقم
وصار يدق ومايردوون
طلبت منه اطلع اغير جو وافق
قلت ابي ايكيا
خخخخ ابي اي شي ينسيني
رفض قال اخاف يجيك شي 
وش بيطلعنا من ايكيا
قال روحي للمشى
طلعنا بعدالمغرب وصلينا العشا بمسجد
ركبت السياره وهو مازال يدق
الصدمه ردو عليه وقالو ايوه موجود سرير
لك ساعتين عشان تجي
انا قلبي صار يدق بقووووه ودمووووعي
مثل السيول  وهو يهديني قلت
حرام عليك كان خليتني الليله بس
قال خيييره واطالع بعيالي
ويزيد البكا عاد يستهبل زوجي يقول
تبين اشتري لك آيباد الحين 
خخخخ عارف اني مستحيل اقول ايه هههههه
ياليتني قلت ايه راحت علي خخخخخ
المهم رحت البيت كنت مستعده حافه جسمي
تروشت ترويشه معتبره 
ورتبت الحوسه فرغت الزبايل
وجهزت شنطة عيالي 
واخذت موية زمزم وسكرت شنطتي كل هذا
ودموعي تصب 
طلعت المستشفى 9ونص
وصلت 10ضبط زوجي الاوراق
وعيالي معي اخذهم ابوهم وجاب اغراضي
وطلع على طول على غرفة التنويم
جابو لي لبس وعلب التحاليل
دخلت الحمام تكرمون اغير لبسي 
ياالله ساعتها جاني شعورغرررريب
ودي اهرب قسم بالله بغيت ادق
واقول له ارجع بس تعوذت من الشيطان
توني جلست عالسريرجت الدكتوره
يومااااااه كشفت وحطت تحميله
بكيت قبل تكشف وقلت لها أخاف من الكشفيه
وتفهمت الوضع الله يسعدها سودانيه
 وبعدها حاولت بالنوم لكن هيهات 
مانمت عالصبح جت الساعه 9
دكتوره سوريه وبرضو
كشف وتحميله وكانت كشفيتها بقساوه آآه
لا حسيت بأي اعراض
ولاده تعبت نفسيا بس جالسه
اقرأ بوردالولاده وسورة البقره من الايفون
وانفث على بطني واشرب زمزم
الظهرجابو وحده معي بالغرفه 
برضو بيعطونها طلق الله يسعدقلبها
حبوبه عسل غامديه  من اهل الجنوب ونستني 
وملت علي الفراغ كأن لي سنوات اعرفها
طوال اليوم انا وهي ننتظر الدكتوره
 من الظهر لين الساعه 11بالليل
طول الوقت سوالف وضحك جتنا حاله 
هستيريه ماادري ردة فعل قلت لها خلينا نطلع
نمشي شوي وافقت وطلعنا 
اه ليتنا ماطلعنا قابلنا حريم يمشون
وخذي من السوالف اللي جنينها تعبان
وبيعطونهاطلق وجنينها الله اعلم
ماراح يعيش واللي لهاكم يوم معطينها
طلق ولا انفتح الرحم واللي قرروعليها
عمليه بعد معاناه مع الطلق
آه بس من جد تحطمت اللي معي
راحت الغرفه ماتبي تسمع
وانا مشيت معهم شوي ورجعت الغرفه
وانا محطمه استغفر الله تقفلت الدنيا
بوجهي قلت بس مثلهم
وقالت اللي معي ياويلك لو شفتك
طالعه مع الباب بامسكك واقفل عليك
خخخخخخ جلست اضحك وابكي
وجلسنا نترقب الدكتوره وفجأه
جت الممرضه تقول روحو الحمام تكرمون
الدكتوره بتجي وبديت انتفض
وقلبي يدق واقول لخويتي
احس فيني ماغص وفطست ضحك
قالت شكلك مافيك اي علامات ولاده
قلت لها لا مغص خوف 
وفطست ضحك قالت زين صرتي تعرفين
تفرقين بين مغص الطلق والخوف
خخخخخخ الله يسعدها وين ماكانت
المهم جت الدكتوره يوماااااه قصدي
الجزاره مصريه الله لا يوليها مسلم
قالت لي حاكشف واعطيك تحميلة طلق
وتنتفض رجليني وتكشف وتحط التحميله
مافي قلبها اي رحمه
اصلا من شفت وجهها وانا عارفه
كشفيتها وش بتصير 
وتروح للي جنبي هي لها ولاده قيصري
سابقه يعطونها صناعي 
وتجلس مسكينه تصرررررخ
الله ياجرنا وانقلب ضحكنا صياح
سكرو اللمبات وهجدنا
عالفجر تعبت اللي معي 
ونادتهم ونقلوها على غرفة الولاده
قبل لا تطلع ودعتني وطلبت ادعي لها
صليت الفجر وجلست ادعي
واقر وانفث واردد اللهم خلصني جلست
اتقلب بالفراش وامشي بالغرفه
انتظر الدكتوره وكنت احس بطلق خففففيف
عالساعه 7الصباح جت الدكتوره 
نفسها المصريه سمعت صوتها بالسيب
وقام بطني يمغصني
قالت حاكشف الله لايذوقكم
كشفت كشفيه اعوذبالله
تألمت منها بقووووه  وقالت مفتوح
1سم ووسعته لك
إه ياويل قلبي كل هذا وواحد
وقلت لها ليش انتي كذا
حرام عليك قالت وعد مني
لو كشفت عليك ماراح اوجعك
قلت بنفسي طيب باخليك تكشفين 
والله لاردك
قلت حطي لي اقوى تحميله
خلاص انا معد اتحمل كشفياتكم
قالت حاسأل الاستشاري  وارد لك
وارسل لزوجي رساله
تكفا تصدق عني بنية ان ربي يخلصني
وترى ضاقت بي الدنيا
ويدق ولاارد عليه احس خلاص
ويرسل ولاارد احس كرهت كل شي
واجلس ادعي واطلب ربي
واقرء قرآن من جوالي
تقريبا الساعه 10ونص جتني سوريه
يالبى قلبها وقالت باكشف 
واحط تحميله سألنا الاستشاري وقال
اعطوها وانهرت وجلست ابكي من قلب
وهي تقول شو مالك تبكي
طب ليش عم تبكي
قلت خلااااااص تعبت
سوو لي اي شي
وقلت لها الدكتوره اللي قبلك
عذبتني وتعبتني قاسيه وعنيفه جدا
قالت بإذن الله ماراح اتعبك
وهذي آخر تحميله منها على غرفة الولاده
بإذن الله
حطتها وراحت وصار الطلق يزيد ويزيد
جلست ساعه وقمت امشي
وقامت كبدي تقلب واستفرغت تكرمون
وحسيت بخمول وتعب 
وانا احس بحالة يأس بس ثقتي
بربي وحسن ظني به ريحني شوي
وجلست بسريري
وشغلت مجد القرآن وجلست ادعي 
وادعي واتضرع وجوالي بعدته
عني كرررررهته
جت الممرضه تاخذاغراض اللي جنبي
قلت ولدت فلانه قالت لا الحين هي 
بغرفة العمليات ياالله تضايقت
وحزنت عليها
 اذن الظهر وقمت الحمام
اتوضأ وانا احس اني خلاص
تعباااااااااانه صليت وانا عالكرسي
ودعيت من قلبي
وهذي آخر صلاة صليتها
بعدها زاد الطلق
جت الممرضه تاخذ النبض 
وتحطه وانا ابلع ريقي
تعبانه حتى المويه مااقدر اشربها
استفرغها على طول وزياده على
كذا اربع ايام مانمت 
صرت اذا راح الطلق انوووووم
بدون شعور واذا جاآ تمسكت بيد السرير
وادعي ربي
بعد الظهرزاد الالم وقلت للممرضه
راحت تنادي الدكتوره
وجت قالت الرحم مفتوح 
على غرفة الولاده 
طبعا تكلم الممرضه وانا سافهتني
قلت بصوت عالي كم مفتوح
ولاردت علي سفهتني وراحت
قالت يلا البسي عبايه وخذي موبايلك
لبست عبايتي وانا اتوجع وخذت الجوال
وركبت العربيه دقيت على زوجي
وقلت له بيدخلوني
غرفة الولاده ودوني غرفة الولاده
ولأول مره زوجي موب معي
اول مادخلت السيب اسمع اصوات الحريم
يصارخون وينادون خفت مره
والحمد لله حطوني بغرفه لحالي
دخلت واشوف الاجهزه والمقصات والمشارط
شي شي مرعب وانا دايخه
في عالم آخر حطتني عالسرير
وسألتها كم الساعه؟
خخخخ نظاميه وابي اعرف الوقت 
خخخخخ اللي تولت توليدي القابله
جنسيتها تونسيه جعلها ماتولاني مره
ثانيه ومعها ماليزيه انا دااااايخه
وهم يبوني اصحصح بس اون واقول
ياااااارب وهي تسألني عن اسمي
ومااقدر ارد مافيني حيل
 وتنفص عيونها علي خخخخ
وخفت وقلت اسمي وسالتني عن
اسم زوجي هذااللي اتذكره
وحطت المغذي وقاست الضغط
بعدها دخلت مرحلة الالام المتواصله
والاااااام زادت وزادت وحرصت اني
اذكر الله وادعي بس لا بد من الصراااخ
وجت لحظة الفرج والخوف والالم والتعب
والفرح 
لحظة خروج النفس من النفس
تخيلو تقول لي ادفعي الراس قرب يطلع 
 وانا اقول لهل انتي كذابه خخخخخخ
وعصبت علي ادفعي ادفعي
وانا اصاااارخ بكل قوتي
وتجمعو علي كلهم طلع الراس
يوم جت تشيله بدون شعور
رفعت جسمي لفوق مدري وش جاني
من كثر الكشفيات
صارت اي لمسه من تحت تخوفني وتفزعني
 هي انهبلت وصارت
تضرب رجولي لا تقمزي لا ترتفعي
حيرجع لورى وانا ابكي بقووووه
وصارت تهديني وسبحان الله نزل الراس
بعدها مااتذكر شلون ووش سوو لي
بس اتذكر انها قامت تهاوشني
وتقول ليش ارتفعتي
انا انهرت وصرت ابكي وجنبي
دكتوره سوريه مسكت يدها وضميتها
خخخخخ وانهرت وهم يقولون ليش
تبكي شوفي ابنك 
مدري وش احس به يوم اضم يدها
 بعدها شفت مولودي اللي تعبني
 اللي يجعله قرة عين
لي ويرزقني بره ويجعله من حفظة كتابه
ولدي (حسام )
وصارت التونسيه كل من دخل احد
تعلمهم شوفو وش سوت لما جايطلع الراس
صارت تقمز قلت لها خلاص
شي غصب عني
رفعت ضغطي بجد
قلت لها عطيني الجوال اعلم زوجي
قالت لا لين اخلص 
جت الممرضه عطتني جوالي 
كلمت زوجي وشغلت الايفون
على سورة البقره وحطيته عند اذني
وهديت وجلست احمدربي طوال الوقت
هذي قصتي كاااامله 
لي كم يوم وانا اكتبها لعيونكم.

الحمد لله على سلامتك شذى
عشت معاك لحظه الخوف والتعب والتوتر والفرح ووقت طلوع الراس
ادمعت عيني يالله لا تضيع لنا اجر
ويجعل عيالنا بارين بنا

[COLOR="Teal"][/COLOR]

مرحبا

يالله ياشذى الله يعظم اجرك واجر كل ام واجعل كل الم شفتيه لك اجر فية

قصة ولادتك بكتني الله يحفظة لك ويصلحة ويصلح اخوانه كنت اتوقع

الولاده سهلة مو بالصعوبة هذي

-------------
يومياتي السابقة عادية جدا تمسيح البيت وكنس وغسيل ملابس ومواعين وطبخ

الانجاز الوحيد الي سويته الكوي يوك الجمعة كويت سلتين ملابس لاخواني ورتبت

دولابهم وبخرته وعطرته ومسحت غرفتهم وكنستها وغيرت مفارش اسرتهم وبخرتها
ورشيت الستاير والمفارش بمعطر
السبت
رتبت غرفتنا ومسحتها وكنستها وغيرت المفارش والبطانيات ورتبت دولابي والادراج
والتسريحة والكوميدينات وبخرتها وشغلت فيها الفواحه وقفلتها وبعد ماخلصت رحت لغرفة
ماما تنظيف وتمسيح وتبخير ورتبت دولابها وكنستها وغيرت مفرش السرير وغيرت في
الجلسة الارضية الي فيها شوي صارت تفتح النفس
الاحد
ماذكر اني سويت شي يعتبر انجاز غسلت فقط دفعة ملابس بيضا وسويت العشا
ايدام مشكل وملوخية ومصقعة وشاي ووعلى 11 غسلت المواعين وشطبت
المطبخ من الى تمسيح الدولاب والكونترات وغسيل الارضية وخرجت الزباله تكرمون
الاثنين
كنست الصالات ومسحتها ورتبت الصالة الرئيسية ومسحت الطاولات والارفف والتحف
ومسحت المدخل واخذت دوش وصليت واختي سوت الغدا برياني العصر
غسلت المواعين وسويت قهوة جات جارتنا اتقهوو هي وامي والمغرب راحت صليت
وجالسة الحين اتقهوى وافرفر في النت ماصدقت يجي اتصال

شذى الله يعظم اجرك واجر كل الامهات

ياقلبي عليك تعبتي كثييييييير

بس جد جد جد خففففففففففت من الولادة

شذا الله لا يضيع عليك تعب
خفففففففففففففففففففففففت
اللي معك ذكرتني بسالفة قريبة مني
تخيلوا حطوا لها طلق صناعي وسووا لها توسيع من تحت
ولا طلع البيبي كان تعبان دخلوها غرفة العمليات
يمممممممممممممممممه رعب

عهود
شكرا ع وصفة البيتزا اللي بساندوتش
عجبتني
حيييييييييييييييييييل ويكفي انها عجبت بعللولي
عندكم غيرها عطوني
خخخخخخخخخخخخخخخخخخ

اروما الله يعينك ع رعب ليلة الملكة وليلة الدخلة وآخرها الحمل
والله من انخطبت عادي ما بكيت ولا شيء اشوف امي تبكي
مش عارفة ليش ومتنحة يوم جات ليلة الملكة وبعد العقد
هاتك صيااااااااااااااااااااااااااااااااااااااااااااااااااااااااح
اقول انا ايش سويت هههههههههههههههههههه
مدري ايش جاني
وغير دموعي اللي في ليلة الزواج
مشكلتي وحدة صعب تغير من مكان لآخر

بنات الرياض
اختي معها صدفية وبحثت في النت عن علاج شفت ذا






يقولون موجود عند العطارين الباكستانيين في الرياض
فيه وحدة منكم تقدر تشحنه لي وادخل لها حسابه
اذا ما عليكم كلافة

صباح الخير ،،،

شذى دموعي تصب والله ،،

احتري قصة ولادتك والحين تحسفت ،،

الله يعظم الاجر ويرزقك بر عيالك ،،،

يومياتي ،،،

اليوم بعد ردي دخلت المطبخ ونظفته

وصلحت غدانا ساندويتشات روبيان ،

وتحممت وجهزت لبسنا حق الدار ،

تغدينا ولبسنا وجانا الفان 3 العصر

الحمد لله اختباري زين ، ورجعت مع امي

لبيتهم ، تقهوينا وجلست الين العشاء ورجعني

ابوي لبيتي ، عشيت عيالي زبادي ونومتهم 8

ونمت معهم ، وصحيت 12 ، اتابع برنامج ساعة حوار

على المجد العامه ، يشدني هالبرنامج كثيييير ،

تصبحون على خير ،،

بنات ايش رايكم في هذا الفستان؟؟؟

عهود ،،،

حلو الفستان ولونه اعجبني ،،