هلا والله شلونكم بنات
انا ياية ولله الحمد ابشركم انه ولدي طلع سليم والكيس اللي كان براسه اختفى ألف الحمدالله لك ياربي ماخيبتني
كل هذا بفضل الله وسورة البقرة والاستغفار رب العالمين مافي أرحم منه
طبعا رحت موعدي وانا على اعصابي وشوي تأخرت على مادخلوني كان في وحدة قبلي
دخلت وانا قلبي يدق وادعو ربي كل دقيقة وثانية انه يفرّح قلبي بضناي
يات الدكتورة تبع الاشعة وقالت لي المفروض تيني في الاسبوع 26 والحين انتي بالـ 25
وانا اطالعها اقول انشاءالله ماتأجلني للاسبوع الياي
قلت لها دكتورتي قالت لي هالاسبوع وهي ويهها جنه مو عاجبها
المهم هي تعرف شنو المشكلة سيده حطت الاشعة على راس البيبي وقامت تحوس وانا و زوجي عيونا معلقة في الشاشة ناطرينها شتقول
وانا كنت مركزة وجفت انه مافي شي اختفى الكيس الا تقولنا راح مافي شي بس نطرو بتأكد اكثر
كانت وايد طيبة ومهتمة تقريبا جيكت راسه 5 مرات وهي تكبر الصورة عشان تتأكد
وعطتنا كلام اكيد انه راح 100% طبعا شعور لا ينوصف هني انا و زوجي استانسنا
وهي بعد استانست معانا يحليلها تقول انا ماقلت لكم من قبل عشان ماخرعكم لانه هالشي عادة يروح
وسالتها لو ممكن هالكيس يرجع قالت لا خلاص مايرجع
وسوت كل المقاسات راوتني كل جزء من يسوفي حبيبي وسمعتني دقات قلبه وقالت لي انه الحمدالله كلشي تمام وطبعا اذاها كان يتشقلب ويسوي حركات فديته
عطتني موعد 11 يناير هالمرة يعني جدمت يومين وسالتها عن وزنه قالت لي طبيعي لحد الحين وخليتها بعد تتأكد لي من الجنس وطبعا أكدت لي انه صبي على قولتها 101% صبي
عقب طلعت وانا مستانسة و كأنه جبل على قلبي وانزاح
رحت سيده المختبر حق فحص السكر طبعا كنت صايمة 3 ساعات مثل ماقالو لي
عطوني قلاص بلاستيك فيه مشروب غليظ شفاف وايد حالي طعمه يلوع الجبد :sick: شربته شوي شوي وكل مرة اشرب لازم وراه ماي وبقى شوي في القاع ماقدرت اكمله زوجي قالي بس خلاص اكا ويهج انقلبت الوانه خذاه وقطاه بدون ما الدكتور يدري طبعا :lol:
كنت برجعه كذا مرة بس يودت روحي على الاخر عشان ماعيده
بعدين تمينا ننتظر ساعة كاملة وخذو دم واحنا ماشيين وقلوبنا متطمنة على يسوفي :L:
Baby Girl [/COLOR]
أم سلمى [/COLOR]
.. saso_m
