شات حوامل مصر وتجهيزاتهم للبيبي .. لشهر شعبان1432

جمعه مباركه

منى ازززززززيك
ماعملتيش موضوع مباركة لروكا ؟؟؟؟؟؟؟؟؟؟؟

ازيكم يابنات عاملين ايه

الف مبروووووووك لروكا ولميا ربنا يطمنننا عليهم يارب

والله يابنات انتو عارفينني بحب اطمنكم دايما
الحمد لله الامور كويسة او يعني فرحتك بالنونه بتنسيكي كل حاجة تعب الولادة والحمل والتربية وكله
فمش تقلقوا ولا تشيلوا هم
وادعوا كتييييييير لنفسكم قبل الولادة وللنونات ان ربنا يوسع رزقهم ويهديهم لكم
انا كنت بدعي كتير اوي وطبعا دلوقت مش بصلي فبدعي برده بس انا اقصد ادعوا ف السجود وان شاء الله ربنا يستجيب

هحكيلكم بقى قصة ولادتي ف المشاركة القادمة هههههههه

انا يوم الخميس قاعده في امان الله ف شقتي مع جوزي
قررنا ننزل نتغدا بره ونتمشى شوية قلتله يلا بينا
نزلنا اتغدينا...وقبل ماننزل صليت استخارة...اروح لدكتورة تانية ولا لا
ونزلنا وواحنا قاعدين قلتله عايزة اروح لدكتورة فلانة.... استغرب اوي لاني مش بحبها لانها مولدة معظم قرايبي قيصري
فقالي ليه ماتروحي لحد بيحب الطبيعي قلتله انا عايزة دي
قمنا رحنالها...بتعمل سونار قالتلي المية كتير اوي والراس عايمة فوق عشان كدا
استني اما نكشف
كنت طبعا قايلالكم انا مش ناوية اعمل الكشف ده تاني بس استحملت
بتكشف لقت عنق الرحم فاتح قيراطين...طبعا استغربت انتي حاسة بحاجة قلتلها لا نهائي
فوسعت هي بايدها كدا شوية...وقالتلي الحوض كويس ويسمح بطبيعي بس صعب شوية...كمان الراس كبيرة...بس انتي شاطرة وواضح كدا انك بتستحملي الالم...وهولدك طبيعي
صعقنا طبعا...الدكتورة دي اشطر واحدة تولد قيصري
قالتلي ليه؟؟؟ انا بكلمك لمصلحتك انتي... الطبيعي احسنلك وهتقدري عليه ماتخافيش بس هي نونتك ماشاء الله كبيرة شوية وراسها كبيرة عشان طبعا انا كنت قفلت الاسبوع 41 كمان... ميعاد الولادة المظبوط كان 24-6 وانا والدة 1-7
وكتبتلي دخول مستشفى للولادة الطبيعي...وقالتلي روحي وقالت لماما شكلها هتصحيكي على نص الليل كدا فهاتيها وتعالي
ماما قالتلي هنروح على بيتنا بقى..قلتلها ماشي بس هروح شقتي الاول...روحت من عند الدكتورة لشقتي مشي...مسافة كبيييييرة جدا...واحنا ماشيين قلتله بص... عايزة ايس كريم من 911 هههههههههه ده محل عندنا...رحت ضربت الايس كريم المتين وروحت البيت تمشية وماشيين نحب ف بعض...روحت البيت نضفت الشقه وغسلت الحاجات الي ف الحوض ولميت شنطتي وخليت بابا خد الحاجات ف العربية ونزلنا روحنا لبيت ماما مشي... كان الوجع شغال...الطلقة تيجي اقف ف الشارع...استني شوية تروح امشي
وطبعا كان بدأ دم ينزل وكدا

استمر المسلسل ده بقى لحد الساعه 5 الفجر... كان الطلق كل 3 دقايق بقى...
وانا كنت واخده عهد على نفسي مش هصوت والكلام ده
لبسنا ورحنا المستشفى وكلمنا الدكتورة...جت على 7 كدا
بتكشف عليا لقت ايييييييييييه؟؟؟ عنق الرحم زي ماكنت عندها الساعه 8 بالليل...11 ساعة ومافتحش
قالت نعلق طلق صناعي
علقت طلق صناعي وطبعا عينكم ماتشوف الا النور
والطلق كان فظيييييييييع بجد...وانا عماله اعيط واكتم ف نفسي ف كتف ماما...الدكتورة دخلت لقتني مغطية وشي ومحمد هاري نفسه عياط جنبي وعمال يبوس ف ايدي
فضلت تضحك ههههههههههههه
واعدت تتريق عليه وتقولي انتي جايبه الواد الطيب ده منين ههههههههههههههه
بابا قالها اصلهم بيحبوا بعض

ساعة وشوية وبتكشف تاني لقته فتح نص سنتي زيادة
قالتلي بصي كدا قدامك 5 ساعات بالمستريح مادام ماشيين بالمعدل ده
شدي حيلك
شوية وانا ازرقيت جدااااااا
ومابقتش قادرة وبطني شدت جامد وهي عمالة تلف علينا على امل حد يرد عليها بكلمه نكمل طبيعي ولا نقلبها قيصري
ماما تقولها الي تشوفيه
محمد يقولها اعملي اي حاجة المهم ماتتعبش حرام عليكم ههههههههههه

طلعت لبابا قالتله انت شكلك الوحيد العاقل ... اعمل ايه
قالها توكلي على الله ولديها قيصري
وقد كان :)

دخلت العمليات والوجع شغال طبعا الطلق شغال وانا عمالة مش قادرة اخد قرار
لحد وانا على ترابيزة العمليات بقول للدكتورة ينفع اكمل طبيعي قالتلي احنا فيها
قلتلها الصح ايه؟ قالتلي بصي مفيش ولادة سهلة
بس للاسف انتي مش عارفه تاخدي قرار والي معاكي كمان مش مساعدينك ... ركزي كدا وخدي قرار
وانا معاكي للاخر
قلتلها اعملي الي انتي شايفاه ...
قالتلي اقري قران
وادتني التخدير الاول وماحضرتنيش للعملية وانا صاحية...
مافقتش بقى غير ف اودتي...حسيت بس وهما بينقلوني من على الترابيزة للسرير
قعدت كتير على مافقت
والنونة كانت مزرقة لاني كنت مزرقة اوي وكاتمة نفسي كتير مع وجع الطلق
لما ابتديت افوق بقى ماخرفتش زي ماكنت فاكره
لا فضلت اعيط كتيييييييير كان محمد قاعد عند راسي كدا عمال يطبطب عليها..بقيت اقوله انت زعلان مني؟ عشان ولدت قيصري؟
يقولي لا طبعا وبطلي عياط
كل ماحد يكلمني اعيط
ويقولولي بتعيطي ليه اقولهم عشان معرفتش اكمل
وبعدين اعدت اعيط تاني
بتعيطي ليه؟؟ عشان ماما ماعرفتش تذاكر وعندها امتحان بكره

جابولي النونة مابقيتش شايفه طبعا بوضوح وكدا بس شفتها وخلاص
وقلت لمحمد هي حلوة؟ يقولي كل ماحد يشوفها يقول مروه الصغيرة
هي فعلا نسخة طبق الاصل مني وانا مولودة...صورة سبوعي هي بالظبط شكلها
وفضلت طول مانا ف البنج انادي عليه
كل مانطق انادي عليه
لما فقت بيقولي طلعتي اصيله ههههههههه مانادتيش غير عليا

واجت الممرضة وداست على بطني الدوسة الي بتقولوا عليها دي
ولا الدكتورة هي الي داست باين مش فاكرة
بس والله مش تخافوا مش بتوجع ولا حاجة يعني بسيط الحمد لله
هي بتفرق من جسم لجسم
وبصفة عامة الخياطة والعمليات وجعها اقل بكتير ف الرفيعين
وانا اول ماولدت جسمي كلللللللله فشششششش رجعت زي ماكنت لاني كنت ورمانة جدا فكل ده نزل المية دي كلها
ماما بتقولي انتي بطنك كانت كلها مية الدكتورة فضلت تشفط كتيييييييير

وبعد حبة البنج راح وادوني مسكن
وبالليل برده
ولما نزلت مشيت ماكنتش حاسة بوجع اوي لان كان لسه المخدر شغال نوعا ما فكان متوهني
بس انا اساسا كان عندي انيميا ونزيف العملية طبعا زودها فاول ما نزلت دخت اويييييييييييي وماما وخالتي سندوني طبعا حركوني شوية
وشوية شوية الامور بقت احسن ومش تقلقوا خالص الحمد لله

وانا كمان بحاول اتحامل عشان افوق لنونتي بسرعه وماتقلش على حد كمان...
بس مش تقلقوا يعني والله انا نسيت كل التعب ده لما فقت واكتشفت اني ماعنتش حامل
فضلت اضحك هههههههههه

اصعب حاجة بقى لما كنت بشرب وشرقت
ياخبرررررررر الكحة دي فظيعة
ربنا يعديها على خير وافك السلك بقى واخلص ان شاء الله

مرمر الف حمداللة على سلامتك انتى وكارمن وماشاء اللة عسولة و كوبس انها شبهك البت يارا كلها باباها مش واخدة منى حاجة خالص بس عسولة بردو ماشاء اللة

مليووووووووووووووووووووووووون مبروك لميا وروقه ربنا يقومكم بالسلامه ياررررررررررررب

كيتي حبيبتي حمدالله ع سلامتك ياقمر ومعلش طبيعي او قيصري المهم انك بخير انتي والنونه الحمدلله

حمدالله على سلامتك يا كيتي , والله قطعتي قلبي على عياطك انتي وجوزك :(

حمدا لله على سلااااااااااامتك يا كيتى

ربنا يتم نفاسك على خيييييييير ويوسع رزق النونة ياااااااااارب

الحمد لله على سلامتك يامروه انتي وكارمن ويارب يسعد ايامكم بيها يارب وتبقى احلى بنوته في الدنيا ,,,انا تنحت بمعنى الكلمه وانا بقرأ حكاية ولادتك وربنا يسترها معانا يابنتي ويجعل المك في ميزان حسناتك يارب

ربنا يخليكم ليا يابنات والله بجد كل ده مافاكرة منه ايييييييي حاجة وبحكيه عادي ولا زعلانة ولا اي حاجة ... وف يومها والله بقول لمحمد بغض النظر عن اي تعب الموضوع يستاهل...ربنا مايحرم حد ابدا ياااااااارب بجد دي نعمة اكبر من اي نعمة ف الدنيا
كل تعبك بيتنسى لما تشوفي ابنك ولا بنتك وتاخديه ف حضنك كدا وتلاقيه فعلا مالوش غيرك
حتى لو من ايد لايد ... لما بيعيط بيجيلك انتي لو عايز يرضع يجيلك انتي

ربنا يقومكم كلكم بالسلامة يارب وتفرحوا بنوناتكم وربنا يخليهم لكم ويبارك لكم فيهم

وادعولي نونتي دفيانة شوية النهارده وانا بجد تعبانة اوي عشانها
الحمد لله هي سخونية بسيطة بس صعبانة عليا اوي... يادوب لسه كنت هبطل لها دوا الصفرا بكره ولا بعده ... دلوقت هديها دوا كمان وهي يادوب ماكملتش اسبوع

ربنا يبارك لكم كلكم ف ازواجكم واولادكم ويخليهم لكم يارب

صحيح احب اطمنكم هههههههه حاجة كانت قلقاني انا شخصيا
انا وزنت دلوقت لقيت نفسي بقيت 63
وانا يوم الولادة كنت 74
فالحمد لله هانت هههههههههههه عشان كل زيادتي كانت ف بطني والمية الي كنت مورماها دي

*Om Mo3az & Eyad*;15343858:
منى ازززززززيك
ماعملتيش موضوع مباركة لروكا ؟؟؟؟؟؟؟؟؟؟؟

لا والله ياام ميزو مش بعرف اعمل :worn_out:

كيتي اللف حمد الله علي سلامتك انتي و نونتك تسدي انا عيطت و انا بقرأ قصه ولادك بس انتي ليه زعلانه انك ولدتي قيصري و فضلتي تعيطي كله بأمر الله و الحمد لله علي كل شئ ....

مين فقس جديد ياترى؟

ماجدة
مش عارفه والله كنت بعيط ليه حسيت اني دلوعة ومش بستحمل وان هيقولوا عليا خايبه هههههههههه

يويا ازيك.. انا فقست خلاص

منا عارفه انك فقستى يا مروه قوليلى احاسيسك المبعثره بالنسبه للامومه

وتعالو شات امهات انا بتعب من المشوره والله

حمد الله على سلامتك ياقمر وسلامه كارمن ربنا يخليهالك
وهو فعلا الموضوع يستاهل ربنا يرزق كل اللى عاوز يارب

الحمد لله عى سلامتك يا مروة وعلى سلامة النونة وتكبر كدة وتحلو وصحتها تبقى احسن ان شاء الله
ربنا يخليكوا يا يا بنات ولكل اللى دعالى الحمد لله الجو هدى شوية

مرمر اية دوا الصفرا دة اصل الدكتور قالى ملهاش دوا و هى نسبتها كانت كام يامرمر

مرمر حبيبتى تعبتى كتير فى الولادة يارب يكون فى ميزان حسانتك يارب ويباركلك فى كارمن وتشوفيها عروسة ماشاء الله دى عسولة خالص ربنا يحميها يااااااااااااااارب


ده لينك المباركة لروكا قلب طفلة

http://forums.3roos.com/showthread.php?p=15346607#post15346607