عندي مشكلة ساعدوني جزاكم الله كل خير

اولا انا بدخل بالموضوع مباشرة
مشكلتي يا جماعة ... اني ملتزمة بعملي بس مسئولي المباشرة مو بالعني لانه مختلف مع المدير اللي واقف بصفي وكل ما قال المدير شيء رحت سويته انا مالي شغل بالهوشة اللي بينهم بس مسئولي المباشر حاطني في باله واني صوب المدير وحاط علي X
المهم بعد فترة صار سوء تفاهم بيني وبين وحدة من البنات وهي اللي غلطانه ومع هذا وقف مسئولي بصفها وهو يدري ان الغلط منها بس علشان يقهرني ويرد على المدير بشكل غير مباشر انت مع هذيك وانا مع هذي (بذمتكم هذي حاله)
المهم عقب هالسالفة مسئولي المباشر سحب شغلي تحجج باي سالفة المهم اخذ شغلي وعطاه البنت هذي وهي ما تعرف كوعها من بوعها وعفست الدنيا فوق تحت وبالاخير هدت الشغل خلته حايس بين فلان وعلان عقب كذا شهر رجعوا يتأسفون مني واحنا الغلطانين بس خلصي شغلك لانه عليه يترتب اشياء ثانية ..... الخ
المهم بعد كم اسبوع وبعد روحه ورجعه رضيت بس لازم كل وحدة توقف عند حدها انا على نيتي ما ادري شنو صار اثاري لما سوو المشكلة وزعوا اشياء على ربعهم واخذوا اغراض وايد مو من حقهم وطبعا ما كتبوا فيها اي وصل وبالتالي صار عجز ونقص بالاغراض يعني مو مثل ما خليت شغلي بالمرة وفوق هذا يطلبون اغراض بالهبل وما ادري وين تروح واحيانا كثيرة الاقي مسئولي يقول لي اطلبي لي هالاغراض باعداد كبيرة ولما توصل ما يسلمني اياها لأ يخليها بمكتبه وبالتحديد تحت رجله (والله على ما اقول شهيد)يخشهم تحت المكتب ولا من شاف ولا من دري الا اذا انا قمت اتحري واسأل الاغراض اللي طلبناها وين راحت وبالاخير يطلعها لي من تحت المكتب ويعطيني ياها (للعلم تري الاغراض تكون عنده بالشهور وتحت رجوله يعني لايمكن نسي كل يوم شنو تحت رجوله)
المهم انا ما رجعت لشغلي الا بعد ما شفت هالاشياء ولعلمي بانهم بيدبرون لي مصيبه يلزقونها فيني وانا مالي ذنب رحت لمساعد المدير وقلت له ما سوي لي شيء رحت للمدير وقلت له واستانس لما سمع هالكلام قلت له تري انا بريت ذمتي منهم ولا لي شغل بشغلهم وقلت لك اللي صار وانتو كيفكم بعد كم شهر ولا سوي المدير اي شيء
الحين مرت سنه على هالموضوع ومسئولي مجمدني عن الشغل ما يعطيني اي شيء اسويه وانا بروحي اسوي الشغله هذي او هذيك وارجع له بس اهو يطالعني ويسكت
حاليا عندنا تقييم للموظفين وحط لي درجة اقل من كل مرة وانا رفضت اوقع على النتيجة اللي حطها لي ومن يومها ما شفته ولا راضي يسلمني الورقة وكل ما اسأل عنه ما الاقيه
رحت للمدير بقول له مو قادرة اشوفه عنده شغل وايد وصعب ادخل عليه

بذمتكم قولو لي شسوي انا منقهره ومنبطة جبدي هذا جزا اللي يقول الصج هذا جزا اللي يخاف ربه ولا ياكل مال غيره هذا جزاي