التجمع السابع لحوامل شهر فبراير

ام ملاك الله يعين بس شكله مابقى الا حنا
دام موعدي ماراح الى الان هذا شي يطمن
ان شاء الله بروح امشي اليوم لعل وعسى تقولي الدكتورة ان الجنين نزل للحوض
لان المراجعة اللي راحت لسا مانزل
اليوم احس اني خفيفة وبطني خفيف وش السبب برايكم؟
الحمد لله على السللامة للي ولدوا

أريـــن;14471222:
ميقات يالله الحمدلله على السلامة
بس ليه طقتك مع راسك وانتي بترجعين؟
كان رجعتي عليها تستاهل خخخ

الهنوف ان شاء الله ولادة

واللي ماولدوا شوفوا الجانب الايجابي من الموضوع
ان عيالكم بيصيرون اصغر خخخخ

الله يسلمش حبيبتي ارين

ما ادري فيها الهبله تبي تجر الزيله علشان ماارجع على الارض وطقت راسي ابها دفعتها دفعه قويه يالله الحمد لله جت سليمه

أم مــــــلاك;14471555:
مساء الخير
شخباركم اليوم كروشات
عسى في أخبار طيبة:)
ميقات, ياااا الله قصتش مؤثرة:'( و تخرع بعد :hysterical: الحمد لله على سلامتش و سلامة زينب و تتربى في عزكم، و عن الحليب خيو أنصحش تاكلين يوميا كف ايدش سمسم، و تشربين حلبة بعد و إن شاء الله يدر عندش الحليب

هلا والله خيو ام ملاك

الحمد لله الكل تمام وننتظر ولادتكم على احر من الجمر
الله يسلمش حبيبتي وعلى السمسم هاليومين اكل عصيد ومرشوش سمسم وايد لذيذ يم يمي هههههههههههه:thumbs_up: الحلبه لين الحين ما اكلتها:rolleyes: وان اء الله نشوف الحليب ههههههههه

شخباركم بنات وحشتوني كلكم من زمان مادخلت البيبي مأخذ كل الوقت وابتدت المدارس وصاير مافي وقت.  

فرقـــودة : حاولي ترضعينـــه , لان اذا تيبس صدرش اكثر ترتفع حرارتش وتصيدش سخونـــه
,, اخذي فوطه مبلله بماي دافي , ودلكي الصــدر
وحاولي ترضعينــه , واذا عن الألم والتشقق ويلااااااه
حدث ولا حرج , اني قام يطلع دم من الحلمه اذا أرضــع الكتكوتـــه
وقمت استخدم كريم أفالون ,, الحمد لله خفت التشققات وبالتالي خف الألم عن قبل

الله يعينـــا بس , هذي ضريبــة الأمومــــة
الحمد لله

حمدالله على سلامتش فرقد والف مبروك المولود ويتربى بعزكم إنشاالله بعدي ماقريت شي بس صفحة بروح اقرأ كم صفحة باي

:thumbs_up:

جمال الزهره;14472977:
الحمد لله على سلامتج وسلامـــة زنابـــــي
وعن الحليب حبيبتـــي , قولي لهم ياخذون لج حلبـة من الحواج وياريت تكون مطحونه واكليها مع الرشوفة أو ابليعها ويه ماي ,, وااجد الحلبة زينه وتزيد الحليب
وعن أبو صفـــار حاولي كل ساعتين تعطين الكتكوتــه سوائل
يعني حليب من صدرج أو صناعــي وخلي الوالده تفوح لها شويــة حلوه وياها نبات عشان تتقبله الكتكوتـــه , أو تقدرين تنقعسن لها تمره في ماي حار وبعدين صفيهــا لها وعطيها إياها

وان شــاء الله ما عليهــا شــر :thumbs_up:

الله يسلمش حبيبتي جمال شخبارش وشخبار الكتكوته اباء؟؟؟

ان شاء الله اقول الى امي تسوي لي حلبه

اايي ابو صفار امتعبنها وامخوفني صايره عيونها صفره وايد والماي ما تبي تشربه واسوي ها مرضعه ما تشربها كامل واذا شربتها تصيح من الغازات والله يعدي هالفتره على خير وان شاء الله اجرب اسوي التمره

ومشكوره خيو

الفرقد 23;14473134:
سلااام \\
ميقات \\ الحمد الله على سلامتش ,, وان شاء الله تتشافين بسرعه ,, وحاولي تاكلين اشياء تطلع الحليب عشان ترضعين بنتش
ابو صفار كرية ويروح بكثرة الرضاعه ان شاء الله ,, !!
بقول لكم اني مو قادرة ارضع حسون ,, كل ما يرضع صددري يألللمني عدددددددددددل ما اقدرررر عددل ,, بس يكسر خاطري اذا اعطية المرضعه ,, وابي ارضعه من صدري الان كلش صغييير وزنة ولازم ارضعه طبيعي عشان يكبر شووي ,, ويش اسوي ,,
استخدم كريم بالمرز حق حلمات الصدر بس ما احسه يفيد !!

الله يسلمش خيو فرقوده ... شخبار حسون؟؟؟؟


على الحلمات اني بعد متشققين عدل اذا حاولت ارضعها اقعد اصح من الالم واستخدم كريم بالمرز وبدون فايده وخواتي قالوا لي اعصر من الحليب وامس الحلمه فيه بس بعد ماكو فايده وعلى طول استخدم حفاظات الصدر بس بعد نفس الننتيجه

ღام عبودღ;14474624:

بنات باركو حق برائة عروسه :lol:

ولدت الحمدلله اليوم
جابت بنوته (نبراس)
عقب معاناة 3 ايام في السلمانية

الحمد لله على سلامتها وسلامة نبراس والله يخليهم ويقومهم بالسلامه

أم مــــــلاك;14480191:
غرور الشوق, ألف الحمد لله على السلامة
بس ما خبرتينا ويش جبتين؟

حلوة الخليج, هنوف إن شاء الله أكيد ولدت
بس فتون وينها!! لو ولدت أكيد بتطرش مسجات حق اللي عطتهم رقم تلفونها

سبرايز اني هني .خخخ
ام ملاك شطوره تعرف اني لو ولدت بطرش مسج

اني شوي تعبانه
ونفسيتي داااااااون:(

أم الأقمار الثلاثة;14476384:



الحمد لله على سلامتش وسلامة البنوتة

صج الولادة معاناة ولا عاد إذا صادفتِ ناس ما تحس ولا عندها في قلبها رحمة

والله يعينك ويعيني على الخياطة متى يطيح الخيط ونرتاح

بالنسبة للحليب أكلي سمسم ورهش (الحلاوة الطحينية) وكثري من الشوربات لأن الشوفان يزيد الحليب

وعلى أبو صفار علاوينا من أمس أحس أن عينه مو صافية وفيها صفار حاولت اتذكر الاشياء اللي تفيد لأبو صفار لكن ذاكرتي للأسف ميح فقلت بسأل أمي أو عمتي

الله يسلمش خيو ام الاقمار
اي والله معاناة مع الخياط للحين يألم وما اعرف اتحرك زين ولا انام على ظهري وبطني وغير القعده اكو قلت الى الحجي يشتري لي طوق الي نقعد عليه لان جوانبي عورتني من كثر قعدتي ونومي على جنب
اايي خيو ان شاء الله باكل هالسوالف الله يسمع منش ويذر صدري حليب علشان الكتكوته
وان شاء الله علاوي ما فيه الا الخير وما تشوفون شر بس اذا شاكه فيه وديه المستشفى احسن للأطمئنان:thumbs_up:

ضحكة كذوووووووووبة;14476408:
الحمدلله على سلامتكم .................. فرقودة ووميقات العمر وام فاطمة وبرائة عروس والعروس النائمة
يتربون في عزكم الصغار


اللي تسال عن الحليب ............ الكمثرى والروب وعصير الجوافة من تجربتي يدر ون الحليب
حاولي قبل ماترضعين تشربين سوائل واشياء دافية

عروس ربي يسهل عليج ان شاء الله

ربي يحفظكم ويحفظ عيالكم

الله يسلمش خيو
الا شخبار البيبي وشخبارك معاه؟؟؟

أم الأقمار الثلاثة;14476803:
قبل لا أكتب قصة ولادتي بأكتب لكم الأشياء اللي سويته قبل لا أولد

كل يوم قبل لا أنام كنت أقرأ أدعية تسهيل الولادة الموجودين في الملف المرفق واللي حطته وحدة من الكروشات بس نسيت من :worn_out:

أدعية تسهيل الولادة

ثاني شيء سويته هو المشي

طبعاً زي ما قلت لكم من قبل أنا شفت افرازات مخلوطة بدم يوم الأحد ..

يوم الأثنين ما شفت شيء

يوم الثلاثاء كانت الافرازات مستمرة من الظهر الى يوم ثاني

يوم الاربعاء بدأ الألم من الساعة 4 الفجر وكان يروح ويرجع .. على الساعة 6 الصباح جلست أحسب الفاصل بين كل ألم وألم ... كان الألم كل 5 دقايق يعني منتظم بس كان الطلق خفيف وما كان يستمر أكثر من 30 ثانية

الى الساعة 9 والألم ما كان يزيد فجأة حسيت بشيء ينبط داخل قمت عشان أروح تكرمون الحمام ما لحقت أوصل الا الماي نزل بس كميته كانت قليلة.

كلمت زوجي وكان راجع من الدوام وبدأت تجهيز أولادي وجهزت نفسي وسويت لي منقوع الزعفران وحطيته في الشنطة كنت ناوية اشربه لما أوصل المستشفى بعدين غيرت رائي وشربته في السيارة

وصلنا المستشفى على ما خلصت اجراءات الدخول دخلت على الدكتورة فحصتني لقيت الرحم فاتح 4-6 سم خلوني اغير ملابسي وركبوني غرفة الولادة

ركبوا عليّ جهازين واحد لنبضات الجنين والثاني ما أدري حق ايش

وحطوا عليّ مغذي وجت الممرضة وحطت إبرة في المغذي عرفت بعدين أنها لتسريع الولادة

جت الدكتورة بتفتح كيس الماي ولما دخلت العصا عشان تفتحها ما شافت شيء نزل سألتني نزل عليش الماي قلت ليها اي قالت واجد قلت لها لا قليل مع انهم سألوني في الاستقبال وقلت لهم نزل الماي ولما أخذوا الضغط ردوا سألوني وقلت لهم

المهم جهزوني وخلصوا وقبل لا تطلع الدكتورة قامت توصيني لا تدفعي الا اذا قلنا لك تدفعي وطلعت الدكتورة والممرضتين اللي معاها وظلت ممرضة ويايّ

كان الألم يروح ويجي وكنت أحاول اتصبر وأشغل نفسي بالتسبيح لكن بعدين وصلت لمرحلة خلاص مو قادرة جلست أصارخ واتقلب على السرير يمين وشمال وشوي ودي اشيل الاجهزة المركبة عليّ

والممرضة تقول لي تنفسي لا تصارخي

وانا كلما احاول اتنفس مو قادرة خلاص الألم لا يحتمل واني اصارخ ومفزعة العالم وهي تقول لي لا .. لا .. تنفسي واني اقول لها ما أقدر

وجلست أصارخ عليها وين الدكتورة ؟

قامت تسألني زي سوي براز ؟؟ وأنا اصارخ

بعدين جت الدكتورة والممرضات .. اللي ولدتني الممرضة (قابلة) بس كانت الدكتورة موجودة تشرف على الولادة

كنت أصارخ ومو قادرة أدفع وكلما اشتد الألم قمت سكرت ارجولي والممرضة تصارخ عليّ أدفعي .. اعطي مجال للبيبي .. وانا مو قادرة .. وكان الراس باين بس ما كان يطلع

واسمع الممرضة تقول للدكتورة It is so tight والدكتورة ما تبغى تسوي توسيع بس لما شافت الوضع أنه مافي مجال سلموها المقص وبعدها حاولت ادفع اكثر وكلما احاول احس مافي فايدة وبعد عدة محاولات حسيت بشيء ينزلق وبعدها بشيء دافي ينزل وراه

أخذوا علاوي حبيبي وعلى طول رفعوه وحطوه فوق الشرشف وبعدها قصوا الحبل السري واخذوه ينظفوه ويفحصوه وانا ظليت على السرير لا حول لي ولا قوة

قالت لي الممرضة بعد شوي بنطلع المشيمة وتركوني فترة وبعدها جت الممرضة وطلعت المشيمة

وبعدها جت الدكتورة وخدرتني وبدأت الخياطة .. كنت أحس بنغزات واحس بالخيط وهي تخيط وما خلصت واني مصدقة ..

وجابوا لي علاوي عشان اشوفه وقربته مني الممرضة عشان ابوسه

وتوتة توتة خلصت الحتوتة .. حلوة ولا فتفوتة

الحمد لله على النعمة ... الله يرزق كل المحرمين ببركة هذا اليوم ..

الحمد لله على سلامتش وسلامة الكتكوت

Ms.Sugar;14478016:

الله يسااعدج ميقاات حسيت بالالم من قصتش بس يالله ربش كريم اهم شيء سلامتش وسلامة الصغيرره تتربى بعزكم ان شااء الله ..

من ناحية الاشياء الي تدر الحليب ماقصرو البنات .. والله يعطيش العاافيه ان شااء الله..



....

هلا والله موجه الله يسلمش حبيبتي وما قصرتي

غرور الشوق;14480124:

هلا وغلا


حبيت ابشركم اني ولدت بعد معاناة الطلق الصناعي

هلا غرور الحمد لله عل السلامه بس ما قلتي شنو جبتين؟
والله يخلي الكتكوت او الكتكوته

بنات بقول لكم شي قولوا لي شنو اسوي مع الخياط تعبانه حدي ما اقدر انام على ظهري ولا بطني ولا اقعد وبس على الجوانب ولا اعرف اتحرك واذا بقوم لازم احد يسحبني لاني ما اقدر اقوم ولا اتحرك عدل واستخدم كريم ميبو بس بدون فايده حتى تكرمون الحمام ما اقدر ادش والسبب الخياط تعبانه منه ومن صدري متشقق

مييقات انا اتذكر بولدي الاول اسوي منقوع المرة
احط موية دافية بقارورة ومعها مرة واحركها بعدين اصب شوي منها على الفوطة والحمدلله يخفف علي بس عند الحاجة سويها
وبعد اذا تعرفين خوا جوا تحطينه مع زيت زيتون وتمسحين على الجرح ممتازة وان شاء الله ١٠ ايام والخيوط طايحة

ميقات حبيبتي نصيحة للخياطة قبل ماتطيح ماتستخدمي غير غسول بيتادين
بعد ما تجفيفي المنطقة عدل طبعا
وبعدين حطي كريم ميبو
بس ترى البيتادين يكون مركز يعني من العلبة بدون تخفيف
ودعواتك ربنا يفرجها علي واولد

والله شكلي مطيحة عندكم الله يعينكم تحملوني
ميقات
انا مريت بحالتك في ولادتي الاولى حتى ما اقدر اتقلب ع السرير ع جنب واحد وحتى صياح قمت اصيح
لحد ما جربت المرة اشرب من منقوعها
و اتنقع بموية دافية مع وصلة مرة صغيرة << يعني منقوع المرة
و الله ياني حسيت اني توي مولودة من خف الالم عني
الله يكون بعونك و يفرجها لك
جربي و ادعي لي بالولادة السهلة

هلا كروشات اخباركم صايرين حده خامل التجمع الفرقد حاولي قدر المستطاع انك ترضعين حسون لانه اذا ما رضعتيه بيزيد الوجع بعيد الشر وعمليله كمدات ماي ساخن الله يعافيكي ما تشوفي شر
برائه عروسه وغرور الشوق الحمدلله على السلامه ومبروك ما جاكم والله يديم عليهم الصحه والعافيه