•• 3 تجمع أمهات نوفمبر 2010 لشهر صفر••

جحة
معلومات حلوة
يعطبج العافية ..

وردة
حلوة الاناشيد

وينكم
صفوي وام حمود
شخباركم

سلام

شخباركم

انقطعت عنكم كم يوم

كنت ادش اقرا الواجب واطلع

مالي خلق كلش ارد

كنت احاتي نتائج اجامعة وخايفة اني رسبت

وتوني متشجعة من شوي وجيكت من الموقع

والحمدلله طلعت ناجحة لكن المعدل نزل

لكن بالنسبة لي تحدي وانجاز اني نجحت مع الظروف الا مريت فيها هالفصل

من حمل وثقل وتعب وولاده وربى طفلة

وبالنسبة الى التجمع كل مرة اقول بجي ويصير ظرف يمنعني

لكن هالمرة بصر على الجية ان شاء الله

بس لا تخلونها في الويكند

حبك حياتي;14322273:

رد روز

الحمدالله انش نجحتيين

اني بعد احااتي النتاائج على ناار الله يستر :-#

ذاك الكورس من النساة انقصف قصااااف ونزل عدددددل

وهالكورس الله يستررررررر

اني بعد داك الكورس انقصف من الزين وصاروا عليي مواد

لو نجحت فيهم جان هالكورس تخرجت

لكن يلا شوفة بتي قدامي تنسيني كل شي

red ro0ose;14322482:
اني بعد داك الكورس انقصف من الزين وصاروا عليي مواد

لو نجحت فيهم جان هالكورس تخرجت

لكن يلا شوفة بتي قدامي تنسيني كل شي

الواجب طويل ويبرد القلب

لكن مفتقدة ألم أم حمود وبشدة؟؟ عسى المانع خير

جحة وردوه مشكورين خلفات الجبدات

على التجمع اتفقوا على يوووم ينااسبكم كلكم عشان يجوون

اني اي يوم يناسبني

زهورة شكلش نمونتي اقعد من الصبح

حبك .. افتكيتين وعطلة ممتعة * _ *

رد روز الحمدلله عديتينها على خير

وفوووي وزهور وام زهاري وزهورة وباقي البناات شخباااركم؟

نسيت أقول ان تاريخ 27\1 يصادف عيد ميلادي وترى هو أول يوم من آخر دورة ليي وعقبها حملت

بس اني في لين يسألوني في مواعيدي عن آخر دورة كلة أقول 28\1 بذل 27 لأن تاريخ الولادة المفروض يكون 3\11 فعشان جدي غيرته على كيفي لأني ماحب الأرقام الفردية حتى يصير 4\11 لكن سبحان الله ولدت في التاريخ إله المفروض أولذ فيه بالضبط 3\11

ههههههه بقووي عجيييب عيد ميلاادش

ويا الرواااتب loool

عجل أني 18-2 الناس كلها مفلسة خخخخ

أي عنوووب ههههه

بقَايا حُلمْ;14323468:
نسيت أقول ان تاريخ 27\1 يصادف عيد ميلادي وترى هو أول يوم من آخر دورة ليي وعقبها حملت

بس اني في لين يسألوني في مواعيدي عن آخر دورة كلة أقول 28\1 بذل 27 لأن تاريخ الولادة المفروض يكون 3\11 فعشان جدي غيرته على كيفي لأني ماحب الأرقام الفردية حتى يصير 4\11 لكن سبحان الله ولدت في التاريخ إله المفروض أولذ فيه بالضبط 3\11

بنسوي لش حفلة وش كبرها :adore:

عنوب;14323500:
ههههههه بقووي عجيييب عيد ميلاادش

ويا الرواااتب loool

عجل أني 18-2 الناس كلها مفلسة خخخخ

وبعد بسوي لش حفلة وش كبرها

وردة البرية;14324936:
وبعد بسوي لش حفلة وش كبرها

:adore:أني فديتش انتيييين:adore:

:D:D:D

صباااح الخيير

اني مستااانسة حدي

جتني الدورة وانتو بكرامة اليوم

وصار تاريخ 26 لي حدث مميز :D
اخر دورة لي كانت بهالتاريخ وجتني اول دورة لي بعد الولادة

وبعد اليوم المعااش له :lol:

لاني كله كنت خايفة واقول فيني لوعة وراسي يدور وبحمل ومادري ويه:thumbs_down:
وزوجي يقول لي من وين من الهواء تحملين او على الريحة:lol: ويتطنز علي:o

طق المطر طق .. طق المطر طق

طق المطر على قطر طق خخخخخ>>كنا نغيها وحنه صغار

والحيين قمت اهلوس من الفرحة

سلام شخباركم
أمس بس طليت وما رديت رحنا أول أمس المنامة بيت جدي وحمود ذبجني صدق ما يسوى طلعة ويه جهال إلى درجة حتى ما راحت المأ,,, ويوم ثاني الصبح رديت رحت بيت جدي لأن أخذت إجازة ما في أحد يجود حمود وسوه إلي روحه مؤدب ونام الصبح بس عقب قعد ويالله عفسني من الصياح وقام يزوع إلي وسيده اتصلت لأبوه وقلت إليه أخذه بيت جدك ما في شده خله شوي ارتاح،،، واليوم رجعت الشغل إن شاء الله أخلص من وقت
احين برد عليكم
ورود يبغي إلي احفظ الأغاني
جحة مشكورة على المعلومات
بقوي كل عام وأنتي بخير وعقبال المليون
وفوي عملية بواسير اسم إلا عليش
تنهدات شخبارش وشخبار حمود
حبك الحمد لله افتكتين من الامتحانات وإن شاء الله تجين تبشرينا بالنتيجة
رد روز مبروك النجاح والحمد لله أهم شي نجحتين شوفي بقول إليش المعدل صار مو مهم أكوا احنا جبنا معدلات عدلة ما أشوف أشغالنا عدلة خيو أهم شي شهادة وشهادة من جامعة أوكي لان تعرفين أزمة الجامعات أحين وان شاء الله تحصلين تتخرجين وتفتكين
أم شهد شخبارش
ألم الزمان ما بينت عسى المانع خير وإن شاء بتش صارت احسن احين ويه المضاد
أحبك والقمر يشهد شخبار فطوم
ريما بعد من فترة ما طلت اكيد مشغولة ويه البنات
عنوب شخبارش وشخبار تامي وياش وإن شاء الله يجي عيد ميلادش ونسوي إليش حفله
صفوي شخبار الجو عندكم وشخبار فطوم
عشوق بالعافية على السيد للثياب وإن شاء اليوم إلا تفصلون ثوب عرسه يارب
بعد مين إذا نسيت احد سامحوني

شخبارركم بنات

وحشتوني حدكم ..

شخبار الامطار وياكم ؟؟ ...

اني وحدة ماحب هالاجواء ... احس الجو صاير كئيب بره .. وف نفس الوقت ابي اروح بيت ابويي وخايفة اطلع في هالجو ويه بتي .. :|

جاي ع بالي اكتب ليكم قصة ولادتي ... ههههههه .. حددي متفرغة لا .. :lol:

ان شاء الله يمديني اكملها قبل لا تقعد فطوومة .. :D


الله يسلمكم اني كان المفروض موعدي 13 -11 ...

قبل هالتاريخ كان عندي موعد عند دكتورتي الا اتابع عندها .. وكان المفروض اخر موعد ليي عندها خلاص .... طبعا اني المواعيد الا طافت كان كل شي اوكيه الحمدلله .. والراس كان تحت والبيبي متهيأ للولادة خلاص .... الا في آخر موعد رحت الا قامت الدكتورة بتجيك وضعية الراس بايدها ... شفتها نفس الا مستغربة .. الا تقول لي قومي بسوي لش اشعة ... رحت وسوت ليي اشعه ... الا تقول ... الراس مو تحت .. البيبي غير وضعيته .. وخلاص الحين ما يصير تولدين الا قيصرية :confused::|:hysterical: ... قلت ليها ويش السالفة يعني ما في امل ؟؟ :confused: .. الا تقول البيبي في الشهر التاسع ما يتحرك بسهولة يعني احتمال ضعيف ان يرد يرجع الراس تحت ... باجر ضرووري تروحين السلمانية عشان يحددون ليش موعد للعملية :(:'(:'(

طبعا طلعت من العيادة واني راسي داير عليي .. اقول سبحان الله ويش الا خلا الراس يتحرك يوم خلاص قربت ولادتي .. وقعدت اضرب اخماس في اسداس ... اقول اكيد اني بمووت اذا ولدت طبيعي .. من زوود الالم .. عشان جدي حكمة الله خلت الراس يتحرك في اخر لحظة عشان اولد عمليه هههههههههه :lol: شفتون جيفه التفكير :lol::lol:

المهم .. كنت حددي خايفة من سالفة العملية ... رحت وقلت لامي الا صار ... قالت ليي لا خافين .. وعطتني خلق جايبنها ابويي اللعام من العراق .. وقالت ليي صلي على النبي وامسحي بها على بطنش ... وما في الا الخير ...

وسويت الا قالته ليي .. ويوم ثاني رحت السلمانية ونقعت ليي شوي ... بعدين دخلت الا هناك دكتورة منقبة :struggle: .. قلت ليها السالفة الا تقول قومي بسوي لش اشعة ... وحطت عليي الاشعة وظلت يمكن فوق ربع ساعة هي حاطة الجهاز على بطني مادري ويش تدور :lol: .. وحتى وهي تجيك بايدها تجيك بالعداااااال عددل كأنها خايفة ... اغلب الظن ان هي دكتورة جديدة او ان هي تريننغ مالت جامعة .... المهم عاد بعدين الا تقول ليي ... اي راس البيبي صاير مو تحت ... صاير على صووب :confused: بس اذا تبين تتأكدين عقب شوي بتجي الدكتورة خليها تسوي لش مرة ثانية :hysterical: ... قلت ليها اووكيه .. وطلعت برا ومرة ثانية نادو عليي .. الا طلع ان ما ف دكتورة .. في بس دكتور رجال :struggle: .. قال ليي قومي بسوي لش اشعة ... وافشيلتاه :hysterical:
طبعا من زهقة سالفة العملية ومن خوفتي .. وافقت ان الدكتور يسوي لي الالتراساوند عشان اتأكد ان الراس تحت لو لا :thumbs_down: ســوا ليي الاشعة الا يقول للدكتورة المنقبة ... خوفتين البنية ... الراس وضعيته طبيعية وصاير تحت وما فيه شي :biggrin: قلت ليه عجل ويش السالفة ليش الدكتورة امس قالت ان الراس فوق ... الا يقول يصير ساعات جدي في حالات نادرة ان البيبي يكون الى الشهر التاسع يتحرك ووضعيته مو ثابته .. بس انتين لازم من باجر كل يوم تروحين حق تخطيط لأن خلاص طاف موعدش ... ووقت الا يجيش ألم الولادة .. لازم بنسوي لش التراساوند مرة ثانية عشان نتأكد اذا الراس تحت لو لا ..

يــوم ثاني .. رحت جدحفص حق تخطيط .. وفي الطريق قلت لزوجي يشتري لي كاكو وعصير عشان اكلهم عشان ما يغربلوني في التخطيط .. رحت الا تقول ليي السستر .. خلاص اكلتين .. قلت لها اي .. الا تقول .. شنو اكلتين .. قلت لها كاكو وعصير :D .. الا تقول لالالالالا كاكو ما في زين .. لاااازم سندويج ... عشان التخطيط يصير زين وما نعيده مرة ثانية :hysterical: .. راح زوجي واشترى لي سندويجة جبن واكلتها بالغصب كنت شبعانة .. :confused: .. ورحت سويت التخطيط وطلع الحمدلله زين .......

اليوم الثاني .. في الطريق قال ليي زوجي .. يلا بشتري ليش سندويجة :biggrin: .. قلت ليه لالالالا كلش مووو طااايقة ,,, الا يقول ليي واذا صار التخطيط مو زين ؟ :study: .. قلت ليه يعني التخطيط ما بيضبط الا بالسندويجة .. :-#!!!!!!!! .. أكلت لي شي خفيف ورحت ..
حطو علي التخطيط ,, جت السستر .. الا تقول الساعة جم اكلتين ؟ قلت لها توني قبل لا اجي .. قعدت تحوس في بطني وكل شوي تقول ليي تعالي على هالجنب وتعالي على هالجنب .. بعدين شالت التخطيط .. وقالت ليي روحي اكلي لش شي وتعالي بنعيده لش لان التخطيط مو زين .. :| ..

راح زوجي جاب ليي عصير الربيع برتقال .. وشربته .. وعادو ليي التخطيط .. الا تقول السستر .. التخطيط بعد مو زين :!!: لحظة بروح براويه الدكتورة وبشوف ويش تقول .. راحت داخل وجت الا تقول... الدكتورة تقول التخطيط مو زين ولازم ترقيد :hysterical::hysterical: ... اني تضايقت حددي لأن كلش ما كنت مستعدة ولا حاطة في بالي الترقيد ... قلت ليها ما يصير اروح الحين وباجر الصبح اجي ... الا تقول لا .. لازم يحطون عليش تخطيط طول الليل ويشوفون اذا التخطيط اوكيه او لا ... :hysterical: .. اتصلت لامي وخبرتها .. وبعدين جابو ليي ثياب الولادة :confused: لأن كانو بيدخلوني داخل جناح الولادة وبيحطون عليي التخطيط هنااك ... :confused: .. لبستهم واني فاطسة على روحي من الضحك .. لأن ما فيي الم ولا شي ... وما كنت متخيلة شلون بدخل جناح الولادة واني ما فيي شي ... :struggle:... دخلووني .. وحطو عليي التخطيط.. وقضيت ليلة كئييييبة حدها ... ما في الا صوت الصراخ .. والسسترات رايحين جايين .. والتخطيط الا مضايقني طووول الليل ... ما عرفت انام ولا ثانية ... وصادني خووف عدل من الولادة .. لأن طول الليل كنت اسمع صوت الصراااخ .. وحسيت ان الولادة فلم رعب ...

يوم ثاني ... جت الدكتورة .. الا تقول ليي الحمدلله التخطيط بالليل كان زيين .. بس بما ان انتين البارحة كان تخطيطش مو زين ..فممكن ان في اي لحظة يرجع التخطيط يصير مو زين .. وانتين ف ك الاحوال موعدش طاف ... يعني الحين لازم طلق صناعي ... :confused:
لا حول ولا قوة الا بالله ... من شي الى شي ثاني :hysterical:...اني مادري ويش هو الطلق الصناعي ولا جربته ... بس كنت خايفه منه واجد وكنت خايفه اني ما اتحمل الالم ... وف نفس الوقت كلش ما كنت مستعدة نفسيا ذاك اليوم ان يحطون علي طلق صناعي ... طبعا هالكلام كان يوم الاثنين .. قلت للدكتورة اني من قبل قالو ليي اذا ما جاش الطلق الطبيعي الى يوم الخميس ... بنحط عليش طلق صناعي ... فليش ما انتظر للخميس واشووف يمكن يجيني الطلق ... الا تقول بس ما تدرين يمكن خلال هالايام ف اي لحظة التخطيط يصير مو اوكيه ... ومو زين للبيبي يتم ف البطن اكثر دامش مطوفة موعدش ... :(

وظليت في حييرة .. بين خوفي على البيبي .. وخوفي من الطلق الصنااعي ...

قالت ليي الدكتورة اذا تبين بنخليش عندنا الى يوم الخميس .. وكل يوم بنسوي لش تخطيط مرتين .. اذا صار التخطيط مو زين في اي لحظة .. مباشرة بنحط عليش طلق صناعي .. واذا بعد ما جاش الطلق الطبيعي للخميس .. بعد بنحط طلق صناعي ...

ارتحت الى هالاقتراح ... وحسيت ان هو انسب شي ... وطبعا ما طلعوني من جناح الولادة الا اول وقعنا اني وزوجي ان ما نبي طلق صناعي الحين ... :celebrate:

وتميت مرقدة ف المستشفى الى يوم الخميس ... وكان من هالايام ايام العيد ... يعني عيدت ف المستشفى :lol:
المهم .. والى يوم الخميس واني انتظر الطلق يجيني ... ولا في شي ... وكل ما يجون يحطون عليي التخطيط .. قلبي يطيح ف الارض ان يمكن يصير مو اوكيه ويحطون لي طلق صناعي ... ولا بد من السندويجة الا كنت اكلها قبل التخطيط :lol: من غير نفس بس خوفا من ان التخطيط يكون مو زين .... يعني كانت ايام حدها مو حليوة !!!!!!!!

طبعا جت الخميس ... ولا جاني الطلق ... وسلمت امري لله ... وقلت يلا خلاص طلق صناعي اهم اولد وارتاح ...

الساعة 6 الصبح حطو ليي التحميلة الاولى .. وقالت ليي الدكتورة اذا جاش الالم من اول تحميلة وااجد زين ...

جت الساعة 3 الظهر .. وكان توه مبدي الالم عليي ...
بعدين جت الدكتورة المغرب تجيك ,,,, الا تقول ليي توش 1 سم :hysterical:

حسيت بالاحباط حددي ... بس قلت يلا بيطوف الوقت وف النهاية اكيد بولد وبرتاح :lol:
زوجي تم وياي الى الساعة 12 .. وكان الالم هذا هوو ما تغير ولا زاد ..

قلت ليه خلاص رووح وباجر تعال .. لان ياست ان يزيد الالم ...

وتميت في السرير اتقلب ... وع الساعة 1 ما شفت الا شي منبط :worn_out: والسرير تغرق مااي :|
جو ليي السسترات وبسرعة بسرعة لبست ثياب الولادة وطرشت مسج لزوجي ان بدخل خلاص .. وتمو ثيابي واغراضي كلهم في الجناح ما صار وقت اشيلهم قالت ليي السستر اني بخبر زوجش عنهم اذا جا ...

طبعا رحت جناح الولادة واني مستانسة حدي احسب قريب بولد :| .. جيكووني الا تقول السستر ، بعدش 1 سم .. :|:|

وطووول الليل وحدة رايحة ووحدة جاية يجيكون وكله 1 سم مو راضي يتوسع ااكثر :hysterical:

يااا الله كل هالالم على 1 سم ؟؟؟ والى متى بظل 1 سم ما بيزيد ؟؟؟؟

جت الساعة 7 الصبح وتبدل الزام .. وجت ليي السستر الجديدة وجيكتني .. الا تقول .. 1 سم :confused:

اني هني خلاص انهرت ..... وقلت ليهم ارجوكم ارحموني وسووني عملية ما اتحمل اكثر ... من امس للحين كله واحد سم .. خلاص ما في امل اتوسع اكثر لمتى بتم جدي ...

الساعة 7 ونص جت سستر وضربتني ابرة ... ولا ادري هالابرة مالت وويش

الساعة 8 جت سستر تجيكني .. واني خلاص كنت يائسة ... جيكتني .. الا اقول ليها واني تعبانة .. بعد نفس الشي ؟ الا تقول لالالالا ... الحيين 7 سم ... خلاااص ولااادة :woo::woo::woo:

اني فتحت عيووني ... وجذبت اذوني .. اولا مستغربة من التوسع الا صار مرة وحدة .. وثانيا مو حاسة ان الالم تغير عليي ... لأن من البداية اصلا كان الالم زلازل :lol:

راحت السستر بسرعة وجابت العدة :lol: .. وقالت ليي يلا اذا جاش الالم سوي بووش على قولتها :lol: .. عاد اني من الهبالة والخرعة .. اقوليها .. الحين ؟؟ :lol: ههههههههههه .. الا تقول ليي اييي .... صدق كنت هبلة بهالسؤال ... هههههههههههه

المهم... جاني الم اول مرة .. سويت بوش.. ما صار شي ... بعدين مهلت شوي .. وجاني الم مرة ثانية اقووى... قلت في قلبي .. يـــــــا أم البنين ... وسويت بووش ,,, ما شفت الا شي طاااالع مرة وحدة .... واسمع صوت صياااااح ... اللــــــــهم صل على محمد وآل محمد.... ولددددددددت خلااااااااص .. موووو مصدقة ... حطوها على بطني وهي تصيح واني مو مصدقة ان بنتي خلاص طلعت .... وجت السستر فتحت رجولها ,,, الا تقول baby Girl .. :lol::lol:
طبعا ولدت الساعة 8 ونص .. وعقب دقايق اتصلو لزوجي وخبروه..

طبعا زوجي كان ينتظر بره ... لأن هو ما شاف المسج الا طرشته ليه الا الصبح ... واتصل لامي وخبرها وكانو جايين مستانسين يحسبوني ولدت خلاااص ... لأن كنت مطرشة المسج من الليل ..

وبعدين جو وانصدمو لما قالو ليهم اني للحين 1 سم .... :(

وتمو يخيطون فيي الى الساعة 9 ونص :hysterical: .. وكان يعوور شووي بس اني كلش ما تكلمت حزة الخياط ... اقول في قلبي اهم شي ولدت .. والحين سوو فيي الا بتسوونه ههههههه ... حتى بعدين السستر تقول ليي .. أنت واااجد زين :lol::lol:

وطلعت بعدين من المعركة .. ودخل زوجي وامي وجابو ليي حبيبتي فطوومة :L: بعدين ودوني الجناح وكان ماساوي حدده فيه الظاهر 5 اسرة .. والحمام بعيد عن سريري:hysterical: بس الحمدلله بالعصر حصلت حجرة خاصة ورحت فيها ...

وخلــــصت قصتي .. والحمدلله رب العالمين ولدت بالسلامة .. وانتهت المعاناة بسلام الحمدلله :adore: ..

وووبس تعبت وااااجد هذرت ... :worn_out:

عنوب;14326634:
:D:D:D

صباااح الخيير

اني مستااانسة حدي

جتني الدورة وانتو بكرامة اليوم

وصار تاريخ 26 لي حدث مميز :D
اخر دورة لي كانت بهالتاريخ وجتني اول دورة لي بعد الولادة

وبعد اليوم المعااش له :lol:

لاني كله كنت خايفة واقول فيني لوعة وراسي يدور وبحمل ومادري ويه:thumbs_down:
وزوجي يقول لي من وين من الهواء تحملين او على الريحة:lol: ويتطنز علي:o