هذي
قصة ولادتي ..
موعد ولادتي كان تاريخ 8/12 بحساب الدورة .. و بحساب السونار كان تاريخ 11/12 .. اني من دخلت التاسع .. ما حسيت بأي تغيرات غير الثقل اللي زاد .. يعني لا افرازات و لا شي .. اللهم كان بين فترة و فترة يجيني الم و يرد يروح .. فتاوقعت روحي انه راح يجي موعدي و يطوف و اني ما ولدت هع
ذاك اليوم بتاريخ 1 كان يوم الاربعاء .. طلعت ويا رجلي و رحة دوحة عراد و مشيت الممشى كامل .. و تعبت حدي و طول ما اني امشي و اني اتذكر بقايا هههههه .. ليما خلصت اللفة و قعدت عالكراسي ريحت شوي و عقب مشيت .. رجعت الشقة و اني احس بثقل مو طبيعي و احس الجاهل نازل تحت كلش .. بس مثل ما قلت ليكم كلش ما توقعت اني اولد قبل .. خصووصا انه كان عندي موعد في المركز قبل كم يوم و قالت ليي الدكتورة ما اتوقعش تولدين هالاسبوع لان بعده راس الجاهل ما ثبت عدل في الحوض .. المهم يوم ثاني رحت نفس المكان دووحة عراد و كنت مقررة اني اخذ اللفة كامل .. مشيت بس 10 دقايق و شيرت .. و قلت لرجلي بس رجعني ماني قادرة .. كان يجيني الم و كنت احس بالثقل عدل فرجعني مسكين البيت .. ذيك الليلة اللي هي ليلة الجمعة ما نمت من الالم .. كان عندي الم يروح و يجي و كنت يا داشة يا طالعة من هالحمام .. كل شوب ادخل اشوف نزل عليي شي او لا ..بس ما في و لا شي نزل عليي .. كنت نظيفة عدل .. فقت اكيد هذا وجع هرااار ..تميت للصبح اتعصور من الوجع .. قعد رجلي يقولي وش فيش ؟؟ تعبانة اوديش المستشفى ؟قلت له ما فيني شي .. المهم الصبح الساعة 8 قمت سبحت بماي دافي و الالم كل ما ليه يزيد .. و طلعنا من الصبح جينا سترة بيت ابويي علشان بتريق وياهم .. و حزتها كان الالم يجيني كل 10 دقايق و من يجيني اصفن بروحي و اتم ساكتة .. بس ما قلت لأمي شي .. الا ابويي يسالني عقب وش فيش شكلش تعبانة .. !! ضحكت بالغصب قلت ليه لا ما فيني شي .. جان يقولي شكلش بتولدين هههههه
عقب خذيت امي على صوب و قلت ليها انه وياي وجع من البارحة .. قامت سوت ليي تالي زعفران وشربته ..
للظهر تميت و عقب رحنا البلاد بيت جدي كعادتنا علشان نتغذى هناك .. هني شوي الوجع خف عني .. قعدت و تغذيت و دخلت قلت بريح شوي لان طول الليل سهرانة ويا الوجع .. و من دخلت الحجرة تم الوجع يروح و يجي و اللي يدخل يسالني وش فيش تعبانة هههههه و اني كله لا لا .. ليما تالي الكل في بيت جدي درى انه اني ويااي ريح . و ما في الا خالاتي و بنات خالتي يا رايحين بقلاص زعفران .. و يا جايين بقلاص كف مريم .. و اللي رايحة بلاص حليب و سمسم هههههه خلوا بطني هذا اليوم يخلط عليي هههههههههههههههه المهم تميت على هالحال الى الساعة 10 بس وصلت حدي و قلت لأمي يلا المستشفى لان طول الوقت ترو و تجي تقول ليي اوديش و اني اقول ليها لا .. طلعنا بنروح المستفى و اتصلت لرجلي و الفقير وصل قبلنا ههههه .. رحت السلمانية و انسدحت علشان يفحصوني و سيدة تذكرت وردة يوم تقول فزعت المكان هههههه .. و سلمت امري و جيكتني وحدة بحرينية الا تقول سانتي .. جان ابطل عيوني كل هالوجع و سانتي .. و في هندية وياها احسها ما ثدقت ردت فحصتني الا تقول 4 مو 1 .. هني ارتحت شوي على صادني خوف انه خلاص قربت اللحظة .. خلوني ابدل و حطوا عليي جهاز التخطيط اللي يلوع الجبد و ينرفز و يقهر ههههه شوي ردوا بيفحصوني ما خليتهم لان صدق كان يعور هههه .. ردت جت هندية غير بتفحصني ما خليتها ههههه سويت فلم ليهم ,, اخر شي حطوني على ويل جير وودوني حجرة الدكتورة علشان تفحصني و بعد ما خليتها هههه عصبت و ردوا رجعوني مكاني .. الا هم جايين ليي يقولون ليي بيطرشوني جدحفص لان ما في مكان فوق .. صاير عندهم ليك ماي و ما ادري ويه .. قلت لهم ما بروح لو ويش يصير .. قالوا ليي كيفش ترى بتولدين هني في الطوارئ ,, و خفت و قلت يلا انزين .. و عقب جهزوني علشان بيودوني في الاسعاف ,, و طرشوني جدحفص و دخلوني هناك حجرة الولادة و جت هندية بتفحصني بس ما خليتها ههههههه و اني كل ما يجون اتذكر وردة ..تالي جت بحرينية و بعد ما خليتها جان تعصب عليي و تقعد تتزمر هني خفت و سلمت امري اليها فحصتني الا تقول 5 .. و اخذي شي نفس العصا طويلة و بطت الكيس .. لان ليما رحت المستشفى واني بس وجع ما نزل عليي ولا شي .. و حسيت بشي دافي ينزل و عقبها مباشرة ابتدى الوجع اتذكر حزتها كانت الساعة 12 و شوي .. لان تميت فترة شوي في السلمانية .. و اني اتعصور من الوجع و كل ما تجيني الطلقة اخذ نفس مثل ما علموني و كنت ارتاح .. تالي طلعوا من الحجرة و خلوني بروحي .. اني هني حسيت اني خلاص راس الجاهل بيطلع .. و اني اناديهم و محد مفيسني .. ليما تالي صرخت عليهم صرخة من قمت راسي و جوا ثنتين يتراكضون .. و اني اقول ليهم ابغي اروح الحمام و الهندية تقولي اي حمام اكو راس الجاهل يبين .. رفعوا رجولي .. عصرت عصرتين و الثالثة حسيت بحمود يوم يطلع و كانت الساعة 2:22 بتاريخ 4/12 ,, طلعوه و حطوه على صدري دايركت قمت اصيح كل ما سمعت صياحه و اني ابوس فيه و اتذكر اني قلت ليه يا عمري .. و عقب قامت تخيطني و ما خلصت مني الا الساعة 3
صدق ولادتي الحمد لله رب العالمين احسها كانت سهلة و ميسرة ... بس اللي ذبحني كله السيم
اعذروني على التفاصيل و الاطالة .. ادعوا لولدي بالهداية و انه يكون بار لأمه و ابوه
و دعواتكم لكل المحروومين الله لا يحمهم من هاللحظات يا ربي