•• تجمـع أمهـات نوفمبــر 2010 لشهر ذي الحجـة ••

السلام عليكم

شخباااركم ؟ اني جيييييييييييت :lol:

مبروك علينا تجمع الامهات >> والله وكبرنا وصرنا امهاااات وعندنا بيبيات .. الحمدلله :D

صاير كلش ما عندي وقت .. يومي تقريبا كله في المستشفى .. امس زوجي مر عليي متأخر شوي ما وصلت المستشفى الا تسع واربعين دقيقة .. دخلت الا هي توها شايلة المرضعة من بوزه .. تقول الممرضة شفتش تأخرتين قلت ما بتجين فعطيناه مرضعة :-# .. وانتظرت الى رضعة 12 ونص .. وما رجعت البيت الا الساعة ثلاث .. ورديت رجعت ليه الى رضعة ست ونص .. واليوم كله راح يا رايحة يا جاية .. خبركم ترضيع وشفط واقعد وياه شوي واجي .. :lol:

الحمدلله اليوم الدكتورة طمنتني عليه وقالت كلشي اوووكي .. وبتخليه تحت الملاحظة الى بكرة .. عشان اذا كلشي اوكي بكرة يرخصونه :adore:

****

بقايا .. يمكن لأنش ما تاكلين عدل عشان جدي ما فيش حليب .. اول الايام ما كان ينزل مني حليب الا بالغصب .. واقعد اشفط بالساعة والنص وحتى خمسين ملي ما يوصل .. لكن من قمت آكل عدل .. صار اوكي .. قبل ما اطلع من البيت آكل .. واحمل ويايي كيس اكل المستشفى .. فيه موزة وماي وعصير وسمسم خخ .. واني اشفط آكل وصار اووكي خخ ..

***

عشوووق .. مسكين الله يساعده على الغازات .. وعلى طاري التطهير اني كان خاطري اطهره يوم سابع بس ما صار .. اذا ان شاء الله بكرة رخصوه بحاول اطهره يوم 14 .. اللي هو بيكون يوم السبت .. والله يساعدهم مساكين على الم التطهير ..

***

الوافية .. اييي ما شاء الله الايام تركض ركيض .. اتذكر اللول ايام الحمل قصدي ايام ما قبل النفط :D .. كنا نحسب الايام والشهور حساب .. ونحسب الاسابيع وننتظر متى ندش اسبوع جديد ومتى ندش شهر جديد .. والحين الحمدلله ولدنا وبنغمض وبنفتح وبنشوف اولادنا صاروا طولنا :lol: الله يخليهم ..

***

صفااااء .. اكلي عدل عشان يصير عندش حليب .. اذا مو عشانش عشان فطوووم ... وشوي شوي ان شاء الله بيزيد حليبش وبيشبعها .. واذا تبغين تعودينها على الصناعي غيري نوع المراضع اللي تستخدمينهم يمكن ما عجبوها :lol: >> خبرش الجهالو مو كلشي يعجبهم .. يمكن حلمات المراضع ما ترتاح ليهم ..

***

نور الامل 1986 .. يعني انتين كنتين من المتخفين :D .. حياش الله ويانا وكل يوم تعالي :lol:

***

الم الزمان .. ما يشوف شر حموود .. وان شاء الله كلها كم يوم ويصير زين .. ختنتينه عند منهو ؟ جمال الزيرة ؟

***

R3ma .. شخبارش وشخبار البنوتات ؟ وشخبار سارة مع اختها تغار منها لو لاا .. بالنسبة للشفاطة للحين ما شريت بس افكر آخذ ميدلا ما ادري شسمها .. اشوف واجد يمدحونها وسعرها احسن من غيرها .. سعرها في الثلاثينات بينما افنت ب 75 .. وعلى فكرة في المستشفى يستخدمون ماركة ميدلا بعد بس طبعا كبيرة ..

***

شخبار كرشتكم ؟ :-# .. والوزن .. :worn_out:

اني بطني صاير يخوووووووووووووووف .. كأنه همباية خايسة خخ .. نفس الجلي .. ما ادري ويش اسوي فيه عشان يعتدل شوي ..

هلا حبك حياتي

شخبارش ؟ :lol: ... عجييبة رجعة الديااار .. اني للحين ما وصل ولدي وانتظر متى ارجع دياري به خخ ..

وشخبار بنت جيرانكم وولدها ؟ صار احسن ؟

هلا عشوقة والله اخباري الحمد لله وحمود ذابحتنه الغازات والله يساعدش على التطهير اني ظهرته يوم السبت واليوم طاحت الربلة
جحة ان شاء الله باجر يرخصونه وتفرحين فيه والله يبلغش فيه معرس
وباقي الأمهات شخباركم وشخبار بيبياتكم

جحة حمرة;13842495:
هلا حبك حياتي

شخبارش ؟ :lol: ... عجييبة رجعة الديااار .. اني للحين ما وصل ولدي وانتظر متى ارجع دياري به خخ ..

وشخبار بنت جيرانكم وولدها ؟ صار احسن ؟

اهلين نور الامل

واخيرا شاركتين ويانا

كنت دايما اشوف اسمش

يتربى حمود في عزش

F:


صبايا شرفووووني

يآ لهفتي فيك .. من غلآتك دوختني موآصيلك ..~

هلا رد روز شخبارش أي وأخيرا قررت اشارك
وش أخبار المراجعة وياش كأنه كان عليش امتحان قدمتينه أو لا

السلام عليكم شخباركم أمهات حابة أنضم وياكم في التجمع أني ولدت بتاريخ26/10 وجبت بنوتة مثل القمر سميتها زهراء تقبلوا دخولي.

:)

تنهدات محامية;13840089:
مررحبا

مبرووك عليكم افتتاح تجمع الامهات ..

ادعوا الله يسهل عليي و اولد .. يجيني الطلق مرة وحدة و افتك من الثقل ,,


لان

الله يسهل عليش يالغالية ويجيش الطلق وما توصلين المستشفى الا دايركت ولاادة:p

ألم الزمان;13840891:
خيوه تعبانه ويا حمود من طهرناه زايد اصياحة ومن قمة راس ولا يسكت وكله يبغي للرجول
اليوم ثالث المفروض يخف اصياحة بس مثل اول يوم ولا ادري وش اسوي ما في الا امي اكي تدور بالشبه مسكينه

االله يعينش خيتوو

نور الأمل 1986;13841988:
هلا وفوي شخبارش وش أخبار حسون
والله كنت تكل اليوم أدخل تجمعكم وكان خاطري اشارك بس كنت مستحية شوي لدرجة كنت اتضايق إذا وحدة فيكم تمرض أو يصيدها شيء بس احين قررت اشارك وأتمنئ تقبلوني وياكم

حيااااش الله بيناا:adore:

غصون نضرة;13843519:
السلام عليكم شخباركم أمهات حابة أنضم وياكم في التجمع أني ولدت بتاريخ26/10 وجبت بنوتة مثل القمر سميتها زهراء تقبلوا دخولي.

اكييد نقبلش وحيااش على لعين والراس:thumbs_up:

وفووي حبيبتي فطومة الحمدلله بس احس الزكام زااد ما قل :thumbs_down:

جحة الحمدلله وبكرة ان شاء الله تبشرينه مرخصينه:thumbs_up:

وردتي وحشتيني اتصلت لش ما تردين شكلش نايمة او مشغولة المهم وحشتييني وااجد:adore:

زهورة وزهور ووفوي وبقوي وحبك (قروبنا اللي يتجمعون) وباقي البنااات خاطري اقعد ويااااكم متى بتطلعون وقت اللي تفكرون تطلعون بعد لاربعين او قبل تعالوواا بييتنا:D

هالمرة ألم شرفيين بوجودش:)

>>قاعدة اتحلم انه بسرعة بيتجمعوون:lol:

صدق صدق وقت اللي كلنه اووكي وصرتون زينين بنتجمع حياكم في بيتنا:)

اني بااااااااااااك :lol:

طلعت من المستشفى ورحت اتعشى وي رجلي خخ >> خوش نفاس واربعين يزعم اللول اللي في النفاس تتبطح وتتسدح وتتسطح على قولة النسوان اربعين يوم والحين ندور الهيامة مداور خخخخخخ ..

اني ويايي زكام مغربلني .. خفت اعدي ولدي فخلوني البس كمام وقت اللي بدخل عليه .. الله يستر ان شاء الله ما ينعدى ... ما صدقنا على الله ترقع شوي ..

***

حبك حياتي

اي والله اللي يشوف حال غيره تهون عليه مصيبته .. اني خلال هالكم يوم اللي اروح فيهم تعرفت على امهات واجد .. وبعضهم حالة اولادهم كلششش صعبة بس الكل حامد وشاكر .. الحمدلله .. وشفت وحدة من ديرتكم قلت يمكن هذي بنت جيرانكم بس طلعت مو هي لأنها جايبة صبي مو بنية .. الله يفرج عنهم ياا رب .. ويشفيهم ويرجعون الى حضون امهاتهم ..

وبالنسبة للوزن .. ما ادري كم وصل وزني عقب الولادة .. :worn_out: .. بس يبغي ليي رجيم عاجل .. صايرة فيل متنقل واجد زدت في الحمل .. وبطني صاير كأنه جلي بس ما يصير البس السير من العملية وما يصير اصلا اسوي رياضة للبطن خلال هالكم شهر ..

***

عنوووب .. اني بعد خاطري نتجمع مع بيبياتنا .. ان شاء الله عقب ما نطعمهم تطعيمة الشهرين بنتفق وبنلتقي مع بعض ..

***

اليوم قدمت اجازتي .. :lol: .. راح تكون الى تاريخ 20\3 .. يعني شكلي ما برجع الشغل الا وكلشي متبخر من مخي خخ .. ولو اني احس ان الايام تركض وبغمض وبفتح وبشوف اني لازم اداوم بكرة ..

نور الأمل 1986;13843233:
هلا رد روز شخبارش أي وأخيرا قررت اشارك
وش أخبار المراجعة وياش كأنه كان عليش امتحان قدمتينه أو لا

لا مارحت اقدمه

ماراجعت عدل وماحبيت اغامر واروح اقدمه

بدرس له على راحة وبقدمه عقب

حبك حياتي;13844777:

سلااااااام

اكلمكم من ارض الدياار:adore:

جيت اطل عليكم :adore:

:thumbs_up:واخييرا

الله يخليكم لبعض خيتو

امهاااااااااااااااااااااااااااااات لحقوني
اللي طهروا بيبياتهم صاير شئ غريب لحمود
من طهرناه واهو كله يصيح ولين صاح كأنه احد ضاربنه
من قمة راسه يصرخ ولا يبغي يرضع او يشرب المرضعة
بس اهزهز فيه جان يسكت ومن اشوي بدلت حفاطته
لاحظت طالعة ليه حبوب صغيرة صفرة تحت فتحة البول اكرمكم الله
كأنها فطريات اتصلت العيادة وقال الدكتور هاي وسخ بس حاولت اشيله اتألم حمود
وزاد بالصراخ ويقول الدكتور عطيه ادول عشان يسكن عليه الالم بس من اهني
لباجر ذا ما في تطور بحالته بروح ليه يسوي لي حل دعواتكم امهات ليه

مثل ما خبرتكم ان راح اكتب اليكم قصة حملي وولادتي طبعا تزوجت وبعد الزواج بتسعة شهور حملت بولدي احمدي طبعا الشهر إلا حملت فيه كنت مقررة اسافر اني وزوجي والحمد لله ان حملت في البداية كان كلشي طبيعي في الاسبوع 13 نزل علي دم رحت إلى دكتورتي وكانت كيران في ابن النفيس ما سوت إلي شيء رجعت البيت وزاد الدم رحت الأميركي وعطوني إبرة ومثبت والحمد لله طبعا أخذت اجازة من الشغل وقعدت في البيت وحتى شقتي ما اركبها لأن درج بعد ثلاثة أسابيع نزل علي دم واجد وطيران على الأميركي لأن صرت أتابع عندهم طلعت ان المشيمة نازلة وظليت تحت المراقبة عندهم لمدة أربعة أيام وطبعا الحركة كانت ممنوعة علي فممدت اجازتي ورحت عند أمي اسبوعين وكانت النفسية زفت عندي ما كان في أحد أشكي اليه وزوجي كان الوحيد إلا يسمعني وطبعا طول فترة الحمل كنت خايفة في الشهر السادس صادني طلق وعطوني حبوب اسمها يوتبار توقف الطلق ونفعت ويإي دخلت السابع ورجع الطلق وزيدوا جرعة اليوتبار والحمد لله في هذا الوقت كنت اشتكي من ألم في الكلى وطلع عندي خمس حصوات صغيرة في الكلى اليمين لدرجة كنت ما أقدر حتى اقعد وترقدت من جديد وتحملت الألم عشان حمودي وعدا الشهر ودخلت الشهر الثامن وبدأت مشكلة ثانية وهي التهاب بكتيري وتقلصات حاولوا يعطوني ادوية حق الالتهاب بس ما نفعت وياي وبدأوا يعطوني إبر كل 12 ساعة لمدة خمسة أيام وطبعا قبل هذي الأبر كنت أترقد بين فترة والثانية بسبب التقلصات طبعا دخلت التاسع على حساب الدورة بس على حساب الالترساوندا كنت في الثامن صادتني تقلصات بشكل كبير رقدوني مرة ثانية وبدأوا يعطوني إبرة الرئة أربع جرعات لمدة يومين بعدها خفت التقلصات لكن استمر ويإي طلق لمدة ثلاثة أسابيع وترقدت خمس مرات في هالثلاث أسابيع وكنت ما أقول إلئ أمي لأن فيها الضغط وكنت خايفة عليها فنفسيتي تعبت بشكل كبير وطبعا الرحم كان عندي مفتوح واحد سانتي وكان الطلق قوي حتى التخطيط أكد إلشي اخر مرة ترقدت كان يوم الجمعة قبل لا أولد وترخصت يوم الأحد الساعة 12 الظهر لأن تعبت من المستشفى ومن المصاريف رجعت البيت وكنت ميته من الطلق بس استحملت الساعة ست المغرب نزل دم بسيط بس توقعت روحي أهلوس ورد نزل الساعة ثمان المغرب وما اهتميت بعدها حسيت بضيقة خلق قلت لزوجي طلعني وصدق طلعني وداني ساحل أبو صبح وهني زاد الألم رحنا أخذنا عشئ ورجعنا البيت واني في السيارة كنت اصيح من الألم أول ما وصلت البيت قلت بتسبح دخلت الحمام الله يعزكم شفت دم واجد ناديت أبو الشباب ورحنا مستشفى الأميركي لأن مقررة أولد عندهم دخلوني وطلبوا عينة أبوال عطيتهم عينة دم من كثر ما كان ينزل علي دم نقلوني غرفتي وجت الدكتورة وشافت ان التوسع اثنين سانتي يعني ما في تغير لأن قبل لا يرخصوني كنت اثنين سانتي خبرتني ان بيعطوني فرصة لصبح وبيحددون في ذيك الليلة ما نمت زوجي طلع وخبرني ان بيرجع إلي بعد ساعة وكان متضايق طلبت منه قرأن وسجادة عشان أصلي وفعلا جابهم إلي ورد طلع كان مو قادر يقعد وخبرني ان بيفتر بالسيارة وبيرجع صليت صلاة الصبح وقعدت اقراء سورة مريم والزلزلة وجئ زوجي هني وكان قلبي مقبوض نمنا الساعة ست ونص الصبح الساعة سبع وعشرين حسيت بشئ دافي صرخت صرخة ناديت فيها زوجي قام من على الكرسي إلا هو نايم عليه واني أقول اليه في شيء ينزل وهي يقول لا الممرضات سمعوا صراخي وجوا إلي نادوا الدكتورة وجت وطلع جيس الماي خلوني اتسبح ودخلوني غرفة الولادة لأن وصلت ثلاثة سانتي بعدها الساعة عشر ونص وصلت أربعة سانتي وكنت طول الوقت ساكته بس ادعي لأن كنت تعبانة الساعة 11 وشي وصلت عشرة سانتي جهزوا كلشي لكن المشكلة ان الرأس مو نازل عدل تحت عطتني الدكتورة ساعتين إذا ما نزل بيدخلوني عمليات قعدت ادعي ان الله يسهل إلي وتوسلت بأهل البيت طبعا أختي ساعدتني واجد كانت ويائ في حجرة الولادة والحمد نزل الرأس بس بعدين لازم ادفع ما قدرت لأن كنت في ذيك اللحظة كنت أذكر مشاكل الحمل والتعب النفسي إلا مريت فيه لكن بعدين جتني قوة ودفعت وطلع احمدي حبيبي إلئ الدنيا
طبعا في اشياء ما ذكرتها لأن إذا أذكرها اصيح كل ما تذكر وهم يجروني في كل مرة على كرسي اصيح لأن كرهت المستشفى وغير الأمور إلا تعرضت اليها
أدري عورت رأسكم وسامحوني
وسامحوني بعد لأن الخط مو راضي يكبر لأن اكتب في التلفون

كللللووووووووووووووووووش أني اخت ام زهاري..
الف الصلاة والسلام عليك يا حبيب الله محمد
كللوووووووووووووووش
ام زهاري ولدت وجابت أحلى بنوتة ..
((مريم ))
الله سهل عليها راحت الساعة عشر وشئ و11 ولدت

خيو ألم الزمان اني صاد حمود بعد يوم طهرناه بس يوم ثاني خف وعلى لصياح نفس إلشي كأنه أحد صارنه بس افتكيت يوم طاحت الربلة