•• تجمـع أمهـات نوفمبــر 2010 لشهر ذي الحجـة ••

R3MA;13879638:
ام شهد..

ماشاء الله تبارك الله
ربي يخليه لك ويحفظه يارب

جحة حمرة;13874470:
السلام عليكم

شخباركم ؟ اني جيييييييييييييييت :lol:

تنهدات محامية .. حمدالله على السلامة ويتربى حمود في عزكم ودلالكم ..

ام زهاري .. حمدالله على السلامة وتتربى مريوووم في عزكم ..

خلاص الحين تجمعنا كلهم ولدوا .. الحمدلله على كل حال :adore:

***

الحمدلله .. رخصوا ولدي ليلة الجمعة .. صارت صحته احسن لكن للحين ليه متابعات الدنيا والدين .. في اكثر من قسم .. يوم الثلاثا هالاسبوع عنده موعد لكن بيصير اجازة السنة الهجرية .. فيبغي لي اتصل فيهم عشان اشوف متى اوديه ..

يوم اللي رحنا نستلم ولدي .. كان خاطري البسه ثياب خضران :D >> تذكرت الثياب الخضران مال بنت عنوووب اللي راوتنياهم في بيتهم .. قلت لو موصية يجيبون ليه جان لبستهم اياه في طلعته من المستشفى :cool:

كنا ناوين نقرأ مولد في البيت بمناسبة رجعته بالسلامة بس امي قالت قريب محرم مو حليوة .. اقرو في ربيع ان شاء الله ..

ويوم الجمعة عفسني عفااااس .. عوض عن الايام اللي ظلها في المستشفى كلها .. ظل قاعد من خمس الصبح الى تسع بالليل .. بس فاتح بوزه يبغي يشرب .. ظهري تكسر واني ارضعه .. بعدين طلع ان حليبي ما يشبعه واتصلت الى ابوه يشتري ليه حليب صناعي ( يوم اللي كنت مخططة اروح اشتري حليب الصناعي ولدت خخ :lol: ) المهم واشوة انه شربه ..

وولدي مسكين صياح خخخ .. من يوم هو في المستشفى كلما اروح ليه اسأل الممرضات يصيح واجد ؟ يقولون يعفسنا عفاس من الصياح ما يسكت :worn_out: .. اقول ليهم لأنكم تجوعونه وتعطونه حليب بالقطارة ما تشبعونه خخخ .. قالوا حتى لو من يفتح عيونه يفقعها لينا صيحة ولا يسكت وصيحته صيحة تعصيب :-# >> بعد طلع على الدنيا وما صاح وظل اسبوع كامل مخدر وما سمع اول صيحة ليه الا عقب اسبوع كامل من ولادته فقال بيعوض وبيطلع حمايق هالاسبوع كله :lol:

****

اقوووول امهاااات .. >> راح مسمى كروشات لأني واثقة ان كلكم نفسي اختفت الكرشة منكم نهائيا وصار بطنكم لاصق في ظهركم >> عشم ابليس في الجنة :-#

انزين ويش عن تجهيزاتكم ؟ اغلبنا هذي اول مرة نجهز للولادة .. فوش تحسون الاشياء اللي اخذتون فيها مقلب خخخخخخخ والاشياء اللي نسيتونها ..

بالنسبة ليي اكبر مقلب صادني هو دشاديش الرضاعة خخخ .. اللي فيهم فتحتين .. ماخذة ليي كأن خمس او ست وحدات .. وطلع ما منهم فايدة .. اشوة اني ماخذة ليي بعد بيجامات فهم اللي فادوني واجد .. الدشاديش ما اعرف ارضع بهم كلش ملش .. هذا غير اني احس ان خلقهم مو مريح خاصة اذا لامس جرح العملية .. بينما البيجامات قطن فعادي يكونون وي جرح العملية واسهل في الترضيع بعد ..

شي ثاني .. ثياب البيبي .. اخذت كم وحدة اب تو ون منث .. اللي هم قد النيو بورن .. بس طلعوا كبار بعد عليه .. واني طول الوقت اقول يمكن يطلعون صغار عليه وما يلبسهم .. يعني من زيرو لثري ما ادري متى بيصيرون قده >> يعني ما عندي حجة عشان اقول بروح اتسوق ثياب للبيبي لأن صغروا عليه لأن ثيابه واجد وبيكفونه مدة >> ولو ان خاطري ارد اروح اتسوق واتشرى ليه ثياب .. :lol:

اخذت جواريب وقفازات للايادي وهالسوالف .. طلع ان ما منهم فايدة حاليا لأن البيبي على طول ملوت وملحف .. يعني من عقب ما نشيلهم من الفراش بيكون منهم فايدة ..

قمت امشي واتشرى لحد ما شفت اني ماخذة لحافات الدنيا والدين خخخ .. امي تقول ليي ماخذة لحافات واجد قلت ليها لا بس اخذت اثنين ما ادري ثلاثة .. تقول مو ثلاثة جايبة انتين ستة ما ادري سبعة :worn_out:

عاشقة قلبي;13878501:
هلا امهات
اخباركم؟
تنهدات
الحمد لله على السلامه
ويتربى حمود في عزكم ودلالكم
جحجوحه
الحمد لله على سلامة سيد محمد
الله يخليه لش ويحفظه ويبلغش فيه
الم الزمان
اللهم صل على محمد وآل محمد
ماشاء الله ولدش يجنن
وصدق فيه شبه واجد من سيد جواد
اطلع في صورته واطلع في سيد جواد
واحس يشبهه واجد
الله يخليه لش
وبالغه فيه معرس يارب
اخباري
رجعت شقتي من يومين
وحوستي حوسه
ماعندي وقت كلش
ووقتي كله يضيع على التنظيف وسيد جواد
باقي الامهات
اخباركم واخبار اولادكم؟

ام شهد11;13879205:
هذي صورة ولدي عبدالله الله يخليه اللي كان مخشوش في بطني ههه

اللهم صلي على محمد وال محمد

R3MA;13879213:

ماشاء الله تبارك الله ..

حمود كيووووووووت ربي يخليه لكم