:'(:'( :'(
فاطمه 86;13812645:
:'(
ولدي عمره 5 شهور ...الله كتب لي احمل فيه بدون تخطيط وعندي قبله ولدين اعمارهم متقاربه ومادريت عن نفسي اني حامل الا بالشهر الرابع وكنت وقتها اخذ حبوب منع حمل وهو ببطني ماادري ..
كنت رافضته ومااهتميت بالحمل ولا باكلي ابدا اببدا..
مراجعاتي بالحمل بالسلمانيه كل مره كانوا يقولون ان فيه شي مره قلبه تعبان مره تشوه خلقي بالبطن ومره دقات قلبه مو طبيعيه .. وكل موعد كنت اتمنى اروح يقولون لي ميت ولا ينولدلاسمح الله معاق .. ولدته والحمد لله طلع سليم مافيه شي نهائيا .. ولاني والده بعمليتين فكانت ولادتي عمليه
اولادي وديتهم لامي وكانت عندهم رحله للسعوديه يومين واولادي كلش ماعندهم مناعه بس ماعندي اي حل ثاني راحوا يوم ويوم ثاني دخلت العمليات وولدت
على رجعتهم من الرحله كنت بترخص من المستشفى ورجعت لبيت ابوي وولدي الصغير معاي
دخلتي الا اولادي كل واحد متمدد بصوب وامي تقول ترى من امس مااكلو شي :woo:
وحرارتهم مرتفعه
وماتتخيلون التعب اللي كان فيني والده بعمليه واولادي مرضى مصخنين حد حدهم وطالع لهم فطريات ببوزهم مايقدرون ياكلون وولدي الصغير بوصفار نسبته 13 لازم احط بالي ليه كنت امرضهم واتابع الصغير
وقتها صدق تمنيت لو ربي خذاه ولا عطاني ياه استغفر الله ارتفع عليه ابوصفار واجد ورقدت وياه بالمستشفى وبالي ويا اولادي وطافت على خير ومرت الايام
واجد كنت ادعي عليه ونفسيا كنت رافضته مااذكر مره حنيت عليه كان منبوذ اغلب الوقت مرمي على الارض او في الجلاسه حتى ماكنت الاعبه بس وقت الرضاعه ارضعه او اعطيه مرضعه واجشيه وارجعه مكانه لو يعفسنا من الصياح مااشيله لي ماتعود مايصيح ابدا طول الوقت هادئ يقعد وينام بروحه يشرب وينام يلعب كله في هالجلاسه كان اذا شاف احد مار صوبه يطلع اصوات ويظحك ويتنحنح يبي يشيلونه او حتى يلاعبونه
اذكر اذا اروح اتسوق اشتري لاخوانه وهو انساه حتى ثياب عيد الفطر ماذكرته الال يوم رجعنا البيت
مامر يوم الا وادعي عليه (( ياربي سامحني))
ماكنت احس باي مشاعر ناحيته ابدا
لين جا اليوم كان مريض من يومين التهاب بالبلاعيم وبلغم وزكام وحالته حاله حتى وصل مرحله مايرضع الا نايم ويرضع وهو يصيح ... وصلت حدي عليه اعصابي فلتت في لحضه وصرخت في وجهه وخليته على السرير ماكن راضع من الصبح خليته على السرير وطلعت وهو يصيح واصل صوته للشارع .. رجعت حاولت اسكته ماسكت وقتها كان ولدي الوسط تكرمون موصخ بالصاله وعصبت عليه عدل وحطيت الحره بالصغير ضربته على فخده بدون شعور ايدي علمت على رجوله .. وطلعت المطبخ
رجعت ليه قلبي ماطاوعني اخليه شفته ازق وراسه مودنه على فوق وعيونه مفتوحه على اخرهم لانفس يطلع ولانفس يدخل كنه ميت
رفعته اياديه ممددين على ورا وراسه طايح على ورى اهزه مايتحرك بدون شعور كنت اصرخ بالغرفه ولدي مات ولدي مات ياربي لايموت ياربي خذني لاتاخذه حبيبي ولدي علوي عمري سامحني ولدي قوم لاتموت ولدي مات بدون شعور كنت اضرب روحي بايد ويد حاملتنه كنت ابي اروح الحمام اغسل وجهه يمكن يرد نفسه مادليت الحمام وين اطلع الصاله وارجع غرفة النوم والمطبخ وانا اصيح واصرخ .. دخلته الحمام ورشيت وجهه بماي بارد وهو ابدا مافي نفس قعدت على السرير وصياحي واصل للجيران ضربته على ضهره وهو جثه هامده وحسيته يحاول يتنفس مو قادر
دخلت يدي في حلقه وضربت على ضهره وزوع بلغم كميه كبيره وقام يتنفس مباشره حطيته على صدري ضميته واني اصيح ونام وهو على صدري وكل شوي اشيله اشوفه يتنفس لو لا
موقف مااتمناه حتى للعدو ... كان عقاب من الله ماادري لو راح وقتها شنو كان صار فيني من وقتها انا مو قادره اتركه طول الوقت على رجولي حتى المطبخ احمله معاي
كنت اقول لاهلي قبل اذا يعصبون علي على معاملتي له اني ماابيه واني تعبانه منهم وماابيه واذكر كلمه كنت دايما اقولها ((ياليته ماجا ))
اليوم اكتشفت انه غالي غالي حتى اغلى من اخوانه
الله يهديني ويسامحني
هذا علوي .. صلو على النبي و ادعوا له من مرض ماشفت ضحكته طول اليوم خامل ونايم .. مسكين توه مرجع كمية كبيره بلغم صدره متروس