,.-~*'¨¯¨'*·~-.¸-(التجمع الثالث عشر لحوامل شهر نوفمبر(11) 2010)-,.-~*'¨¯¨'*·~-.¸

[/COLOR]

حبك حياتي;13798632:

الم الزماان
حمدالله على سلامتش وسلامة حمود
وكل هالتعب والالام يروح بشووفته :)
وموقفش يوم ينزل الماي بالحديقة كلش محررررج:-#
الحمدالله ان عدا على خيير;)

الحمدلله عدت على خير بس صج ولادتي كانت متعبه تحت ولادتي اللي قبل ما امهل كلش ساعتين او 3 بالكثير من ينزل على الماي واولد واروح المستشفى واني متوسعة 5 سانتي الا بولادتي الثانية رحت المستشفى واني متوسعة 10 ولدت بغرفة تبديل الملابس بالطوارئ لكن فن :p

بقَايا حُلمْ;13799420:

ويش اخبارش الحين
تنصحيني بالكريم؟؟

[/CENTER]

خيوه بصراحة الكريم نفعني واجد وتطور ملحوظ من حيث الحركة قبل كنت ما اقدر اقعد عدل كله يعوروني وكان حجمهم بحجم الحمص ( النخج ) واللحين احس حجمهم اصغر وكل ماليهم يضمرون ان شاء الله يختفون من اهني لنهاية الاسبوع وافتك منهم

الم الزمان
قصة ولادتش مؤثرة وواحرااج يووم ينزل عليش المااي
بس كل شي يهوووون عشان حموود
الله يحفظه ويخليه

ألم الزمان;13799471:
خيوه بصراحة الكريم نفعني واجد وتطور ملحوظ من حيث الحركة قبل كنت ما اقدر اقعد عدل كله يعوروني وكان حجمهم بحجم الحمص ( النخج ) واللحين احس حجمهم اصغر وكل ماليهم يضمرون ان شاء الله يختفون من اهني لنهاية الاسبوع وافتك منهم

زين عجل ضروري اليوم باخذ ليي
لاني تعبااانة واجد خصوصا امس
واني مو توه ويايي
من فترة يعني تقريبا من العام شهر 4 بس زاد عليي في حملي هذا وخصوصا لما ولدت

ألم الزمان;13799415:
خيوه لين رحتين بيسألونش جم سؤال عن موانع الحمل اللي تبغينها لولب لو حبوب وبعدين بياخذون منش عينه من عنق الرحم كلش ما يعور وبيعطونش العينه بغرشه تودينها المختبر وخلاص :)

السلام عليكم

شخباااركم ؟ اني جيييييييييييييت :lol:

توني اليوم قادرة ادخل على الانترنت .. الايام اللي طافت كنت في حالة من التعب النفسي والجسدي .. الحمدلله على كل حال ..

بكتب لكم اكشن ولادتي المأساوي .. اللي ما اتمناه حتى لأعدائي :'( .. بس اول ادعوا الى ولدي سيد محمد ان يقوم بالسلامة ويعطوني اياه .. لأنه للحين مرقد ..

يوم السبت تاريخ 20\11 .. قعدت من النوم وجيت اسولف شوي في التجمع .. شوي بس وحسيت بألم الطلق .. الم يروح ويرجع .. مباشرة عرفته ان هذا هو لأن نفس اللي صادني في السابع يوم اترقد .. طبعا الالم كان محتمل ومو منتظم .. قلت الى زوجي ترى سيد محمد شكله بيشرف الليلة او بالكثير بكرة الصبح .. وحسيت ان نزل عليي شي .. شفت افرازات فيها دم .. واستانست خخ :D .. قلت يالله ما باقي شي واولد وافتك .. وقام كل شوي ينزل عليي ماي فيه لون اصفر خفيف .. حتى اني لبست اولويز وكذا مرة اغيرها ..

المهم .. الشقة كانت عفسة .. فدايركت قمت انظف فيها .. اني وزوجي قمنا نشتغل فيها وننظفها ونظفنا الحجرة تنظيف عميق .. والطلق كان كلش مو منتظم وكلما تجيني طلقة اريح شوي وارد اواصل شغل خخ .. لحد الساعة ثلاث الظهر .. شفت ان الالم ما انتظم قلت يقولون الناس يتبخرون بعود خلني اجرب واشوف خخخخ .. قمت وتبخرت بعود ونفس الشي ما تغير شي .. بعدين فتحت النت وشفت بعض الوصفات لتحمية الطلق وتسهيل الولادة .. ويا ريتني ما لجأت للنت حزتها ..

اني كلمن كان يقول ليي ان الزعفران زين .. وكنت مجهزة ليي زعفران .. المهم شفت ان نشرب كوب حليب ونحط وياه قفشة زعفران وقفشة عسل .. وزوجي سوى ليي الحليب وشربته وبعدين بالقفشة اكلت باقي الزعفران اللي في الكوب >>>> وهذا الشي اللي هلكني وانصح كل وحدة على وجه ولادة انها تبتعد عن الزعفران والدارسين نهائيا ..

المهم بس شربت الحليب وقلت خلني اروح جدحفص الى تخطيط وما بقول ليهم شي .. والليل او بكرة اذا زاد عليي الالم بروح السلمانية الى ولادة ..

المهم بس خلصت كوب الحليب ولبست دفتي وركبنا السيارة رحنا جدحفص .. ودايركت خلوا عليي التخطيط .. حتى قلت للسيستر ترى من الصبح ويايي الم خفيف وينزل عليي ماي فيه لون اصفر شوي .. وما عبرتني خخ .. وعلى فكرة من شربت الحليب لحد ما حطوا عليي التخطيط نص ساعة بس .. ومرة وحدة والتخطيط عليي ما شفت الا الطلق قاعد يصيدني بشكل مو طبيعي .. كل طلقة ورا الثانية .. وكل وحدة تقول الزود عندي .. وكلما تجيني طلقة اقول آآخ بالعدال .. والسيستر ما كانت صوبي وما تدري عني .. المهم لحد ما حسيت روحي اني مو متحملة .. ناديت على السيستر وجت تشوف وش فيي بس شافت التخطيط الا هي متبهدلة وتنادي باقي السيسترات وجوا فصخوني وخلوني البس ثياب الولادة .. واني من قالت بتدخلني الولادة جتني الصيحة >> حسيت ان السالفة جد خخخخخ ..

المهم وقالوا ليي اتصلي الى زوجش بسرعة خله يدخل لش داخل .. جا وقعدوني على ويل جير ودخلوني الولادة .. وهناك كلهم تجمعوا عليي لأن مفكريني خلاص بولد الطلق مبين كان حامي حده فتوقعوني بولد .. وقتها كان الساعة خمس ونص المغرب ..

المهم جت الدكتورة فحصتني .. وانذبحت من الالم ودايركت نزل عليي ماي صاااخن وقالت 2 سم بس !!! .. قالوا ليي وش ماكلة قبل ما تجين اهني ؟ ماكلة دارسين ؟ قلت ليهم لا !! .. قالوا انتين ما جيتين الا ماكلة شي او شاربة شي .. قلت ليهم شربت حليب زعفران .. قالوا عشان جدي كل هالطلق اللي فيش على 2 سم بس .. المهم وقمت اتعصور من الالم .. واقول الى الدكتورة كل هالام وبس 2 سم !! قالت من الزعفران اللي شربتينه ترى كلش مو زين لأنه يزيد الطلق بس ما يفتح الرحم .. يعني يذبحكم من الالم على قلة الفايدة ..

المهم جابوا ليي الاكسجين .. واني ما اعرف الطريقة الصحيحة للتنفس ويقولون ليي لا تقولين آخ بس اخذي نفس .. واني ذيك الحزة في دنيا ثانية .. حتى كنت اقول في خاطري لو ادري ان العرس وراه جدي ما عرست خخخخخخخخخخخخخخخخخخ

وعطوني ثلاث ابر مهدئة .. وحسيت شوي بالراحة ونمت ليي شوية .. كنت احس بالطلق بس خفيف وبس آخذ نفس وشوي يخف .. بعدين ردوا جوا فحصوني قالوا 3 .. بعدين لحفوني وقالوا زوجش بيدخل .. >> حتى اني للحين مستغربة حدي خبري بجدحفص ما يدخلون احد على اللي بتولد .. المهم دخل عليي وقعد ويايي فترة وقام يهمزني في ظهري لأن الالم كله كان في الظهر بس كان مفعول المهدأ للحين فيي .. اتذكر اول ما دخل عليي كنت توي مخلصة من طلقة الا اقول ليه مو تقول تبغي اولاد واجد ما فيي شدة يعووور خخخخخ .. المهم ظل ويايي فترة وكل شوي يجون يطردونه وآخر شي طلع .. وظليت اعاني وي الطلق خاصة ان مفعول الابرات اللي عطوني اياهم راحوا ..

وكانوا كل شوي يطالعون في تخطيط البيبي .. وكأن فيه شي مو طبيعي .. بس اني كان الالم ذابحني ومو مفتكرة فيهم ..

كنت اسمعهم يتكلمون عن وحدة مدخلينها الى عملية .. وعن سوالف عمليات .. وبعدين دخلوا ثنتين دكاترة يسولفون عن انهم بيسوون عملية .. واني في خاطري اقول لو يسووني وافتك جان ..

على الساعة 12 .. جت وحدة من السيسترات تسألني اسأله .. فدايركت عرفت ان بيسووني عملية .. ما اتذكر الاسئلة بس من ضمنهم عن اشياء عن اسناني وباقي الاسئلة واني ادري ان هالاسئلة ما تنسأل الا اللي بتتسوى عملية .. المهم وبعدين جوا حلقوا بطني .. قلت يعني عملية ..

عقبها قاموا يجهزوني للعملية .. ونادوا زوجي .. ودخل عليي وقاموا يقولون له مضطرين نسويها عملية وما نقدر نتأخر ازيد .. لأن توها 3 ونص الى اربعة سم والبيبي تعبان .. ما ندري ويش فيه بس من التخطيط مبين انه قاعد يعاني ولازم يطلع .. كل طلقة تجيها يزيد تعبه .. وباقي عليها وقت واجد لحد ما توصل 10 سم .. دار لي زوجي وقال لي يقولون بيسوونش عملية قلت له موافقة موافقة .. بسرعة وقع .. المهم عطوني بعدين ورقة اوقعها .. واني اقول جاني الفرج ..

طبعا هالوقت يوم قالوا ان البيبي تعبان كنت افكر ان دقات قلبه ضعفت .. عشان جدي بيسووني عملية ما توقعت ان السالفة كبيرة وجايدة :'(

المهم قالوا في وحدة في العمليات بس تطلع بندخلش .. واني كل شوي ما قمت اقول ليهم متى بتبنجوني متى بتبنجوني .. يالله بسرعة يالله بسرعة >> منزهقة حد حدي على العملية ..

واني داخل الحجرة وحدة من الدكاترة الثنتين اللي شفتهم قبل ويقولون انهم جايين بيسوون عملية تتكلم في التلفون ما قبضت من كلامها الا سك بيبي وسيزيرين .. عاد فكرتها تقول ان اللي الحين تو مسوينها عملية ولدها مريض .. كسرت خاطري عدل وقلت الله يصبرها >> ما دريت ان اني المقصودة :'(

المهم دخلت غرفة العمليات وعقب ما بنجوني البنج النصفي .. اللي هو ابرة في الظهر ارتحت .. واختفى الالم كله .. وظل دكتور التبنيج والممرضة يسولفون ويايي وحطوا ستارة عشان الدكتورتين يسووني العملية ..

شوي بس وحسيت ان شي مو طبيعي قاعد يصير في الحجرة .. سمعت صوت كأن أه .. أ .. وبعدين اصوات واجد .. وناس تدخل وناس تطلع .. وكأن صايرة حالة طارئة في المكان .. عرفت ان ولدي طلعوه وفيه شي .. خاصة اني ما سمعت صياح .. سألت الممرضة اللي واقفة على راسي ويش فيه ولدي .. قالت ما فيه شي .. وكل شوي اسألها تقول ما في شي .. وشكلها كانت مرتبكة حدها .. ودكتور التبنيج بعد راح الجهة الثانية .. قمت اباعد الستارة ابغي اشوف هالعفسة على ويش .. المهم .. بعدين اسمعهم يقولون نادوا الاكس ري .. نادوا الاسعاف .. طبعا اللي كانوا يتكلمون مو الدكاترة اللي يسووني العملية .. اصوات غير .. باعدت الستارة شوي اشوف مصدر الصوت .. اشوف ممرضات وناس متجمعين على صوب .. اللي هو عند دكتورة الاطفال ..

ذيك الحزة ضغطي قام ينزل .. والممرضة تمسح على راسي >>> تذكرت الوافية اهني :worn_out: يوم تتطنز عليي على اقول ان السيسترات بيمسحون على راسي ...

المهم لحد ما خلصوا من العملية وبغوا يطلعوني .. طبعا لا سمعت صيحة ولدي ولا شفته ولا راووني اياه .. وقت اللي يطلعوني درت صوب المتجمعين والممرضة قالت راووها اياه صرخت عليها دكتورة الاطفال تشوفه عقب مو الحين !!

نقلوني الاستراحة .. ونادوا زوجي .. اسمعهم يتكلمون وياه وقالوا له ان البيبي تعبان واجد ويوم يطلعونه ما صاح وحاولوا ان ينقذونه .. واتضح انه شارب ماي واجد وتجمع له ماي ووصخ على الرئة .. وطرشوه بالاسعاف السلمانية ..

تطمن عليي زوجي وقلت له روح شوف سيد محمد وطمني عليه .. راح واني ما ادري من الصدمة لو من اثر التخدير لو شي .. كانت حواسي متجمدة حدها .. يعني ما كنت احس ولا اشعر بشي .. المهم ونقلوني الجناح .. غرفة عامة .. ومن دخلت كنت افكر في زوجي اللي راح المستشفى ولا رجع .. قلت للممرضات اتصلوا في زوجي قولوا ليه يجي .. ابغي اطمن على ولدي .. كل شوي اقول ليهم وقالوا بيجي لش .. قلت لهم على الاقل قولوا له يجيب تلفوني ابغي اكلمه في التلفون اطمن على ولدي ..

المهم بعدين ممرضة اتصلت فيه وقالت ليه .. قال بيصلي وبيجي .. كانت الساعة خمس الصبح .. لأنه رجع من السلمانية ورجع جدحفص يبغي يدخل عليي وما خلاه السيكورتي يدخل ..

المهم يوم جا الساعة ست .. وجاب تلفوني .. قال ليي انه راح شاف الصغير وان قالوا له انه شارب ماي وحالته مستقرة وبيخلونه 48 ساعة تحت الملاحظة .. قلت الحمدلله .. وطرشت مسجات على السريع للي اتذكرهم اني ولدت .. واتصلت الى امي وقلت ليها اني ولدت .. وقلت ليها اني ولدت بعملية في جدحفص وولدي شوي تعبان ونقلوه السلمانية .. كنت حاسة انه تعبان واجد وحالته صعبة بس ذيك اللحظات ما ادري شلون القوة اللي حسيت فيها وكان ايماني بالله قوي انه بيتحسن ..

عقبها جوني بيتنا .. تطمنوا عليي وراحوا للصغير السلمانية .. وجوني الاهل .. وسمعت كلام يسم البدن .. يعني يجونكم ناس ما عندهم اسلوب في الكلام تماما .. بدل ما يخففون على الوحدة يزيدونها .. جتني وحدة من المقربين تقول ليي جعلها تعبة مخلوفة ان شاء الله يعيش ليكم عاد !!!! .. حسيت من كلامها انه خلاص بيموت .. وكل كلامها كان انه ما بيعيش .. يمكن هالكلام اللي سمعته كان اصعب عليي من الحالة اللي مريت فيها :'(:'(

المهم عقبها نقلوني حجرة خاصة .. وظليت فيها واني بلا اي شعووور .. بس كان راسي يألمني حده .. جتني ممرضة هندية تقول ليي انتين راسش يألمش من التفكير في ولدش .. كوني واثقة ان الله اللي عطاش اياه بيحميه وما بيحرمش منه >> على فكرة هذا نفس الكلام اللي قالته ليي الممرضة اللي كانت واقفة على راسي في العمليات عقب ما طلعت من الاستراحة .. المهم وقالت ليي اني ام وحاسة بشعورش لكن لا تخافين ولدش بيطلع بالسلامة .. >> قلت شوفوا الهنود اللي مو مسلمين اللي ما يعرفوني ولا شي شلون يخففون عليي وناس بدل ما يوقفون ويايي ويخففون عليي يسببون ليي حالة احباط شديد ..

وعدى اول يوم وطبعا ما نمت كلش ملششش .. وصادتني حالة ما ادري ويش هي .. ظليت احس اني اسمع صراخ احد بيولد .. طول الليل ابغي انام واني اتخيل ان وحدة تصارخ .. كنت احس ان الصوت في اذوني وكأنه صدق .. وهو كله هلوسااات ..

المهم في اليوم الثاني اللي هو 22\11 .. قالوا انهم بيحاولون يحصلون ليي سرير في مستشفى السلمانية عشان ينقلوني هناك .. وبالغصب حصلوا ليي سرير هناك ونقلوني بسيارة الاسعاف الساعة ست المغرب .. وتلخلخت عافيتي تلخلخ من سيارة الاسعاف .. كل مرتفع او تبركن احسه يلخلخ مكان الجرح ليي ..

رحت وقعدوني في حجرة عامة فيها ثنتين غيري .. وقالوا اذا حصلوا غرفة خاصة بينقلوني ليها .. واني ما كان هامني الا اني اشوف ولدي واتطمن عليه .. وما قدرت اروح دايركت الى ولدي لأن جوني ناس يزوروني .. وكنت انتظز متى تخلص الرخصة عشان اروح ليه .. عقب ما طلعوا الناس .. قلت الى زوجي ودني الى ولدي .. ما رضى قال خليها الى بكرة .. قلت له ما فيه ابغي اروح الحين اشوفه .. وافق ان يوديني بالغصب ..

طبعا ودوني على ويل جير لأن ما كان فيني شدة امشي مسافة .. رحت جناح 307 اللي فيه وحدة العناية القصوى بالاطفال حديثي الولادة ..

وشفت ولدي في موقف ما اتمنى ان اي ام تشوف ولدها فيه .. >> لحد اهني كفاية ما اقدر اكتب ويش شفت بس اللي صار اني ما تحملت اشوفه جدي وذبحت روحي من الصياح واني هناك وكلما اتذكر اول نظرة اليه اصيح ..

الحمدلله على كل حال .. عقبها عانيت معاناة في السلمانية من التنقل من جناح الى جناح بسبة اني شفتد فروم جدحفص >> استوت هذي عيارتي ..

يوم ثاني من الصبح جوا ليي من سبع قالوا ليي السرير نبغيه .. وانتين جاية من جدحفص وما عندش بيبي فبننقلش جناح غير وبنجيب وحدة هني .. وخلوني اشيل وانقل في اغراضي واني توني 48 ساعة من طلعت من العملية !! وودوني جناح الحوامل .. وذاك اليوم ظلوا ينقلوني من حجرة لحجرة ..

المهم .. طلعت من المستشفى 24\11 بالليل .. ليلة الغدير .. مريت على ولدي بعد قبل ما اطلع وكانوا مقللين نسبة التخدير منه .. وعايد علينا وفتح عيونه شوية لينا عن خاطرنا ..

الحمدلله الحين حالته تحسنت واجد عن قبل .. من يوم الخميس واني اروح ليه الصبح والليل .. اقعد وياه شوي واشفط ليه حليب .. توهم اليوم مبدين يشربونه حليب .. والحمدلله اليوم يوم رحت له كان قاعد ومصحصح .. لكن للحين على جهاز التنفس ..

ادري دوشتكم بقصتي الطويلة .. المتعبة المأساوية .. كان فيها تفاصيل واجد تصيح بس ما احب اني اتذكرها .. وما ابغي اكدركم بها ..

الحمدلله اهم شي ان ولدي حالته تتحسن وان شاء الله بسرعة يخف ويعطوني اياه ..

سلام عليكم


شخباااااااااااااااااركم امهات

الحمد لله على السلامه جحه

والله عورتين قلبي بقصتش وان شاء الله السيد يطلع بالسلامه بحق اهل البيت

حبيبتي جحة حمدلله على السلامة
ياراد يوسف على يعقوب من مغيبة يرد عليش السيد بالسلامة
اول مرة اقرأ قصة ولادة تعور القلب وتصيحني مثل قصتش
الله يقر عينش خيوه بشوفته ويعطونش اياه اليوم قبل باجر

خيو جحه مايشوف شر السيد وربي بيحفظه لش وبتر عينش بشوفته بحق ام البنين وبحق هالايام المباركه

قصة ولادتي .

موعد ولادتي 15-11 وكنت متوقعه وعندي امل اني اولد قبل الموعد ب 10 ايام او اكثر لكن توقعاتي طلعت فاشله:lol:

تاريخ 14 جاني الم يروح ويجي بس ما كان منتظم وتوقعت طلق كااااذب ولما صحيت الصبح ما كان فيني شي..
تاريخ 15 الصبح ما كان وياي الم بس بعد صلاه الظهر زاااد الالم وكان الالم مو منتظم بس من يجيني الم يذبحني وكان الالم كل ساعه وساعات يجيني كل نص ساعه بس ما يقل الوقت كان يزيد وماتوقعت ولاده..

واهني اشتغلت على روحي قلت لازم اشوف وش سالفه الالم هذا ومن الساعه 3 العصر سويت ليي كف مريم يمكن شربت 4 قلاصات كباااار:-# ونص غرشه ماي ورد وزعفران:struggle: وحليب دافي وتبخرت ببن:hysterical:

والالم نفس ماهو ما كان منتظم واذا جاني ذبحني من حرارته:'(

المغرب صلينا ورحت تمشيت مع زوجي في ممشى عالي وما مشيت واااجد لان كنت تعبانه
ورحت دايركت مستشفى جدحفص الى تخطيط ..
وطلع التخطيط اوكي ومافيني طلق:mad: لان يسوون التخطيط نص ساااعه
اهني انقهرت اقول اليها الالم يجيني كل نص ساعه وساعات كل ساعه وذابحني عدل ماعبروني:'(

مشيت ورحت الشقه وعشيت بناتي ونيمتهم ونمت وقال لي زوجي اذا بتروحين المستشفى قعديني ..

الساعه 1 الليل حسيت بموت من الالم خلاص وكان بعد مو منتظم بين نص ساعه

المهم قمت وقريت سورة مريم وسوره الزلزله وصليت ركعتين ولبست دفتي وقعدت زوجي قووم ماني قادره

وانطلقنا جدحفص ووصلنا الساعه 2

عطيتهم الكارد وورقه التخطيط اللي سووه ليي المغرب..

فحصتني السستر وقالت ليي 3 سانتي اني اهني استانست وقلت قرب الموعد وفي نفس الوقت جاني خوف:thumbs_down:
قالت لي بدلي . بدلت ونادت زوجي واخذ ثيابي وجروني للمقصبه:worn_out:
قسم الولاده كااااااااااااان هادىء وذاك الوقت ما كان عندهم احد غير ثنتين مخلصين منهم وفي الاستراحه

المهم حطو ليي هالتخطيط الا يلوع الجبد وهالسيلان الا خضر ايدي :badly:
وفحصوني وقالو 3 سانتي بعد ولاحظو ان الطلق وياي كل نص ساعه وكنت كل ربع ساعه اروح الحمام ..

المهم ضليت على هالحال لين الساعه 7 الصبح وكنت متوسعه 4 سانتي بس وكان الالم كل نص ساااعه والسسترات كل من جت فحصتني . واني ما كنت اتوسع بسرعه

بعدين قالو بنعطيش ابره على شان تلين الرحم وترتاحين شوي وكنت رافضتنها وقامو يقعنوني واخيرا استسلمت واخدتها

ومن اخدتها زيدت الالم بس الوقت نفس ماهو كل نص ساعه ووسعت ليي رحم لين وصلت الى حاله قمت اضرب روحي من الالم والله كان الطلق كلش كلش حااااار ويروح ويجي الطلق

ومن اجيني الطلقه انادي السستر تعااااااااااااااااالي لا تروحين عني بمووووت خلاص واهي مسكينه تهدا فيني وتمسح على ايدي ومن تروح الطلقه تمشي عني ومن تجي نفس الحاله سستر تعاااااااااااااااااااالي ههههههههههه:o


ورده البريه تذكرت واااااااجد في غرفه الولاده ههههههههههه
شفت الدعاء الا قلتين قراتينه بصوت عالي والسسترات ضحكو عليش لان اني بعد سويت هالحركه ههههههههههههههه

بعدين حسيت روحي ابغي ادفع وقامو يتراااااااااااااااكضون ويلبسون القفازات ويبرزون عدتهم وقالو لي من يجي الم عصري وكان هالمره الطلق وياي غريب حتى يوم قريب بيطلع ولدي الطلق يروح ويجي:|

وبعد في هاللحظات ولدي ارتفع راسه.. وقامو جابو ليي هوز مادري وش فيه وهي تصارخ البيبي راسه راح فوق
وبعدين اعتدل وحمدت ربي


يمكن عصرت 10 مرات او اكثر والله واااااااااجد ومافي نتيجه واني تعبانه ومافييى قوه. واصيح من قلبي والسستر تجيب ليي ماي وكلينكس تمسح وجهي لان خلاص حسيت قوتي راحت
وبعدين سويت بووووش قوووووووووووووووووووي وسمعت صياح ولدي بعدقلبي وقصو حبل السري وقالت ليي بوي وحطته على صدري بس كنت ماابغي اشوفه لان هلكت وحسيت جسمي خلاص مااقدر احرك شي فيه ورجايلي قامو يتراقصون:lol:

عقب ما ولدت حبيب قلبي عبدالله يجي دور المشيمه تعسرت ليي مارضت تطلع الا عقب ربع ساعه او اكثر عقب معاناه من السستر وهي تعصر في بطني .. وهم واقفين ينتظرون الفرج المشيمه تطلع تقول ليي السستر مابنخبر زوجش ولدتين لان ماتعتبرين ولدتين والمشيمه ماطلعت اني اهني صحصحت وخفت :'(

وبعدين خيطوني غرزتين من بره ..

وعقب ماولدت استانسو قالو هذا البيبي يبي يجي في العيد لان ولدت في عيد الحجاج يوم الثلاثاء:adore:بتاريخ 16 الساعه 9 ونص الصبح

لحد يقول الولاده ماتخوف
ترى في ناس الله يسهل عليهم وناس تتعسر ولادتهم

اني الصراحه في هالولاده شفت الموت :'(

وبعد الولاده جاني عقبان الا نفس الم الطلق اول مايبدي من ارضع ولدي يجيني .. واستمر وياي 3 ايام..

ونسيت ماقلت ليكم كل اللي سويته مانفعني لا زعفران ولا تبخر

ويوم عيد الغدير طهرنا عبوووود :)

ادعو الله يخلي اولادي ويهديهم:thumbs_up:

ام نور وعلي;13798844:

سلام

شخباركم
للحين ما ولدت ، واليوم المغرب بعد ما ينامون عيالي بروح السلمانية لطلق صناعي ان شاء الله يحصلون سرير وأرقد، خلاص وصل الثقل حده وتنفخ جسمي .

ام زهاري لما ليها لودة اليوم ان شاء الله تكون ولدت وافتكت

الله يسهل على الجميع ان شاء الله

الله يسهل علييش حبيبتي

وان شاء الله جاش طلق من الله بدل هالصناعي :thumbs_down: وييسر لش رب العالمين وتولدين بسهالة

جحة حبيبتي الله بيرده لش سالم ان شاء الله بحق جده رسول الله

والله بيجزيش خير بدل صبرش على الالم والتعب والمعاناة

امهات

خبروني راحت دبتكم لو ليها اثر

هههههههههههه