,.-~*'¨¯¨'*·~-.¸-(التجمع الثالث عشر لحوامل شهر نوفمبر(11) 2010)-,.-~*'¨¯¨'*·~-.¸

عاشقة قلبي;13641561:
هلا بنات
اخباركم؟
متملله حدي وزهقانه
متى تجي الساعه 4 عشان اروح الى ولدي

هلا عشوقة ...
ان شاء الله يصير زين وتاخذينه اليوم :adore:

بس ليش ما رحتين بيت أبوش ..؟

انا بااشهر التاسع وبكرة اخر يوم لي في شهري وانتي

اني من ولدت واني تجيني الآم مو طبيعيه في بطني
حتى مااعرف انام زي الناس

ااام ليث;13641594:
انا بااشهر التاسع وبكرة اخر يوم لي في شهري وانتي

في التاسع بعد ...
وباقي 4 أيام ... :adore:
بس ما يندرى متى الله يكتب الولادة ...
بعد لو قبل هال 4 أيام ... :worn_out:

هي الام جدا عادية بتخلي الرحم يرجع لوضعو الطبيعي انشالله واسمها الخوالف عنا بالاردن تتبع كل حمل الله يخفف عنك يارب

هلا احبك
اني في بيت ابويي
لكن ماحد وياي
خواتي وحده مسافره
والثانيه تجي العصر على ماتخلص امورها وشغلها في شقتها بعدين تجي

:thumbs_up:يالله بنشوف مين تولد قبل شدي حالك

اشربي كمون مع يانسون انشالله بتخفي

عاشقة قلبي;13641637:
هلا احبك
اني في بيت ابويي
لكن ماحد وياي
خواتي وحده مسافره
والثانيه تجي العصر على ماتخلص امورها وشغلها في شقتها بعدين تجي

اهاا ..

ان شاء الله اليوم يوصل السيد ، ويملي عليش كل وقتش .. :adore:

الله يسمع منكم يارب
ان شاء الله يعطوني اياه
قلت باطلعه على مسؤليتنا
لكن امي تقول لي خليه هم ادرى بصحته
واخاف اطلعه وابتلش
ان شاء الله بدون مااقول ليهم هم يعطوني اياه
ياعلي صاير نفسي فيه وبقوه بعد
يوم اللي ولدت كان طول اليوم جنبي
صحيح كنت تعبانه والخياط مااعرف اقوم واقعد منه
لكن نسيت تعبي كله وهو وياي
الله يبلغكم ان شاء الله
ويسهل عليكم وتشوفون نونواتكم في حضونكم يارب

الله يسلمك يارب ويخفف عنك

عاشقة قلبي;13641679:
الله يسمع منكم يارب
ان شاء الله يعطوني اياه
قلت باطلعه على مسؤليتنا
لكن امي تقول لي خليه هم ادرى بصحته
واخاف اطلعه وابتلش
ان شاء الله بدون مااقول ليهم هم يعطوني اياه
ياعلي صاير نفسي فيه وبقوه بعد
يوم اللي ولدت كان طول اليوم جنبي
صحيح كنت تعبانه والخياط مااعرف اقوم واقعد منه
لكن نسيت تعبي كله وهو وياي
الله يبلغكم ان شاء الله
ويسهل عليكم وتشوفون نونواتكم في حضونكم يارب

الله كريم ان شاء الله .. :adore:
وأكيد بيوحشش ، وخاطرش كله تطالعين فيه :adore:

الله يبلغنا ان شاء الله بشوفة كتاكيتنا ...

بس ما قالو لش تروحين ليه ترضعينه مثلا أو شي ...؟

أحبك والقمر يشهد;13641549:
شخبارش بقايا وحشتيناا ..
شحوالش وشحوال الكتكووووتة

وشخبار تجربة الولادة لأول مرة .. ههههه :D

اهليين خيوو

الحمدلله والكتكوتة بخيير اكي نااايمة

:)

وتجربة الولادة الحين قاعدة اكتب ليكم القصة

:worn_out:

عاشقة قلبي;13641561:
هلا بنات
اخباركم؟
متملله حدي وزهقانه
متى تجي الساعه 4 عشان اروح الى ولدي

اهليين عشووقة

الحمدلله على سلامتش

وربي يقوم السيد بالسلامة وتشوفينه بحضنش يارب

بكتب ليكم قصة ولادتـي ومسامحة على الهدرة الزايدة

:o

بتاريخ 20-10 ابتدأ عندي الطلق بس كان مو منتظم وكنت مفتوحة 1 سم وشي

وبتاريخ 25-10 كان عندي موعد عند دكتورتي وسوت ليي توسعة وكانت التوسعة شي مؤولم لدرجة وقالت ليي اني راح اولد على اليوم لو يوم ثاني

يوم ثاني نزلت مني السدادة وافرازات واستمرت ليوم ثاني هالافرازات وقلت اكيد بولد بنفس اليوم لو يوم ثاني لكن ابد

وتميت ويا الالم لمدة اسبوع بس من غير ما أولد

30-10 رحت تمشيت مشي عالمي في دوحة عراد لمدة ساعة كاملة 3 كيلو واهلكت حدي

وبتاريخ 1-11 كان عندي موعد عند دكتورتي ومن دخلت قلت ليهااا دكتورة مافاد ويايي لا توسعة ولا شي

فحصتني داخل الا بعد نفس الشي 1سم وشي وحاولت بعد توسع بس اني قمت اصرخ قلت ليهااا خلاص ماا امبي كفاية اول مرة مت من الالم

فسوت ليي توسعة بس شوي بس هالمرة نزل عليي دم اكثر من المرة الاولى واستمر ويايي طول اليوم + الم في بطني نفس الم الدورة وظهري

ويوم ثاني اله هو تاريخ 2-11 وانا بالدوام وانا مو قادرة الالم يروح ويجي ومستمر ويايي

رجعت البيت الظهر وكتبت ليكم اني مو قادرة من الالم

متعودة من ارجع من الدوام ارجع تعبانة حدي ولازم امبي انام بس بهداك اليوم ماقدرت انام فقلت خلني اقوم اسبح واجهز نفسي لان شكله الولادة قربت

قمت سبحت وتبخرت ببن والالم نفسه ماراح مني

عقب شربت كوب واحد من عشبة مريم والالم لازال ويايي بس متحملتنه ويوم بمشي المستشفى شربت الكوب الثاني وطبعا رحت المستشفى بروحي اني وزوجي بس << كنا من قبل مقررين اذا بولد مابخبر احد عشان لحد يحاتي

وصلت المستشفى الساعة 6 المغرب وقلت ليهم احتمال ولادة والسستر اله هناك فحصتني اول اله تقول 1سم وشي !

انا اهني صادني احباط ،، كل هالالم اله عندي ومن فترة وبعده نفس الشي !

المهم حطت عليي تخطيط والالم كلما يجي له يزيد عقب خلتني اروح للدكتورة وكانت هندية قالت ليي انتي بعدش 1سم وشي بس في الم لكن انا الحين بشوف بعد كم فاتحة واذا بعده 1 وشي انته يروح بيت

رحت انسدحت على السرير فحصتني اله تقول حقي انتي الحين 3 سم !! << طلع السسترات الهبلان اله هناك ولايفهمون شي

وقالت ليي الدكتورة يقعد اهني لما يصير 4 يودي فوق حق ولادة ويشوف بعد يمكن مافي سرير فيروح يامحرق ياجدحفص

اناا اهني استانست على خفت من الولادة شوي

بس قلت ليهم ما امبي اولد في غير السلمانية

طلعت من عندها قلت ليهم بروح اكلم زوجي رحت ليه اقول ليه بيي اسكت بولد قرريب الليلة ان شاء الله ،، بو الشباب استانس حده وما عرف ويش يسوي وجى ويايي عشان نشوف سالفة ان بخلوني عندهم لو لا لان يقولون الاسرة مال الولادة كلهم فل

وخيروني اذا بتم عندهم لو بروح جدحفص لو المحرق وخوفوني قالوا حقي اذا صرتين اهني مابتحصلين اهتمام نفس اله يخلونهم في غرفة الولادة لان هناك يعطون مهدأ وجدي وانتين اهني لين ظليتين تحت
تحيرت حدي عقب قررت اني اتم بالسلمانية واتصلت في امي اخبرها وهو اتصل في بيتهم

المهم رحت بدلت وخلو عليي التخطيط والالم كلما يجي ليه يزيييد وانا مو قادرة ومن تجي الطلقة اون شوي من الالم واقعد اصيييح واتذكر اني لازم آخذ نفس عشان ارتاح شوي بس ان يعني كنت متحملة ومصبرة نفسي

وهم كلما يشوفون الالم يزيد يفحصوني ويقولون ليي بعده 3 سم !
خب انا هالحزة ماصدقتهم لان المرة الاولى كانوا هبلان ولا عرفوا يقيسون صح

واهني واني اصيح اقول ليهم نادوا على زوجي وهم يقولون اهني في مريضة مايصير

عقب هو كان يسأل عني وسمع صياحي وجى مسكين ومو عارف شيسوي عقب مشى لان جو السسترات

وتميت على هالحالة لما وصلت حدي من الالم وهم بعدهم يقولون ليي 3سم !
عقب جت دكتورة وقالت بتفحصني اله تقول ليي 6 سم !!

يعني اشكره هالسسترات اله يقيسون مايعرفون بالمرة يعني جان ولدت وهم ولايدرون

عقب جهزوني عشان يودوني فوق ويوم طلعوني فوق جى زوجي شافني للمرة الاخيرة قبل لا اروح وقعدت اصييح وهم متخسبق المسكين حده

:o

ودوني غرفة الولادة وانا شوي فيني خوف وكلما تجيني الطلقة واون من الالم يذكروني يقولون لي خذي نفس وارتاح شوي

وصلت وقلت ليهم امبي اروح الحمام << السستر مارضت تقول كل حين تروح وتوها قبل لانجيبها كان داخلة بس انا اصريت اروح

كنت صدق كل شوي اروووووووح الحمام كل حين اتحاصر

المهم رحت الحمام ورجعت

شفت مكتوب في ورقة قبالي ياخالق النفس من النفس الخ وسيدا ذكرت وردة البرية

جت وحدة وبطت ليي كيس الماي وكان دافي حده وشي غريب يعني وشافت رحمي وقالت ليي ماشاء الله رحمش متهيئ حق الولادة وقلت ليها اكيد من عشبة مريم هههه اله تقول اي دا الخايس جيفا قدرتين شربتينه؟ قلت ليها اني وحدة امبي افتك وامبي اولد بسرعة فعشان جدي صبرت روحي ،، قامت تمزح وقالت عجل يعني تنصحينا نوزع على الحوامل جان بسرعة يولودون ،، وهالحزة زااااااااااااد عليي الالم عددددل وقعدت اون

المهم استمريت على هالحالة الى الساعة 2 مدري 3 الالم كل حين يروح ويجي لما وصلت 8 سم اهني استخفيت وقمت اصرخ بشكل هستيييري اقول ليهم يعووووووور وامبي اروح الحمام

:worn_out:

وظليت كل حين من تجي الطلقة اصررخ واقول يعووور هع

ويوم وصلت 10 اقول ليهم بروووح الحمام وهم ابد يقوولوون ليي ولادة الحين ولادة سوي بوووش وخذي نفس

بس انا هالحزة كلش نفسي انقطع وريقي يابس حد حده قلت ليهم امبييييي مااااااي مو قادرة وجابوا حقي مااااي ولا شكله من الوولف بعد

وتميت فترة اعصر وهم كل حين يشجعون تجييني شوي الضحكة من داخلي وارد اوقف ورد يرجع الراس لداخل لان اله تشجع تقعد تصفق تقول احسن احسن يالله يالله

:lol:

وتميت معاناة واني ويا هالتعصير واجد تعبت لان ويايي بواسير من الحمل تكرمون ولان نفسي صاير قصير ما اقدر اطول

آخر شي شجعت روحي لما قالوا حقي واصلي واصلي طلع ثلاث ارباع الراس واصلي واااااااصلي واهني ضغطت على روووحي اكثثثرر وتحملت ليما طلعت نووور عيووووني الساعة 4:14 الصبح وسيييييييييدا حطووها على صدري

آآآه حسيت آلالام الدنيا كلها رااحت في هاللحظة وقعدت اقووول واخيييييييييرا

بس من طلعت مااصاحت كانت تساعل قلت ليهم شفيها الجاهلة ماصاحت شوي اله الظاهر مسكينة ضربوها وقامت تصيييح وقعدت اقول من غييير شعوور ياااااااااااعمررري وقعدوا ينظفونها وكلما صاحت قلت ياااااااااعمري

:lol:
وقعدت وحدة تخيطني وقلت ليها خدريني ما امبي احس بشي وخيطتني ومهلت واااااااجد كأنها تخيط دشدادشة وكنت احس لما تنغز بالابرة بس مو داك الالم يعني محتمل

وسالتهم خبروتون زوجي قالوا الحين بنقول ليييه

وبس خلصوا منا وطلعونا عشان بودونا غرفة استراحة الولادة وجى زوجي شافني ويوم رحنا الاستراحة اهني شاف زوجي بنته وقعد يصييح حده الموقف يصييح

:'(

وبس ما امبي اطول اكثررر لاني واجد هرريت

بس كل شي كووووووم والخياط كوووووم ثااااني

بالرغم من اني واجد عانيييت من الالم من قبل كم اسبوع ويوم الولادة عانيت من الطلق من المغرب الساعة 6 ليما ولدت الساعة 4 وربع يعني 10 ساعات وربع وانا اعاني بس الحمدلله رب العالمييين اهم شي ولدت بالسلامة وشفت كتكووتي بخييير

وعقبااالكم يااااااااااااااااارب


:)

أم زهاري;13641739:

سلاااااام

شخباركم ؟؟
ام شهودة
مشكورة على السؤال بس امس دخلت وما كان عندي نت ..

بقوي
شخبارك ..
اخبار زنوب الامورة ..

والله يعينك على السيم ..

اهليين ام زهاري

انا الحمدلله وزونوب بخيير

والسيم يعووور مادري متى بيطيح وبفتك منه

:badly:

وعلى سالفة الغرفة الخاصة جحة كأن سألت ؟

الحمدلله انا حصلت

بالرغم من انها حدها صغيرة بس احسن من الغرف العاااامة

وبقول ليكم شي

انا عقب ماودوني الجناح من بعد الولادة وجت امي وعمتي واختي ومرت اخوي قالوا ليي قومي اسبحي وبنساعدش مارضيت يازعم استحي قلت عقب بقوم بروحي وبسبح << عنيدة

عقب مامشوا ضربت جرس سالت السستر عادي اقوم اسبح؟

قالت ليي اذا تحسين روحش اوكي عادي قوومي

قمت وطلعت ثيابي ودخلت الحمام وتوني واقفة مشغلة الماي اله احس الددنيا كلما يجي ليها وتصيير سووودة وتظلم في عيوووني

وحسيت روحي خلااااااص بطيييح

سيدا ضربت جرس بس محد جى واني احس روحي خلاص بطيح وذكرت بتي اقول مسكينة منهو ليهااااا

بعدين قمت اصرررخ جان يجون بسرررعة ليي قبل لا خلاص اطييييح واشوى جتني الفهمية وقعدت جان انشدخت على الارض

جوا ليي السسترات يترااااااااااكضون خايييفيين وكتوا على وجهي ماااااي باااارد وجابوا ليي عصيير وشربته ليما فتحت شوي شوي

عقب عصبوا عليي قالوا ليش قمتين بروحش قلت ليهم اني سالتهم وقالوا عادي

وقالوا خلاص لاتسبحيين << تخيلوا ما اسبح واقعد بحالتي !

قلت ليهم لاااا امبي اسبح والحين صرت زينة وخافوا قالوا ليي من تحسين بشي سيدا ضربي جرس واسبحي وانتين على الكرسي


فنصيييييييحة بنات من تروحون الجناح اكلوا ليكم شي واشرربوا عصير قبل لا تقومون لايدور رااااااسكم

:thumbs_down:

ياعلي بقايا
احس اكشن ولادتش مؤثر
يعني ولادتي تهون بواجد
اني صحيح عانيت وي الطلق
لكن الحمد لله حسيت ولادتي سهاله من رب العالمين
والحمد لله يوم الله سهل علينا والله يحفظ لينا كتاكيتنا
والله يسهل على الجميع يارب