هلوساتي سنتين التي خلالها سحقت 73 كيلو^_^ (((خـــواطــــر للأخــــت SOUL)))

انحصارنا بين مطرقة الماضي وسندان المستقبل


السمان نوعين

الاول

سمنته اصيله .. طفوله سمينه..مراهقه سمينه .. حياة زوجيه سمينه .. او عزوبيه طويله والسبب سمينه..!!


الثاني

سمنه حديثه من رغد وراحة الحياة الزوجيه او من الحمل وحبوب الحمل او من مشكلات اجتماعيه ونفسيه


النوع الاول

لما يبدا بالدايت او حتى يفكر فيه تلقى نفسها غرقانه بالماضي

سمنتي اصليه..بنحف وارجع لان انا اصلا سمينه

وتستمر بتسمير الشحوم على الواح الشحوم بين الكرش والارداف

والسبب


انا اصلا سمينه لو نحفت برجع اسمن..لو ماقالت هالحكي تبي تسمعه وتصدقه...!!

النوع الثاني


ذوات السمنه الحديثه

هذولا يأرقهم الوقت ويبون يرجعون مثل قبل باسرع مايمكن

تختار رجيم ابو 5 كيلو بالاسبوع

تكتشف انها مانزلت غير 2 كيلو

يوووه باقي لي شهرين على هالحال

لانها طبعا افترضت النزول بيكون مستمر

ماتدري انه فيه ايام وقد تكون شهور الجسم يقول ستووووب لازم نريح

للاسف ترجع تجمع الدهون والشحوم قبل توصل حتى مرحلة الثبات

وتكتفي بـ2 كيلو نزلتها بثقة اللي بتنزل الباقي

ولما تطلع بعد اسبوع ثاني ع الميزان تلاقي مع الـ2 اللي نزلوا 2 راجعين..!!


فقط لانها انحسرت بين تفكيرها وطموحها والمستقبل البعيد


فيه نوع نااادر واقدر اسميه غريب

اللي يخاف ينحف ويترهل...هذولا اعتبرهم مغيبين العقل..!!


عشان تنجحين

خلي تفكيرك مايتجاوز وقفتك وانعكاس صورتك بالمرايه

وشوفي انتي كذا تمام او تحتاجين تجديد

كل شي يحتاج وقت وصبر وراحه لما نكون نبي نعيد بناءه...


الوقت مهم..لكن لايكون طويل ونمل والاهداف لاتكون اكبر من القدره على التحقيق


لما تكون الكوره اكبر من المرمى....مستحيل تدخل..!!

الشكولاته والمعاناة


اغلب العالم تخرب دايتها عشان قطعة شكولاته

اكلتي قطعه او حبة سنكرس

مو اخرب يومي واكل باقي الكرتون

اخصم سعراتها من الايام الجايه

مو شرط اعذب نفسي ولااتعشى

لنفرض ان سعراتك زادت بسببها 300 كالوري

وانتي يوميا تاخذين 1000 كالوري

خلي باقي الاسبوع 950 ماراح تفرق معك كثير


خلونا نتعامل بذكاء عشان نعرف نعيش برواق

اتركوا التفكير بالمستقبل..صدقوني هو سبب الفشل


اللي يفكر بالقمم عمره مايكون بطل

حسن الاستماع...وتأكيد الاقتناع


لما تسمعين صوت عقلك يقولك

راح تنحفين اكيد لما يقل اكلك لو شوي

راح تنحفين لما تحركين جسمك وتجبرينه ينتج طاقه ويحرق الدهون لو حركه بسيطه


راح تقتنعين

ان الشي الكبير ممكن تشيلينه لو قسمتيه لاقسام صغيره

تبين تنزلين 40 كيلو

قسميها على 10 شهور

بتلاقين 4 كيلو بالشهر

تنزلينها بالراحه وبدون ضغط اعصاب

لا وممكن تنزلين ضعفها اول شهرين

يعني تستغنين عن شهرين

المهم

تقتنعين بحكي عقلك..وتقتنعين ان اي انسان قادر انك يحقق الانتقال

بين الي كان يشوفه ممكن واللي اعتقد انه مستحيل..



لكم حبي

الراحه النفسيه والتوتر

امر لابد من توفره

يعني وزنا وطله ثابت او زايد

نحوس الدنيا

لو حسناها بنتضايق زياده

نفكر بشكل ايجابي ونقول

الاسبوع الجاي اكيد بينزل

ونكرر التفكير الايجابي

هنا راح يحبط الثبات

طول ماحنا نمشي صح

ناكل صح ونتحرك

اكيد نبي ننحف اكيد

خذوها من سول

خبصتي


ماانتهت الحياة ولاتوقفت القدرات


اكيد انتي لسه تحبين نفسك

خلاص خبصتي

انتهينا

لاتحصرين نفسك بهالتخبيصه وتنكد عليك

تهني فيها

وبكرا كنك بتروحين للداوم

انتهت الاجازه

وبدا الجد

كيف تاخذين الراتب وانتي مرتاحه

ماله قيمه

تنحفين بحبوب

وتمنعين نفسك بحرمان

ليه

كل شي سهل

مجرد انك تذكرين نفسك

امس اكلت وانبسطت

طعم البيتزا هذي مثل اللي امس واكلت منها ومليت

بغير

واكون صح

واعيش صح

بالاخير ممكن شوية جنون مع تخبيص

وارجع لعقلي

أزمة البيريود(الدوره الشهريه)

هنا حكايه ثانيه

هو ضيق وهو شهيه مفتوحه وهو لخبطه
كل ماتبون

الان انا اعاني من هالضيق

وأصبه وين؟؟؟

بأشياء حلوه..لكن افكر

الى متى مااستمتع بالحلا
وارد على نفسي 20 سنه مستمتعه متعه متصله متواصله

وش حصلتي إلا مجموعة شحوم خلت الميان يكرهك إذا وقفتي عليه...!!
الان نفسيتي 20 تحت الصفر جدا سلبيه

لكن هاجس الرشاقه طاغي .... ولازم وبإذن الله راح اوصل له
ليش خلي ازمه يوم او يومين تنسيني مبادئي...وافكاري الصح

عمر الأكل ماصار متنفس للضيق....

موضوع الرابح الاكبر ليس سوا حافز للبعض


85 % من اللي في هالبرامج رجعوا اوزانهم السابقه باقل من سنه

وهذا مو كلامي

هذا كلام البرنامج نفسه لكن النسخه الاجنبيه

طبعا لانهم اكثر صدقا للاسف


المجموعه هذي في هالبرنامج ينزلون هالاوزان بخلال 6 شهور

يعني شخص ينزل فوق 50 كيلو في 6 شهور

اعتقد امر مو منطقي ولاصحي

نتيجته العكسيه بتكون اقرب واسرع مما نتصور


المده الطويله في ممارسة الدايت لها عدة فوائد

- المحافظه على الوزن اطول وقت ممكن

- القدره للانتباه من بدري في حال رجعنا لطريقنا القديم

- نسبة الترهلات تكون اقل من النزول السريع باكثر من 60%

- الجسم يتعود على الكميات الجديده او النوعيات الجديده

- كل 3 شهور تكوني نيوك لو بدل مايتغير شكلك مره وحده >>> مهمه للحريم

- الراحه النفسيه كون الضغط قليل على الجسم من ناية الاكل او الرياضه..


هذا مايحضرني الان...




7
7
7
7

لما يكون عندك شغل كثير

نتيجة اهمالك وتسويفك

بكرا بغسل

بكرا برتب وامسح

وبكرا يجر بكرا وبكرا

وبكرا

وصار شهر

نتبهتي ان الشغل بدل مايكون غسيل

طلع بلاوي زرقا

قلتي اليوم خلاص ببدا بشغلي هالمره لين اخلصه

وبديتي

وكل ماتذكرتي ان الشغل كثير تمللتي وانتي توك باديه

لكن لو فكرتي او اعتبرتي شغلك تسليه وتناسيتي كثره

وفكرتي ان الشغل مسيره يخلص

بتلقين وصلتي للنهايه

مايمنع ترتاحين بين فتره وثانيه

تجلسين تشربين لك شي او تريحين رجولك

طبعا هالحكي لو افترضنا ان الشغلات اختراع لم يتم

هذا الدايت

مجموعة تراكمات لاهمال وتسويف لأشغال

اتخذي قرار اخير ولافيه رجعه

برتب حياتي

واشيل اللي ماله لازمه فقط مشوه شكلي

مثل القشاويل اللي تملا بيوتنا ماغير تحوسنا وتقلل من حسن منظره

كل الدعوى

ترتيب وتعديل

فيه شوية راحه وتسليه

واسترجاع الهمه لمواصله الترميم والتعديل


لكم حبي

جلسه مصارحه

جلسه ضروريه


حددي انتي من اي نوع

من النوع الاكول

او من النوع اللي اكله عاطفي

او من النوع اللي اكله وقت الفراغ والفضاوه


بعدها اتبعي الدايت اللي يناسب


غالبا نتبع نظام بدون مانعرف انفسنا من اي نوع


فتلقين نفسك تطامرين من دايت لدايت

تمشين لك اسبوع

وتجيك وحده

والله اخت زوجي او جارتي ناقصه نص وزنها قالت مسويه رجيم مادري وشو والله

تردين

تكفين اساليها

وتدق الناقله

ولاترد الناحفه

وانتي دخلتي دوامة اللخبطه والانتظار


كل الطرق تودي الى روما

واي اسلوب صحيح بيعدل اخطاءك

اسيرات الماضي


ومهووسات المستقبل



الى وقت قريب كنت من هالمجموعه


واكتشفت ان الشي الوحيد اللي ربحته خسارة الحاضر


لما افكر بالشهر اللي راح اني نزلت 5 كيلو بسرعه تجي فكرة انه لازم اخر الشهر الجاي

انزل اقل شي 4

واضل محصورة بين هالفكرتين

او اقول اخر الشهر ليه نزلت 2 بس

والشهر اللي راح كانت 5

والمحصله فكره وحده

محصوره بين الشهر اللي راح وآخر الشهر الجاي


والمساحه بينهم الم وقلق وارق وعدم رضا وعدم قناعه


وعدم قدره على الفرح والاستمتاع



ان كنتي من هالمجموعه السجينه بين هالفترتين

انتبهي واطلبي اكبر محامي




لكم حبي

كل ماهو مقدر سيكون

رضينا ام ابينا



نخطط ونفكر ونقول نبي نمشي ونبي نقول ونبي ناكل

ونبي ونبي


لكن شي واحد بيكون

ماهو مكتوب


الاتكال على الله اهم شي

والقناعه بماكتب الله

(( يارب اعني وسهل الامر علي))

كررتها كثيرا .. ولا خيبني ربي

الحب


عيشي الحب

لو قصه وهميه

عيشي وكانك معشوقه ... وان هناك من هو يموت فيك

بالتالي لازم تكوني قد هالحب


لازم اكون جميله.. استمر جميله

وأبقى جميله

مثيره

جذابه



انا انسانه استحق ان يغرم بي

لأني فقط


اعشق نفسي

وراح ادور دايم على مايبرهن لها اني اعشقها...


لكم الحب

كل الطرق تؤدي الى روما


بالتخفيف ننحف

بالاكل الكثير ايضا ممكن ننحف


شويه تطوير للاختيارات

وترتيب للاوقات...


ونحصل احلى الاشكال...

لكل جواد كبوه..

واستراحة محارب

رددتها كثير

لكن اكتفيت بترديدها

ونسيت اني Soul اللي اغرمت بـ Soul

اصارحكم واصارح Soul لست فتره طالت نوعا ما

انشغلت عنها واهتميت بغيرها..

باختصار اهملتها

بالتالي اهملتني..

البارح عاتبتني.. وقالت

(( تكفين مابي ارجع للظلام والقهر و الألآم..))

بكت وبكيت..

وعدتها مااخليها...

وكمية القبح اللي باهمالي رسمته فيها

بعشقي بشيله عنها وأحليها


لكم ودي ووردي

بكرا.. خلاص خبصت اليوم..!!

ليه نتعامل بهالحيله الغبيه بس عشان ناكل

انا ضد الحرمان بالاكل

كل ممنوع مرغوب...

موضوع العقاب لاننا خبصنا امر مافيه غير الانقلاب على النفس

خبصت اكلت لابد اني انبسط بهالتخبيص

وبكرا يوم جديد..

الخطه البديله او التصحيصيه

لاهي حرمان ولا سوائل ولا زبادي ولاتفاح

الخطه

الالتزام وكثير من الحب والاحترام..

والحديث تكرر...


لكم حبي

فــكـــرهـ


افطري فطور نحيفه تدور السمن .. يعني كلي اللي بخاطرك مثل هالانسانه


تغدي غدا اللي وزنها مثالي وتبي تحافظ على رشاقتها


تعشي مثل الطفل اول ماتعلمينه الاكل بعد الرضاعه ....


وخليك متاكده من الصحه والرشاقه مثل هالطفل متاكدين انه بيكبر

غالبا حنا الحريم

الإناث بشكل اعم

تجينا حالات اكتئاب ماندري وش سببها

لما نكون نعاني من الوزن الزائد نرمي عليه السبب

ونقول ايه لازم ننحف
الى متى والى متى.!!؟

طيب وننحف

وتستمر الحاله الغريبه اللي تمر علينا...

وهالمره نقول ايه شكلي من كثر الحرمان بديت احس بهالضيق لازم ارفه عن نفسي بشويه اكل

ايييييييييييييه عاد وصلنا خير...اي خير إلا دمار
ونبدأ عملية الترفيه الوهميه المؤقته

وناكل وناااااااااكل ....

عاد بالله وش ناكل

وجبه من هارديز...او بيتزا أو شكولاتات ولاهيب قطعه ولاحبه او حبتين

لا ناكل بإجرام...المشكله لو فكرنا شوي ان المتعه فقط في الفم..!!
وهالنوع من المتعه ماله نهايه إلا لما ماتقدرين تبلعين الاكل لانه وصل لآآآآخر حلقك

يعني الحلق مسدود مافيه مجال ينزل
خلصنا واكلنا..

خلاص بكرا نبي نرجع لنظامنا

نصحى ع العاده ننظر الميزان...وااااااااو كيلو
وش اكلت انا............؟؟؟

لا ماهوب كيلو..لكن هالزياده الهميه حطمتك يوم ثاني وقلتي الله ياخذ الدايت وسنينه

يعني انا اذبح نفسي اسبوع وانزل 2 كيلو وبيوم ارجعها

ماعاد انا متعبه عمري
وترجع نفس الاسطوانه القديمه....

التغيير من الخارج لابد انه يكتمل بتغيير من الداخل.........!!!

أحسني الأختيار


للأسف دايم نسوي رجيمات
لكن مانختار صح...

ونكتشف بعد مده ان الجسم مايتغير او ماينزل

ويجينا ملل واحباط..وعقبها انتقام

مانحسن الاختيار

نختار رجيم سريع...

نبي ننزل بسرعه

نحضر الزواج وعقبها بعدي الطوفان

كنك تجمعين مبلغ تشترين فيه فستاااان غالي

وعقبها تعلقين الفستان لين يروح موديله...

والوزن يرجع بمجرد العوده للأكل....ولو ظنينا اننا نخفف...

لازم نختار بعقولنا ..مو بفمنا الاكل

فيه اكل لذيذ لكن خفيف

احسب وافكر بالمكونات..

راح تحسين انك راقيه...حتى بتفكيرك بالاكل................

الى متى الحصار


الاغلب منا واولكم انا

انحصرنا زمان بين مطرقة الميزان وسندان الانظمه السريعه

بالاخير

وزن زايد للاسف...!!


لو نحفت بشوف النتائج بدون ميزان


خدامة اهلي وزنها 55 كيلو

واختي 53

والفرق بينهم بالشكل اكثر من 15 كيلو تصدقون..!!

امر الوزن وعلاقته بالشكل امر نسبي 70% غير منطقي


كلها كلمتين

تصديق معه تطبيق


صدقي ان الاكل اللي يسمنك بنفس الوقت ينحفك

وطبقي الطريقه الصح اللي صدقتي فيها السطر اللي فوق...


شوية هلوسه ممزوجه بفلسفه ... يغلفها مجموعة ألآم لقولوني...

الحمدلله خلصنا كل الموضوع

حبيت انقله لكـــم لانو مررررررررره عجبني وحسيت انو اثر فيني لا تنسوني من دعائكم الصالح لي
وادعولي انو مايجي بدايه السنة الا وانا واصله للهدف الي اتمناه واذ عجبكم موضوعي قيموني


والله يكتب الخير للجميع