ربات منزل غير بشهر الخير

السلام عليكم و رحمة الله و بركاته

لي كم يوم ما اكتب يوميات لانه اساسا ما عندي يوميات

من يوم رحت راجعت و انا بس منسدحه و رافعه رجولي

و باموت من الالم لدرجة حتى من نومي اصحى منه

و الدواء ينووووم فاصير مدروخه طول اليوم بس الحمدلله

سلفاتي عاذريني و شايلين عني المطبخ و الشغل

امس بس غسلت شوية ملابس لي و زاااااااد

الالم مررررررره و اليوم حركات البيبي كانت عنيفه

و قويه مره و فجأه حسيت الالم اختفى و يارب

يكون البيبي ارتفع من غير شر و ربي سهل

عليه و كملت الغسيل و كوب نسكافه طلبتني

ملابس بناتي تغسلها الله يجزاها الف خير

بس طبعا ما اعطيتها اللي عندها يكفيها

بديت على 8 و تفرجت على باب الحاره و كملت

خلصت على 12 الحمدلله يارب و تسحرنا على 1

و على 3 ناموا بناتي و اللحين جعععت و سويت

لي ساندويشة جبن و جالسه اتسحر..


ناويه بإذن الله اذا جينا بنسافر بارتب وحده من

الشنط للنفاس و اخليها عند اهلي يصير يخف

عني الشغل بجده و يبقالي ملابس البيبي بس..


اليوم فرحت مررررررررره انه بكره رمضان لنا 3 سنوات

و رمضان ناقص..

بآخر ساعات رمضان 1431 اقول

الله يعيده علينا و عليكم اعواما مديده و ازمنه مديده

و نحن و اياكم باتم صحه و عافيه و كل عام و انتم بخير..

مساء الخير والفرح والسرور كيفكم
:biggrin:وكل عام وانتم بخيـــــــــر:biggrin:
ومن العــــــايدين
جالسه أجهز شنطتي وبنسافر الساعه 2 للديرتنا الله يسلمنا من الزحمه
وحابه أقولكم أن هذا العيــــــد بالنسبه لي غيــــــــــر :oلسبب مـــا
وأن شاء الله راح أخبـــركم بعد العيــــــــد
:029:عســــــاكم من عــــــــــواده:029:

سلام كيفكم؟
عيدكم مبارك جميعاً :)
يومياتي:
زوجي معزوم على الفطور وسويت لي قهوه واصابع جبن وسندويش كودو وحمرت لي سمبوسه
وجلست احوس بالبيت بدون ايه نتائج خخخخخخخخخخخ
غسلت مواعيني ومسحت الفرن والكونترات والأرضيه وجهزت ملابس العيد ولففت شعري وضبطت حواجبي ياانا لعبت فيهن بالصبغه لعب هههههههه الله يستر
من تعليقات زوجي
بنات ادعو لي يجيب لي هديه هالعيد خخخخخخخ كل سنه اجيب له ويسحب علي بحجه ان مافيه شي حلو لقاه!!
وانا ارد عليه واقول مالك عذر لوتقطف ورده من حديقه جارنا اهم شي لاتدودل ايديك يارب يقطف لي ورده من حديقتهم خخخخخخخخخ
ودي انام بس مافي نوووم!!
اللهم ارحم من لم يحضرو معنا هذا العيد :(
اللهم اسعدهم في قبورهم :(

السلام عليكم ,,

عيدكم مبارك ,,وعساكم من الفائزين بجوائز رب العالمين ,,

اليوم صلحت ع الفطور بيتزا بس ,,ماابي المواعين تراكم علي ,,

عقب العشاء ,,رحت للسوق اشتري كم غرض ناقص ,,ومريت ناس من قرايبنا أعزيهم ,,ابوهم توفى قبل ثلاثة ايام ,,كانت وفاته في الصين رايح يسوي عملية زراعة كبد ,,توفى قبل لا يسويها ,,

الله يرحمه ويسكنه فسيح جناته ,,على فكره يصير عم أبو حكاية عطر ,,

بعد ماعزيتهم ,,مريت محل حلويات وشريت شوكلاته ,,<<بنات ابشركم جدتي طلعوها من المستشفى,,

ويارب يصير العيد هذا اوسع صدر من العام لما كانت منومه ,,

المهم رجعت للبيت 11,,تعشوا عيالي باقي البيتزا ونومتهم على 12 ,,وزوجي راح لأخوه ,,

وبعدها شمرت سواعدي ونظفت المطبخ وغسلته ,ونفضت الكنبات وكنست اللي تحتها ,,,وغسلت الصاله بالعملاق ,,

وشطفتها وطلع السيراميك يلق .. ,,وكنست ومسحت غرفتي وحطيت مفرشي اللي غاسلته قبل,,وبخرت البيت وطلع يهبل لإستقبال العيد ,,

ورحت أبي أنام وجلست اتقلب فيني النوم بس الحرصه شينه ,,أخاف يضيع الوقت ومايمديني لأن عيدنا عقب الصلاة على طول ,,

مساء الخير

كل عام وانتم بخير حبيباتي

يومياتى صحيت 3 صليت ورتبتت غرفه الملابس وغسلت حمام الضيوف وشطبت المطبخ وعلى6 ونص نزلت لاهل زوجى زوجى جايب فول وتميس ومعصوب وافطرنا في الحوش وطلعت بيتى واحاول انام مافي امل قمت كويت ملابس العيد الين 10 ونص طبعا لنا 8 سنين نظامنا في العيد نواصل للفجر نصلي في المشهد ونعايد ناس ونفطر عندهم ونرجع ننام والظهر نكون معزومين غدا نحضره ونرجع ننام والليل نتعشى اى شىء وننام ثانى يوم نقوم بدرى نسافر مكه وجده نعايد على اقاربنا اللى هناك ونرجع رابع العيد نحضر عشاء وبقيه الايام نطلع للبر

السنه هذى العيد مختلف ماعندنا اى مناسبات من جد المنحوس منحوس الين يموت كل سنه وانا ليله العيد حايسه ودايخه بالشغل واقضى اواخر رمضان والسنه لانى مخلصه بيتى وملابسنا من بدرى مافي عيد خخخخخ
المهم نمت 10 ونص الين 1 طبعا نوم مقطع وقمت روشت ولدى وبناتى وتحممت ولبسنا بجايم العيد وتكشخت وطبعا الالام من الدوره اول مره تجى كذا توجع مره ولبستهم على 5 الا ربع وطلعت رهوفه وجوجو عرايس ملبستهم فستان زواج اخوى ابيض وطبقات ولبستهم تاج وجعدت شعورهم ومن ذكائي نسيت اصورهم خخخخ وولدى لبسته دقله بيج وكاشخ على الاخر اسم الله عليه الله يبلغنى فيهم عريس وعرايس يارب وزوجى كشخ بس عاد مو عريس خخخخ ماابي ازوجه ورحنا للمشهد وطبعا ماعلى صلاه بس انبسطت بالحلاوه والعالم الكاشخه ورجعنا 7 ونص عملنا فطور عصيده وحركات وافطرنا وعلى 9 نمت وقمت 5 واعتقد اننا بالليل يمكن نطلع نتمشى الله العالم وبكره باذن الرحمن بنروح لمكه وجده وزوجى بيسافر الاحد الله يستر عليه يارب

وهذى اخر اخباري

ومن العايدين ومن الفايزين إن شاء الله خخخخخخخ اغنيه محمد عبده الي ماللعيد طعم بدونها
ماقدرت انام قبل العيد واصلت انا وزوجي وصلينا الفجر وعلى 5 وربع لبست ولبست ولدي وطلعت على 6 الا ربع ابي نصلي العيد دام مامعي طفل صغير
رحنا لمسجد ديرتنا وزحمه مره وقال زوجي بنروح مسجد ثاني وكان توه مكبر التكبيره الثانيه ولا لقى مواقف قلت له انزل صل وانا بصلي بالسياره قال لا بشزف المسجد الثالث رحنا والاهم يصلون هنا انا طنقرت وزعلت رايحين بنصلي وهو يمشور بنا الله يهديه:(
رجعنا لمصلى الديره وخلصو مصلين ولاصلينا:( سبحان الله خيره!!! جلسنا نسمع الخطبه بالسياره ونزلت عند جدتي وتعيدت عندها ومشيت بعد صلاه الجمعه
غيرنا ملابسنا ونمنا واخت زوجي حطت شغالتها عندي ولا لي خلقها ابد!!
آخر مره ضاربه ولدي جعلها للضربه :(
وهاوشتها وقلت بقول لمدام تخصم من فلوسك وزعلت!!اابركها ساعه طبعاً ماقلت لأخت زوجي ماله داعي لأنها ماتحط عيالها عندها
الموهيم نمت بعد ماقلت لها ترتب الصاله وغرفه الجلوس وتكنسهم وصحيت على 6 نومي مقطع وحالتي حاله
صحى زوجي و ولدي لبسو وراحو لأهله وانا حطيت ملابس بيضاء بالغساله وتجهزت ورحت اعايد اهل زوجي بعد اذان العشاء وتوني راجعه منهم
دايخه وفيني نووووم مره شطفت الملابس البيضاء وابيها تاخذ ريحه الداوني شوي عشان اجففها وارتاح منها
بكره معزومه عند عمتي في بيتها وكل وحده بتجيب طبق عشاء محتاره مدري وش اسوي ؟؟
ودي اسوي رز مع دجاج صيني ومره اقول لا بسوي لزانيا بس شغلتها شغله وحلاتها حااااااااره بوقتها شكلي بسوي سلطه ورز صيني وبس
ودي اقوم افضي المكنسه الكهرب واغسلها ماحبيت اعطيها الشغاله اخاف ماتعرف لها وتحوسها علي!!
واحس بيتي نظيف مدرري وش اعطيها بكره تسوي؟
وش رايكم بخليها تمسك غرفه الجلوس وسيب الرجال وحمامهوتمسح جدرانهم وتغسل الحماام والمغاسل بالعملاق وتضبطهم
وبعده بخليها تمسح جدران المجلس وموكيته
وبعده بخليها تمسح جدران صاله فوق وغرفه ولدي
وبعده تمسح موكيت الصاله وبكذا يصير بيتي تنظف عميييييق ولله الحمد
سي يو:)

مساء الخير

يومياتى لانى مستعجله
امس رحنا للملاهى وركبت الشوايه الله لايوريكم اول مره اركب بحياتى والفلبينيه تصارخ وانا اصارخ معها وربي خرجت منها كانى صرصور كان في خلاط خخخخخخ وركبت العجله العملاقه ودخت خخخخخ ورهوفه سخنت ياقلبي ونمت 7 وكل شوى اقوم من واحد من عيالى بالدور يبكون وعلى 11 خلاص كويت ملابسنا قفلت شنطنا روشت بناتى ولبستهم كلمت ماما وكان نفسي اقابل صاحبتى جات الطائف بس بسافر منقهره مره المهم والحين ابسافر جده يومين استودعكم الله


سلخير عسا يدها للكسر انا شغالتى كانت رهف تقول انها تقرصها ومااصدق رهف الين شفتها بعينى وجع الله لايحدنا عليهم وياليت تسلفينا هى تغسل وتكوى والله يابنات الكوى ممتلى لانه بالعيد بس لبسوا 4 ملابس خخخخخ يعنى 4 وخمس اشخاص السلات تستغيث الله المستعان


استودعكم الله مع السلامه

السلام عليكم و رحمة الله و بركاته

كل عام و انتم بالف خير

كيفكم

اكتب يومياتي بالعيد


هذا العيد كان من احلى الاعياد اللي مرت عليه

ليلة العيد روشت بناتي و نومتهم و تروشت و سشورت

شعري و نمت يمكن نص ساعه و صحيت صليت و تكشخت

لبست لبس بين الجلابيه و روب الحمل لونه اسود و زيتي

و في تطريز بسيط بالذهبي عند فتحة الصدر و تحت الصدر

و من ورا حزام و حطيت ظل زيتي و ذهبي و روج اورانج

و لبست ذهب ناعم و بنوتاتي لبستهم فساتين زي بعض

حرير ابيض مشجره باخضر و موف و عند الوسط شريطه

ساتان خضرا و طلعنا تقهوينا و فطرنا و رحنا عيدنا على

ناس جنبنا يقربون لزوجي و رجعنا شغلنا مسجل و على

11 رحنا عيدنا على خال زوجي و كانوا مجتمعين عندهم

عياله و زوجاتهم و بعدها مرينا على بنات خالة زوجي

و رجعنا البيت بعد الظهر و نووووووووووووومه لما 6 صحيت

صليت و لبست خرجنا تقهوينا و راحوا الرجال و البزوره

على حفل مسوينه اهل القريه هنا و احنا شغلنا

مسجل و رجعوا على 12 عشيت بناتي و نومتهم

بس بالعافيه ناموا و نمت


و اليوم ما صحينا الا متأخر جابوا غدا من برا تغدينا

و تجهزنا و نزللنا عند اخت زوجي بالعقيق و كانت

عندها خالة زوجي و جات اخت زوجي الثانيه

جلسنا ل 12 و رجعنا البيت و سلامتكم..

السلام عليكم ,,

طبعا ليلة العيد مانمت ولا طب عيني النوم ,,

على اني دايخه وكنت صاحيه من 1 الا ربع الظهر ,,بس ماكتب ربي النومه ,,

المهم يوم اذن الفجر قومت عيالي وروشتهم ,,ولبستهم ,,<<حمودي مالبسته ثوبه الا عقب الصلاة عشان مايتوسخ ’’

صليت الفجر وكنت قبل الاذان قد تروشت,,

وجعدت شعري وعكرشته ببنس ,,ولبست سريع سريع ,,لأني أبي اصلي العيد وزوجي شاب علي يبيني أخلص

عشان نلقى مواقف ,,المهم طلعنا وصلينا ,,

ومريت أهلي سلمت على أبوي وامي ودخلت أضبط شكلي ومكياجي والبس ولدي ثوبه ,,وزوجي سلم على أمي ,,

وطلعنا رحنا لجدة زوجي سلمنا عليها وتقهوينا ,,وطلعنا من عندهم ورحت عيد خالي اللي عنده جدتي المريضه ,,

وكانوا فيه أمي وخواتي ,,وخالتي وبناتها ,,وحريم خوالي ,,ويارب الحمد لله كانت جدتي معنا ,,صح انها طايحه ونايمه ,,واذا قامت تناظر فينا وكأنها ميب حاسه وش اللي حولها ,,

بس يكفي وجودها بيننا ,,الله يرحم حالها ,,ويختار لها الصالح ,,

8 ونص حطوا العيد ,,رز وهريس وجريش ,,

وقبل لا نروح دخلوا خوالي سلموا علينا ,,استانست بشوفتهم ,,الله يحفظهم ,,

رجعنا على 12,,ونمنا الى خمس العصر ,,قمنا وتقهوينا ,,

وكنا ننتظر خالتي أم زوجي وبناتها بيجون من الديره ,,والحمد لله بيتي كان تحفه ,,ولا تعبت قبل لا يجون ,,بس تأخروا ماجو الا 12 ,,

وامس ,,قمت10 وتقهويت انا وزوجي مع خالتي ,,وجاب زوجي غدا ,,وبعد الغداء ,,رحنا لأخو زوجي في ديرتنا ,,<<60 كيلو عن الرياض

تعشينا عندهم ,,ورجعنا 11 ونص ,,وخالتي وبناتها ناموا عنده ,,هالمره قال لها ابيك تجلسين عندي ,,واليوم ان شاء الله بنروح لهم ,,

السلام عليكم و رحمة الله و بركاته


كيفكم


اليوم و امس كانوا ممتعيييييين جدا بالنسبه لي و متعبين

بنفس الوقت بس اللحين ابغى امدد ظهري و اريح شوي



فوفو
ايام عيد و كلا لاهي انتظري السبت يرجعون لك اكيد

صباح الخيـــــر
كيفكم مشتاقه لكم وكل عام وانـتم بخــــــــير
اليوم زارونا أخوات زوجي وأخواني وانبسطنا
واتعشو عندنا طبعاً من برى
رغم شغالة أخوي موجودة ألا أني تعبت وبصراحه أنا تعبت من أول يوم بالعيد
ونصحتني الدكتورة بملازمة السرير بس ماقدرة لآزم أجهز أغراض التقديم بنفسي
وآآآآآآآة ياظهري من الألم الله يستر بس وكمان أتصلت قريبتي واحتمال تمرني بكرة أو بعدة
ماقدرة أعتذر لأنها عارفه أني تعبانه واستحاله أخرج من البيت
دعواتكم لي يابنات وعساكم من عوادة

صبااااااحكم ورد
وكل عاااااااام وحبايبي بالف خير
الفجر رجعت من العمره الحمدلله من بدايه رمضان ادعي ربي يرزقني عمره
وربي استجاب لي اللهم لك الحمد
مشينا لمكه قبل العيد بيومين
تعيدنا بين مكه والطايف
وامس مرينا المدينه يوم ورجعنا للقصيم الفجر
سلااامي لكم وحده وحده ولي رجعه بيومياتي باذن الله

يومياتى السبت رحت لمستشفى الاطفال لان رهوفه مسخنه وطلع عندها التهاب بالحلق ومشينا لجده ورحنا لناس نعايدهم ووصلنا الاستراحه بعد المغرب وتسبحوا عيالى والعيله الكريمه الا انا لان عندىالدوره ولان اخو زوجى موجود بس كان فيه وقت يكون لى دور وابو زوجى عزمنى الف مره قال شوفيه راح برا الاستراحه انزلى معنا طبعا مافي امل انزل وعندى الدوره وتعشينا 11 وكنت مرهقه مره ونمت صحيت 6 ياليل على الازعاج كلهم يبون يتسبحون وانا عصبت واحس حلقي يوجعنى افطرنا ورجعت احاول انوم عيالى وناموا على 10 وعلى 12 سلمنا الاستراحه ورحنا نتغدى مطعم السمك جنان الغداء وودعت زوجى راح على المطار الله يستر عليه واحنا مشينا للبيت ووصلنا 6 المغرب وقمت غسلت الابيض والملون الا ولدى يصارخ بطنى وسخن وكلمت اهل زوجى وجات ام زوجى واخوه معى ورحنا للطوارى طلعت درجه حراراته 38 وعنده التهاب ورجعنا للبيت ونومتهم على 11
وعلى 5 ونص حسيت انى ارتجف وجسمى كانى مدعوسه بسياره وسخنت والتهب حلقي دايخه اخذت مضاد مسكن مافي امل كانى اولد وام زوجى ماقصرت عصرت لى برتقال وليمون وسوت لى عشاء وارسلت الشغاله ترتب الصاله حاسوها عيالى وشطبت لى المطبخ من جد ريحتنى الله يسعدها بس مو قادره اجلس اتحممت 5 مرات ولسه ارتجف وعلى 2 ونص اتصلت على زوجى وانا ابكى قلت مو قادره اجلس وكلم اهله ومن حسن حظى انهم صاحيين نزلت بناتى ينامون تحت واخذت ولدى وام زوجى واخو زوجى ودانا طلعت درجه حراراتى 40 وعندى التهاب شديد بالحلق صديد يقول عندك قدره عجيبه على التحمل خخخخ الالتهاب له فتره وانتى ساكته اعطانى ابره مسكنه واعطانى مضاد في الوريد ومغذيه واللهم لك الحمد خفت الحراراه مره ورجعنا البيت الساعه 6 الفجر ماقصروا اهل زوجى الله يجزاهم بالخير والله ورجعت طلعت بناتى ونومتهم وكلمت زوجى يقول لمن سافرت كلكم مرضتوا خخخخ قلت من الشوق بس والحين مره جيعانه عملت لى نسكافه وساندوش جبن واباخذ المضاد واكمل نومى